Romanos 6

1¿A'ini huataujmua'a ɨ nyej neri jamue'ixaa? ¿Ni qui tyaj tyauj autya'ɨtza'ara'an ɨ Dioj jemi tɨ ij eitze'e Dioj rɨ'ɨ titaata'an? 2Catu xaa nya'u. ¿A'ini ti'irɨ'ɨri tej teyan tyauj títya'utya'ɨtza'ara'an ɨ Dioj jemi, a'ini catu che'e ra'astijre'e tyaɨjna tɨ a'ij pua'a een? Capu xaa nya'u che'e a'ij ti'irɨ'ɨri tyaj ra'ara'asten ɨ tɨ a'ij pua'a een. 3Ma sajta muan, xu'uri seyan ramua'aree saɨjna, tyatɨ'ɨj huamuaɨ'ɨvijhuaca'a tyaɨjna cɨme'e tyej teri ra'astijre'e tyaɨjna ɨ Cɨriistu'u, tɨ ajta i'i Jesús, tyan tu tyajta tyaɨjna jetze ajtyama'acantaca'a tɨ'ij aɨn huamɨ'ɨ. 4Tyatɨ'ɨj huamua'ɨvijhuaca'a, ayaa pu ajta titaaruu maj ta'ava'ana aɨjna jamuan ɨ tɨ huamɨ'ɨ, tej ti teyan che'eta tyana'a jajcuacan cɨn ruuri ta'ara'ani a'ij tɨ ajta tiraaruu aɨjna ɨ Cɨriistu'u. Dioj pu ayan ra'ajjáj hua'a tzajta'a ɨ mɨ'ɨchite aɨjna cɨme'e tɨ muáre'eri'ira'ara'an huataseijre. 5Tɨ pua'a teyan tyaɨjna jetze ajtyama'acantaca'a tɨ'ɨj aɨn huamɨ'ɨ, ayaa pu ti'ayajna tyaj tyajta jetzen ajtyama'acanta ta'aju'un tyaɨjna tɨ'ɨj Dioj ayan ra'ajjáj hua'a tzajta'a ɨ mɨ'ɨchite. 6Ayaa pu'u, ayaa pu tita'amitejte'e, tɨ aɨn tɨ a'ij pua'a een, ɨ tyaj cɨn a'ij pua'a ti'itítachaɨca'a, Dioj pu ajta ra'uxɨjte jamuan ɨ Cɨriistu'u matɨ'ɨj rá'utatai ɨ Curuu jetze, tɨ ij ayan antipua'are aɨjna tɨ a'ij pua'a een ɨ tyaj cɨn a'ij pua'a ti'itítachaɨca'a tɨ ij cai che'e ca'anijra'a tyajamuaataijte'en aɨjna tɨ a'ij pua'a een. 7Tɨ pua'a a'atɨ arí huamɨ'ɨni, capu che'e rɨ'ɨrista a'ame tɨ aɨn ɨ tɨ a'ij pua'a een ayan tiraataijte'en. 8Me tyajta ityan, ayaa pu tita'amitejte'e tɨ ayan ti'ayajna. Tɨ pua'a ityan Cɨriistu'u jetze ajtyama'acan aɨjna cɨme'e tɨ huamɨ'ɨ, tyan tu tyajtahua'a ruuri ta'aju'un tyaɨjna jamuan. 9Ayej xaa nya'u ti'ayajna, a'ini Dioj pu ari ra'ajjáj aɨjna ɨ Cɨriistu'u hua'a tzajta'a ɨ mɨ'ɨchite, aɨj pu cɨn, capu che'e rɨ'ɨri tɨ Cɨriistu'u ajtahua'a huamɨ'ɨni. Capu che'e rɨ'ɨri tɨ ra'antimue'itɨn aɨjna ɨ muáre'eri'ira'ara'an ɨ maj cɨn huacui'ini. 10Tɨ'ɨj aɨn huamɨ'ɨ, ayaa pu een cɨn huamɨ'ɨ tɨ ij ra'upua'arite'en aɨjna tɨ a'ij pua'a een ɨ maj cɨn a'ij pua'a titetyújchaɨca'a. Ajta ijii, tɨ Cɨriistu'u ajtahua'a i'iruuri, aɨ pu ayan aɨjna cɨn ruuri tɨ ij rɨ'ɨ tiraata'an ɨ Dioj. 11Che'e ayan che'eta na'a tyajamua'amityejtya'a sej seri huacuii sej si cai che'e seyan raatyava'ɨrihua'an saɨjna tɨ a'ij pua'a een. Che'e ajta ayan tyajamua'amityejtya'a sej ruurican huatyajturaa ɨ Dioj jemi aɨjna cɨme'e sej seri saɨjna jetze ajtyama'acan ɨ Cɨriistu'u tɨ ajta i'i Jesús. 12Aɨj pu cɨn, caxu seyan rata'acare'en tɨ aɨn ɨ tɨ a'ij pua'a een ayan tyaja'amue'ijtya'a ɨ a'amua tzajta'a. Caxu sajta ra'astijra'a aɨjna tɨ a'ij pua'a een tɨ huiiraninyei ɨ a'amua tzajta'a. 13Caxu sajta ratuiira'a tɨj na'a tɨ seijre'e ɨ a'amuajetze saɨjna jemi ɨ tɨ a'ij pua'a een sej si seyan ratyava'ɨrihua'an, silu sata'aj seyan huataujtuiire'en ɨ Dioj jemi saɨjna cɨme'e tɨ ayan tyajamua'amitejte'e tɨ aɨn ari amue'irajtuaa hua'a tzajta'a aɨme ɨ mej meri huacuii. Sata'aj seyan tiraatatuire'en tɨj na'a tɨ seijre'e a'amuajetze sej si seyan saɨjna cɨn