Romanos 3

1¿Ti'itajni cɨn a'ij tirajchaɨre'e aɨjna ɨ a'atɨ tɨ Israel jetze ajtyama'acan? ¿Ni qui ti'itɨj a'ij tiraatyava'ɨri tɨ aɨn ra'antisijchaca'a ɨ runavij? 2Ayej xaa nya'u. Eihua pu tira'ancura'asin, ajta mui'icaca pu cɨn raatyava'ɨri, aɨjna cɨme'e tɨ Dioj anacai raatyajtuaa ɨ runyuuca aɨme jemi ɨ maj Israel jetze ajtyama'acan. 3Ma majta seica, camu meyan tira'ara'astijre. ¿A'ini huataujmua'a aɨjna ɨ maj cai meyan tira'ara'astijre? ¿Ni qui meyan ra'urauuna maɨjna tɨ cɨn Dioj tya'ataujratziiri'i? 4Camu a'atzu xaa nya'u. Che'e ayan eenye'en ɨ Dioj jemi tɨ aɨn Dioj rusaɨj ayan tzaahuati'ira'a cɨn huatyaturan tɨj na'a rusen cɨme'e. Ma majta ɨ tyetyaca, che'e ayan eenye'en mej ti'ihue'itaca. Che'e ayen eenye'en a'ini ayaa pu te'eyu'usi'i tɨcɨn: Mej mi raamua'aree tɨ ayan ti'ayajna a'ij pej peri tyu'utaxajtaca'a, pej pi tyu'utyamue'itɨn paɨjna cɨme'e matɨ'ɨj maɨn mua'axɨjte'en. 5Tɨ pua'a ayan seijre'e tɨ Dioj ayan urare'enya'acan cɨn huatyajturaa aɨjna cɨme'e tyaj cai ra'astijre'e ityan, ¿a'ini huataujmua'a amɨjna? ¿Ni qui teyan tyu'utaxaj a'ij mej ti'ixaxa'a aɨme ɨ maj cai ramua'ate ɨ Dioj? Ayaa mu tɨcɨn: “Capu nu'u xa'apɨ'ɨn rɨcɨ ɨ Dioj aɨjna cɨme'e tɨ aɨn huatanyu'ucan ityejmi jemi.” 6Ayaa nu tyaja'amue'ixaate'e, tɨ pua'a ayan ti'ayajna a'ij mej ti'ixaxa'a aɨme, ¿a'ini auj ti'irɨ'ɨri tɨ aɨn Dioj hua'axɨjte'en naijmi'ica ɨ maj yan huachaatɨme ɨ chaanaca japua? Capu xaa nya'u a'ij ti'irɨ'ɨri. 7Rɨ'ɨri tɨ a'atɨ ayan tyu'utaxaj yee, ¿a'ini een cɨme'e Dioj ayan auj na'axɨjte'en aɨjna cɨme'e ɨ nyaj nu'u autyajturaa ɨ jemin? Capu ayan tiraavijte'e a'ini Dioj pu eitze'e tzaahuati'ira'a cɨn huatyaturaasin aɨjna cɨme'e nyaj nu'u ti'ihue'itaca. Ajta eitze'e mu meyan rɨ'ɨ tirata'aca ɨ Dioj maɨjna cɨme'e. 8Tɨ pua'a ayan ti'ayajnacache'e a'ij tɨ ti'ixa aɨjna ɨ a'atɨ, ayaa pu ajta rɨ'ɨrístaca tyej teyan tyu'utaxajtanche'e tɨcɨn: “Tiche'e nu'u teyan a'ij pua'a ti'irajcha'ɨ tɨ ij ayan huatyaturan ɨ tɨ i'ixa'apɨ'ɨn.” Ee xaa nya'u, ayaa mu seica ta jetze ti'ipua'arite'e tyaj nu'u teyan ti'ixaxa'a. Mu'uri xaa nya'u meyan ra'antimue'itɨ tɨ Dioj ayan aɨjna cɨn hua'axɨjte'en. 9¿A'ini na'aqui? ¿Ni qui ayan huataujmua'a tɨ eitze'e naa ti'itavaɨre'e ityejmi i tyej Israel jetze ajtyama'acan cai aɨme? Capu xaa nya'u a'atzu, a'ini tu'uri teyan raataxajtaca'a tɨ aɨn ɨ tɨ a'ij pua'a een, aɨ pu ta'antimue'itɨ tyej ti tya'uta'ɨtzee ɨ Dioj jemi naijmi'ica ityan i tyaj Israel jetze ajtyama'acan, majta aɨme ɨ mej seij chuejra'a japua e'ema'acan. 10Ayaa pu xaa nya'u ti'ayajna a'ini ayaa pu te'eyu'usi'i tɨcɨn: Capu nu'u ma'a a'a a'atɨ tɨ ayan urare'enya'acan cɨn seijra'a. Capu a'atɨ. 11Capu nu'u ma'a a'a a'atɨ tɨ yau'eite a'ij tɨ een ɨ Dioj jemi. Capu nu'u ma'a a'a a'atɨ tɨ ayan rahuauhuau tɨ ij raatyaanajche. 