Romanos 15

1Tyajta ityan, i tyej tyamua'a naa tiru'umua'aree a'ij tɨ een ɨ Dioj jemi, ayaa pu tiraavijte'e tyej tya'utaviicue'i tyaɨjna cɨme'e a'ij maj ti'ijrɨ'ɨre aɨme ɨ maj cai xɨ yau'eite tyamua'a naa ɨ Dioj jemi. Tiche'e cai teyan tyana'a rahuauca ityejmi cɨme'e a'ij tɨ tita'amitejte'e, silu tiche'e rɨ'ɨ tihua'uta'an ɨ seica. 2Ayaa pu titaavijte'e ityejmi, a'achu tyaj pua'amua, tyej ti rɨ'ɨ tiraatyavaɨre'en ɨ ta'ihuaara'a tɨ ij aɨn eitze'e raayɨ'ɨtɨhua'an a'ij tɨ ti'ijxe'eve'e ɨ Dioj. 3Ayaa pu xaa nya'u Cɨriistu'u ajta ayan huarɨj. Capu ayaa na'a rahuauca'a a'ij tɨ tira'aranajchaca'a, silu ayaa pu raara'aste a'ij tɨ te'eyu'usi'i tɨcɨn: “Ayaa pu nyeetzi japua rajve maj na'ajtya'axɨ mueetzi jetze ma'acan.” 4Ayaa pu'u, a'ini nain tɨj na'a tɨ ajna'ɨmɨ á'ayu'usi'ihuaca'a, ayaa pu een cɨn te'eyu'usi'ihuaca'a tyej ti jetzen huatamua'aten, tɨ ij aɨn tɨ á'ayu'usi'ihuaca'a ca'anijra'a taata'acare'en tyej ti teyan tya'utaviicue'i, tyajta teyan rachue'eva'a tɨ Dioj ayan tu'irajtuaani. 5- 6Ajta aɨn Dioj tɨ ayan ca'anijra'a amuaata'aca sej si seyan huatyaujca'anyen, ajta sej si tya'utaviicue'i, che'e aɨn ajta amuaata'acare'en sej rɨ'ɨ titetyújchaɨ rujɨɨmua'a sej si seyan ru'ihuaamua'a xa'ara'ani tyamua'a naa a'achu saj pua'amua. Che'e Dioj rɨ'ɨ tyajamuaata'acare'en aɨjna cɨme'e saj sauj seyan ra'astijre'e ɨ Cɨriistu'u tɨ ajta i'i Jesús, sej si naijmi'i seyan rɨ'ɨ tiraata'an saɨjna ɨ Dioj tɨ ya'upuaara'an pueen ɨ tavastara'a, aɨjna ɨ Jesús tɨ ajta i'i Cɨriistu'u. Sata'aj seyan rɨ'ɨ tiraata'acare'en a'achu saj ru'umua'aree ɨ a'amuatzajta'a. 7Sata'aj seyan che'eta sana'a ancura'ujvi'itɨn seij sajta seij a'ij tɨ Cɨriistu'u ajta amua'ancure'evi'itɨ muejmi sej si seyan saɨjna cɨn rɨ'ɨ tiraata'an ɨ Dioj. 8- 9Ayaa nu tyaja'amue'ixaate'e tɨ aɨn Cɨriistu'u ayan aɨjna cɨn te'entyajrupi tɨ ij hua'utyavaɨre'en aɨme ɨ maj runavij antisi'iche aɨjna cɨme'e mej meyan raamua'aree tɨ Dioj tzaahuati'ira'a cɨn arauraste a'ij tɨ ari tya'ataujratziiri'i. Cɨriistu'u pu nain cɨn tya'ataujratziiri'i hua'a jemi ɨ hua'ahuaacɨxa'astyamua'acɨ'ɨ mej mi aɨme ɨ mej seij chuejra'a japua e'ema'acantacaa majta meyan rɨ'ɨ tiraata'asin ɨ Dioj maɨjna