Romanos 12

1A'ini Dioj pu ari amua'ancu'uvajxɨ, ayaa nu tyaja'amuahuavii, nye'ihuaamua'a, sej si seyan huataujtuiire'en ɨ Dioj jemi ɨ rutevi cɨme'e, sata'aj raatyajtuaani ɨ Dioj jemi, ɨ saj sajta cɨn rɨ'ɨ tiraata'an. Tɨ pua'a seri seyan huarɨni, aj xu si raatyavaɨre'en a'ij tɨ tiraavijte'e, saj ruuri cɨn huataujmuaɨ'ɨvajta. 2Caxu seyan tityataura'acare'en sej seyan che'eta sana'a titetyújchaɨ matɨj aɨme ɨ seica ɨ mej yan japuan seijre'e i chaanaca. Caxu xaa nya'u seyan rɨjca muan, silu sata'aj seyan saɨque huaujruuren saɨjna cɨme'e sej seri huaujjajcuare ɨ á'amuamua'atziira'a jetze. Aj xu seyan ramua'areeran a'ij tɨ ti'ijxe'eve'e ɨ Dioj, sajta seyan ramua'areeran ti'itɨ tɨ i'i xa'apɨ'ɨn ɨ Dioj jemi, ti'itɨ tɨ ayan tira'araanajchi, nusu a'ij sej huarɨni sej si nain cɨn ra'ara'astijre'en a'ij tɨ Dioj ti'ijxe'eve'e. 3A'ini Dioj pu aɨjna cɨn tinyeijca nyej ni neyan tyajamuáamua'aten, ayaa nu tyaja'amue'ixaate'e naijmi'ica muejmi. Che'e cai a'atɨ ayan a'ujtzaahuatya'a, a'ini capu ayan tiraavijte'e. Caxu xaa nya'u seyan rɨjca, silu sata'aj seyan rɨ'ɨ me titya'umuámua'ara'a ɨ ru jetze. Sata'aj seyan saɨjna jetze tyu'umua'ati a'ij tɨ ti'itɨj cɨn Dioj ari tyajamueijca, seij ajta seij. Ayaa pu xaa nya'u tiraavijte'e. 4Ayaa pu'u na'a. Tyatɨj tyana'a pua'amua tyej teyan ratyáhue'ira'a, ajta capu ti'iseicaj na'a tɨj na'a ti'ityejve'e ɨ tajetze. Capu ajta ti'iseicaj na'a ɨ tɨ cɨn titaatyava'ɨri tyatɨj tyana'a teyan ti'ityejve'e, silu ayaa pu ti'imui'i. 5Ayaa pu che'eta na'a een tyej teri Cɨriistu'u jetze ajtyama'acan. I tyaj mui'itɨ ara'ase, ayaa tu naijmi'i ti'itaseijrata tyaj seij tyana'a jetze ajtyama'acan ɨ tevi. Ajta a'atɨ tɨ na'a tɨ ta jetze ajtyama'acan, aɨ pu ajta hua'a jetze ajtyama'acan ɨ seica, a'achu maj pua'amua. 6Capu ayan ruxa'a na'a titaacɨ́'ɨ ityejmi aɨjna ɨ tyaj cɨn teri ratyava'ɨri. Aɨj pu cɨn, tiche'e teyan tiraatyavaɨre'en a'ij tɨ aɨn Cɨriistu'u ayan rɨ'ɨ titaatá'a. Tɨ pua'a ayan tiraacɨ́'ɨ seij ɨ a'atɨ tɨ ayan tyu'utaxaj ɨ Dioj jetze ma'acan, che'e aɨn ayan jetzen ma'acan tyu'utaxajta a'achu tɨ caj ru'umua'aree. 7Tɨ pua'a ayan tiraacɨ́'ɨ seij ɨ a'atɨ tɨ ayan hua'utyavaɨre'en ɨ seica, che'e ayan hua'utyavaɨre'en, na'ari tɨ pua'a ayan tiraacɨ́'ɨ tɨ ayan tihuá'umua'aten ɨ seica, che'e ayan tihuá'umua'aten. 8Tɨ pua'a ayan tiraacɨ́'ɨ aɨjna ɨ a'atɨ tɨ ayan raayɨ'ɨtɨhua'an tɨ ca'anijra'a hua'uta'an ɨ seica, che'e ayan ca'anijra'a hua'uta'an. Seica pu ayan tihua'ucɨ'ɨ mej meyan tihua'utapueijve'en aɨme ɨ maj cai a'ij ti'ijviicue'i. Miche'e meyan ruxé'evi'ira'a cɨn tyamua'a naa tihua'utapueijve'en. Ajta aɨn tɨ ayan antyujmua'aree aɨjna cɨme'e tɨ ti'ijta teyujta'a, che'e aɨn a'ujca'anyaacan cɨn ti'ivaɨra'a. Ajta aɨn tɨ hua'acu'uve aɨme ɨ maj cai a'ij ti'ijviicue'i, che'e aɨn rutyámua'ava'acan cɨn