12Naijmi'i mu meri ma ruurai majca'i. Camu che'e ti'itɨ cɨn ti'ivaɨre'e ɨ jemin. Capu ma'a a'a a'atɨ tɨ ayan rɨ'ɨ ti'ityujcha'ɨ. Capu a'atɨ xaa nya'u. 13A'ij pu pua'a namuajre'e a'ij mej ti'ixaxa'a. Runyanu mu cɨn ti'ihue'itaca mej mi hua'ucuanamuan ɨ ruxa'a tyaɨte. Ayaa pu che'eta na'a ti'ivaɨre'e ɨ nyuucari ɨ maj cɨn ti'ixaxa'a tɨj ajta ɨ hua'ave'eri tɨ je'ihuaje'ica, aɨjna tɨ cu'ucu'u jetze e'ijninyei. 14Eihua mu a'ij pua'a tyu'ujepe'e, majta huapɨ'ɨ eihua hua'ajaaxaijte'e ɨ ruxa'a tyaɨte. 15Ca'anacan mu a'uruaachejye'i mej mi seij huaje'ica ma a'ahua'a. 16A'u tɨ na'a maj a'acɨɨnye, aɨ mu a'ujca'anyaacan cɨn raatyáuuna tɨj na'a tɨ aun tyeje'eseijre'e. Eihua mu pueijtzi hua'ata'aca ɨ ruxa'aj tyaɨte. 17Capu ayan tihua'amityejte'e a'ij tɨ een tɨ'ɨj Dioj hua'utyapua'arite'en ɨ tyaɨte mej mi ru'ihuaamua'atan tyamua'a naa. 18Camu majta ra'atese'e ɨ Dioj. Camu majta rata'aca tɨ hua'a jemi seijra'a. 19Tyajta ityan, tu'uri teyan ramua'aree a'ij tɨ ti'ixa ɨ nyuucari ɨ maj cɨn ti'ijta. Ayaa pu tihue'ixaate'e aɨme ɨ mej jetzen ruxe'eve'e mej meyan ra'ara'astijre'en maɨjna ɨ nyuucari. Ajta ayan huatyatuiihuaca'a mej mi huatyaturan maj cai che'e ti'itɨ xajta naijmi'i ɨ tyaɨte maɨjna cɨme'e tɨ cai che'e me'e ti'itɨ ɨ maj ru jetze rupua'arite'e. Ayaa pu'u te'irajraa tɨ ij ayan amiteera tɨ Dioj hua'axɨjte'esin naijmi'ica ɨ maj yan huachaatɨme ɨ chaanaca japua aɨjna cɨme'e maj autyajturaa ɨ jemin. 20Aɨj pu cɨn capu a'atɨ ayan urare'enya'acan cɨn huatyaturaasin ɨ Dioj jemi aɨjna cɨme'e tɨ aɨn a'atɨ ayan ra'astijre'e aɨjna ɨ nyuucari ɨ maj cɨn ti'ijta. Me tyajta ityan, ayaa tu een cɨn ramua'aree ti'itɨ tɨ pɨrɨcɨ tɨ a'ij pua'a een tyaɨjna cɨme'e tɨ cai rɨ'ɨri tyaj nain cɨn ra'ara'astijre'en tyaɨjna ɨ nyuucari. 21Ajta ijii, pu'uri ayan titaataseijrate a'ij tɨ ti'irɨ'ɨri tyej teyan urare'enya'acan cɨn huatyaturan ɨ Dioj jemi. Tu'uri ramua'aree tɨ cai ayan che'eta na'a ti'ivaɨre'e aɨjna ɨ nyuucari ɨ maj cɨn ti'ijta. Ee xaa nya'u, ayaa pu che'eta na'a ti'ita'ixaate'e aɨjna ɨ nyuucari, majta aɨme ɨ mej mejmi'i ti'ixaxa'ata'a ɨ Dioj jetze ma'acan. 22- 23Ayaa pu che'eta na'a tihua'acɨ'ɨti naijmi'ica mej mi meyan urare'enya'acan cɨn huatyaturan ɨ Dioj jemi maɨjna cɨme'e mej meyan ra'ara'asten maɨjna ɨ Jesús tɨ ajta i'i Cɨriistu'u. Ayaa pu che'eta na'a tihua'acɨ'ɨti aɨme ɨ maj Israel jetze ajtyama'acan, majta aɨme ɨ mej seij chuejra'a japua e'ema'acan, a'ini naimi'i mu ruxa'a e'en ɨ Dioj jemi. Naimi'i mu majta autyajturaa ɨ jemin. Ajta capu a'atɨ ayan raayɨ'ɨtɨ tɨ'ij ayan nain cɨn rɨ'ɨ tiraata'an ɨ Dioj. 24Ajta pu Dioj ruxé'evi'ira'a cɨn ayan tihua'uxa'apɨ'ɨntari'iri'i mej mi urare'enya'acan cɨn huatyaturan ɨ jemin aɨjna cɨme'e tɨ aɨ pu ayan rɨ'ɨ tihua'uta'a. Ayaa pu een cɨn hua'a japua huanyúu aɨjna cɨme'e a'ij tɨ huarɨj ɨ Cɨriistu'u tɨ ajta i'i Jesús. 