Romanos 7

1Ne'ihuaamua'a, mɨ sej ramua'aree a'ij tɨ tya'axa ɨ yu'uxari jetze ɨ maj cɨn ti'ijta, ayaa nu tyaja'amue'ixaate'e tɨ aɨn nyuucari ayaa na'a ti'iraijte'e ɨ a'atɨ tɨj na'a tɨ auj ruuri. Capu che'e ti'iraitya'a a'ame tɨ'ɨj huamɨ'ɨni. 2Ayaa pu ti'ayajna, tɨ pua'a jɨita'a ayan ari viche'e, ayaa pu ti'iraijte'e aɨjna ɨ nyuucari tɨ nu'u ayan ruxe'eve'e tɨ aɨn jɨita'a ayan huatyaturan jamuan ɨ rucɨn tɨj na'a tɨ auj ruuri. Aru tɨ pua'a aɨn cɨna'ara'an huamɨ'ɨni, capu che'e ayan ti'iraitya'a a'ame. 3Aɨj pu cɨn, tɨ pua'a nu'u seij jamuan huatyeviche'en tɨ pua'a auj ruuri ɨ cɨna'ara'an, ayaa mu tiraatamua'amuatya'a mua'aju'un maɨjna ɨ jɨita'a tɨcɨn tɨ huataujxana'acɨre. Ma ajta tɨ pua'a aɨn cɨna'ara'an ayan huamɨ'ɨni, aɨjna ɨ nyuucari capu che'e ti'iraitya'a a'ame. Ajta camu che'e meyan raatamua'amuatya'a mua'aju'un tɨcɨn tɨ huataujxana'acɨre, tɨ pua'a seij jamuan huatyeviche'en. 4Sajta muan, nye'ihuaamua'a, a'ini Cɨriistu'u pu ayan rajpueijtzi ja'araa ɨ rutevi cɨme'e muejmi jetze ma'acan aɨjna cɨme'e tɨ huamɨ'ɨ ɨ curuu jetze, capu che'e tyajamueitya'a a'ame aɨjna ɨ nyuucari ɨ maj cɨn ti'ijta. Aɨj xu cɨn, muan seij jetze xu ajtyama'acan. Ai pu aɨn pueen aɨjna tɨ Dioj ayan ra'ajjáj hua'a tzajta'a ɨ mɨ'ɨchite sej si seyan raatatuiire'en ɨ Dioj jemi satɨj sana'a saj saɨjna cɨn huarɨj tɨ i'ixa'apɨ'ɨn. 5Ayaa pu'u xaa nya'u titaaruu tɨ'ɨj ayan ti'itaijtya'acaa aɨjna cɨme'e tɨ a'ij pua'a een. Aɨjna ɨ nyuucari ɨ maj cɨn ti'ijta, aɨ pu ca'anijra'a raata'a aɨjna tɨ a'ij pua'a een tɨ huiiraninyei ɨ ta tzajta'a. Ajta aɨn tɨ a'ij pua'a een, ayaa pu ti'imuara'acaa ɨ ta tzajta'a, tyatɨj tyana'a ve'e ɨ ta jetze, tyej ti teyan raamue'itɨn tyaj huacui'ini. 6Ajta ijii, capu che'e ti'itaitya'a a'ame aɨjna ɨ nyuucari ɨ maj cɨn ti'ijta, a'ini Cɨriistu'u pu huamɨ'ɨ ta jetze ma'acan. Aɨ pu aɨjna jetze taatyajtuaa tyej ti jajcuacan cɨn ti'ityava'ɨrihua'an tyaɨjna cɨme'e ɨ ye'ira tɨ aɨjna jetze ma'acan ɨ xaijnyu'ucara'ara'an ɨ Dioj, tyej ti cai che'e teyan ti'ityava'ɨrihua'an ɨ ye'ira cɨme'e tɨ mi'ima'acan, tɨ ajta te'eyu'usi'ihuaca'a. 7¿A'ini huataujmua'a aɨjna? ¿Ni ayan huataujmua'a, tɨ aɨn nyuucari ɨ maj cɨn ti'ijta, ni cai aɨn pueen ɨ tɨ a'ij pua'a een? Capu xaa nya'u, a'ini canu neyan ramua'areeranche'e ti'itɨ tɨ pɨrɨcɨ tɨ a'ij pua'a een tɨ pua'a cai huatyaturanche'e ityejmi jemi aɨjna ɨ nyuucari ɨ maj cɨn ti'ijta. Tɨ pua'a cai ayan tinaata'ixáate'enche'e aɨjna ɨ nyuucari tɨcɨn: “Capej ti'inyacua'atze”, canu a'anaj ramua'areeranche'e tɨ ayan a'ij pua'a