Romanos 14

1Tɨ pua'a a'atɨ cai xɨ ru'umua'aree a'ij tɨ huataujmua'a tɨ ayan ra'ara'astijre'en ɨ tavastara'a, sata'aj ra'ancure'evi'itɨn ruxé'evi'ira'a cɨme'e. Caxu seyan sana'a ra'axɨjtya'a saɨjna cɨme'e a'ij tɨ tira'amitejte'e aɨjna. 2Ayaa pu maujmua'are ɨ seij ɨ Dioj jemi tɨ ayan ti'ita'aca tɨ nain tyu'uca'ani, ajta aɨjna ɨ saɨj, tɨ cai tyamua'a naa tiru'umua'aree a'ij tɨ een ɨ Dioj jemi, ayaa pu tira'amitejte'e tɨ ayaa na'a ti'ita'aca tɨ raacua'ani tɨ tye'ejnyéj a chuaata'a. 3Ayaa pu tyu'ujxe'eve'e tɨ aɨn ɨ tɨ nain ti'icua'aca cai ayan raxaahuata aɨjna tɨ cai nain ti'icua'aca. Ajta aɨn tɨ cai nain ti'icua'aca, ayaa pu che'eta na'a ruxe'eve'e tɨ aɨn cai ra'axɨjtya'a aɨjna tɨ nain ti'icua'aca, a'ini Dioj pu ajta ayan ra'ancure'evi'itɨ aɨjna ɨ a'atɨ. 4Pajta muaa, mɨ pej cai nain ti'icua'aca, ¿a'ataani ayan aɨjna cɨn timuéijca pej peyan ra'axɨjte'en ɨ a'atɨ tɨ seij jemi ti'ivaɨre'e? Capu a'atɨ, a'ini seij pu ti'iraijte'e. Ajta aɨn ɨ a'atɨ, aɨ pu ara'astijre'esin aɨjna tɨ ti'iraijte'e. Na'ari tɨ pua'a cai ayan huarɨni, aɨ pu jemin mue'itɨche'en. Ma ajta, aɨjna tɨ nain ti'icua'aca, aɨ pu xaa ara'astijre'esin, a'ini tavastara'a pu ca'anijra'a raata'asin tɨ ij ayan ra'ara'astijre'en. 5Ajta saɨj jemi, ayaa pu tira'amitejte'e tɨ sei xɨcaj ayan eitze'e ruxe'eve'e ɨ Dioj jemi cai seica xɨcajra'an jetze. Ajta seij jemi, ayaa pu tira'amitejte'e tɨ ruxa'aj na'a ayan e'en nain xɨcajra'an jetze. Miche'e meyan rujɨɨmua'a mana'a tiraaxa'apɨ'ɨntare'en tyamua'a naa, a'ij tɨ tya'umua'atze ɨ rutzajta'a ɨ tɨ xa'apɨ'ɨn een ɨ Dioj jemi. 6Aɨjna tɨ ayan tira'amitejte'e tɨ seij xɨcajra'an jetze eitze'e ruxe'eva'a, ayaa pu tiraaxa'apɨ'ɨntare ɨ tavastara'a jemi. Ajta aɨn tɨ nain ti'icua'aca, ayaa pu ajta rɨcɨ ɨ tavastara'a jemi, a'ini aɨjna ɨ a'atɨ ajta pu rɨ'ɨ tirata'aca ɨ Dioj. Ajta aɨn tɨ cai nain ti'icua'aca, aɨ pu ayan che'eta na'a ti'icua'aca ɨ tavastara'a jemi. Aɨ pu ajta rɨ'ɨ tirata'aca ɨ Dioj. 7Ayaa pu'u, a'ini tyatɨj tyana'a pua'amua ityan, capu a'atɨ ayan rusaɨj ruuri. Capu ajta ayan rusaɨj mɨ'ɨni. 8Tɨ pua'a teyan i'iruuri, ayaa tu i'iruuri tyej ti rɨ'ɨ tiraata'an ɨ tavastara'a na'ari tɨ pua'a teyan huacui'ini, ayaa tu che'eta tyana'a cui'ini tyej ti huatatatuiire'en ɨ tatevij cɨme'e tyaɨjna jemi. Aɨj pu cɨn, capu amɨn a'ij tɨ pua'a teyan i'iruuri nusu tɨ pua'a teyan huacui'ini. Tyauche'e tu tavastara'a jetze ajtyama'acan. 9Aɨj pu cɨn, Cɨriistu'u ayan huamɨ'ɨ, ajta a'itáraa hua'a tzajta'a ɨ mɨ'ɨchite tɨ ij aɨn ayan hua'avastara'a pueenya'a a'ara'ani aɨme ɨ mej meri huacuii, ajta aɨme ɨ maj mauj i'iruuri. 