Romanos 11

1Aɨj nu cɨn neyan tyaja'amue'ihua'u. ¿Ni qui ari ma hua'uhua'axɨ ɨ Dioj aɨme ɨ maj tyaɨtestyamua'ame'en pueen? Capu xaa nya'u, a'ini capu ma nuurai inyeetzi, i nyaj nyajta Israel jetze ajtyama'acan, a'ini aɨj nu jetze airáanye ɨ Abraham tyaacan, nyajta hua'a jetze ajtyama'acan aɨme ɨ mej airaujneijte maɨjna jetze ɨ Benjamín. 2Ee xaa nya'u, capu ayan ma hua'uhua'axɨ ɨ Dioj aɨme ɨ rutyaɨtestyamua'a ɨ tɨ jajcua ɨmɨ hua'antihuau. ¿Ni sacai seyan ramua'aree a'ij tɨ te'eyu'usi'i ɨ yu'uxari jetze tɨ aɨjna cɨn ayan tya'axa a'ij tɨ aɨn Elías ayan tiraatyajhuau ɨ Dioj jemi tɨ ij aɨn pueijtzi hua'uta'an? Ayan tɨcɨn: 3“Casi'i, nyavastara'a, mu'uri hua'ucuii aɨme ɨ mej mueetzi jetze ma'acan ti'ixaxa'a. Majta meyan tyu'utauunaxɨ maɨjna ɨ tyajcua ɨ mej japuan ti'imuaɨ'ɨvajtaca. Nyaa nu'u ni ya huatyejvee. Capu che'e maa a'atɨ. Majta meri nyaje'icatacu.” Ayaa pu'u tyu'utaxajtaca'a aɨjna ɨ Elías. 4Ma ajta aɨn ɨ Dioj, ayaa pu tyu'utanyúu tɨcɨn: “Ayaa nu hua'utyajtuaa mej mi meyan huatyaturan inyeetzi jemi a'achu cumu arahua'apua vi'ira'a ɨ tyaɨte, ɨ maj cai a'anaj ranajchaca'a maɨjna ɨ Baal.” Ayaa pu tiraata'ixaa. 5Ayaa pu che'eta na'a seijre'e ijii aɨme ɨ maj tyaɨtestyamua'ame'en pueen. Dioj pu ruxé'evi'ira'a cɨn hua'antihuau. 6Ajta tɨ pua'a Dioj ayan hua'antihuau ruxé'evi'ira'a cɨme'e, capu che'e rɨ'ɨri mej meyan ti'itɨ cɨn te'entyarute ɨ jemin aɨjna cɨme'e mej meyan ti'itɨj cɨn ra'ara'astijren. Na'ari cai, capu ti'itɨ a'ij ti'ityava'ɨri tɨ Dioj ayan hua'antihuau ɨ ruxé'evi'ira'a cɨme'e. 7¿A'ini na'aqui? Aɨjna ɨ maj a'ujca'anyaacan cɨn rahuauca'a aɨme ɨ maj Israel jetze ajtyama'acantaca'a, camu ra'ancura'a maɨjna. Ma majta, aɨme ɨ tɨ Dioj hua'antihuau, aɨ mu xaa ra'ancura'a. Majta aɨme ɨ seica, Dioj pu ayan ca'anijra'a hua'uta'a mej mi antaujnaamɨn ɨ ruxaijnyu'uca ɨ jemin. 8Ayaa pu'u na'a, a'ini ayaa pu te'eyu'usi'i tɨcɨn: “Dioj pu ayan hua'uruu mej mi meyan tyu'ujtɨmue'ira ɨ rumu'u jetze. Ayaa pu hua'uruu tɨ ij cai a'ij tihua'amityejtya'a ɨ maj rasise'ij, mej mi majta cai yau'eitaa mua'ara'ani ɨ maj ranamuaj. Ayaa pu'i eenya'a ja'araa tɨj na'a tɨ yu e'ire'enye.” 9Ajta aɨn ɨ David tyaacan, ayaa pu tyu'utaxajtaca'a tɨcɨn: Miche'e cai che'e meyan rutyamua'ava'a maɨjna cɨme'e tɨ eihua tihua'ucɨ'ɨ, silu miche'e seica tihua'ari'i nain cɨme'e, majta hua'antipua'arite'en. Che'e ayan hua'a japua rajveti a'ij tɨ tiraavijte'e aɨjna cɨme'e mej auta'ɨtze ɨ Dioj jemi. 10Che'e cai ayan tihua'amityejtya'a a'ij tɨ ti'itɨ tihua'ucɨ'ɨti. Miche'e meyan tyaujca'anihua'an tɨj na'a tɨ yu auca'itɨ a'ame maɨjna cɨme'e maj ca'anyejri cɨn ti'imuare'e. 11Nyajta nu neyan tyaja'amue'ihua'u. ¿Ni qui meyan nain cɨn auta'ɨtze tɨ ij ayan hua'a japua rajveti mej rajpueiitzi mua'ara'ani tɨj na'a rusen cɨme'e, tɨ ij cai che'e rɨ'ɨristan tɨ Dioj hue'irajtuaani? Capu xaa nya'u a'atzu, silu ayaa pu eenya'a a'araa. A'ini aɨ mu autyajturaa ɨ Dioj jemi, Dioj pu ayan rɨ'ɨ tihua'uta'a aɨme ɨ mej seij chuejra'a japua e'ema'acan mej mi meyan ruuri huatyaturan ɨ jemin. Ayaa pu een cɨn huarɨj ɨ Dioj tɨ ij ayan hua'uruuren aɨme ɨ maj Israel jetze ajtyama'acan mej mi chueera'a mua'ara'ani. 12Ajta, tɨ pua'a Dioj ayan eihua huapɨ'ɨ rɨ'ɨ tihua'uta'a aɨme ɨ mej seij chuejra'a japua e'ema'acan aɨjna cɨme'e ɨ mej meyan huamue'itɨche ɨ jemin aɨme ɨ mej Israel jetze ajtyama'acantaca'a, eihua pu eitze'e huapɨ'ɨ tihua'uta'asin naijmi'ica ajna xɨcaara'an tɨ jetzen hua'anaijmire'en aɨme ɨ mej Israel jetze ajtyama'acan. 13Ayaa nu tyaja'amue'ixaate'e mɨ sej seij chuejra'a japua e'ema'acan, a'ini Dioj pu ayan tinaataij nyej neyan tyajamuaata'ixaate'en muejmi, ayaa nu tyu'utanca'anyej nyej ni nain cɨn jamuaatyavaɨre'en a'ij tɨ tiraavijte'e. 14Ayaa nu een cɨn rɨcɨ nyej nyaɨjna cɨn ca'anijra'a hua'uta'an nyaɨme ɨ nyaxa'aj tyaɨte tɨ pua'a rɨ'ɨristan mej mi chueera'a mua'ara'ani nyej ni je'icaca antimué'itɨn mej meyan rá'antzaahuate'en. 15Ayaa pu'u, tɨ'ɨj aɨn Dioj ayan ma hua'uhua'axɨ aɨme ɨ mej Israel jetze ajtyama'acantaca'a, aj pu i aɨn hua'ancure'evi'itɨ aɨme ɨ mej seij chuejra'a japua e'ema'acantacaa. ¿A'ini te'eme icu, tɨ'ɨj Dioj ajtahua'a hua'ancure'evi'itɨn aɨme ɨ mej Israel jetze ajtyama'acan? ¿Ni cai ayan seira'a a'ame tɨj tɨ pua'a Dioj ayan hua'ajjájpua hua'a tzajta'a ɨ mej meri huacuii? 16Niche'e seij nyuucari jamuaata'ixaate'en nyaɨjna cɨme'e ɨ cueijtzi ɨ maj pan huátaahuan. Tɨ pua'a Dioj huataura'ate'en aɨjna ɨ cueijtzi ɨ maj anacaican raatamuaɨ'ɨvejte, aɨ pu ajta huataura'ate'esin nain ɨ pan ɨ maj raataahuaca'a. Ajta, tɨ pua'a Dioj ayan huataura'ate aɨjna ɨ naana'a tɨ jetzen ajtanyéj ɨ cɨye, aɨ pu ajta huataura'ate naijmi'i ɨ pi'ista tɨ jetzen ajta'upu'u ɨ cɨye jetze. Ayaa pu che'eta na'a een muejmi jemi. 17Tiche'e teyan raataxaj tɨ Dioj ayan ra'antina'axɨ jetzen ɨ aceituuna je'icaca ɨ pi'ista. Aj pu ij seij antivi'ite ɨ pi'ista tɨ seij jetze ma'acantaca'a aceituuna tɨ rusaɨj ajnyej. Sajta muan, ayaa xu saɨjna jetze ajtyama'acantaca'a ɨ aceituuna tɨ rusaɨj ajnyej. Ajta ijii, muan xu seri saɨjna jetze ajtyama'acan tɨ Dioj jetze ra'antivi'ijte aɨjna ɨ pi'ista. Pu'uri amú'uca'anisti'i aɨjna tɨ a'ara'ara'an pɨrɨcɨ aɨjna ɨ aceituuna. 