Romanos 5

1Ayaa pu ti'ayajna. Tu'uri urare'enya'acan cɨn huatyajturaa ɨ Dioj jemi aɨjna cɨme'e ɨ tyej tya'atzaahuate'e. Ajta aɨn ɨ tavastara'a, aɨjna Jesús tɨ ajta i'i Cɨriistu'u, aɨ pu ayan taatyapua'ari ɨ Dioj jemi. 2Pu'uri xaa nya'u rɨ'ɨri tyej teyan huataseijre'en jemin tɨ ij ijii aɨ rɨ'ɨ titaata'an. Ayaa tu eenye'eque'e seijre'e tɨ aɨ rɨ'ɨ titaatá'a. Tyajta teyan tyaɨjna cɨn tatyamua'ave'e tyaɨjna cɨme'e tyej tyauj rachu'eve'e ajna xɨcaara'an ɨ tyaj jetzen seijra'a ta'ara'ani tyaɨjna jamuan ɨ Dioj tɨ ayan rɨ'ɨ huapɨ'ɨ naa seijre'e mej mi maɨjna cɨn rɨ'ɨ naa tira'utaseij ɨ tyaɨte. 3Capu aɨ na'a, silu tyajta tyaɨjna cɨn teyan tatyamua'ave'e tyaɨjna cɨme'e ɨ tyaj cɨn rajpueijtzi, a'ini ayaa tu ti'ijmua'aree tyej teyan raayɨ'ɨtɨ tyaj tya'utaviicue'i tyaɨjna cɨme'e tyej ti'itɨ cɨn tirajpueijtzica'a. 4Ajta, tɨ pua'a teyan raayɨ'ɨtɨ tyej teyan tya'utaviicue'i, tyajta tu teri tyu'utyaamue'itɨ ɨ Dioj jemi. Tɨ pua'a tyajta teyan tyu'utyamue'itɨn, aj pu xaa ayan í'irɨni tyej teyan raachu'eve'en tyej ti tyaun a'utyaturan ɨ Dioj jemi. 5Capu a'anaj taatatyevi'iraste'esin tyej teyan raachu'eve'en a'ini eihua pu ca'anijra'a taata'a ɨ Dioj ɨ tatzajta'a aɨjna cɨme'e tyaj jetzen arátaca'anye aɨjna ɨ xaijnyu'ucara'ara'an ɨ Dioj. Ajta Dioj ayan tiya'utaityaca'a ɨ ruxaijnyu'uca tɨ'i tyejmi jemi huatyaturan. 6Tyauche'e tu cai a'ij té'eviicue'iracaa tɨ'ɨj ajna tyaja'ure'enye ajna xɨcaara'an tɨ jetzen Dioj ayan tiraaxa'apɨ'ɨntare tɨ aɨn Cɨriistu'u hua'a jetze ma'acan huamɨ'ɨni ɨ tyaɨtye ɨ maj cɨn autyajturaa ɨ Dioj jemi. 7A'anácɨmɨ pu ayan ti'irɨni tɨ a'atɨ ayan huataura'an tɨ huamɨ'ɨni seij jetze ma'acan tɨ rɨ'ɨ ti'itevij. Ee xaa nya'u, camu mui'i ɨ mej meyan huataura'an mej mi seij jetzen ma'acan huacui'ini, capu amɨn a'ij tɨ pua'a aɨn a'atɨ eecan huapɨ'ɨ rɨ'ɨ ti'itevij. 8Ma ajta Dioj, ayaa pu een cɨn titaataseijrate tɨ aɨn huapɨ'ɨ taxe'eve'e aɨjna cɨme'e tyatɨ'ɨj tyauj a'aturaacara'a ɨ jemin, Cɨriistu'u pu xaa tajetze ma'acan huamɨ'ɨ. 9Ayaa pu'u een cɨn huamɨ'ɨ tej ti teyan urare'enya'acan cɨn huatyaturan ɨ Dioj jemi. Aɨj pu cɨn ayan huarɨn, ayej xaa nya'u ti'ayajna tɨ'i aɨn tajapua huanyuuni tɨ ij cai taacɨ'ɨti ɨ pueijtzi tɨ ayan tyaja'ure'enyejsin. 