raatyava'ɨrihua'an ti'itɨj cɨme'e tɨ xa'apɨ'ɨn een. 14Tɨ pua'a seyan huarɨni, capu a'anaj tyajamuaataijte'esin aɨjna tɨ a'ij pua'a een, a'ini xu'uri seyan saɨjna jetze araujca'anye tɨ Dioj ruxé'evi'ira'a cɨn rɨ'ɨ tyajamuata'aca. Caxu che'e seyan ca'anyejri cɨn ra'astijra'a saɨjna ɨ nyuucari ɨ maj cɨn ti'ijta. 15¿A'ini tyajamua'amitejte'e muejmi? ¿Ni qui teyan tyauj a'ij pua'a ti'itítacháɨ ta'ara'ani tyaɨjna cɨme'e tɨ Dioj ruxé'evi'ira'a cɨn rɨ'ɨ titaata'aca, tyajta cai che'e ra'astijra'a tyaɨjna ɨ nyuucari ɨ maj cɨn ti'ijta? Catu xaa nya'u a'atzu. 16Muan xu seyan ramua'aree tɨ pua'a seyan huataujtuiire'en a'atɨ jemi sej si ca'anyejri cɨn ra'ara'astijre'en, muan xu ca'anyejri cɨn raatyava'ɨriha'a sa'aju'un, xaa nya'u. Capu amɨn a'ij tɨ pua'a seyan tiraatyava'ɨrihua'an saɨjna tɨ a'ij pua'a een, tɨ ajta ayan amuaata'asin saj huacui'ini, na'ari tɨ pua'a seyan sana'a tiraatyava'ɨrihua'an saɨjna tɨ xa'apɨ'ɨn een sej si seyan ruuri huatyaturan ɨ Dioj jemi. 17Ajna'ɨmɨ xu xaa seyan ca'anyejri cɨn raatyavaɨ saɨjna tɨ a'ij pua'a een. Arú ijii, ayaa nu een cɨn rɨ'ɨ tirata'aca ɨ Dioj nyaɨjna cɨme'e saj a'ujca'anyaacan cɨn ra'ara'astijre'e saɨjna ɨ nyuucari ɨ maj cɨn tyajamuaamuá'ate, ɨ saj sajta ra'ancura'a. 18Dioj pu amue'irajtuaa sej si cai che'e ca'anyejri cɨn raatyava'ɨrihua'an saɨjna tɨ a'ij pua'a een. Ma ajta, ayaa pu amuaaruu sej si ca'anyejri cɨn raatyavaɨre'en saɨjna tɨ xa'apɨ'ɨn een aɨjna jemi ɨ Dioj. 19Ayaa nu nyaɨjna cɨn a'ahuauritaacan cɨn tyaja'amue'ixaate'e a'ij tɨ tihua'aruurajcaa hua'a tzajta'a ɨ tyaɨte a'ini ayaa pu tyajamua'aturaate'e saj cai nain jau'eite. Ayaa xu sejmi'i tyu'ujtuiira'acaa satɨj sana'a saj ratyáhue'ira'a sej si seyan raatyava'ɨrihua'an ɨ saj cɨn huataujxana'acɨre'en, sej si sajta seyan huarɨni tɨj na'a tɨ cai xa'apɨ'ɨn een ɨ Dioj jemi. Aɨj pu cɨn, ayaa pu ruxe'eve'e sej seyan che'eta sana'a huataujtuiiren nain cɨme'e satɨj sana'a saj ratyáhue'ira'a sej si seyan raatyava'ɨrihua'an ɨ tɨ xa'apɨ'ɨn een sej si seyan urare'enya'acan cɨn huatyaturan ɨ Dioj jemi. 20Satɨ'ɨj sauj raatyava'ɨrihua'a saɨjna tɨ a'ij pua'a een, capu a'amua jetze ruxe'eva'acaa sej seyan ra'ara'astijre'en saɨjna tɨ xa'apɨ'ɨn een ɨ Dioj jemi. 21¿Ti'itajni cɨn a'ij tyajamuaatyavaɨ ajna'ɨmɨ aɨjna, tɨj na'a tɨ ari já'amuatyevi'iraste'e? Capu sein ti'itɨ, a'ini tɨj na'a tɨ ayan a'ij pua'a een, ayaa pu hua'atyava'ɨrihua'a mej mi maɨjna cɨn huacui'ini. 22Ma ajta ijii, tɨ'ɨj Dioj amue'irajtuaa sej si cai che'e raatyava'ɨrihua'an aɨjna ɨ tɨ a'ij pua'a een, ayaa xu seri ca'anyejri cɨn raatyava'ɨri saɨjna ɨ Dioj. Ajta, ayaa pu tyajamuaacɨ'ɨti sej seyan urare'enya'acan cɨn huatyaturan ɨ Dioj jemi, sej si seyan seira'a xa'ara'ani ɨ jemin tɨj na'a rusen cɨme'e. 23Ayaa pu'u xaa nya'u ti'ayajna. Ayaa pu raamue'itɨn ɨ a'atɨ tɨ huamɨ'ɨni tɨ pua'a ayan raatyavaɨre'e aɨjna tɨ a'ij pua'a een. Ajta, ayaa pu een cɨn Dioj rɨ'ɨ titaatá'a ruxé'evi'ira'a cɨme'e tej ti teyan ruuri huatyaturan ɨ jemin, aɨjna cɨme'e tyej tyaɨjna jetze ajtyama'acan tyaɨjna ɨ Cɨriistu'u tɨ ajta i'i Jesús, ɨ tavastara'a.

will be added

X\