Romanos 8

1- 2Rumuare'eri'ira'ara'an pu cɨn amue'irajtuaa aɨjna ɨ xaijnyu'ucara'ara'an ɨ Dioj sej si seyan ruuri huatyaturan ɨ jemin aɨjna ɨ Cɨriistu'u, tɨ ajta i'i Jesús. Capu che'e a'anaj tyaja'amueitya'a a'ame aɨjna ɨ muáre'eri'ira'ara'an aɨjna tɨ a'ij pua'a een tɨ ajta jamuata'aca saj huacui'ini. Aɨj pu cɨn, capu che'e Dioj ti'itɨj cɨn muejmi jetze tya'upuá'ajte'esin. 3Ajta aɨn ɨ Dioj, aɨ pu ayan huarɨj a'ij tɨ cai tyu'utarɨ'ɨristaraca'a tɨ ayan huarɨni ityejmi jemi aɨjna ɨ nyuucari ɨ maj cɨn ti'ijta. Capu a'atzu taavaɨra'acaa aɨjna ɨ nyuucari aɨjna cɨme'e tyaj cai tya'ataví'icue'ira'a tyej ra'ara'asten. Aɨj pu cɨn Dioj ayan mu ya'utaityaca'a ɨ ruyauj tɨ ij aɨn ayan che'eta na'a huataseijre'en matɨj aɨme ɨ tyetyaca ɨ mej a'ij pua'a titetyújcha'ɨ ɨ Dioj jemi, tɨ ij ajta aɨn huataujmuaɨ'ɨvejrita aɨme jetze ma'acan ɨ maj cɨn autyajturaa ɨ Dioj jemi. Ayaa pu aɨjna cɨn huarɨj tɨ'ij ayan ra'uxɨ́jte'en tɨ cai che'e ti'itaitya'a a'ara'ani aɨjna tɨ a'ij pua'a een. 4Aɨ pu ayan huarɨj tyej ti tyaɨjna cɨn teyan ra'ara'astijre'en a'ij tɨ tiraavijte'e, a'ij tɨ aɨn ti'ijxe'eve'e aɨjna ɨ nyuucari. Ayaa tu xaa teri teyan ra'ara'astijre a'ini catu che'e teyan ti'ititacha'ɨ tyaɨjna cɨme'e tɨ a'ij pua'a een tɨ huiiraninyei ɨ ta tzajta'a, silu tyej teyan tyaɨjna jetze arátaca'anye tyaɨjna ɨ xaijnyu'ucara'ara'an ɨ Dioj. 5Majta aɨme ɨ mej meyan ti'ityujcha'ɨ maɨjna cɨme'e tɨ a'ij pua'a een tɨ huiiraninyei ɨ hua'a tzajta'a aɨme, ayaa mu maɨjna cɨn ti'imua'atze a'ij tɨ aɨn ca'anijra'a tihua'ata'aca aɨjna tɨ a'ij pua'a een. Majta aɨme ɨ mej maɨjna jetze araujca'anye ɨ xaijnyu'ucara'ara'an ɨ Dioj, ayaa mu maɨjna cɨn rahuahuau a'ij tɨ ti'ijxe'eve'e aɨjna ɨ xaijnyu'ucara'ara'an ɨ Dioj. 6Tɨ pua'a a'atɨ ayan na'a aɨjna jetze ti'imuajca tɨ a'ij pua'a een tɨ huiiraninyei ɨ tzajta'an, ayaa pu ti'ijcɨ'ɨti tɨ huamɨ'ɨni. Ma ajta tɨ pua'a aɨn a'atɨ ayan tyu'utaura'an tɨ ayan ti'ityujcha'ɨ a'ij tɨ aɨn ti'ijxe'eve'e aɨjna ɨ xaijnyu'ucara'ara'an ɨ Dioj, ayaa pu Dioj raatyapua'arite'en ɨ tzajta'an, ajta ayan raata'acare'en tɨ ayan ruurican huatyaturan ɨ jemin. 7Ajta aɨjna ɨ a'atɨ tɨ aɨjna jetze tyu'umua'ati tɨ a'ij pua'a een, aɨ pu rajchaɨre'e ɨ Dioj. Capu taura'aca tɨ aɨn ti'iraiítya'a a'ara'ani aɨjna ɨ nyuucari tɨ Dioj jetze e'iraninyei. Ee xaa nya'u, capu a'atzu a'ij ti'irɨ'ɨri tɨ aɨn a'atɨ ayan ra'ara'asten rusaɨj. 8Ayaa pu'u na'a. Capu a'ij ti'irɨ'ɨri mej rɨ'ɨ tiraata'an ɨ Dioj aɨme ɨ maj mana'a meyan ra'astijre'e maɨjna tɨ a'ij pua'a een tɨ huiiraninyei ɨ hua'a tzajta'a. 9Ma sajta muan, caxu seyan tityataura'acare'en tɨ aɨn ɨ tɨ a'ij pua'a een ayan tyaja'amueitya'a ja'ara'ani, a'ini aɨj pu ari huatyajturaa muejmi jemi aɨjna ɨ xaijnyu'ucara'ara'an ɨ Dioj. Aɨj pu cɨn, aɨ pu tyaja'amueitya'a a'ame. Ajta, tɨ pua'a cai ayan seij jemi huatyajturaa aɨjna ɨ xaijnyu'ucara'ara'an ɨ Cɨriistu'u, aɨjna ɨ a'atɨ capu Cɨriistu'u jetze ajtyama'acan. 10Ajta, tɨ pua'a Cɨriistu'u ayan huatyajturaa ɨ a'amua tzajta'a, ayaa pu ja'amuacɨ'ɨti tɨ aɨn aupua'are ɨ saj ratyáhue'ira'a. A'apua'aren xaa nya'u aɨjna cɨme'e tɨ huiraninyeica'a a'aye'i tɨ a'ij pua'a een ɨ a'amua tzajta'a. Ma ajta, ayaa xu ruuri huatyajturaa ɨ a'amua tzajta'a aɨjna cɨme'e tɨ Dioj ayan amua'uxɨjte sej si seyan urare'enya'acan cɨn huatyaturan ɨ jemin. 11Ajta, tɨ pua'a ayan huatyajturaa muejmi tzajta'a ɨ xaijnyu'ucara'ara'an aɨjna ɨ Dioj tɨ ra'ajjáj aɨjna ɨ Jesús hua'a tzajta'a ɨ mɨ'ɨchite, aɨjna tɨ ra'ajjáj ɨ Cɨriistu'u hua'a tzajta'a ɨ mej meri huacuii, aɨ pu ajta rarujte'en ɨ saj ratyáhue'ira'a aɨjna cɨme'e tɨ aɨn xaijnyu'ucara'ara'an ari seijre'e ɨ a'amua tzajta'a. 12Aɨj pu cɨn, ayan ruxe'eve'e ityejmi jemi tej ti cai che'e teyan ra'astijra'a tyaɨjna tɨ a'ij pua'a een tɨ huiiraninyei ɨ ta tzajta'a. 13- 14Ayaa pu'u na'a, a'ini tɨ pua'a seyan ra'ara'astijre'en saɨjna tɨ a'ij pua'a een tɨ huiiraninyei ɨ a'amua tzajta'a, ayaa pu tyajamuaacɨ'ɨti saj huacui'ini. Ma sajta muan, tɨ pua'a seyan tira'antipua'arite'en saɨjna tɨ a'ij pua'a een tɨ ayan huiiraninyei ɨ a'amua tzajta'a, tɨ pua'a sajta seyan huarɨni saɨjna cɨme'e saj jetzen araujca'anye ɨ xaijnyu'ucara'ara'an ɨ Dioj, ayaa pu tyajamuáacɨ'ɨti sej seyan ruuri huatyaturan ɨ Dioj jemi, a'ini aɨme ɨ mej meyan jetzen araujca'anye ɨ xaijnyu'ucara'ara'an ɨ Dioj, aɨ mu yaujmua'ame'en pueen ɨ Dioj. 15Ajta aɨn ɨ xaijnyu'ucara'ara'an ɨ saj ra'ancura'a, capu ayan tyaja'amueijte'e saj ca'anyejri cɨn tyu'umuare'en, sej si sajtahua'a ratzɨɨnye'e saɨjna tɨ tyaja'amueijte'e. Capu xaa nya'u, silu ai pu'u aɨn pueen ɨ xaijnyu'ucari tɨ ayan a'amuaya'upuajtaca'a. Aɨj tu cɨn teyan ra'anjee ɨ Dioj, tɨcɨn: ��Taata yee, taata.” 