10Ayaa pu ti'ayajna, a'ini tyatɨ'ɨj tyauj rajchaɨra'acaa tyaɨjna ɨ Dioj, aɨ pu ayan rɨ'ɨ taaruu tej ti teyan rɨ'ɨ titeetyaturan ɨ jemin aɨjna cɨme'e tɨ aɨn yaujra'an tajetze ma'acan huamɨ'ɨ. Ijii, a'ini aɨ pu ayan rɨ'ɨ taaruu tej ti rɨ'ɨ titeetyaturan ɨ Dioj jemi, ¿ni cai ayan ti'ayajna tɨ aɨn tu'irajtuaani aɨjna cɨme'e tɨ ajtahua'a i'iruuri? Ee xaa nya'u ayaa pu ti'ayajna. 11Capu aɨ na'a, silu tyajta tu teyan tatyamua'ave'e jemin ɨ Dioj tyaɨjna cɨme'e tɨ aɨn tavastara'a, aɨjna ɨ Jesús tɨ ajta i'i Cɨriistu'u, aɨ pu ayan rɨ'ɨ titaaruu tyej ti teyan rɨ'ɨ titeetyaturan ɨ Dioj jemi. 12Ayaa pu ti'ayajna, tɨ aɨjna tɨ a'ij pua'a een ayan huataseijre iiyan chaanaca japua aɨjna cɨme'e tɨ saɨj na'a ayan autyajturaa ɨ Dioj jemi. Ajta aɨjna cɨme'e tɨ aɨjna ɨ seij ayan autyajturaa, aj pu'i ajta yan tyaja'ure'enye tɨ huamɨ'ɨ aɨjna ɨ a'atɨ. A'ini naimi'i mu meyan e'iraanyej maɨjna jetze ɨ tevi, ayaa pu ajta tihua'ucɨ'ɨ mej mi majta huacuii a'ini naimi'i mu majta meyan autyajturaa ɨ Dioj jemi. 13Ee xaa, tɨ'ɨj cai xɨ huatyatuiihuaca'a ɨ nyuucari ɨ maj cɨn ti'ijta, mu'uri meyan a'aturaaca'a ɨ tyaɨte ɨ Dioj jemi. Ma ajta, tɨ pua'a cai seijra'a ɨ nyuucari ɨ maj cɨn ti'ijta, capu ajta xaa rɨ'ɨrista a'ame tɨ a'atɨ ayan ra'uxɨ́jte'en ɨ saɨj ti'itɨj cɨme'e ɨ tɨ cɨn autyajturaa. 14Ma ajta, tɨj na'a tɨ Dioj raatyataahuaca'a aɨjna ɨ Adán asta na'a cai huataseijre aɨjna ɨ Moisés, naimi'i mu huacuii ɨ tyaɨte. Capu amɨn a'ij tɨ pua'a macai meyan che'eta mana'a huarɨj a'ij tɨ huarɨj aɨjna ɨ Adán tɨ cai ayan ra'ara'astijre a'ij tɨ Dioj ayan tiraijca. Ajta aɨjna ɨ Adán, aɨ pu ayan éenya'a tɨj aɨjna tɨ cai xɨ huataseijre. 15Ma ajta, capu ruxa'aj na'a aɨjna tɨ te'irajraa aɨjna cɨme'e tɨ Dioj ruxé'evi'ira'a cɨn taatapueijve, ajta aɨjna tɨ a'irájraa tɨ saɨj na'a autyajturaa ɨ Dioj jemi. Capu xaa nya'u, a'ini mui'itɨ mu meyan huacuii maɨjna cɨme'e tɨ saɨj ayan autyajturaa ɨ Dioj jemi. Ma ajta, eitze'e pu huapɨ'ɨ ti'ivaɨre'e aɨjna tɨ Dioj taatapueijve, a'ini aɨ pu ra'uraú aɨjna tɨ jetzen ma'acan seira'a ja'araa tɨ a'ij pua'a eenya'acaa tɨ ij ajta huá'ucɨ'ɨti mui'icaca a'ij tɨ ɨ saɨj ɨ tevi huarɨj ruxé'evi'ira'a cɨme'e tɨ ij aɨn