cɨme'e tɨ aɨn hua'ancu'uvajxɨ. Ayaa pu te'eyu'usi'i tɨcɨn: Aɨj nu cɨn rɨ'ɨ timuaata'asin hua'a tzajta'a aɨme ɨ mej seij chuejra'a japua e'ema'acan. Ayaa nu ti'ichuiica na'ame nyej ni nyaɨjna cɨn rɨ'ɨ timuaata'an. 10Ajtahua'a ayan tɨcɨn: Sata'aj huataujtyamua'ave'en hua'a jamuan ɨ tyaɨtestyamua'ame'en pueen ɨ Israel tyaacan, muaan mɨ sej seij chuejra'a japua e'ema'acan. 11Ajtahua'a seij ayan tɨcɨn: Sata'aj rɨ'ɨ tiraata'an ɨ tavastara'a, naijmi'i muan, a'achu saj pua'amua, mɨ sej seij chuejra'a japua e'ema'acan. Sata'aj sajta seyan tyu'utachuiica ɨ jemin sej si saɨjna cɨn rɨ'ɨ tiraata'an, naijmi'i muan, mɨ tyaɨte sej yan huachaatɨme chaanaca japua. 12Ajtahua'a, ayan tyu'utaxajtaca'a aɨjna ɨ Isaías tyaacan tɨcɨn: Seij pu airaujneijte'esin aɨjna jetze ɨ Isaí. Aɨ pu ayan huataseijre'esin tɨ ij ayan tihua'utaijte'en naijmi'ica aɨme ɨ mej seij chuejra'a japua e'ema'acan. Majta aɨme, ayaa mu rajchu'eve'esin tɨ'i aɨn hue'irajtuaani. 13Ajta aɨn ɨ Dioj tɨ ayan ca'anijra'a tata'aca tej ti teyan raachu'eve'en, che'e aɨn ayan rɨ'ɨ tyajamuaata'an sej si eihua huapɨ'ɨ huataujtyamua'ave'en, tɨ ij ajta amuaatyápua'arite'en tyamua'a naa saɨjna cɨme'e sej seyan ra'astijre'e saɨjna ɨ tavastara'a. Che'e aɨn ajta ayan rɨ'ɨ tyajamuaata'an sej si eitze'e seyan raachu'eve'en saɨjna cɨme'e saj saɨjna jetze araujca'anye ɨ xaijnyu'ucara'ara'an ɨ Dioj. 14Ayaa pu tina'amitejte'e inyeetzi tɨ ayan ti'ayajna muejmi cɨme'e sej seyan nain cɨn rɨ'ɨ titetyújcha'ɨ seij sajta seij. Nain xu u'umua'aree ɨ tɨ ruxe'eve'e, sajta seyan raayɨ'ɨtɨ sej si huauritii seij sajta seij. 15- 16Ayaa nu eihua ahuanyaca'anyaa nyej ni neyan tyajamuaatayu'use'en ti'itɨ cɨme'e. Capu ti'iseicaj na'a, canu nyajta ti'itzɨɨnya'acaa nyej neyan huarɨj, silu ayaa nu nyajtahua'a ti'itɨ cɨn amua'utamua'areeri'i nyaɨjna cɨme'e, a'ini Dioj pu ayan tinyeijca. Ayaa nu nyaɨjna cɨn te'entyajrupi nyej ni tyu'utyavaɨre'en ɨ Dioj jemi. Nyajta nu nyaɨjna cɨn antinmua'aree nyej neyan ratyavaɨre'en ɨ Cɨriistu'u, tɨ ajta i'i Jesús, nyej ni neyan tihua'uta'ixaate'en aɨme ɨ mej seij chuejra'a japua e'ema'acan a'ij tɨ ari huarɨj ɨ Dioj. Ayaa mu eenya'a mua'aju'un tɨj muaɨ'ɨvejri tɨ seij