16Ajta aɨjna ɨ xaijnyu'ucara'ara'an ɨ Dioj, ajta ɨ tamua'atziira'a, ayaa mu che'eta mana'a ti'ijmua'aree tyaj nu'u teyan yaujmua'ame'en pueen ɨ Dioj, ɨ tɨ ta'iya'upua. 17Ajta, tɨ pua'a teri teyan yaujmua'ame'en pueenye'en ɨ Dioj, ti'itɨ pu aɨjna cɨn ajta ti'itacɨ'ɨti. Ayaa pu ti'itacɨ'ɨti ɨ Dioj jemi tɨj ajta ayan tiraacɨ́'ɨ ɨ Cɨriistu'u. Tɨ pua'a teyan tyajta jamuan Cɨriistu'u rajpueijtzi, tyan tu tyajta jamuan Cɨriistu'u ra'ancura'asin tyaɨjna tɨ rɨ'ɨ huapɨ'ɨ naa seiira'a a'ame tɨj na'a rusen cɨme'e. 18Ayaa pu xaa nya'u tina'amitejte'e inyeetzi. Aɨjna tɨ cai xɨ seijre'e ityejmi jemi, ɨ tɨ huapɨ'ɨ naa seiira'a a'ame tɨ ajta ti'itacɨ'ɨti tɨ'ɨjtahua'a huataseijre'en ɨ tavastara'a, eihua pu jeitze'e huapɨ'ɨ ruxe'eve'e aɨjna cai aɨjna ɨ tyaj cɨn rajpueijtzi iiyan chaanaca japua. 19Ajta, tɨj na'a tɨ ayan ti'iseijre'e tɨ Dioj ayan tyu'utaahuaca'a, aɨ pu ari a'ujca'anyaacan cɨn rachu'eve'e ajna xɨcaara'an tɨ jetzen Dioj hua'utaseijrata aɨme ɨ mej yaujmua'ame'en pueen. 20Ajta nain tɨj na'a aɨjna tɨ ti'iseijre'e, ayaa pu saɨque huaujruu tɨ ij cai ayan eenya'a a'ara'ani a'ij tɨ ti'ijxe'eva'acaa ɨ Dioj. Ma ajta, capu ayan rusaɨj huaujruu silu Dioj pu ruxé'evi'ira'a cɨn ayan raatyajtuaa tɨ ij ayan raajajcuare'en majca'ihuayee. 21Nain tɨ ti'iseijre'e, ayaa pu ti'ijchu'eve'e ajna xɨcaara'an tɨ jetzen Dioj ayan raatyajtuaani tɨ ij cai che'e ayan ca'anyejri cɨn raatyava'ɨrihua'an aɨjna tɨ ra'antipua'arite'esin. Aj pu xaa ayan che'eta na'a huataujseijrata a'ame tɨj na'a ɨ tɨ Dioj raatyataahuaca'a jamuan ɨ maj yaujmua'ame'en pueen ɨ Dioj. Ruxaahua pu cɨn naa seira'a a'ame. 22Ayaa tu ti'ijmua'aree tɨ ayan eenya'a a'aye'i tɨj na'a jajcua jɨmɨ tɨ yu e'ire'enye, tɨ ayan che'eta na'a ti'iseijre'e tɨ taujye'in aɨjna cɨme'e tɨ tyamua'a tirajpueitzi a'aye'i tɨj jɨita'a tɨ pua'a ayan tira'utacui'inye. 23Me tyajta ityan, tyan tu teyan che'eta tyana'a tataye'in a'ini pu'uri seijre'e ityejmi jemi aɨjna ɨ xaijnyu'ucara'ara'an ɨ Dioj, tɨ aɨn pueen ɨ ta'anajca tɨ Dioj ayan cɨn tya'ataujratziiri'i. Ta'ataca'anyaacan tu cɨn teyan rachu'eve'e tɨ ij ayan nain cɨn titáacɨ'ɨti aɨjna cɨme'e tyej yaujmua'ame'en pueen ɨ Dioj, tɨ ij ajta Dioj ayan ru'irajtuaani ɨ tyaj ratyáhue'ira'a. 24Ayaa pu een cɨn Dioj tu'irajtuaa tyej ti teyan raachu'eve'en tyaɨjna ɨ tyaj cai xɨ raseij. Aru, tɨ pua'a teri raaseij ɨ tej rachu'eve'e, capu che'e ruxe'eve'e tyaj rachue'eva'a. ¿Ni cai ayan ti'ayajna tɨ cai ma'a a'atɨ tɨ ayan rachu'eve'e aɨjna tɨ ari raseij? Capu xaa nya'u ma'a a'a ja'atɨ. 25A'ini tu'uri rachu'eve'e tyaɨjna tɨ cai xɨ taacɨ́'ɨ, aɨj pu cɨn ayan tyu'ujxe'eve'e tyej teyan raachu'eve'en tyacai teyan caxaahuata. 