een tɨ pua'a neyan ti'inyacua'atze. 8Ajta aɨjna tɨ a'ij pua'a een tɨ huiiraninyei yu nyatzajta'a, aɨ pu ayan ti'ihuaujxe'eviste inyeetzi jetze nyej ni eihua huapɨ'ɨ ti'inyacua'atze aɨjna cɨme'e tɨ aɨn nyuucari ayan tinaamua'ate a'ij tɨ huataujmua'a aɨjna ɨ nyuucari tɨ cɨme'en yee capej ti'inyacua'atze. Ayaa pu'u, a'ini tɨ pua'a cai ayan seijra'a ɨ nyuucari ɨ maj cɨn ti'ijta, capu rɨ'ɨri tej teyan raamua'areera ti'itɨ tɨ pɨrɨcɨ tɨ a'ij pua'a een. 9Ajta jajcua ɨmɨ nu neyan nyaxaahua á'ucha'acanya'a; canu ti'itɨ ti'imua'areeraca'a. Capu ti'inyeijtya'acaa aɨjna ɨ nyuucari ɨ maj cɨn ti'ijta. Aj nu ni neyan ra'utamua'areeri'i nyaɨjna ɨ nyuucari. Nyatɨ'ɨj ni neyan tiraamua'areeri'i tɨj na'a ɨ nyaj cɨn autyajturaa nyaɨjna jemi ɨ nyuucari. Canu che'e rɨ'ɨ me tya'ucha'acanya'a. 10Ajta, ayaa pu tina'amitejtya'acaa tɨ ayan tyu'urɨj. Aɨjna ɨ nyuucari tɨ cɨn Dioj ayan tiraaxa'apɨ'ɨntare tɨ nu'u cɨn rɨ'ɨ titaata'acare'enche'e, capu ayan rɨ'ɨ titaatá'a tzɨte'e, silu ayaa pu'u na'uxɨjte nyej ni neyan huamɨ'ɨni nyaɨjna cɨme'e nyaj cai ra'ara'aste nyaɨjna ɨ nyuucari. 11Ayaa pu aɨjna cɨn tye'irájraa. Aɨjna tɨ a'ij pua'a een, ayaa pu ti'ihuaujxe'eviste inyeetzi jetze aɨjna cɨme'e tɨ aɨn nyuucari ayan tyu'utaxajtaca'a ti'itɨ tɨ pɨrɨcɨ tɨ a'ij pua'a een. Ajta e'eyan, aɨn tɨ a'ij pua'a een ayan naacuanamua nyej ni cai neyan ra'ara'asten nyaɨjna ɨ nyuucari. Ayaa pu aɨjna cɨn huarɨj, aɨ pu ɨ nyuucari ayan nya'uxɨjte nyej ni huamɨ'ɨni aɨjna cɨme'e nyaj cai ra'ara'astijre. 12Aɨj pu cɨn, capu ti'itɨj ra'aturaate'e aɨjna ɨ nyuucari ɨ maj cɨn ti'ijta. Ajta aɨjna tɨ cɨn ayan tihueijte'e, capu ajta ti'itɨ ra'aturaate'e. Ayaa pu een cɨn ti'ijta a'ij tɨ tiraavijte'e, ajta nain pu cɨn i'i xa'apɨ'ɨn. 13¿Ni qui ayan huataujmua'a tɨ aɨjna tɨ i'i xa'apɨ'ɨn ayan na'uxɨjte nyej ni nyeyan huamɨ'ɨni? Capu xaa nya'u a'atzu. Ma ajta, ayaa pu ruxe'eva'acaa tyej teyan tiraatamua'ati ti'itɨ tɨ pɨrɨcɨ tɨ a'ij pua'a een, tyej ti teyan raamua'aree tɨ aɨn pɨrɨcɨ aɨjna tɨ xaa a'ij pua'a een ɨ Dioj jemi. Aɨj pu cɨn aɨjna tɨ a'ij pua'a een ayan ti'ihuaujxe'eviste inyeetzi jetze, tɨ i aɨn tɨ i'i xa'apɨ'ɨn, ayan na'uxɨjte'en nyej ni nyaɨjna cɨn huamɨ'ɨni, nyaj cai ra'aste nyaɨjna ɨ nyuucari, tɨ ij ajta ayan seira'a a'ara'ani tɨ eihua huapɨ'ɨ a'ij pua'a seijre'e ɨ Dioj jemi aɨjna ɨ ti'itɨ tɨ aɨn nyuucari raata'ijmɨ. 14Ayaa tu ramua'aree tɨ aɨn nyuucari aɨjna jetze ma'acan ɨ xaijnyu'ucara'ara'an ɨ Dioj. Me nyajta inyaa, i nyaj cɨn ratyáhue'ira'a, nyaa nu nyajta ti'ivaɨre'e nain cɨme'e nyaɨjna