Romanos 2

1Pajta muaa, a'atɨ paj pɨrɨcɨ, tɨ pua'a peyan seij jetze tí'ijpua'ajte'e ɨ a'axa'aj tevi ti'itɨj cɨme'e, capu rɨ'ɨri pej peyan tyu'utaxaj yee capaj aɨn púeenya'a ɨ paj cɨn peyan huarɨj ti'itɨj tɨ a'ij pua'a een. Muaa paj asaɨj a jetze tia'apua'ajte'e paɨjna cɨme'e pej peyan che'eta pana'a ti'itye'echa'ɨ a'ij tɨ aɨn ti'ityujcha'ɨ aɨjna ɨ pej jetzen ti'itɨj cɨn ti'ipua'ajte'e. 2Tyajta ityan, ayaa tu ramua'aree tɨ aɨn Dioj ayan tihua'uxɨjte'en tzaahuati'ira'a cɨme'e aɨme ɨ mej meyan a'ij pua'a títeetyújcha'ɨ. 3¿Ni qui ayan timua'amitejte'e tɨ cai Dioj pueijtzi muaata'asin, muaa mɨ pej peyan che'eta pana'a a'ij pua'a ti'itye'echa'ɨ tɨj ajta aɨn a'ij pua'a ti'ityujcha'ɨ ɨ paj jetzen ti'ijpua'ajte'e ti'itɨj cɨme'en? 4¿Ní qui muaa paj raatyaxaahuataca'a paɨjna ɨ Dioj tɨ eihua huapɨ'ɨ rɨ'ɨ timuata'aca, tɨ ajta mua'acu'uvaa a'aye'i? Auche'e pu te'eviicue'i mueetzi cɨme'e. ¿Ni cai ti'itɨ mueetzi jetze tasiseiri tɨ Dioj ayan rɨ'ɨ timuata'aca pej pi saɨque tyu'umua'ati ɨ jemin? 5Ma pajta muaa, ¿a'ini pej pi peri ra'antyaana ɨ a'axaijnyu'uca pej pi cai saɨque tyu'umua'ati ɨ Dioj jemi? Ayaa paj ramue'itɨcɨ tɨ aɨn Dioj eihua huapɨ'ɨ pueijtzi muaata'asin ajna xɨcajra'a jetze tɨ jetzen ayan huataseijre'en a jeijre'e ɨ Dioj tɨ'ij nain cɨn titya'axɨjte'en tzaahuati'ira'a cɨme'e. 6Aɨ pu Dioj nu'u a'atɨ ayan tyu'uta'asin a'ij tɨ nu'u tiraavijte'e seij ajta seij. 7Majta seica, aɨ mu ɨ mej meyan te'eviicue'i mej meyan rɨ'ɨ titetyujcha'ɨ maɨjna cɨme'e mej meyan rahuauhuau tɨ Dioj ayan rɨ'ɨ tihua'uta'an, tɨ aɨn ajta va'acan cɨn tihua'utaijte'en, tɨ ajta ayan tihua'uta'an mej mi ruurican huatyaturan ɨ jemin tɨj na'a rusen cɨme'e, ayaa pu xaa nya'u tihua'ucɨ'ɨti mej meyan ruurican huatyaturan ɨ Dioj jemi tɨj na'a rusen cɨme'e. 8Ajta aɨme ɨ mej rujɨɨmua'a mana'a rájtyauve, majta cai á'ujca'anye mej meyan ra'ara'astijre'en aɨjna cɨme'e tɨ ayan ti'ayajna, silu aɨ mu'u maɨjna cɨn ra'ara'astijre'en maɨjna tɨ hua'a tzajta'a huiraninyei tɨ a'ij pua'a een, ayaa pu tihua'acɨ'ɨti tɨ Dioj ayan hua'ajtya'axɨ'ɨsin. A'ij pu pua'a tihua'uta'asin ɨ pueijtzi aɨjna cɨme'e tɨ nyu'ucamɨ'ɨ. 9Matɨj mana'a pua'amua ɨ mej a'ij pua'a títeetyújcha'ɨ, eecan pu hua'utamuare'eriste'esin. Dioj pu huapɨ'ɨ pueijtzi hua'uta'asin, anacai aɨme ɨ maj Israel jetze ajtyama'acan, ajta e'eyan aɨme jemi ɨ mej seij chuejra'a japua huachaatɨme. 