26Ajta aɨn xaijnyu'ucara'ara'an ɨ Dioj, aɨ pu tavaɨre'e aɨjna cɨme'e ɨ tyaj rahuavi'iraca ɨ Dioj jemi, a'ini catu a'ij rɨni tyajɨɨmua'a, ni catu a'atzu ramua'aree ti'itɨ tɨ nyuucarijra'a ayan ruxe'eve'e tej ti teyan tyu'utyejnyuuni ɨ jemin. Aɨj pu cɨn aɨ pu ta jetze ma'acan tyenyuusin. Ayaa pu ti'icɨ'ɨxɨ, cumu tɨ cai tyá'anrɨ'ɨre, a'ini capu a'atɨ raayɨ'ɨtɨ tɨ ayan tyu'utaxaj. 27Ajta aɨjna tɨ ayan tiru'umua'aree nain cɨme'e a'ij tyej ti'imua'atze ɨ ta tzajta'a, aɨ pu ajta ramua'aree a'ij tɨ huataujmua'a aɨjna tɨ rahuavii aɨjna ɨ xaijnyu'ucara'ara'an ɨ Dioj a'ini aɨ pu ayan hua'a japua huatanyuusin a'ij tɨ aɨn ayan ti'ijxe'eve'e ɨ Dioj. 28Tyan tu tyajta teyan ramua'aree tɨ Dioj ayan tavaɨre'e tɨ ij nain cɨn ayan te'irajra'ani tɨ i aɨjna cɨn rɨ'ɨ titaata'an ityejmi, i tyaj raxe'eve'e ɨ Dioj. Ajta Dioj pu aɨjna cɨn ayan taatajée tej ti teyan raatyava'ɨrihua'an a'ij tɨ aɨn ari titaaxa'apɨ'ɨntari'iri'i. 29Ajta aɨme ɨ tɨ Dioj jajcua jɨmɨ hua'amuajtyaca'a tɨ ayan hue'irajtuaani, aɨ pu ajta jajcua jɨmɨ hua'antihuau tɨ ij ayan hua'uruuren mej mi meyan che'eta mana'a seira'a mua'ara'ani tɨj aɨjna ɨ yaujra'an. Ajta ayan tiraaxa'apɨ'ɨntare tɨ ij ayan hua'ajá'a pueenya'a a'ara'ani, aɨ pu ajta eitze'e vasta'a pueenya'a a'ara'ani macai ɨ seica ɨ ru'ihuaamua'a ɨ maj mui'i tɨ Dioj hua'aya'upuaca'a. 30Ajta aɨme ɨ tɨ ayan jajcua jɨmɨ hua'antihuau, aɨ pu ajta hua'utajée. Ajta aɨme ɨ tɨ ayan hua'utajée, aɨ pu ajta ayan tihua'uxa'apɨ'ɨntari'iri'i maj nu'u urare'enya'acan cɨn huatyaturan ɨ jemin. Ajta aɨme ɨ tɨ ayan tihua'uxa'apɨ'ɨntari'iri'i, aɨ pu ajta ayan hua'uta'a mej mi nain cɨn meyan che'eta mana'a seiira'a tɨj ajta aɨn seijre'e ɨ yaujra'an tɨj na'a rusen cɨme'e. 31Aɨj pu cɨn, ¿a'ini tetyu'utaxajta? Tɨ pua'a Dioj ayan tajapua nyuuca, ¿ni auj ayan ti'irɨ'ɨri tɨ a'atɨ ayan ta'antipua'arite'en ityejmi? Capu xaa nya'u. 32Capu Dioj ayan tiraatauuni'iri'i ɨ ruyauj tɨ ij cai huamɨ'ɨni ɨ curuu jetze, silu ayaa pu tihua'utatuii ta jetze ma'acan naijmi'ica, tyatɨj tyana'a pua'amua ityan. Aɨj pu cɨn, ayan che'eta na'a ruxé'evi'ira'a cɨn ayan nain taatapueijve'esin, nain tɨj na'a tɨ ti'iseijre'e ɨ Cɨriistu'u jemi. 33¿A'ataani ayan tihuá'axajtzi'iran aɨme tɨ Dioj ayan hua'antihuau? Capu a'atɨ xaa nya'u, a'ini Dioj pu rusaɨj ayan tihua'uxa'apɨ'ɨntari'iri'i mej mi meyan urare'enya'acan cɨn huatyaturan ɨ jemin. 