18Aɨj xu cɨn, caxu seyan a'ujtzaahuatya'a saɨjna cɨme'e ɨ tɨ Dioj ari ra'antina'axɨ aɨjna ɨ pi'ista. Tɨ pua'a seyan a'ujtzaahuatya'a sata'aj seyan tyu'umua'ati saɨjna jetze ɨ nyuucari tɨ ayan tɨcɨme'en yee “capu ayan muejmi jetze araujca'anye ɨ naana'ara'an aɨjna ɨ cɨye, silu muan xu saɨjna jetze araujca'anye ɨ naana'ara'an.” 19Tɨ pua'a seyan ti'ixajta tɨcɨn: “Ayaa pu ra'antina'axɨ aɨjna ɨ pi'ista tɨ ij ayan ta'antivi'ijtya'axɨ'ɨn ityejmi ɨ cɨye jetze.” 20- 21Ee xaa nya'u, ayaa pu ti'ayajna. Capu amɨn a'ij. Ayaa pu een cɨn hua'uruu aɨjna cɨme'e maj cai rá'antzaahua. Ma sajta muan, ayaa xu'u sana'a saɨjna jetze ajtyama'acan saɨjna cɨme'e sej seyan tya'atzaahuate'e. Caxu seyan a'ujtzaahuatya'a, silu sata'aj seyan ti'itzɨɨnya'a, a'ini Dioj capu ayan tiraatauuni'iri'i aɨjna ɨ pi'ista tɨ ajtanyajxɨ ɨ cɨye jetze tɨ re'en. Capu ajta tyajamuaatauuni'ira muejmi. 22Sata'aj seyan saɨjna jetze tyu'umua'ati ɨ tɨ cɨn Dioj amua'ancu'uvajxɨ muejmi, ajta ɨ tɨ cɨn muare'eri hua'uta'a aɨme. Aɨ pu muare'eri hua'uta'a aɨme ɨ maj autyajturaa ɨ jemin. Aɨ pu ajta amua'ancu'uvajxɨ muejmi. Ajta, ayaa pu auj á'amuaruuren tɨ pua'a seyan a'atyeevi'in saj saɨjna jetze araujca'anye tɨ cɨme'en Dioj rɨ'ɨ tyajamuaata'a. Na'ari cai, aɨ pu ajta ma amúuhua'axɨjsin muejmi. 23Ajta aɨme, tɨ pua'a macai che'e a'ateevi'in maj cai meyan tya'atzaahuatya'a, Dioj pu ayan ajtahua'a hua'antivi'ijte'esin a'ini aɨ pu raayɨ'ɨtɨ tɨ ayan huarɨni. 24Ayej xaa nya'u ti'ayajna, Dioj pu raayɨ'ɨtɨ tɨ ayan huarɨni a'ij tɨ cai ti'irɨnyaca a'anaj tɨ na'a iiyan. Aɨ pu amua'antina'axɨ aɨjna jetze ɨ cɨye tɨ ɨtzitá huanyej tɨ ij ayan amua'antivi'ijte'en jetzen ɨ saɨj ɨ mej ra'atyahuii. Ma ajta, aɨme ɨ mej Israel jetze ajtyama'acan, a'ini aɨme anacai mu ajtyama'acantaca'a maɨjna jetze ɨ cɨye, capu a'atzu muare'erista a'ame tɨ Dioj ajtahua'a hua'antivi'ijtya'axɨ'ɨn aɨjna jetze, mej mi majtahua'a tyaɨtestyamua'ame'en pueenya'a mua'ara'ani. 25Ayaa nu ti'ijxe'eve'e, nye'ihuaamua'a, sej si yau'eitaa xa'ara'ani tyamua'a naa a'ij tɨ huataujmua'a aijna tɨ ru'avaa ɨ Dioj jemi, sej si cai a'ujtzaahuatya'a ti'itɨ cɨme'e. Ayaa nu tyaja'amue'ixaate'e mej meri antaujnaamɨ mui'itɨ aɨme ɨ maj Israel jetze ajtyama'acan. Mauche'e mu meyan huatyaturaasin asta mana'a cai meyan ara'astɨ mua'ara'ani a'achu maj pua'amua tɨ Dioj ayan