25Dioj pu ayan raatyajtuaa ɨ Jesús hua'a tzajta'a aɨme ɨ maj yan japuan huachaatɨme iiyan chaanaca japua tɨ ij aɨn ayan huataura'an tɨj muaɨ'ɨvejri ɨ tɨ cɨn tyu'utanajchita aɨjna cɨme'e ɨ mej tye'echaɨca'a ɨ Dioj jemi. Ajta tɨ ij aɨn hua'utyapua'arite'en ɨ Dioj jemi aɨjna cɨme'e mej ra'atzaahuate'e. Dioj pu ayan huarɨj tɨ ij ayan tihua'utaseijrate'en tɨ cai aɨn a'ij pua'a huarɨj tɨ'ɨj aɨn anacai tihua'uta'uuni'iri'i ɨ maj cɨn autyajturaa ɨ jemin. Capu ajna'ɨmɨ pueijtzi hua'ata'acara'a. 26Aɨ pu ajta ayan huarɨj mej mi maɨn ɨ mej huatyaɨte ijii meyan raaseij tɨ aɨn xa'apɨ'ɨn huarɨj aɨjna cɨme'e tɨ rusaɨj uraré'en. Ayaa pu ajta huarɨj mej mi raamua'aree tɨ ajta xa'apɨ'ɨn rɨcɨ aɨjna cɨme'e tɨ ayan tihua'axa'apɨ'ɨntari'ira mej mi meyan urare'enya'acan cɨn huatyaturan ɨ jemin, naijmi'ica, a'achu maj pua'amua ra'astijre'e. 27Tɨ pua'a ayan ti'ayajna, ¿ti'itajni cɨn tyá'atatzaahuate'en? Catu ti'itɨj cɨme'e, a'ini capu che'e ayan tiraavijte'e. ¿Ti'itajni pɨrɨcɨ ɨ nyuucari tɨ taata'ijmɨjra? ¿Ni qui aɨjna cɨme'e tyaj ra'ara'astijre'en tyaɨjna ɨ nyuucari ɨ maj cɨn ti'ijta? Capu xaa nya'u aɨn pueen, silu aɨjna ɨ nyuucari ɨ tyaj cɨn tya'atzaahuate'e. 28Ayaa pu xaa ti'ayajna a'ini ayaa pu tita'amitejte'e tɨ a'atɨ ayan urare'enya'acan cɨn huatyaturaasin ɨ Dioj jemi aɨjna cɨme'e tɨ aɨn a'atɨ tya'atzaahuate'e. Ajta capu ti'itɨ cɨn raatyava'ɨri tɨ ayan ra'ara'astijre'en aɨjna ɨ nyuucari ɨ maj cɨn ti'ijta. 29- 30Ajta aɨn ɨ Dioj, ¿ni qui ayaa na'a pueen hua'a Dioj, ɨ maj Israel jetze ajtyama'acan nusu ajta hua'a Dioj pueen aɨme ɨ maj seij chuejra'a japua e'ema'acan? Ee xaa nya'u, aɨ pu ajta hua'a Dioj pueen a'ini saɨj pu'u aɨn pueen ɨ Dioj. Aɨ pu hua'axɨjte'en aɨme ɨ mej Israel jetze ajtyama'acan mej mi urare'enya'acan cɨn huatyaturan ɨ jemin maɨjna cɨme'e ɨ mej tya'atzaahuate'e. Aɨ pu ajta ayan che'eta na'a hua'axɨjte'en aɨme ɨ mej seij chuejra'a japua e'ema'acan mej mi meyan che'eta mana'a urare'enya'acan cɨn huatyaturan ɨ jemin a'ini ayaa mu che'eta mana'a tya'atzaahuate'e. 31¿Ni qui teyan tyaɨjna cɨn ra'urauuna tyaɨjna ɨ nyuucari ɨ maj cɨn ti'ijta tyaɨjna cɨme'e tyej teyan tya'atzaahuate'e? Catu xaa nya'u. Me tyajta ityan, tyan tu tyaɨjna cɨn ranaijmire'en.

will be added

X\