Tito 1

1Inyaa, i nyaj i'i Pablo, ayaa nu ti'ivaɨre'e ɨ Dioj jemi. Ajta aɨn ɨ Jesús tɨ ajta i'i Cɨriistu'u, aɨ pu na'antihuau nyej ni neyan tyu'utyavaɨre'en nyaɨjna cɨme'e mej mi eitze'e tya'atzaahuatya'a aɨme ɨ Dioj tɨ hua'antihuau, mej mi majta eitze'e yau'eitaa mua'ara'ani tzaahuati'ira'a cɨme'e. Tɨ pua'a meri yau'eitaa mua'ara'ani tzaahuati'ira'a cɨme'e, aj mu mi rɨ'ɨ titetyújchaɨɨ mua'aju'un maɨjna cɨme'e ɨ ruye'ira. 2Aɨj mu cɨn rachue'eva'a mua'aju'un mej meyan ruuri mua'ara'ani para rusen cɨme'e, a'ini ayaa pu tya'ataujratziiri'i ɨ Dioj jajcua ɨmɨ. Ajta aɨjna ɨ Dioj, capu ti'ihue'itaca. 3Ajta aɨn Dioj, tɨ'ɨj tyaja'ure'enye a'anaj tɨ huaujxa'apɨ'ɨntari'ire, aɨ pu raata'a maj raamua'aree ɨ runyuuca cɨme'e. Aɨj pu cɨn ayan tinaataij aɨjna ɨ Dioj tɨ tu'irajtuaani nyej ni tihua'uta'ixaate'en aɨjna cɨme'e tɨ Dioj tya'ataujratziiri'i. Ee xaa nya'u, aɨj nu cɨn ti'ityejvee ɨ tavastara'a jemi. 4Ayaa nu ti'imuayu'use'e, mɨ pej i'i Tito, mɨ pej pajta niyauj pueenya'a pua'araa tzaahuati'ira'a cɨme'e paɨjna cɨme'e pej peyan che'eta pana'a tya'atzaahuate'e nyatɨj inyaa. Ayaa nu ti'ijxe'eve'e mej meyan muaruuren aɨjna ɨ Dioj ɨ tyaj rajya'upua, ajta aɨn ɨ Cɨriistu'u tɨ ajta i'i Jesús, ɨ tɨ tu'irajtuaani, miche'e rɨ'ɨ timuaachaɨn, miche'e majta muaatyapua'arite'en ɨ a'a tzajta'a. 5Ayaa nu een cɨn muaja'utyajtuaa aujna u Creta ɨ chuej tɨ a'araahuachi ɨ jaj japua pej pi rɨ'ɨ raaruuren ɨ tɨ a'aturaaca'a, pej pi pajta hua'antihuauni a'ij nyej neri timue'ixaa aɨme ɨ mej tye'entyarute vaujsi cɨme'e nain japua matɨj mana'a maj huachaatɨme aujna u Creta. 6Ajta ayaa pu ruxe'eve'e tɨ ayan een aɨjna ɨ a'atɨ tɨ tye'entyarute vasta'a cɨme'e, tɨ cai ti'itɨj cɨn a'aturaa, ajta tɨ seij na'a tyevi'itɨnye'en ɨ jɨita'a. Majta ɨ yaujmua'ame'en aɨjna ɨ a'atɨ, ayaa pu ruxe'eve'e mej tya'atzaahuatya'a, tɨ'i cai a'atɨ aɨjna cɨn hua'a jetze tya'upuá'ajte'en mej a'ij pua'a titetyújcha'ɨ na'ari maj cai ti'itɨj a'astijre'e. 7A'atɨ tɨ ayan vasta'a cɨn ti'ityejvee, aɨ pu xaa ayan antyujmua'aree aɨjna cɨme'e tɨ Dioj jetze ma'acan ti'ivaɨre'e aɨme jemi ɨ tyaɨte. Aɨj pu cɨn ayan ruxe'eve'e tɨ rɨ'ɨ ti'ityujcha'ɨ, tɨ cai ti'itɨj cɨn a'aturaa. Ruxe'eve'e tɨ cai ayan á'ujtzaahuate'e, ajta tɨ cai ca'anacan huatanyu'ucan, ajta tɨ cai rutyahueive'e. Ajta, ayan che'eta na'a ruxe'eve'e tɨ cai ayan runya'usi'ive'e, ajta tɨ cai aɨjna cɨn ruvaɨra'a aɨjna cɨme'e ɨ tumin maj ti'ipue'ivi u teyujta'a, na'ari tɨ ti'inyacua'atze tɨ eihua ti'ijcha'ɨ. 8Ma ajta aɨn, che'e ayen eenya'a a'ara'ani tɨ ruxé'evi'ira'a cɨme'e hua'ancure'evi'itɨn matɨj mana'a pua'amua ramuaaren, tɨ ajta aɨjna jetze ucarutye aɨjna cɨme'e tɨ xa'apɨ'ɨn een. Ajta pu ayan