10Pajta muaa, ɨ paj cai xɨ ru'umua'aree tyamua'a naa, ¿a'ini een cɨn peyan ra'axɨjte'e ɨ a'ihuaara'a? Pajta muaa, ɨ paj nain cɨn ti'ita'aca, a'ini een cɨn peyan raxaahua paɨjna ɨ e'ihuaara'a. Capu a'atzu ayan tiraavijte'e sej seyan rɨjca, a'ini naijmi'i tu teyan huataseijre'esin aɨjna jemi ɨ Dioj tɨ ij aɨn ayan ta'uxɨ́jte'en naijmi'ica ityejmi. 11Ayaa pu xaa nya'u te'eyu'usi'i tɨcɨn: Ayaa pu ti'ixa aɨjna ɨ tavastara'a tɨcɨn: A'ini nyaa nu ruuri, ayaa pu ti'ayajna, matɨj mana'a pua'amua maj yan chaanaca japua seijre'e, aɨ mu titunutaxɨ'ɨsin inyeetzi jemi. Aɨ mu majta, meyan rɨ'ɨ tinaata'asin maɨjna cɨme'e ɨ nyaj Dioj pueen. 12Aɨj pu cɨn, a'achu tyaj pua'amua tyaj yan seijre'e, naijmi'i tu teyan tyu'utaxajta mé jeijre'e ɨ Dioj jemi a'ij tyaj ti'itɨj cɨn huarɨj. 13Aɨj pu cɨn, tiche'e teyan raatapua'ajta tyej teyan tya'ataxɨjte'e tajɨɨmua'a. Aru tiche'e teyan raaxa'apɨ'ɨntare'en ɨ ta tzajta'a tyej ti cai che'e ti'itɨj cɨn raatamuáre'eristen ɨ ta'ihuaara'a, nusu tyej ti cai che'e ca'anijra'a raata'an tɨ ij ti'itɨj cɨn huamue'itɨchen ɨ Dioj jemi. 14Ayaa nu ru'umua'aree inyaa, a'ini ayaa nu tyu'unamuajri'i nyaɨjna jemi ɨ tavastara'a, aɨjna ɨ Jesús tɨ ayan ti'ayajna. Tɨj na'a tɨ seij racua'aca tɨ ti'icue'iri'i pueen, capu rusaɨj na'a raxana'ave'e aɨjna tɨ racua'aca. Ma ajta, tɨ pua'a aɨjna jemi ɨ a'atɨ ayan tira'amitejtya'a tɨ ti'itɨ ayan xana'avi'ire'e, aɨjna jemi pu xaa ayan een, tɨ ayan xana'avi'ire'e. 15Tɨ pua'a peyan ca'anijra'a rata'aca ɨ e'ihuaara'a tɨ aɨn cai ayan racua'aca ɨ ti'itɨ ɨ paj xaa racua'aca, rɨ'ɨríista a'ame paj raaje'ihua'atan i tzajta'an a'ini, aɨjna jemi, aɨ pu xana'avi'ire'e aɨjna tɨ raacuaa. Capaj xa'apɨ'ɨn huarɨj. Capaj xaa nya'u raxe'eve'e ɨ e'ihuaara'a paɨjna cɨme'e paj ca'anijra'a raata'a tɨ ayan huarɨni a'ij tɨ tiraaje'ihua'ajtaca'a. Capej ra'antipua'arite'en ɨ e'ihuaara'a a'ini Cɨriistu'u pu jetzen ma'acan huamɨ'ɨ aɨjna ɨ e'ihuaara'a. 16Capaj che'e peyan ti'itiá'acha'ɨ. Na'ari cai, ayaa mu seica meyan ti'ijxájtzi'ira'a mua'ara'ani maɨjna tɨ ayan timua'amitejte'e tɨ xa'apɨ'ɨn een. 17Ayaa nu tyaja'amue'ixaate'e a'ini aɨjna tɨ ayan titaacɨ́'ɨ tɨ Dioj ayan ti'itaijte'e naijmi'ica ityejmi, capu ayan aɨjna cɨn tyej teyan ti'icua'aca na'ari tyej teyan ya'aca. Capu xaa nya'u, silu ayaa tu urare'enya'acan cɨn huatyajturaa ɨ Dioj jemi. Tyajta rɨ'ɨ tityeetyajturaa ɨ ta tzajta'a. Ajta, aɨ pu ca'anijra'a taata'a aɨjna ɨ xaijnyu'ucara'ara'an ɨ Dioj tyej ti teyan huatatatyamua'ave'en. 18Ee xaa nya'u, a'atɨ tɨ na'a tɨ ayan ravaɨre'e ɨ Cɨriistu'u, aɨjna ɨ a'atɨ ayaa pu rɨ'ɨ tirata'aca ɨ Dioj. Majta maɨn ɨ tyaɨte, ayaa pu ajta hua'aranajchi tɨ ayan ti'ijrɨ'ɨre aɨjna ɨ a'atɨ. 19Aɨj pu cɨn tiche'e teyan ahuataca'anyen tyej ti teyan rɨ'ɨ ti'itítacháɨ tej teyan ta'ihuaamua'a ta'ara'ani tyamua'a naa, tyej tyajta rɨ'ɨ huátaruuren tajɨɨmua'a tyej ti eitze'e raayɨ'ɨtɨhua'an a'ij tɨ ti'ijxe'eve'e ɨ Dioj. 20Caxu saɨjna cɨn raatyauunan saɨjna tɨ Dioj ayan raatyajtuaa hua'a jemi ɨ a'amue'ihuaamua'a saɨjna cɨme'e saj nain ti'icua'aca. Naa pu ti'ire'en tɨj na'a tɨ ti'icue'iri'i. Ma ajta, tɨ pua'a a'atɨ aɨjna cɨn ca'anijra'a raata'an ɨ ru'ihuaara'a tɨ aɨn ihuaara'ara'an ayan raacua'ani aɨjna tɨ raaje'ihua'a ɨ Dioj jemi, aɨj pu cɨn ayan autyaturaasin ɨ Dioj jemi aɨjna ɨ a'atɨ tɨ ayan ca'anijra'a raata'a ɨ ru'ihuaara'a. 21Aɨj pu cɨn, eitze'e pu ayan tiraavijte'e paj cai peyan racua'aca ɨ hue'ira'a ca'ɨn paj cai peyan raya'aca ɨ nahuaj. Jee xaa nya'u pata'aj cai peyan ti'itɨj cɨn a'ij huarɨni tɨ ayan ca'anijra'a raata'acare'en tɨ aɨn e'ihuaara'a ti'itɨj cɨn autyaturan ɨ Dioj jemi. 22Tɨ pua'a ayan timua'amitejte'e tɨ ayan ti'ire'en ɨ Dioj jemi pej peyan ti'itɨ huacua'ani, pata'aj peyan asaɨj pana'a aviitzi cɨn tiru'umua'areera. Capej peyan ti'ixajta me jeijre'e, tyaɨte tzajta'a. Che'e huaujtyamua'ave'en aɨjna ɨ a'atɨ tɨ cai rumua'atziira'a cɨn a'ujxɨjte'e aɨjna cɨme'e a'ij tɨ ti'itɨj cɨn rɨcɨ, a'ini aɨ pu ari ayan tiraaxa'apɨ'ɨntare tɨ ayan ti'ire'en ɨ Dioj jemi. 23Ma ajta aɨn ɨ a'atɨ, tɨ pua'a cai xɨ tyamua'a naa tiraaxa'apɨ'ɨntare tɨ ayan ti'ire'en ɨ Dioj jemi tɨ ij ti'itɨ huacua'ani, tɨ pua'a ayan racua'aca, aɨ pu aɨjna cɨn a'ujxɨjte'en tɨ a'ij pua'a rɨcɨ a'ini aɨ pu cai tya'atzaahuatya'a ayan racua'a. Ajta, ti'itɨ tɨ na'a tɨ a'atɨ ayan cɨn rɨcɨ, tɨ pua'a cai ayan tiraaxa'apɨ'ɨntare tɨ ayan ti'ire'en ɨ Dioj jemi tɨ ayan huarɨni, aɨ pu aɨjna cɨn autyaturaasin ɨ Dioj jemi tɨ pua'a ayan rɨjca, a'ini capu tya'atzaahuatya'acaa.

will be added

X\