hua'uxa'apɨ'ɨntare mej tya'antzaahuate'en aɨme ɨ mej seij chuejra'a japua e'ema'acan. 26Aj pu i xaa Dioj hue'irajtuaani naijmi'ica aɨme ɨ mej Israel jetze ajtyama'acan. Aɨj pu cɨn ayan te'eyu'usi'i tɨcɨn: Mu pu a'uve'ema'a a'ame aujna u Sión, aɨjna ɨ a'atɨ tɨ hue'irajtuaani. Ayaa pu rɨ'ɨ hua'aruuren aɨme ɨ mej Jacobo jetze airáanye mej mi cai che'e a'ij pua'a titetyújchaɨ ɨ Dioj jemi. 27Nyajta nu neyan tya'atanratziiri'i aɨme jemi nyej neyan hua'uruuren nyajna xɨcaara'an nyej jetzen tihua'uta'uuni'ira ɨ maj cɨn autyajturaa nyeetzi jemi. 28Aɨ mu rájchaɨre'e ɨ Dioj maɨjna cɨme'e maj raatityaca'a maɨjna ɨ nyuucari ɨ tɨ cɨn Dioj hue'irajtuaani. Ayaa mu maɨjna cɨn huarɨj, ayaa pu tyajamuaacɨ́'ɨ muejmi sej si sajta raanamua saɨjna ɨ nyuucari. Ma ajta, aɨn ɨ Dioj, auche'e pu hua'axe'eve'e aɨjna cɨme'e tɨ jajcua ɨmɨ hua'antihuau, ajta aɨjna cɨme'e tɨ ti'itɨ cɨn tya'ataujratziiri'i aɨme jemi ɨ hua'ahuaacɨxa'astyamua'acɨ'ɨ. 29Ee xaa nya'u, auche'e pu hua'utyavaɨre'esin a'ini Dioj pu cai ra'urauuna aɨjna ɨ nyuucari tɨ ti'itɨj cɨn tya'ataujratziiri'i. Capu ajta yá'uhua'ana aɨjna tɨ cɨn hua'utajee. 30Sajta muan, ajna'ɨmɨ xu cai sajta ra'astijra'acaa. Ma ajta aɨn Dioj pu ayan amua'ancu'uvajxɨ muejmi, a'ini aɨme ɨ mej Israel jetze ajtyama'acan, camu ra'astijra'acaa. 31Ajta ijii, ayaa mu een cɨn autyajturaa ɨ Dioj jemi tɨ ij ajta Dioj hua'ancu'uvajxɨ'ɨn aɨjna cɨme'e tɨ ari amua'ancu'uvajxɨ muejmi. 32Ayaa pu Dioj hua'uxɨjte naijmi'ica ɨ maj cɨn autyajturaa ɨ jemin, tɨ ij ajta hua'ancu'uvajxɨ'ɨn matɨj mana'a pua'amua meyan seijre'e. 33Ee xaa nya'u, ayaa pu ti'ayajna. Eecan pu huapɨ'ɨ tyu'uyɨ'ɨtɨ aɨjna ɨ Dioj. Nain pu cɨn ru'umua'aree. Capu a'atzu amiteere a'ij tɨ ti'itɨ cɨn ayan ti'ixa'apɨ'ɨntare'e. Capu rɨ'ɨri tyej teyan yau'eitaa ta'ara'ani a'ij tɨ Dioj ayan ruxé'evi'ira'a cɨn hua'aruure ɨ tyaɨte ɨ maj yan japuan seijre'e ɨ chaanaca japua. 34“¿A'ataani ramua'aree a'ij tɨ een ɨ mua'atziira'ara'an ɨ Dioj? ¿A'ataani ayan raatavaɨ ɨ Dioj tɨ ij ayan tiraata'ixaate'en aɨjna ɨ Dioj a'ij tɨ ye'i huarɨni? Capu a'atɨ xaa nya'u. 35¿A'ataani ari ayan ti'itɨ tiraatapueijve ɨ Dioj tɨ ij ayan ruxe'eva'a a'ara'ani tɨ aɨn Dioj ajta ti'itɨ cɨn ayan tira'achaɨre'e aɨjna ɨ a'atɨ? Capu a'atɨ xaa nya'u.” 36Ayaa pu'u, a'ini naijmi'i pu jemin ma'acan. Aɨ pu nain tyu'utaahuaca'a. Nain pu aɨjna cɨn ayan ti'iseijre'e tɨ ij ayan rɨ'ɨ tiraata'an. Tyajta ityan, tiche'e tyajta rɨ'ɨ tiraata'an tɨj na'a rusen cɨme'e. Che'e ayan tyaja'ure'enyen.

will be added

X\