Romanos 13

1Ayaa pu tyu'ujxe'eve'e tɨ a'atɨ tɨ na'a ayan hua'ara'astijre'en aɨme ɨ mej ti'itɨj cɨn antyujmua'aree. Dioj pu ayan raaxa'apɨ'ɨntare mej meyan ti'itɨj cɨn títyataté'en. Aɨj pu cɨn Dioj ayan hua'antihuau. 2Aɨj pu cɨn, tɨ pua'a a'atɨ cai huataura'an tɨ ij ayan hua'ara'astijre'en, aɨ pu ajta ma rúuhua'ana aɨjna tɨ Dioj ayan raatyajtuaa iiyan chaanaca japua. Ajta, tɨ pua'a a'atɨ ayan huarɨni, pueijtzi pu aɨjna japua rávaɨjtzi. 3- 4Tɨ pua'a a'atɨ ayan rɨ'ɨ ti'ityujcha'ɨ, capu ruxe'eve'e tɨ aɨn a'atɨ ayan hua'atzɨɨnya'a aɨme ɨ mej ti'itɨj cɨn antyujmua'aree. Ma ajta aɨjna tɨ a'ij pua'a ti'ityujcha'ɨ, ayaa pu xaa nya'u tiraavijte'e tɨ aɨn ayan hua'atzɨɨnya'a aɨme ɨ mej ti'ijta. Tɨ pua'a peyan ti'ijxe'eve'e paj cai ti'itɨj cɨn ratzɨɨnya'a paɨjna tɨ ti'ijta, pata'aj peyan huarɨni ti'itɨj cɨme'e tɨ i'i xa'apɨ'ɨn. Tɨ pua'a peyan huarɨni, ayaa pu rɨ'ɨ timuaata'asin aɨjna tɨ ti'ijta, a'ini Dioj pu aɨjna cɨn ra'antihuau tɨ ij aɨn ti'ityava'ɨrihua'an jemin. Ma ajta, tɨ pua'a peyan a'ij pua'a títiá'acha'ɨ, aj paj xaa ratzɨɨnya'a pua'ame, a'ini aɨ pu aɨjna cɨn antyujmua'aree tɨ pueijtzi muaata'an. Aɨ pu xaa nya'u ti'ivaɨre'e ɨ Dioj jemi tɨ ij Dioj jetze ma'acan ayan pueijtzi hua'uta'an aɨme ɨ maj a'ij pua'a titetyújcha'ɨ. 5Aɨj pu cɨn, ayan tyu'ujxe'eve'e sej seyan hua'ara'astijre'en aɨme ɨ mej ti'itɨj cɨn títyatatí tɨ ij cai ayan a'amua japua rájveti ɨ pueijtzi. Ayaa pu ajta ruxe'eve'e aɨjna cɨme'e sej seyan ra'ara'astijre'e ɨ Dioj. 6Ayaa pu ajta tyu'ujxe'eve'e saj sajta saɨjna cɨn ti'inajchita aɨjna tɨ a'amuajijve'e, a'ini aɨme ɨ mej meyan a'amuajijve'e, aɨ mu ti'ivaɨre'e ɨ Dioj jemi. Tɨ'ɨj pɨ na'a nain xɨcaj tzajta'a, ayaa mu maɨjna cɨn ti'ivaɨre'e. 7Tɨ pua'a peyan a'atɨ te'echaɨre'e, pata'aj peyan tiraanajchite'en a'achu paj caj tira'achaɨre'e, na'ari tɨ pua'a peyan paɨjna cɨn te'echaɨ ɨ mej uvieernu jemi muajijve'e, pata'aj peyan che'eta pana'a tihua'unajchite'en. Ajta tɨ pua'a peyan paɨjna cɨn te'echaɨ ɨ mej muajijve'e maɨjna cɨme'e ɨ pej ti'itu'araca, pata'aj pajta peyan paɨjna cɨn tyu'unajchi. Tɨ pua'a ayan tiraavijte'e pej peyan rɨ'ɨ tihua'ajchaɨ aɨme ɨ mej ti'ijta, pata'aj peyan huarɨni. Na'ari tɨ pua'a ayan tiraavijte'e pej rɨ'ɨ tihua'utyajtuaani aɨme ɨ mej ti'itátyatyá'upu'u, pata'aj peyan rɨ'ɨ tihua'uta'an. 8Sata'aj nain cɨn tyu'unajchita sej si cai che'e ti'itɨj cɨn