Romanos 9

1Ayaa nu tzaahuati'ira'a cɨn neyan tyaja'amue'ixaate'e ɨ Cɨriistu'u jemi. Canu ti'ihue'i nyana'a. Ayaa nu á'anxɨjte'en ɨ nyamua'atziira'a cɨme'e nyej ni nyeyan raamua'ati tɨ pua'a ayan tiraavijte'e nusu cai. Ajta aɨn ɨ xaijnyu'ucara'ara'an ɨ Dioj, aɨ pu ajta aɨjna cɨn nyavaɨre'e. 2Eecan nu huatyanxa'amɨste, nyajta a'anaj tɨ na'a neyan rajpueijtzi yu nyatzajta'a. 3Tɨ pua'a rɨ'ɨrístacajche'e, na'araanajchicache'e tɨ Cɨriistu'u ayan ma nuurainijche'e tɨ ij na'antipua'arite'en hua'a jetze ma'acan ɨ nye'ihuaamua'a, aɨme ɨ mej meyan che'eta mana'a airaujneijte nyatɨj inyaa. 4Aɨ mu Israel jetze ajtyama'acan. Ai mu aɨn pueen ɨ tɨ Dioj hua'aya'upuaca'a. Aɨ pu ajta huataseijre hua'a jemi aɨjna tɨ naa seira'a a'araa mej mi meyan raamua'aree tɨ Dioj aun huatyajturaa hua'a jemi. Dioj pu ajta hua'a jemi mui'icaca cɨn tyu'uta'a ɨ runyuuca a'ij tɨ ayan tya'ame'enche'e. Majta aɨme, ayaa mu ra'ancura'a maɨjna ɨ nyuucari ɨ maj cɨn ti'ijta, majta maɨjna ɨ ye'ira a'ij mej ti'ina'amiche. Dioj pu ajta mui'icaca cɨn tya'ataujratziiri'i hua'a jemi. 5Aɨ mu majta hua'a jetze huanyej ɨ tavaujsimua'a jetze. Ajta, hua'a jetze pu ayan airaujneijte aɨjna ɨ Cɨriistu'u tɨ ajta aɨn pueen ɨ Dioj ɨ tɨ nain cɨn antyujmua'aree. Tiche'e teyan rɨ'ɨ tiraata'acare'en tɨj na'a rusen cɨme'e. Che'e ayen tyaja'ure'enyen. 6Canu nyeyan tyaja'amue'ixaate'e tɨ aɨn nyuucari cai ti'itɨ vaɨra'acaa tɨ Dioj ayan tihua'uta'a. Canu xaa nya'u, a'ini aɨme ɨ mej jetzen airaujneijte ɨ taya'upuacɨ'ɨ aɨjna ɨ Israel, camu naimi'i meyan Israel jetze ajtyama'acan. 7Ajta capu ayan huataujmua'a maj naimi'i yaujmua'ame'en pueen aɨjna ɨ Abraham tyaacan tɨ pua'a meyan maɨjna jetze airaujneijte. Camu xaa nya'u. Ma ajta ayan tɨcɨn: “Ayaa pu amiteera'a a'ame. Aɨ mu'u aɨn pueenya'a mua'aju'un ɨ a'ayaujmua'a, aɨme ɨ mej jetzen airanyejsin aɨjna jetze ɨ Isaac.” 8Ayaa pu'u na'a, aɨme ɨ maj Abraham jetze airaujneijte, capu ayaa na'a hua'ucɨ́'ɨ naijmi'ica tɨ Dioj ayan hua'aya'upuaca'a maɨjna cɨme'e maj maɨjna jetze airaujneijte. Ayaa pu ajta tihua'acɨ'ɨti aɨme ɨ maj tya'atzaahuate'e maɨjna tɨ cɨn Dioj tya'ataujratziiri'i. Aɨme pu xaa ayan amiteera'a a'ame maj meyan yaujmua'ame'en pueen aɨjna ɨ Abraham tyaacan. 