raatyajtuaa ɨ Dioj jemi tɨ ij ayan rɨ'ɨ tiraata'an. Ee xaa nya'u, aɨn ɨ xaijnyu'ucara'ara'an ɨ Dioj, aɨ pu ayan hua'aruuren mej mi meyan urare'enya'acan cɨn huatyaturan ɨ Dioj jemi. 17Aɨj nu cɨn huapɨ'ɨ huatantyamua'ave'e jemin ɨ Cɨriistu'u tɨ ajta i'i Jesús nyaɨjna cɨme'e nyej neyan ravaɨre'e ɨ Dioj. 18- 19Aɨj nu'u cɨn neyan a'anca'anye nyej tyaja'amue'ixaate'en nyaɨjna cɨme'e tɨ Cɨriistu'u ari ayan tyu'uruu aɨjna cɨme'e nyaj ravaɨre'e mej mi maɨn ɨ mej seij chuejra'a japua e'ema'acan meyan ra'ara'astijre'en maɨjna ɨ Dioj. Ayaa mu een cɨn ra'astijre'e maɨjna cɨme'e mej meyan raanamuajri'i a'ij nyej tyu'utaxajtaca'a, majta meyan naaseij inyeetzi a'ij nyej ti'itɨj cɨn huarɨj, nyej neyan huarɨj tɨ huapɨ'ɨ ruxe'eve'e, ɨ maj cɨn a'ij tya'utaseij, a'ini Dioj pu raatyajtuaa ɨ rumuare'eri'ira'a inyeetzi jemi aɨjna cɨme'e nyaj nyaɨjna jetze aranca'anyajca'a ɨ xaijnyu'ucara'ara'an ɨ Dioj. Aɨj nu cɨn nain japua neri tihua'uta'ixaa nyaɨjna ɨ nyuucari tɨ cɨme'en raxa ɨ Cɨriistu'u. Nainjapua tɨj na'a aun maj huachaatɨme u Jerusalén, nyajta meyee a'u maj e'ere'etya'acaa asta nyana'a cai nyaun ɨmɨ a'atanye nyaujna a'u maj a'uchaatɨme tɨj na'a tɨ aun huatacá'a u Ilírico, nain nu cɨn tihua'uta'ixaa ɨ Cɨriistu'u jetze ma'acan. 20Tɨj na'a nyaj autyejche nyaj ra'ara'astijre'en ɨ tavastara'a tɨ yu e'ire'enye, ayaa nu ahuanca'anye nyej neyan tihua'uta'ixaate'en ɨ nyuucari cɨme'e a'u maj cai xɨ a'anaj ya'unamuajri'i, nyej ni cai neyan che'eta nyana'a nyaɨjna jetze a'utejcheni a'u tɨ ari saɨj tyaja'umuáre. 21Me nyajta inyaa, ayaa nu huarɨj a'ij tɨ te'eyu'usi'i tɨcɨn: Aɨ mu raseijran maɨjna ɨ tɨ cai xɨ a'atɨ aɨjna cɨn tihua'uta'ixaa. Majta mu yau'eitaa mua'aju'un maɨjna ɨ maj cai xɨ a'anaj raanamuajri'i. 22Aɨj pu cɨn, mui'itɨ mu naata'ijmɨjri'i nyaj cai neyan nyaun a'atanyén muejmi jemi. 23- 24Aru ijii, a'ini capu che'e ma'a a'arɨ'ɨri nyej nyaun tyaja'umuare'en tɨj na'a ayun tɨ huaca'a, ajta a'ini pu'uri tyajaume a'achu pua'an ninye'ira'a nyej neyan ti'ijxe'eve'e nyej amuaja'uva'amuaare, ayaa nu ti'imua'atze nyej neyan huarɨni nyatɨ'ɨj nyaun a'umé'en u España. Ayaa nu ti'ijxe'eve'e inyaa nyej nyaun amuaja'utéseijra nyatɨ'ɨj nyaun