10Majta aɨme, matɨj mana'a pua'amua ɨ mej rɨ'ɨ títeetyújcha'ɨ, Dioj pu ayan rɨ'ɨ tihua'uta'asin. Aɨ pu ajta va'acan cɨn tihua'utaijte'esin. Tyamua'a pu naa hua'utyapua'arite'esin tɨj na'a rusen cɨme'e. Ayaa pu xaa nya'u tihua'acɨ'ɨti aɨme ɨ maj Israel jetze ajtyama'acan, majta aɨme ɨ maj seij chuejra'a japua e'ema'acan. 11Ayaa pu te'eme a'ini naimi'i mu ruxa'a e'en ɨ Dioj jemi. 12Matɨj mana'a pua'amua ɨ maj cai a'anaj ra'ancura'a ɨ nyuucari ɨ maj cɨn ti'ijta, ayaa mu majta á'apua'aren. Ma ajta Dioj pu cai hua'axɨjte'esin aɨjna cɨme'e ɨ nyuucari. Majta aɨme ɨ maj ra'ancura'a maɨjna ɨ nyuucari, tɨ pua'a meyan ti'itɨ cɨn atya'ɨtza'ara'an, matɨj mana'a pua'amua, aɨjna ɨ nyuucari, aɨ pu xaa ti'itɨ cɨn hua'ajetze tya'ujpuá'ajte'esin. 13Ayaa pu'u, a'ini aɨme ɨ mej urare'enya'acan cɨn huatyaturaasin ɨ Dioj jemi, camu meyan huatyaturaasin maɨjna cɨme'e maj ranamua maɨjna ɨ nyuucari ɨ maj cɨn ti'ijta. Camu xaa nya'u, silu ayaa mu xaa urare'enya'acan cɨn huatyaturaasin ɨ Dioj jemi tɨ pua'a meyan ra'ara'astijre'en a'ij tɨ tira'axa aɨjna ɨ nyuucari. 14Ee xaa nya'u, aɨme ɨ mej seij chuejra'a japua e'ema'acan, ɨ maj cai a'anaj ra'ancura'a ɨ nyuucari, tɨ pua'a meyan ra'ara'astijre'en a'ij tɨ ti'ixa maɨjna cɨme'e mej a'ij tirajtyau ɨ rutzajta'a, ayaa pu aɨjna cɨn huataujmua'a maj rutzajta'a a'ij tirajtyau maɨjna ɨ nyuucari ɨ maj cɨn ti'ijta. 15Aɨ mu meyan ti'itaseijrate'e tɨj na'a a'ij tɨ aɨn ti'ijxe'eve'e ɨ nyuucari ɨ maj cɨn ti'ijta, aɨ pu seijre'e ɨ hua'a tzajta'a. Tzaahuati'ira'a pu cɨn hua'ata'aca maj xaa ru'umua'aree a'ij tɨ ti'ijxe'eve'e aɨjna ɨ nyuucari. Ayaa pu hua'a jetze ti'ipuaapua'ajte'e ɨ hua'amua'atziira'a, ajta aɨ pu tihua'ata'uuni'iraca. 16Ayaa pu te'eme a'ij nyej tyajá'amuamua'ate. Ajna xɨcajra'a jetze tɨ jetzen nain cɨn antyujmua'aréera a'ame aɨjna ɨ Jesús tɨ ajta i'i Cɨriistu'u, Dioj pu raata'asin tɨ aɨn Cɨriistu'u hua'uxɨjte'esin ɨ tyetyaca tɨj na'a ɨ maj cɨn meyan tyu'uruu aviitzi cɨme'e. 17Pajta muaa, tiche'e teyan mueetzi cɨn tyu'utaxaj paj nu'u paɨjna jetze ajtyama'acan ɨ Israel, pajta ra'astijre'e paɨjna ɨ nyuucari ɨ maj cɨn ti'ijta, pajta peyan a'atzaahuate'e paɨjna cɨme'e paj nu'u ranajche tzaahuati'ira'a cɨme'e ɨ Dioj. 18¿Ni qui ayan ti'ayajna, nusu peri ramua'aree a'ij tɨ aɨn ti'ijxe'eve'e?, ¿pajta peri peyan raxa'apɨ'ɨntare ɨ tɨ i'ixa'apɨ'ɨn paɨjna cɨme'e pej tyamua'a naa tihua'amua'ate paɨjna jetze ɨ nyuucari ɨ maj cɨn ti'ijta? 19¿Ni qui pajta peyan ti'imua'atze paj nu'u raayɨ'ɨtɨ pej tihua'umua'aten aɨme ɨ maj cai a'anaj ti'ihuaujmua'ate?, na'ari ¿paj nu'u raayɨ'ɨtɨ pej tihua'utaseijrate'en tzaahuati'ira'a cɨme'e a'ij tɨ een ɨ Dioj? 20¿Ni qui peyan raayɨ'ɨtɨ paj rɨ'ɨ tihua'umua'aten aɨme ɨ tɨ cai ayan tihua'amityejte'e a'ij tɨ tiraavijte'e?, nusu ¿peyan raayɨ'ɨtɨ pej tihua'umua'aten aɨme ɨ maj cai xɨ huavaujse? ¿Ni qui ayan ti'ayajna pej peyan raayɨ'ɨtɨ aɨjna cɨme'e ɨ nyuucari ɨ maj cɨn ti'ijta, tɨ ajta ayan tzaahuati'ira'a cɨn te'eyu'usi'i? ¿Ni tzaa ayan ti'ivaɨre'e aɨjna ɨ nyuucari pej pi nain cɨn ru'umua'areera? 