Romanos 10

1Ayaa nu tyaja'amue'ixaate'e, nye'ihuaamua'a, nyej neyan a'anca'anyaacan cɨn ti'ijxe'eve'e yu nyatzajta'a, nyajta nu rahuavii ɨ Dioj tɨ ij aɨn Dioj ayan hue'irajtuaani. 2Aɨme nu cɨn neyan ti'ixa ɨ maj a'ujca'anyaacan cɨn rana'amiche ɨ Dioj. Aru camu tzaahuati'ira'a cɨn rana'amiche. 3Matɨ'ɨj meyan rahuauca a'ij mej ye'i huarɨni mej mi meyan urare'enya'acan cɨn huatyaturan ɨ Dioj jemi, camu a'atzu ramua'areeraca'a a'ij tɨ Dioj ari tiraaxa'apɨ'ɨntare tɨ ij a'atɨ ayan urare'enya'acan cɨn huatyaturan ɨ jemin. Ayaa mu'u rahuauca maɨjna ɨ maj cɨn rujɨɨmua'a mana'a rajtyau. Aɨj mu cɨn meyan ratite maɨjna ɨ tɨ Dioj ari ayan tiraaxa'apɨ'ɨntare. 4Ayaa pu'u na'a, a'ini Cɨriistu'u pu nain cɨn ra'ara'astijre aɨjna ɨ nyuucari ɨ maj cɨn ti'ijta tɨ ij a'atɨ tɨ na'a ayan urare'enya'acan cɨn huatyaturan ɨ Dioj jemi aɨjna cɨme'e tɨ aɨn ɨ ja'atɨ ayan tya'atzaahuate'e. 5Ajta aɨjna ɨ Moisés, ayaa pu ra'uyu'uxaca'a tɨ nu'u aɨn ɨ a'atɨ tɨ ayan ra'astijre'e aɨjna ɨ nyuucari ɨ maj cɨn ti'ijta, ayaa pu nu'u ajta tyu'ujxe'eve'e tɨ aɨn aɨjna jetze araujca'anye ɨ nyuucari. 6- 7Ajta aɨjna ɨ a'atɨ tɨ ari urare'enya'acan cɨn huatyajturaa ɨ Dioj jemi, ayaa pu ti'imua'atze tɨcɨn: “Capej peyan tya'umua'atzɨ ɨ a'atzajta'a tɨ ayan ruxe'eve'e paj a'ujnyén u tajapua pej yárava'acájneijte'en paɨjna ɨ Cɨriistu'u.” Ajta ayan tɨ aɨjna cɨme'en: “Capej peyan paj tyetya'ɨmɨ a'ucaanyen ɨ tajete paj ra'itatuaani ɨ Cɨriistu'u hua'a tzajta'a ɨ mej meri huacuii.” 8Ma ajta, ayaa pu ti'ixa aɨjna tɨ tzaahuati'ira'a cɨn huatyajturaa urare'enya'acan cɨn ɨ Dioj jemi tɨcɨn: “Pu'uri mueetzi jemi seijre'e ɨ nyuucari paj peyan tihua'uta'ixaate'en, pajta paɨjna jetze peyan ti'imua'atza ɨ a'a tzajta'a.” Ai pu aɨn pueen ɨ nyuucari ɨ tej teyan tihue'ixaatya'a ta'aye'i. 9Ayaa pu'u na'a, a'ini tɨ pua'a mamuaseiiraca ɨ tyaɨte, pej peyan raataxaj yee Jesús pu tavastara'a pueen, ajta tɨ pua'a peyan tya'atzaahuate'e ɨ a'atzajta'a tɨ Dioj ayan ra'ajjáj hua'atzajta'a ɨ mɨ'ɨchite, aj pu xaa Dioj mue'irajtuaani. 10Jee xaa nya'u, ayaa pu ti'ayajna, a'atɨ pu ayan urare'enya'acan cɨn huatyaturaasin ɨ Dioj jemi aɨjna cɨme'e tɨ tya'atzaahuate'e ɨ rutzajta'a. Dioj pu ajta ru'irajtuaasin aɨjna cɨme'e tɨ aɨn a'atɨ ayan tyu'utaxajtaca'a tɨ Dioj jetze ajtyama'acan, meseíraca ɨ tyaɨte. 