te'echaɨ ɨ a'amuaxá'a tevi jemi. Ayaa xu'u sana'a saɨjna cɨn tira'achaɨra'a ɨ saɨj saj huaujxe'eve'en seij sajta seij, a'ini aɨjna tɨ ayan raxe'eve'e ɨ ruxa'a tevi, aɨ pu aɨjna cɨn ari ra'ara'astijre aɨjna ɨ nyuucari ɨ maj cɨn ti'ijta. 9Ayaa pu tihua'utaij tɨcɨn: “Capej ti'ixana'acɨra'a.” Ajta ayan tɨcɨn: “Capej ti'ityacui'ica.” Ajta i'i tɨ ayan tɨcɨn: “Capej ti'inahua'a.” Ajta i'i tɨ ayan tɨcɨn: “Capej ti'inyacua'atza.” Naijmi'i ɨ nyuucari tɨ ayan een, ajta ti'itɨ tɨ a'ij tɨ ra'itya'asi, naijmi'i tɨj na'a tɨ ayan, aɨ pu ara'ase aɨjna jetze ɨ nyuucari tɨ ayan te'eyu'usi'i tɨcɨn: “Pata'aj peyan raxe'eva'a ɨ axa'aj tevi patɨj asaɨj ti'axe'eve'e.” 10Tɨ pua'a a'atɨ ayan tzaahuati'ira'a cɨn raxe'eva'a ɨ ruxa'aj tevi, aɨ pu cai a'anaj a'ij pua'a raruuren. Aɨj pu cɨn, aɨjna ɨ a'atɨ nain cɨn ra'ara'astejsin aɨjna ɨ nyuucari ɨ maj cɨn ti'ijta. 11Sata'aj seyan huarɨni saɨjna cɨme'e sej seri ru'umua'aree ti'itɨj tɨ xɨcaara'an jetze pɨti'irɨcɨ. Pu'uri ayan tyaja'ure'enye sej rɨ'ɨ huaujruuren sej si atanyéjnye'eri tyamua'a naa, a'ini pu'uri eitze'e vejli'i ajna xɨcaara'an tɨ jetzen Dioj tajapua nyuuni. Pu'uri xaa nya'u eitze'e vejli'i tɨ cai vejli'itaca tyatɨ'ɨj anacai tya'antzaahua. 12Pu'uri eitze'e huatɨca'a aɨjna tɨ jetzen ti'ijta aɨjna tɨ a'ij pua'a een. Pu'uri ajta vejli'i ajna xɨcaara'an tɨ jetzen Cɨriistu'u tajapua nyuuni. Aɨj pu cɨn, tiche'e teyan ma rúuhua'axɨn tɨj na'a tɨ a'ij pua'a een tyej teyan anacai tyaɨjna cɨn rɨjcaa. Tiche'e tyajta tyaɨjna jetze arataca'anyen ɨ tyaj cɨn raatyamue'itɨn tyaɨjna ɨ tyaj cɨn ti'ityese'e. 13Tiche'e teyan rɨ'ɨ ti'ititachaɨca a'ij mej ti'ijrɨ'ɨre ɨ tyaɨte maj nyeeriste'e á'ujhua'an. Tiche'e tyajta cai che'e teyan a'ij pua'a eenya'acan cɨn ti'iyestya, tyajta cai che'e a'ij pua'a ti'ityata'aru, tyajta cai che'e ti'ixana'acɨra'a hua'a jamuan ɨ maj tyu'unacua'atziste'e, tyajta cai che'e ti'ixana'acɨra'a seij jamuan tɨ cai aɨn pueen ɨ tyaj yá'uvi'itɨn. Tiche'e tyajta cai teyan nya'usa'a tajɨɨmua'a. Capu ajta xa'apɨ'ɨn tyej teyan a'atachueera'a tajɨɨmua'a. 14Ma sajta muan, sata'aj seyan rɨ'ɨ titetyújchaɨca a'ij tɨ ti'ityújchaɨca'a ɨ tavastara'a, aɨjna ɨ Jesús tɨ ajta Cɨriistu'u pueen. Caxu che'e seyan saɨjna jetze ti'imuajca a'ij sej ye'i huarɨni sej si seyan ra'ara'astijre'en saɨjna tɨ a'ij pua'a een tɨ huiiraninyei ɨ a'amuatzajta'a.

will be added

X\