9Ayaa pu'u, a'ini Dioj pu ayan tya'ataujratziiri'i tɨcɨn: “Ajna tɨ ari ayan tiraaxa'apɨ'ɨntare tɨ ayan tyaja'ure'enyejsin, nyaa nu nyajtahua'a ya uve'enyejsin. Ajta aɨn ɨ Sara, aɨ pu arí tiyauj a'ame.” 10Ajta ɨ tɨ eitze'e ruxe'eve'e, ayaa pu tiraaruu aɨjna ɨ Rebeca. Aɨ pu hua'apuaca tiyaujmua'a a'araa. Ajta saɨj pu'u aɨn pueenya'a ɨ hua'ataata, aɨjna ɨ taya'upuacɨ'ɨ, aɨjna ɨ Isaac. 11- 13Ajta matɨ'ɨj cai xɨ huanunu'eihuaca'a ɨ maj hua'apua, matɨ'ɨj cai xɨ ti'itɨ a'ij huaruurajca'a, tɨ pua'a tɨ xa'apɨ'ɨn een na'ari tɨ a'ij pua'a een, ayaa pu Dioj tiraata'ixaa ɨ hua'anaana tɨcɨn: “Aɨjna tɨ vasta'a, aɨ pu raatyavaɨre'esin aɨjna tɨ pa'arɨ'ɨ.” Ajta ayan tɨcɨn: “Nyaa nu raataxe'eve nyaɨjna ɨ Jacobo. Nyajta rájchaɨra'acaa nyaɨjna ɨ Esaú.” Ayaa pu een cɨn tiraata'ixaa tɨ ij ayan raamua'aree a'ij tɨ rɨcɨ ɨ Dioj tɨ aɨn seij ava'ahuau. Capu ayan aɨjna cɨn ra'ava'ahuau aɨjna cɨme'e tɨ aɨn a'atɨ ti'itɨj cɨn ra'ara'astijre, silu aɨ pu ayan een cɨn ra'ava'ahuau tɨ aɨn Dioj rusaɨj raatajée. 14A'ini teyan tyaɨjna cɨn tyu'utaxajta. ¿Ni qui teyan tyu'utaxajta tɨ cai xa'apɨ'ɨn rɨcɨ ɨ Dioj? Catu xaa nya'u. 15Ayaa pu tiraata'ixaa aɨjna ɨ Moisés tɨcɨn: “Nyaa nu neyan tiraatauuni'ira a'atɨ tɨ na'a tɨ ayan na'araanajchi. Nyajta nu neyan ra'acu'uve a'atɨ tɨ na'a tɨ ayan na'araanajchi.” 16Aɨj pu cɨn, capu ayan ti'ijcɨ'ɨti seij ɨ a'atɨ aɨjna cɨme'e tɨ ayan raxe'eve'e rusaɨj. Capu ajta aɨjna cɨn tɨ ti'itɨj rɨcɨ, silu aɨjna cɨn pu ayan ti'ijcɨ'ɨti tɨ Dioj ayan rá'ancu'uvajxɨ. 17Aɨj pu cɨn Dioj ayan tiraata'ixaa aɨjna ɨ Faraón tɨcɨn: “Ayaa nu nyaɨjna cɨn neyan timuéijca pej te'entyarute paɨjna cɨme'e pej i'i rey, nyej ni hua'utaseijrate'en a'ij nyej huarɨni ɨ nyamuare'eri'ira'a cɨme'e nyej ni pueijtzi muaata'an. Aj mu mi nyeetzi cɨme'en meyan tihua'uta'ixaate'esin a'u tɨ na'a maj huachaatɨme iiyan chaanaca japua.” 18Aɨj pu cɨn Dioj ayan ra'acu'uve a'atɨ tɨ na'a tɨ ayan ra'araanajchi. Ajta pu ayan raata'aca tɨ ayan ra'antyánaamɨn ɨ ruxaijnyu'uca a'atɨ tɨ na'a tɨ ayan ra'araanajchi ɨ Dioj tɨ ij ayan raaruuren. 