21Tɨ pua'a ayan ti'ayajna mueetzi jemi, mɨ pej seica tyu'umua'aten, ¿a'ini een cɨme'e pacai peyan tia'amua'ate asaɨj? Mɨ pej peyan tihua'amua'ate maj nu'u cai tyu'unahua'an, ¿ni qui peyan cai ti'inahua'a muaa? 22Ayaa paj pajta tihue'ixaate'e maj nu'u cai ruxana'acɨre'e. ¿Ni qui muaa pacai peyan axana'acɨre'e? Mɨ tɨ cai mua'araanajchi maj hua'anajche ɨ maj cai diooj pueen, ¿ni pacai peyan ti'inahua'a hua'a teyujta'a tzajta'a? 23Muaa paj ca'anyejri hua'ata'aca mej mi ratyaxaahua ɨ Dioj aɨjna cɨme'e paj cai ra'ara'astijre'e paɨjna ɨ nyuucari ɨ maj cɨn ti'ijta. Ma pajta muaa, muaa paj ahua'atzaahuate'e paɨjna cɨme'e ɨ nyuucari. 24Aɨj pu cɨn ayan te'eyu'usi'i, tɨcɨn: “A'ij mu pua'a tíya'uséij ɨ Dioj aɨme ɨ mej seij chuejra'a japua e'ema'acan muejmi cɨme'e.” 25Tɨ pua'a peyan ra'astijre'e paɨjna ɨ nyuucari ɨ maj cɨn ti'ijta, aj pu xaa ayan timuaatyavaɨre'esin mej mi raamua'aree ɨ tyaɨte paj paɨjna jetze ajtyama'acan aɨjna ɨ Israel. Ma ajta, tɨ pua'a peyan ti'itɨ cɨn autyaturan paɨjna jetze ɨ nyuucari, ayaa mu muaruuren matɨj hua'arujca aɨme ɨ mej seij chuejra'a japua e'ema'acan. 26Ajta a'atɨ tɨ seij chuejra'a japua e'ema'acan, tɨ pua'a aɨn ayan ra'ara'astijre'en ɨ nyuucari ɨ maj cɨn ti'ijta. ¿Ni cai Dioj ayan tiraata'asin aɨjna ɨ ja'atɨ tɨ ayan eenye'en huatyaturan aɨme jemi ɨ maj Israel jetze ajtyama'acan tɨj ɨ a'atɨ tɨ ra'antisijchaca'a ɨ runavij? Ee xaa nya'u, ayaa pu tí'en. 27Aɨjna ɨ a'atɨ tɨ cai ra'antisijchaca'a ɨ runavij tɨ ajta auj ra'astijre'e ɨ nyuucari ɨ maj cɨn ti'ijta, aɨ pu mua'axɨjte'en mueetzi aɨjna cɨme'e pej atya'ɨtza'ara paɨjna jemi ɨ nyuucari. Capu amɨn a'ij pej peri ra'ancura'a paɨjna ɨ nyuucari, pajta ra'antisijchaca'a ɨ a'anavij. 28Tɨ pua'a a'atɨ ayaa na'a ti'ijrɨ'ɨra me jeijre'e, capu ayan huataujmua'a tɨ aɨn ɨ a'atɨ tzaahuati'ira'a cɨn Israel jetze ajtyama'acan. Capu xaa nya'u. Ajta aɨn ɨ a'atɨ tɨ ayan ra'antisijchaca'a ɨ runavij, capu ayaa na'a ti'ivaɨre'e tɨ ij ayan seira'a a'ara'ani me jeijre'e ɨ hue'ira'ara'an jetze. 29Capu ayan ti'ayajna tɨ a'atɨ tzaahuati'ira'a cɨn Israel jetze ajtyama'acan aɨjna cɨme'e tɨ aɨn tya'ara'astijre me jeijre'e seijre'e. Aɨ pu'u xaa ruxe'eve'e tɨ aɨn nain cɨn aráurasten ɨ rutzajta'a. Ajta, aɨjna ɨ ti'itɨ tɨ ti'ivaɨre'e tɨ ij a'atɨ ayan urare'enya'acan cɨn huatyaturan ɨ Dioj jemi, capu aɨ na'a ɨ maj meyan ti'ijrɨ'ɨre ɨ ruhue'ira'a cɨme'e. Capu ajta aɨ na'a pɨrɨcɨ ɨ tɨ te'eyu'usi'i ɨ yu'uxari jetze, silu ai pu aɨn pɨrɨcɨ tɨ aɨn xaijnyu'ucara'ara'an ɨ Dioj ayan rɨ'ɨ raaruuren ɨ a'atɨ ɨ tzajta'an. Ajta aɨjna ɨ maj cɨn rɨ'ɨ tiraata'asin aɨjna ɨ a'atɨ, capu hua'a jemi e'iraninyeica ɨ tyaɨte silu Dioj pu jemi e'iraninyeica.

will be added

X\