11Ayej xaa nya'u ti'ayajna, a'ini ayaa pu te'eyu'usi'i ɨ nyuucari jetze tɨcɨn: “Capu a'anaj ratatyevi'iraste'esin a'atɨ tɨ na'a tɨ rá'antzaahuate'en aɨjna ɨ Cɨriistu'u.” 12Ayaa pu'u, naimi'i mu ruxa'a een, aɨme ɨ maj Israel jetze ajtyama'acan, majta aɨme ɨ mej seij chuejra'a japua e'ema'acan, a'ini seij pu'u aɨn pueen ɨ tavastara'a tɨ ayan ti'itaijte'e naijmi'ica ityejmi, tɨ ajta nain cɨn rɨ'ɨ tihua'ata'aca aɨme ɨ mej meyan rahuavii tɨ aɨn hua'utavaɨre'en. 13Ajta ayan tye'eyu'usi'i tɨcɨn: “A'atɨ tɨ na'a tɨ ayan rahuauhuau ɨ tavastara'a jemi tɨ aɨn raatavaɨre'en, Dioj pu ayan ru'irajtuaasin aɨjna ɨ a'atɨ.” 14Aru, ¿a'ini ti'irɨ'ɨri mej meyan rahuaviira maɨjna ɨ tavastara'a tɨ pua'a maj cai xɨ ra'atzaahuatya'a? Capu a'ij ti'irɨ'ɨri xaa nya'u. Ajta, ¿a'ini ti'irɨ'ɨri mej meyan rá'antzaahuate'en tɨ pua'a maj cai xɨ raanamuajri'i maɨjna a'atɨ tɨ pɨrɨcɨ? Capu a'atzu a'ij ti'irɨ'ɨri. Ajta, ¿a'ini ti'irɨ'ɨri mej meyan raanamuaj tɨ pua'a cai a'atɨ ayan tihua'uta'ixaate'en? Capu xaa nya'u a'ij ti'irɨ'ɨri. 15Ajta, ¿a'ini ti'irɨ'ɨri mej meyan tihua'uta'ixaate'en tɨ pua'a ma cai huataiti'ihuaca'a maj aun á'uju'un hua'a jemi? Capu xaa nya'u a'ij ti'irɨ'ɨri. Aɨj pu cɨn ayan te'eyu'usi'i tɨcɨn: “Eecan tu huapɨ'ɨ naa hua'aseijrate'e aɨme ɨ maj huataiti'ihuaca'a tejmi jemi mej mi taata'ixaate'en maɨjna cɨme'en ɨ tavastara'a.” 16Ma ajta, camu naimi'i meyan ra'ancura'a maɨjna ɨ nyuucari ɨ tyaj cɨn tatyamua'ave'e, a'ini ayaa pu tyu'utaxajtaca'a aɨjna ɨ Isaías tyaacan tɨcɨn: “Tavastara'a, capu a'atɨ ayan rá'antzaahua a'ij tyej tihua'uta'ixaa.” 17Ayaa pu'u. A'atɨ pu ayan tya'atzaahuate'e aɨjna cɨme'e tɨ ayan raanamuajri'i ɨ mej tyu'utaxajtaca'a. Ajta aɨn ɨ nyuucari ɨ mej meyan raataxajtaca'a, ayaa mu een cɨn raataxajtaca'a a'ini Cɨriistu'u pu ayan hua'utaij. 18Nyajta inyaa, ayaa nu tyaja'amue'ihuau tɨ pua'a macai raanamuajri'i. A'ini mijta, xaa nya'u. Ayan te'eyu'usi'i tɨcɨn: Ayaa pu nainjapua namuajre'e a'ij mej ti'ixaxa'a iiyan chaanaca japua. Ajta hua'anyuuca, mu'uri meyan raanamuajri'i a'u tɨ na'a yan japuan ɨ chaanaca tɨj na'a a'uyauj. 19Nyajtahua'a nu neyan tyaja'amue'ihuau tɨ pua'a macai yau'eitaa mua'araa aɨme ɨ maj Israel jetze ajtyama'acan. Ajmi'i pu ayan tyu'utanyúu aɨjna ɨ Moisés tyaacan. Ayan tɨcɨn: Ayaa nu ca'anyejri cɨn amuaata'asin saj ahuaujchueere'en nyaɨjna cɨme'e nyaj rɨ'ɨ tihua'uta'asin aɨme ɨ maj cai Israel jetze ajtyama'acan. Nyajta nu amuaatanyú'ucaste'esin nyaɨjna cɨme'e nyej ni rɨ'ɨ tihua'uta'asin aɨme ɨ tyaɨte ɨ maj cai rɨ'ɨ me titya'umuámua'aree. 20Ajta aɨn Isaías, ayaa pu huataura'a tɨ ayan a jeijre'e tyu'utaxaj tɨcɨn: Ayaa mu na'antinajchaca'a aɨme ɨ maj cai nya'uuhuausima'a. Nyajta nu huatanseijrataca'a aɨme jemi ɨ maj cai nyahuauca'a. 21Ma ajta aɨn, ayaa pu tyu'utaxajtaca'a aɨme cɨme'en ɨ mej Israel jetze ajtyama'acantaca'a tɨcɨn: “Tɨ'ɨj pɨ na'a nain xɨcaj tzajta'a, ayaa nu hua'ahuavii mej mi saɨque tyu'umua'ati inyeetzi jemi. Ma ajta, camu a'atzu na'astijre'e. Tyamua'a mu antaujnaamɨ inyeetzi jemi.”

will be added

X\