ruxe'eve'e tɨ aɨn rɨ'ɨ metyáumua'aree, tɨ ajta rɨ'ɨ ti'ityujcha'ɨ, tɨ ajta uraré'en ɨ rutzajta'a. Ajta i'i, ayaa pu ruxe'eve'e tɨ ruca'anye ɨ rutzajta'a tɨ ij cai ti'itɨj cɨn autyaturan aɨjna cɨme'e tɨ a'ij pua'a een. 9Ruxe'eve'e tɨ aɨn ajta yau'eitaa tyamua'a naa ɨ nyuucari tɨ ayan ti'ayajna a'ij tyej teri tihua'umuá'ate tɨ ij cai a'anaj yá'uhua'anan. Tɨ pua'a ayan huarɨn, aj pu xaa raayɨ'ɨtɨhua'a a'ame tɨ ij tihua'umua'aten tzaahuati'ira'a cɨme'e a'ij tɨ ayan tiraavijte'e, aɨ pu ajta rayɨ'ɨtɨhua'a a'ame tɨ hua'utyamue'itɨn aɨme ɨ mej saɨque ti'ixaxa'a. 10Ayaa pu ruxe'eve'e a'ini mui'itɨ mu me á'ujhua'an ɨ maj cai ti'itɨj a'astijre'e. Eihua mu tihua'amua'ate maɨjna cɨme'e ɨ nyuucari tɨ cai ti'itɨj vaɨre'e, tɨ ajta tyu'ucuanamua. Aɨme mu jetze ajtyama'acan aɨme ɨ mej ra'antisi'iche ɨ ruhue'ira'a. 11Eecan pu ruxe'eve'e tyej hua'uta'ijmɨ mej mi cai che'e meyan ti'ixajta a'ini eihua mu tihua'antyu'uuni'ira matɨj mana'a pua'amua rutyaɨtestyamua'a seij ɨ a'atɨ, majta meyee. Ayaa mu een cɨn meyan tihua'amua'ate aɨjna cɨme'e ɨ tɨ cai ayan tiraavijte'e mej mi aviitzi cɨn raamue'itɨn ɨ tumin ɨ maj rujɨɨmua'a huataujvaɨre'en. 12Seij tɨ hua'a jetze ajtyama'acan, tɨ nu'u hua'a jetze ma'acan ti'ixaxa'a, ayan tyu'utaxajtaca'a aɨme cɨme'en tɨcɨn: “Naimi'i mu ti'ihue'itaca aɨme ɨ maj Creta huachaatɨme. A'ij mu hui pua'a ti'iruure aɨme ɨ maj hua'ɨna'ase'e. Majta eihua huapɨ'ɨ juxaavaca hasta mana'a cai anajucataxɨ'ɨn.” 13- 14Ee xaa, ayaa pu ti'ayajna a'ij tɨ tiraataxajtaca'a. Aɨj pu cɨn, ayaa pu ruxe'eve'e pej peyan huarɨni. Pata'aj ca'anin cɨn hua'ajtya'axɨ'ɨn mej mi tya'antzaahuate'en huataujnyáatacan cɨme'e a'ij tɨ tiraavijte'e, mej mi cai che'e ranamuajra ɨ nyuucari tɨ cai ti'itɨj vaɨre'e tɨ ajta aɨme jetze huanyej aɨme ɨ maj Israel jetze ajtyama'acan, mej mi cai che'e ranamuajra a'ij mej tihue'ijte'e aɨme ɨ tyetyaca ɨ maj cai raataxe'eve ɨ tɨ ayan ti'ayajna ɨ Dioj jemi. 15Ajta aɨme jemi ɨ mej uraré'en seijre'e ɨ rutzajta'a, ayaa pu tihua'amitejte'e tɨ naimi'i tɨj na'a tɨ Dioj ayan tyu'utaahuaca'a, aɨ pu ti'ivaɨre'e ɨ ruye'ira cɨme'e. Majta, camu a'atzu taura'aca tɨ ti'itɨ hua'utaxana'ave'en tɨ a'ij pua'a een. Ma ajta aɨme jemi ɨ maj a'ij pua'a seijre'e ɨ rutzajta'a, capu ti'itɨ i'ire'en. Eihua mu a'ij pua'a me tityaumuámua'aree. Majta, camu che'e raayɨ'ɨtɨ mej meyan raataxaj yee aɨ pu ayan tiraavijte'e nusu aɨ pu cai ayan tiraavijte'e. 16Ayaa mu ti'ixaxa'a tɨcɨn: “Tyan tu ramua'ate ɨ Dioj”. Ma majta cai, camu ramua'ate a'ini camu meyan rɨcɨ a'ij tɨ ti'ijxe'eve'e ɨ Dioj. Eecan mu tyu'uxana'amɨste'e. Camu ti'itɨ a'astijre'e. Camu majta ti'itɨ cɨn ti'ivaɨre'e ɨ Dioj jemi.

will be added

X\