tɨ a'ij pua'a een. 15Ayaa pu'u, canu yau'eite a'ij nyej een cɨn neyan ti'itincha'ɨ. A'ini ɨ ti'itɨ ɨ nyaj neyan raxe'eve'e nyaj cɨn neyan huarɨni, canu xaa nya'u neyan rɨcɨ. Ajta, aɨjna tɨ cai a'atzu na'araanajchi, ayaa nu nyaɨjna cɨn rɨcɨ. 16Ayaa pu'u, tɨ pua'a neyan rɨcɨ nyaɨjna cɨme'e tɨ cai a'atzu na'araanajchi, aj nu xaa nyaɨjna cɨn neyan tyu'utaxaj yee aɨ pu nu'u i'i xa'apɨ'ɨn aɨjna ɨ nyuucari ɨ maj cɨn ti'ijta. 17Aɨj pu cɨn, ayaa na'a een. Canu che'e nyaɨn pueen ɨ nyej nyasaɨj neyan rɨcɨ, silu aɨ pu aɨn pueen ɨ tɨ a'ij pua'a een tɨ tasiseiri yu nyatzajta'a. 18Ayaa nu ramua'aree tɨ yu nyatzajta'a aɨjna jetze ɨ nyaj ratyáhue'ira'a, capu ti'itɨ ú'useijre'e tɨ xa'apɨ'ɨn een. Nyaa nu xaa neyan a'anca'anye nyej neyan huarɨni nyaɨjna cɨme'e tɨ i'i xa'apɨ'ɨn. Me nyajta inyaa, capu rɨ'ɨri nyej neyan rɨjca. 19Ma ajta, ɨ nyaj cɨn neyan rɨcɨ, capu aɨn pueen ɨ tɨ i'i xa'apɨ'ɨn tɨ ajta na'araanajchi nyej neyan huarɨni. Ca pu xaa nya'u. Ajta, aɨjna tɨ a'ij pua'a een, tɨ ajta cai a'atzu na'araanajchi nyej neyan rɨjca, nyauche'e nu nyaɨjna cɨn neyan rɨcɨ. 20Aɨj pu cɨn, tɨ pua'a neyan nyaɨjna cɨn rɨjca a'ij tɨ cai tina'araanajchi, canu che'e nyaɨn pueen inyaa, i nyaj neyan rɨcɨ, silu aɨjna tɨ a'ij pua'a een tɨ ú'useijre'e yu nyatzajta'a, aɨ pu xaa aɨn pueen ɨ tɨ aɨjna cɨn ayan rɨcɨ. 21Aɨj pu cɨn, ayaa pu tina'amitejte'e tɨ ayan ti'inyaruure. Nyatɨj nyana'a nyaj neyan nyaɨjna cɨn á'anca'anye nyej neyan huarɨni ɨ tɨ i'i xa'apɨ'ɨn cɨme'e, aɨ pu ajta nyeetzi jemi seijre'e aɨjna tɨ a'ij pua'a een. 22Ee xaa nya'u, nyaxaijnyu'uca nu cɨn neyan ti'ijxe'eve'e nyej neyan ra'ara'astijre'en tɨj na'a tɨ taatyajtuaa ɨ Dioj. 23Ayaa pu ajta tina'amitejte'e tɨ ayan ti'inyaruure nyatɨj nyana'a ti'ityejve'e ɨ nyejetze. Aɨ pu nya'use'e aɨjna tɨ a'ij pua'a een aɨjna jamuan ɨ tɨ ti'ijta yu nyaxaijnyu'uca jetze. Aɨ pu ajta na'antimue'itɨ nyej ni ca'anyejri cɨn raatyava'ɨrihua'an nyaɨjna tɨ a'ij pua'a een tɨ ayan ti'ijta yu nyej jetze nyatɨj nyana'a ti'ityejve'e. 24Cui'ixaa inyeetzi. ¿A'ataani ayan nu'iratuaasin aɨjna jetze i nyaj ratyáhue'ira'a tɨ i cai ayan ti'inyacɨ'ɨti nyej neyan huamɨ'ɨni? 25Ee xaa nya'u, eecan nu huapɨ'ɨ rɨ'ɨ tirata'aca ɨ Dioj nyaɨjna cɨme'e a'ij tɨ huarɨj ta jetze ma'acan aɨjna ɨ Jesús, ɨ Cɨriistu'u tɨ ajta tavastara'a pueen. Me nyajta inyaa, nyaxaijnyu'uca nu cɨn ratyava'ɨri a'ij tɨ titaatyajtuaa aɨjna ɨ Dioj. Nyatɨj nyana'a ti'ityejve'e yu nye jetze, ayaa nu nyajta ratyava'ɨri a'ij tɨ tí'inyeijte'e aɨjna tɨ a'ij pua'a een.

will be added

X\