Romanos 4

1¿A'ini tyana'a tyu'utaxajta tyaɨjna cɨme'e ɨ tayaaxujcɨ'ɨ, aɨjna ɨ Abraham tyaacan, ɨ tyaj jetzen e'iraanye? ¿A'ini tiraarɨ'ɨre aɨjna jemi ɨ Dioj? 2Ayej xaa nya'u ti'ayajna, tɨ pua'a aɨn Abraham ayan urare'enya'acan cɨn huatyaturanche'e ɨ Dioj jemi, aɨjna cɨme'e tɨ ayan ti'itɨj cɨn tya'ara'aste, aj pu xaa rɨ'ɨrístacajche'e tɨ aɨn rusaɨj ahuaujtzaahuate'en. Ma ajta cai, capu a'atzu rɨ'ɨristaca'a tɨ ayan huarɨni ɨ Dioj jemi. 3Ma ajta, ayaa pu tya'axa ɨ yu'uxari jetze tɨcɨn: “Abraham pu rá'antzaahua aɨjna ɨ Dioj. Aɨj pu cɨn, ayaa pu Dioj tiraaxa'apɨ'ɨntari'iri'i tɨ aɨn ayan urare'enya'acan cɨn huatyajturaa ɨ jemin.” Ayaa pu te'eyu'usi'i. 4Niche'e seij huataxaj ɨ nyuucari. Tɨ pua'a a'atɨ ti'itɨj cɨn ti'imuara'a ayaa pu ruxe'eve'e mej tiraanajchite'en maɨjna cɨme'e tɨ aɨn tyu'umuarej. Camu ti'itɨ raatapueijve'esin ruxé'evi'ira'a cɨme'e, silu ayaa mu ti'ijnajchite'en a'ij tɨ tiraavijte'e. 5Ayaa pu che'eta na'a een ɨ Dioj jemi. Capu a'atzu a'ij ti'irɨ'ɨri tɨ a'atɨ ayan raamue'itɨn tɨ ayan urare'enya'acan cɨn huatyaturan ɨ Dioj jemi aɨjna cɨme'e tɨ ayaa na'a tyu'umuarej ti'itɨ cɨme'e. Ma ajta aɨn, tɨ pua'a ayan rá'antzaahuate'en aɨjna tɨ tihua'axa'apɨ'ɨntari'ira aɨme ɨ mej a'ij pua'a ti'ityetyújcha'ɨ mej mi meyan urare'enya'acan cɨn huatyaturan ɨ jemin, tɨ pua'a rá'antzaahuate'en na'a aɨjna ɨ a'atɨ, Dioj pu aɨjna cɨn ti'ijxa'apɨ'ɨntari'iran tɨ ij aɨn urare'enya'acan cɨn huatyaturan ɨ jemin. 6Ajta, ayaa pu che'eta na'a ra'uteyu'uxaca'a aɨjna ɨ David tyaacan tɨ ayan tya'axa tɨ nu'u Dioj ayan rɨ'ɨ tirata'aca aɨjna ɨ a'atɨ tɨ Dioj ayan tiji'ijxa'apɨ'ɨntari'ire tɨ ij ayan aɨn urare'enya'acan cɨn huatyaturan ɨ jemin. Capu ajta nu'u jetzen ruxe'eve'e tɨ aɨn a'atɨ cai tyu'umuarej ti'itɨj cɨme'e tɨ xa'apɨ'ɨn een. 7Ayan tɨcɨn: Rɨ'ɨ pu tihua'uta'a aɨme ɨ tɨ Dioj tihua'uta'uuni'iri'i ɨ maj cɨn autyajturaa ɨ jemin. Miche'e maɨjna cɨn huaujtyamua'ave'en, a'ini capu che'e pueijtzi hua'uta'asin. 8Rɨ'ɨ pu tirata'aca aɨjna ɨ a'atɨ tɨ Dioj cai ayan jetzen ti'itɨj cɨn tya'ujpuá'ajte'en tɨ aɨn ti'itɨj cɨn autyajturaa ɨ jemin. 9Ajta aɨjna ɨ tɨ cɨn Dioj rɨ'ɨ tihua'ata'aca, ¿ni qui aɨme na'a cɨ'ɨti ɨ mej meri ra'antisijchaca'a ɨ runavij na'ari ajta ayan tihua'ucɨ'ɨti ɨ seica ɨ maj cai meyan ra'antijsijchaca'a ɨ runavij? Ayaa nu neri tyajamuaata'ixaa nyaɨjna cɨme'e ɨ Abraham tyaacan, tɨ Dioj ayan tiraaxa'apɨ'ɨntari'iri'i tɨ aɨn urare'enya'acan cɨn huatyajturaa ɨ jemin, aɨjna cɨme'e tɨ aɨn Abraham ayan rá'antzaahua. 10¿A'anajni ayan tiraaxa'apɨ'ɨntari'iri'i ɨ Dioj? ¿Ni qui ayan raaruu tɨ'ɨj Abraham cai xɨ ra'antisijchaca'a ɨ runavij?, na'ari ¿ayan tiraaxa'apɨ'ɨntari'iri'i tɨ'ɨj aɨn ayan ari ra'antisijchaca'a? Ee xaa nya'u, ayaa pu ti'ayajna, capu Dioj ayan tiraaxa'apɨ'ɨntari'iri'i tɨ'ɨj ayan ari ra'antisijchaca'a ɨ runavij silu tɨ'ɨj cai xɨ ra'antisijchaca'a. 11Aj pu'i ayan raatyajtua aɨjna ɨ ye'ira mej mi meyan ra'antisijche ɨ runavij. Ajta ayan huataujmua'acaa aɨjna ɨ ye'ira tɨ aɨn Abraham tyaacan ayan urare'enya'acan cɨn huatyajturaa ɨ Dioj jemi, aɨjna cɨme'e tɨ'ɨj cai xɨ ra'antisíicha ɨ runavij, aɨ pu ra'antzaahuate ɨ Dioj. Aɨj pu cɨn, ai pu aɨn pueen ɨ hua'ahuaacɨxa'a naijmi'i aɨme ɨ maj cai ra'antisi'iche ɨ runavij, ɨ maj majta tya'atzaahuate'e. Aɨj pu cɨn Dioj ayan che'eta na'a tihua'axa'apɨ'ɨntari'ira mej mi meyan che'eta mana'a urare'enya'acan cɨn huatyaturan ɨ Dioj jemi tɨj aɨjna ɨ hua'ahuaacɨxa'ajcɨ'ɨ. 12Ajta aɨjna ɨ Abraham tyaacan, aɨ pu ajta hua'ahuaacɨxa'a pueen ɨ maj ra'antisi'iche ɨ runavij. Majta aɨme, camu meyan mana'a ra'antisi'iche ɨ runavij, silu aɨ mu majta meyan eenye'e rɨ'ɨ ti'ityetyújcha'ɨ tɨj ajta aɨjna ɨ Abraham tyaacan rɨ'ɨ ti'ityújchaɨca'a, aɨjna tɨ tahuaacɨxa'a pueen, tɨ ajta tya'atzaahuatya'acaa tɨ'ɨj cai xɨ ra'antisíicha ɨ runavij. 13Ajta pu Dioj ayan tya'ataujratziiri'i aɨjna jemi ɨ Abraham, ajta aɨme jemi ɨ mej jetzen a'iraanye tɨ nu'u ayan tiraacɨ'ɨti nain tɨ seijre'e iiyan chaanaca japua. Capu Dioj ayan tya'ataujratziiri'i, aɨjna cɨme'e tɨ aɨn Abraham ayan ra'astijra'acaa aɨjna ɨ nyuucari ɨ maj cɨn ti'ijta. Capu xaa nya'u, silu ayaa pu een cɨn Dioj tya'ataujratziiri'i aɨjna cɨme'e tɨ aɨn Abraham tyaacan ayan urare'enya'acan cɨn huatyaturan ɨ Dioj jemi aɨjna cɨme'e tɨ tya'atzaahuatya'acaa. 14- 15Ayaa pu'u na'a, a'ini tɨ pua'a ayan tihua'ucɨ'ɨti aɨme ɨ maj ra'astijre'e maɨjna ɨ nyuucari ɨ maj cɨn ti'ijta, capu che'e ayan ruxe'eve'e tɨ a'atɨ ayan tya'antzaahuate'en, ajta capu che'e ti'itɨj vaɨre'e ɨ tɨ cɨn Dioj tya'ataujratziiri'i. Pueijtzi pu hua'ata'aca aɨjna cɨme'e tɨ cai rɨ'ɨri tɨ a'atɨ nain cɨn ra'ara'astijre'en aɨjna ɨ nyuucari. Ma ajta, camu ti'itɨj cɨn autyaturan tɨ pua'a cai seijre'e aɨjna ɨ nyuucari ɨ maj cɨn ti'ijta. 16Aɨj pu cɨn, aɨjna tɨ cɨn Dioj tya'ataujratziiri'i ayan tihua'acɨ'ɨti aɨjna cɨme'e maj meyan tya'atzaahuate'e tɨ ij ayan eenya'a a'ara'ani tɨ Dioj ruxé'evi'ira'a cɨn rɨ'ɨ tihua'uta'an, ajta tɨ ayan tzaahuati'ira'a cɨn tihua'ucɨ'ɨti naijmi'ica aɨme ɨ maj maɨjna jetze a'iraanye ɨ Abraham tyaacan. Naijmi'ica pu ti'icɨ'ɨti anacaican aɨme ɨ maj ra'antisijchaca'a ɨ runavij, ajta aɨme ɨ mej meyan che'eta mana'a tya'atzaahuate'e tɨj aɨjna ɨ Abraham tyaacan. Aɨ pu aɨn pueen ɨ tahuaacɨxa'a, naijmi'ica a'achu tyaj pua'amua. 17Ayaa pu te'eyu'usi'i tɨcɨn: “Ayaa nu neri timuaaxa'apɨ'ɨntari'iri'i mueetzi. Mui'itɨ mu tyaɨtye mueetzi jetze eirányejsin.” Aɨj pu cɨn, ayaa pu tira'amitejte'e ɨ Dioj, tɨ aɨn Abraham tyaacan aɨn pueenya'a a'araa ɨ tahuaacɨxa'a. Abraham pu ayan rá'antzaahua aɨjna ɨ Dioj tɨ raayɨ'ɨtɨ tɨ ajtahua'a hua'utatɨsten ɨ hua'axaijnyu'uca aɨme ɨ maj meri huacuii. Ajta aɨjna ɨ tɨ cai xɨ ti'iseijre'e, Dioj pu runyuuca cɨn ayan ti'ixaxa'a tɨ'ij ajta ayan te'irajra'ani. 18Ajta aɨn ɨ Abraham, tɨ'ɨj ayan tira'amitejtya'acaa tɨ cai che'e a'ij ti'irɨ'ɨristaca'a tɨ tipe'eri a'ara'ani, ma ajta ayaa pu tya'antzaahua mej meyan mui'itɨ jetzen titye'irányejsin ɨ tyaɨtye a'ij tɨ Dioj tya'ataujratziiri'i ɨ jemin. Ayan tɨcɨn: “Ayaa mu pua'amua mua'aju'un aɨme ɨ mej mueetzi jetze eirányejsin tɨj xu'ura'ave.” 19Pu'uri rájchaɨca'a aɨjna a'achu cumu anxɨte ninye'ira'a aɨjna ɨ Abraham. Aɨj pu cɨn ayan tira'amitejtya'acaa tɨ ari á'apua'aren ɨ rutevi jetze. Ayaa pu che'eta na'a tira'amitejtya'acaa aɨjna rujɨ́ra'ara'an cɨme'en, aɨjna ɨ Sara, tɨ cai che'e rɨ'ɨristaca'a tɨ tiyauj a'ara'ani. 20Capu amɨn a'ij. Capu raatyaxaahuataca'a tɨ rá'antzaahuate'en. Eecan pu ra'utamua'areeri'i a'ij tɨ tya'ataujratziiri'i ɨ Dioj. Aɨj pu cɨn, huatyaujca'ane ɨ rutzajta'a tɨ ij eitze'e ayan tya'antzaahuate'en. Ajta, aɨ pu rɨ'ɨ tiraata'a ɨ Dioj. 21Ayaa pu nain cɨn tira'amitejtya'acaa tɨ Dioj ayan raayɨ'ɨtɨ tɨ ayan huarɨni ɨ rumuare'eri'ira'a cɨme'e a'ij tɨ aɨn ari tya'ataujratziiri'i. 22Aɨj pu cɨn ayan Dioj tiraaxa'apɨ'ɨntari'iri'i tɨ aɨn Abraham urare'enya'acan cɨn huatyaturan ɨ jemin. 23- 24Ajta aɨjna ɨ nyuucari tɨ cɨme'en ayan Dioj tiraaxa'apɨ'ɨntari'iri'i, capu ayan te'eyu'usi'ihuaca'a tɨ ij ayaa na'a tiraacɨ'ɨti aɨjna silu ayaa pu ajta ti'itacɨ'ɨti ityejmi. Dioj pu ayan che'eta na'a titaaxa'apɨ'ɨntari'ira ityejmi tej ti tyajta urare'enya'acan cɨn huatyaturan ɨ jemin. Ayaa pu ajta ti'itacɨ'ɨti ityejmi, i tyej ra'atzaahuate'e aɨjna tɨ ra'ajjáj hua'a tzajta'a ɨ mɨ'ɨchite aɨjna ɨ Jesús tɨ ajta aɨn pueen ɨ tavastara'a. 25Aɨ pu ayan huatáujtuii tɨ i huamɨ'ɨni ta jetze ma'acan, tɨ ij aɨn tyu'unajchitaca'a itá cɨme'en ɨ tyej té'echaɨca'a tyaɨjna cɨme'e ɨ tyej cɨn autyajturaa ɨ Dioj jemi. Aj pu'i Dioj aɨjna cɨn ra'ajjáj hua'a tzajta'a ɨ mɨ'ɨchite tyej ti teyan urare'enya'acan cɨn huatyaturan ɨ jemin.

will be added

X\