hua'ancu'uvajxɨ'ɨn. 9Ayaa pu ruxe'eve'e saj tzaahuati'ira'a cɨn huaujxe'eve'en seij sajta seij. Sata'aj raatite saɨjna tɨ a'ij pua'a een, sajta seyan ra'ara'astijre'en saɨjna tɨ i'i xa'apɨ'ɨn. 10Sata'aj seyan huaujxe'eve'en seij sajta seij tɨj ru'ihuaamua'a naa. Sata'aj sajta seyan huataujca'anyen tyamua'a naa saɨjna cɨme'e saj rɨ'ɨ tyu'uta'an seij sajta seij. 11Caxu raaxaahuata saj ratyava'ɨrihua'an ɨ tavastara'a, silu sa'ujcanyaacan xu cɨn seyan saɨjna jetze huataujca'anyen ɨ xaijnyu'ucara'ara'an ɨ Dioj. 12Sata'aj huaujtyamua'ave'en saɨjna cɨme'e sej seyan ti'ijtɨj cɨn ti'ichue'eve'e tɨ Dioj jemi e'ema'acan. Sata'aj sajta seyan tya'utaviicue'i saɨjna cɨme'e ɨ saj cɨn rajpueiitzi xa'aye'i. Sauche'e xu rahuaviira ɨ Dioj. Caxu raatápuaapua'ata'an. 13Sata'aj seyan tihua'ura'an ɨ sej tí'ijcha'ɨ aɨme jemi ɨ maj cai a'ij ti'ijviicue'i. Sata'aj sajta seyan ruxé'evi'ira'a cɨn hua'ancure'evi'itɨn ɨ a'amuaxá'a tyaɨte ɨ ruche. 14Ayaa xu sajta seyan hua'uruuren aɨme ɨ mej a'ij pua'a a'amuaruure. Sata'aj rɨ'ɨ tihua'uta'an. Caxu seyan rahuaviira ɨ Dioj jemi tɨ ij aɨn pueijtzi hua'uta'an, silu rɨ'ɨ xu tihua'uta'an. 15Sata'aj seyan huaujtyamua'ave'en aɨme jamuan ɨ maj rutyamua'ave'e. Ayaa xu sajta huarɨni saj huatyáujxaamɨste'en aɨme jamuan ɨ maj ruxaamɨste'e. 16Sata'aj seyan rɨ'ɨ tí'ityechajca tɨj ɨ ru'ihuaamua'a naa. Caxu a'ujtzaahuatya'a, silu sata'aj seyan antyaujsaɨre'en hua'a jamuan ɨ maj cai ti'itɨ cɨn títyetyá'upu'u tɨ eihua ruxe'eve'e. Caxu seyan a'ujtzaahuatya'a ɨ rutzajta'a saj nu'u rɨ'ɨ me titya'umuámua'aree tyamua'a naa cai maa a'atɨ. 17Tɨ pua'a a'atɨ ayan a'ij pua'a a'amuaruure muejmi, caxu seyan che'eta sana'a a'ij pua'a raruure muan. Rɨ'ɨ xu'u sata'aj seyan sana'a huarɨni tɨ'i ayan rɨ'ɨ tihua'amityejya'a naijmi'ica ɨ tyaɨte saj xa'apɨ'ɨn rɨcɨ. 18Sata'aj seyan huarɨni, satɨj sana'a saj caj tiru'umua'aree, tɨ pua'a rɨ'ɨristan, sata'aj rɨ'ɨ titetyújchaɨ hua'a jemi ɨ seica ɨ tyaɨte, a'achu maj pua'amua. 19Caxu pueijtzi rata'acare'en ɨ a'atɨ tɨ ari a'ij pua'a amuaaruu, silu che'e aɨn Dioj ayan pueijtzi raata'an. Ayaa xu huarɨni, a'ini ayaa pu te'eyu'usi'i tɨcɨn: “Ayaa pu ti'inyacɨ'ɨpua inyeetzi nyej pueijtzi raata'an nyaɨjna ɨ a'atɨ tɨ a'ij pua'a muaaruu. Nyaa nu raata'asin nyaɨjna a'ij tɨ tiraavijte'e.” 20Ma sajta muan, ayaa xu huarɨni a'ij tɨ te'eyu'usi'i tɨcɨn: “Tɨ pua'a i'icuata aɨjna tɨ muájchaɨre'e, pata'aj tiraamín. Ajta tɨ pua'a huata'imɨn aɨjna ɨ a'atɨ, pata'aj jaj raata'an. Tɨ pua'a peyan huarɨni, ayaa paj pueijtzi raata'asin paɨjna cɨme'e paj xa'apɨ'ɨn raaruu. Aɨ pu xaa, aɨ pu tirajpueiitzi a'ame tyamua'a naa.” 21Caxu rata'acare'en tɨ aɨjna tɨ a'ij pua'a een ayan amuaamue'itɨn, silu sata'aj seyan tiraamue'itɨn saɨjna tɨ a'ij pua'a een saɨjna cɨme'e saj xa'apɨ'ɨn rɨcɨ.

will be added

X\