a'umé'en, tyej ti a'atzu huatatyamua'ave'en tajɨɨmua'a, sej si sajta naatavaɨre'en nyej ni nyajtahua'a u a'umé'en a'u nyaj a'uméj. 25Me nyajta inyaa, ijii, u nu a'uma'a na'ame u Jerusalén nyej ni hua'utavaɨre'en aɨme ɨ mej maun e'eche ɨ ta'ihuaamua'a, ɨ mej Dioj jemi seijre'e. 26Majta aɨme ɨ mej maun Macedonia huachaatɨme, majta aɨme ɨ maj maun Acaya e'ema'acan, ayaa pu hua'aranajchaca'a mej ti'itɨj hua'uta'an aɨme ɨ maj cai a'ij ti'ijviicue'i, ɨ maj maun e'eche u Jerusalén. 27Ayaa pu tihua'aranajchaca'a mej meyan huarɨni. Ee xaa nya'u, ayaa mu tihua'achaɨra'acaa, a'ini aɨme ɨ mej seij chuejra'a japua e'ema'acan, ayaa pu tihua'ucɨ'ɨ maj ra'ancura'an maɨjna ɨ tɨ cɨn Dioj rɨ'ɨ tihua'uta'a aɨme ɨ mej Israel jetze ajtyama'acantaca'a. Aɨj mu cɨn aɨme ɨ mej seij chuejra'a japua e'ema'acan meyan tihua'achaɨre'e maj meyan ti'itɨ tihua'uta'an maɨjna ɨ maj cɨn huataujvaɨre'en. 28Ayaa nu anacai hua'utatuiire'esin nyaɨjna ɨ mej tyu'uta'a ɨ ta'ihuaamua'a. Nyatɨ'ɨj nain cɨn ra'anticɨ'ɨ, aj nu ni nyaun a'uméj muejmi jemi. Nyajta e'eyan u a'uma'a na'ame u España. 29Ayaa nu ru'umua'aree tɨ ayan te'eme ajna nyatɨ'ɨj nyaun a'umé'en muejmi jemi tɨ aɨn tavastara'a ayan nain cɨn rɨ'ɨ titaata'an naijmi'ica ityejmi. Capu ti'itɨ a'ij tita'aturaatya'a a'ame. 30Ayaa nu tyaja'amuahuavii, nye'ihuaamua'a mɨ saj sajta ra'ara'astijre'en ɨ tavastara'a, aɨjna ɨ Jesús tɨ ajta i'i Cɨriistu'u, sej si seyan tinaatyavaɨre'en saɨjna cɨme'e ɨ nyaj cɨn tí'ityese'e. Sata'aj seyan ti'ijhuaviira ɨ Dioj inyeetzi cɨme'e. 31Sata'aj seyan ti'ijhuaviira tɨ ij aɨn Dioj ayan nu'irajtuaani mej mi cai á'ij nyaruure aɨme ɨ maj cai meyan ra'ara'astijre'e ɨ tavastara'a, aɨme ɨ maj Judea huachaatɨme. Sata'aj sajta seyan rahuaviira mej mi maɨn ɨ mej Dioj jemi seijre'e, ɨ maj Jerusalén e'ema'acan, mej mi meyan ra'ancura'an ɨ nyaj cɨn hua'utavaɨre'en. 32Ayaa xu huarɨni nyej ni nyaun a'umé'en muejmi jemi tɨ pua'a Dioj ayan naata'acare'en, tyej ti tajɨɨmua'a huatatatyamua'ave'en, tyej ti tyajta ca'anijra'a huatáta'an seij tyajta seij. 33Ajta aɨn ɨ Dioj tɨ rɨ'ɨ taatyapua'ari, che'e aɨn ayan huatyaturan naijmi'ica jemi, muejmi. Che'e ayan tyaja'ure'enyen.

will be added

X\