19Ajta saɨj muan, ayan pu tinaata'ixaate'esin tɨcɨn: “Tɨ pua'a ayan ti'ayajna, ¿a'ini een cɨme'e Dioj ayan auj ta jetze ti'ipua'arite'e? ¿A'ataani rajchaɨre'e ɨ Dioj?” 20Me nyajta inyaa, ayaa nu ti'imue'ihuau tɨcɨn: “¿A'ataani paj pueen pej pi peyan anyuuste'e ɨ Dioj jemi mɨ pej i'i tyaata'a?” Dioj pu muaatyataahuaca'a mueetzi. ¿Ni peyan tiraata'ixaate'esin paɨjna tɨ muaatyataahuaca'a tɨcɨn: “A'ini een cɨme'e peyan naatyataahuaca'a”? Capaj xaa nya'u. 21Niche'e nyajtahua'a seij ti'imue'ihuau nyaɨjna cɨme'e ɨ a'atɨ tɨ xa'ari tí'ita'ahuaca. ¿Ni cai ayan tiraavijte'e tɨ aɨn seica huátaahuan ɨ xa'ari tɨ naa ti'iseijre'e, tɨ ajta huapɨ'ɨ ti'inajchi, ajta seica tɨ cai naa ti'en, tɨ cha'ana'a na'a cɨn ti'ivaɨre'e? Ajta nain, aɨj pu cɨn ayan tí'itaavijhuaca'a seij cɨme'e ɨ xarij. 22¿A'ini pana'a tyu'utaxajta tɨ pua'a Dioj ayan huárɨniiche'e tɨ aɨn cai huatanyu'ucan, ajta ayan ta'utaviicue'iranche'e tyamua'a naa a'ij mej rɨ'ɨ mua'aye'i aɨme ɨ tɨ ayan tiraavijte'e tɨ aɨn Dioj pueijtzi hua'uta'an? Ayaa pu een cɨn rɨni ɨ Dioj tɨ ij ayan amiteera'a tɨ aɨn rumuare'eri'ira'a cɨn pueijtzi hua'uta'asin aɨme ɨ mej a'ij pua'a titetyujcha'ɨ. 23Ajta, ayaa pu ta'utaviicue'iranche'e tɨ ij ajta tiraataseijrata tɨ ayan huapɨ'ɨ rɨ'ɨ tihua'uta'a aɨme ɨ tɨ hua'ancu'uvajxɨ, ɨ tɨ anacai ayan rɨ'ɨ tihua'utyajtuaa tɨ ij ayan tihua'ucɨ'ɨti mej mi ruuri meyan eenye'eque'e huatyaturan ɨ jemin tɨj na'a rusen cɨme'e. 24Ayaa pu xaa nya'u ti'itaruuren ityejmi ɨ tɨ ari taatajée, ityejmi i tyaj Israel jetze ajtyama'acan, ajta aɨme ɨ maj seij chuejra'a japua e'ema'acan. 25Jee xaa nya'u, ayaa pu aɨjna cɨn ti'ixaj ɨ Dioj aɨjna jetze tɨ ayan ra'uteyu'uxaca'a aɨjna ɨ Oseas tyaacan tɨcɨn: Aɨme ɨ maj cai anacai nyeetzi jetze ajtyama'acantaca'a, nu'uri neyan hua'utamua'atzi tɨcɨn maj nyetyaɨtejmua'a pueen. Ajta aɨjna nyaj cai raataxe'eve, ayaa nu nyajta raatámua'atzi tɨcɨn mɨ nyaj muaxe'eve'e. 26Ajta, ayaa pu te'eme ajna a'u maj meyan tihua'uta'ixaa ɨ tyaɨte maj nu'u cai nyetyaɨtestyamua'a pueen, amajna mu meyan hua'utamua'atzi maj nu'u yaujmua'ame'en pueen ɨ Dioj tɨ i'i ruuri. 