34¿A'ataani ayan ti'ijxa'apɨ'ɨntare'en tɨ ayan pueijtzi taata'an ityejmi? Capu a'atɨ, a'ini saɨj pu'u ta jetze ma'acan nyuu a'ame. Aɨ pu ajta aun e'eseijre'e ɨrɨɨta'an ɨ Dioj. Ai pu aɨn pueen ɨ Cɨriistu'u tɨ huamɨ'ɨ tajetze ma'acan. Ee xaa nya'u, eitze'e pu ayan tiraavijte'e tej teyan raataxaj yee ai pu aɨn pueen tɨ ajta a'itáraa hua'a tzajta'a ɨ mej meri huacuii. 35¿A'ataani ayan te'entyu'uuna ɨ Cɨriistu'u jemi tɨ ij cai che'e ayan taxe'eva'a? ¿Ni qui ayan ti'ijruuren tɨ pua'a ti'itɨ tamuare'eriste'e na'ari tɨ pua'a ti'itɨ ayan ta'ɨtziitya'a? Capu xaa nya'u. ¿Arí tɨ pua'a meyan a'ij pua'a taaruuren nusu tɨ pua'a teyan tajcu? Capu ajta aɨjna. ¿Ari tɨ pua'a tyaj cai a'ij ti'ijviicue'i?, ca'ɨn ¿tɨ pua'a ayan titáacɨ'ɨti tɨ tzɨɨni'ira'a ɨ tyaj tyaɨjna cɨn huacui'ini? Capu xaa nya'u ayan te'entyu'uuna ɨ Cɨriistu'u jemi. ¿Arí tɨ pua'a meyan taacui'ini? Capu ajta xaa nya'u. 36Ayaa pu te'eyu'usi'i tɨcɨn: Tɨj na'a tɨ é'ijninyei ɨ xɨcaj, asta na'a cai u e'etyarute, tɨ'ɨj pɨna'a mu meyan hua'atu'ire'e aɨme mej mi taacui'ini. Ayaa pu tihua'amityejte'e tej teyan che'eta tyana'a ti'ityava'ɨri matɨj aɨme ɨ canya'axɨ ɨ mej hua'acui'ica mej mi meyan raatuaani ɨ hua'ahue'ira'a ɨ canya'axɨ. 37Capu xaa nya'u ayan a'atɨ te'entyu'uuna. Tɨj na'a tɨ ayan ti'itaruure, nain tu cɨn teyan tyu'utyamue'itɨ aɨjna cɨme'e tɨ Cɨriistu'u ayan taataxe'eve tɨ ij ayan huamɨ'ɨni ta jetze ma'acan. 38- 39Ayej xaa nya'u ti'ayajna. Ayaa pu tina'amitejte'e inyeetzi tɨ ayan ti'ayajna tɨ cai ti'itɨ ayan te'entyu'uuna tɨ ij cai che'e ayan titáacɨ'ɨti aɨjna tɨ cɨn Dioj taataxe'eve. Capu amɨn a'ij tɨ pua'a teyan ruuri huatyaturan na'ari tɨ pua'a teyan huacui'ini. Camu majta meyan te'entyu'uuna aɨme ɨ mej tajapua ti'ivaɨre'e ɨ Dioj jemi, na'ari aɨme ɨ mej meyan ti'ivaɨre'e ɨ tiyaaru'u jemi. Ti'itɨ tɨ na'a tɨ a'ij seijre'e, tɨ pua'a auj tyaja'ure'enyejsin na'ari tɨ pua'a ari ayan te'irajraa nusu muáre'eri'ira'ara'an pueen ɨ a'atɨ, capu ajta ayan te'entyu'uuna. Capu amɨn a'ij tɨ pua'a aɨn puéenye'en tɨ tajapua e'eseijre'e na'ari u tajete, ti'itɨ tɨ na'a tɨ ayan seijre'e, capu a'atzu a'ij ti'irɨ'ɨri tɨ ayan te'entyu'uuna ɨ Cɨriistu'u jemi, aɨjna ɨ Jesús tɨ ajta tavastara'a pueen.

will be added

X\