ayan rɨ'ɨ tihua'uta'an. 16Ajta, aɨjna tɨ Dioj taatapueijve, capu ayan che'eta na'a een a'ij tɨ te'irajraa aɨjna cɨme'e tɨ ɨ saɨj ayan autyajturaa ɨ Dioj jemi. Tɨ'ɨj aɨn ɨ a'atɨ ayan autyajturaa ɨ Dioj jemi, aj pu'i Dioj ra'uxɨjte, ajta pueijtzi raata'a. Ma ajta Dioj, matɨ'ɨj eihua autyajturaa ɨ jemin, aɨ pu ayan taatapueijve aɨjna ɨ tyaj cɨn uraré'enye'en cɨn huatyaturan ɨ jemin. 17Ayaa pu'u xaa nya'u, a'ini tɨ pua'a ayan ti'ayántan ɨ maj huacuii matɨj mana'a pua'amua e'iraanye maɨjna jetze ɨ tevi, ayaa pu ajta ayan ti'ayajna mej mi ruuri mua'ara'ani maɨjna cɨme'e maj ra'ancura'a maɨjna tɨ cɨn Dioj eihua huapɨ'ɨ rɨ'ɨ tihua'uta'a, majta maɨjna cɨme'e meyan ra'ancura'a tɨ hua'utapueijve mej mi meyan urare'enya'acan cɨn huatyaturan ɨ jemin aɨjna cɨme'e a'ij tɨ huarɨj aɨjna ɨ tevi, aɨjna ɨ Jesús tɨ ajta i'i Cɨriistu'u. 18Ayaa pu xaa nya'u tyaja'ure'enye, a'ini seij pu'u ayan autyajturaa ɨ Dioj jemi, Dioj pu naijmi'ica auxɨ́jte tɨ ij pueijtzi hua'uta'an. Ayaa pu ajta te'irajraa mej mi naijmi'i meyan urare'enya'acan cɨn huatyaturan, mej mi ruuri mua'ara'ani tɨj na'a rusen cɨme'e. 19Aɨj pu cɨn, ayan te'irajraa mej meyan titya'utyajturaa ɨ Dioj jemi aɨme ɨ maj mui'i aɨjna cɨme'e tɨ ɨ seij aɨjna ɨ Adán tyaacan ayan autyajturaa ɨ Dioj jemi, ayaa pu ajta tihua'acɨ'ɨti mui'icaca mej mi meyan urare'enya'acan cɨn huatyaturan ɨ Dioj jemi aɨjna cɨme'e tɨ ɨ saɨj ɨ tevi, aɨjna ɨ Jesús ayan arauraste aɨjna tɨ cɨn Dioj tiréijca. 20Ajta aɨn ɨ nyuucari ɨ maj cɨn ti'ijta, ayaa pu een cɨn raatyajtuaa tɨ ij ayan eitze'e huataseijre'en ɨ maj cɨn autyajturaa ɨ Dioj jemi. Ma ajta cɨme'en aɨjna tɨ nu'u ayan eitze'e huataseijre ɨ maj cɨn autyajturaa, ayaa pu ajta te'irájraa. Dioj pu ajta eitze'e rɨ'ɨ tihua'uta'a ɨ ruxé'evi'ira'a cɨme'e. 21Ayaa pu'u xaa nya'u, aɨjna tɨ a'ij pua'a een ɨ Dioj jemi, ayaa pu aɨjna hua'utyaamue'itɨ ɨ mej huacuii. Ayaa pu te'irájraa tɨ'ij ayan che'eta na'a tyu'utyaamue'itɨ a'ame aɨjna ɨ tɨ cɨn Dioj rɨ'ɨ titaatá'a, tyej ti urare'enya'acan cɨn huatyaturan, tyej ti teyan ruuri ta'ara'ani tɨj na'a rusen cɨme'e aɨjna cɨme'e tɨ aɨn tavastara'a ɨ Jesús, tɨ ajta i'i Cɨriistu'u, aɨ pu ayan ta japua huanyúu.

will be added

X\