27Ajta aɨn ɨ Isaías tyaacan, ayaa pu ca'anin cɨn tyu'utaxajtaca'a aɨme cɨme'en ɨ maj Israel jetze ajtyama'acan tɨcɨn: “Capu amɨn a'ij tɨ pua'a meyan mui'icá aɨme ɨ hua'ayaujmua'a aɨme ɨ mej Israel jetze ajtyama'acan. Tɨ pua'a maj meyan a'achu araxca tɨj na'a tɨ seijre'e ɨ sej tɨ aun a'ajca a'u tɨ a'avastɨme ɨ jaj, capu naijmi'ica huiiratuaasin ɨ Dioj, silu aɨme pu'u huiiratuaasin ɨ maj cɨn meyan huatyajturaa. 28Ayaa pu te'eme, a'inica'anacan pu Dioj ayan nain cɨn ra'antipua'arite'esin tɨ pueijtzi hua'uta'asin aɨme ɨ maj yan huachaatɨme ɨ chaanaca japua.” 29Ayaa pu che'eta anacai tira'uteyu'uxaca'a aɨjna ɨ Isaías tɨcɨn: Ayaa tu eenya'a ta'aju'unche'e matɨj aɨme ɨ maj maun a'uchaatɨma'acaa u Sodoma, matɨj majta aɨme ɨ maj aun e'echajca'a u Gomorra, ɨ maj cai che'e e'eseijre'e maujna. Ma ajta aɨn Dioj, ɨ tɨ tihue'ijte'e naijmi'ica ɨ maj aun e'eseijre'e u tajapua, aɨ pu ayan raatyajtuaa ityejmi jemi mej mi meyan huatyaturan aɨme ɨ maj ta jetze airaujneijte. 30Aɨj pu cɨn, ¿a'ini ti'itɨ tetyu'utaxajta? Ayaa pu'u xaa nya'u. Aɨme ɨ maj seij chuejra'a japua e'ema'acan, camu meyan rahuauca'a mej mi meyan urare'enya'acan cɨn huatyaturan ɨ Dioj jemi. Capu amɨn a'ij. Ayaa pu ajta tihua'ucɨ'ɨ maj meyan urare'enya'acan cɨn huatyajturaa ɨ Dioj jemi maɨjna cɨme'e mej tya'antzaahua. 31Ma majta aɨme, ɨ maj Israel jetze ajtyama'acantaca'a, ɨ maj meyan rahuauca'a mej mi urare'enya'acan cɨn huatyaturan ɨ Dioj jemi, maɨjna cɨme'e mej meyan ra'ara'astijre maɨjna ɨ nyuucari ɨ maj cɨn ti'ijta, aɨ mu xaa cai meyan ra'ancura'a maɨjna ɨ maj rahuauca'a. 32- 33¿A'ini een cɨn macai meyan ra'ancura'a? Ayej xaa nya'u, ayaa mu een cɨn huamue'itɨche maɨjna cɨme'e maj rahuauca'a mej mi meyan huarɨni maj ti'itɨj cɨn tya'ara'astijre'en. Camu meyan rahuauca'a maɨjna cɨme'e maj tya'antzaahua. Aɨ mu meyan huamue'itɨche maɨjna cɨme'e maj ratite maɨjna tɨ cɨme'en ayan te'eyu'usi'i tɨcɨn: Casi'i, ayaa nu ratyatuaasin nyaɨjna ɨ a'atɨ nyaujna u Sión. Ayaa pu tinaatyava'ɨri tɨj ɨ tetej ɨ mej jetzen a'ijcá'acatá ɨ tyetyaca, ɨ maj majta jetzen a'itavitze. Ma ajta capu raatatyevi'iraste'esin aɨjna ɨ a'atɨ tɨ ayan rá'atzaahuate'en.

will be added

X\