Romanos 1

1Aij nu jetze tyaja'amuayu'use'e nyaɨjna cɨme'e ɨ nyaj ravaɨre'e ɨ Cɨriistu'u tɨ i'i Jesús. Aɨ pu na'antihuau inyeetzi, i nyaj i'i Pablo nyej ni nyaɨjna cɨn tya'ara'asten a'ij tɨ aɨn tinyeijca. Ayaa pu een cɨn na'ava'ahuau hua'a tzajta'a ɨ seica nyej ni tihua'uta'ixaate'en nyeijna cɨme'e ɨ nyuucari tɨ cɨn Dioj hua'a japua huanyuuni. 2Jajcua jɨmɨ pu Dioj ayan tya'ataujratziiri'i tɨ ayan rɨ'ɨ tihua'uta'an aɨme ɨ maj ti'ixaxa'ata'a ɨ Dioj jetze ma'acan. Aɨj mu cɨn meyan ra'uteyu'uxaca'a maɨjna jetze ɨ yu'uxari tɨ yan tyejmi jemi huatyajturaa. 3Ajta aɨn ɨ nyuucari, aɨj pu cɨme'en raxaj aɨjna tɨ i'i yaujra'an pueen, tɨ ajta e'iraanyej aɨjna jetze ɨ David tyaacan. Ayaa pu tyaja'ure'enye a'ini aɨ pu tyaatacan huanu'eihuaca'a matɨj ɨ seica. 4Ma ajta aɨn ɨ Dioj, aɨ pu e'eyan ayan ra'antihuau tɨ nain cɨn antyujmua'aréera aɨjna cɨme'e tɨ aɨjna jetze araujca'anyajca'a ɨ xaijnyu'ucara'ara'an ɨ Dioj aɨjna tɨ ayan raatamuá'a tɨcɨn niyauj pu yee pueen. Dioj pu ayan nain cɨn tiraijca tɨ'ɨj aɨn aiitaraa hua'a tzajta'a ɨ mɨ'ɨchite. Ai pu aɨn pueen aɨjna ɨ a'atɨ tɨ ayan antyahuaa Jesús tɨ ajta i'i Cɨriistu'u. Aɨ pu tavastara'a pueen. 5Cɨriistu'u nu jetze ra'ancura'a aɨjna tɨ cɨn ɨ Dioj rɨ'ɨ tinaata'a nyej ni neyan jetzen ma'acan a'ura'ani hua'a tzajta'a ɨ tyaɨte nyej ni neyan hua'uta'inen mej mi ra'ara'astijre'en maɨjna ɨ tavastara'a maɨjna cɨme'e mej tya'antzaahuate'en, naimi'i ɨ tyaɨte ɨ mej yan chaanaca japua huachaatɨme. 6Sajta muan, muan xu sajta hua'a jetze ajtyama'acan aɨme ɨ tyaɨte, ɨ tɨ Dioj ajta amua'antihuau muejmi sej si jetzen ajtyama'acanta xa'ara'ani ɨ Jesús tɨ ajta i'i Cɨriistu'u. 7Aijna yu'uxari jetze nu nyeyan tyaja'amuayu'use'e naijmi'ica mɨ sej saun huachaatɨme saujna u Roma, muan ɨ tɨ Dioj a'amuaxe'eve'e, tɨ ajta amua'antihuau sej si jemin seijra'a xa'ara'ani. Che'e ayan tyaja'ure'enyen tɨ aɨn ɨ Dioj, ɨ tyej rajya'upua, ajta ɨ tavastara'a, aɨjna ɨ Jesús tɨ ajta i'i Cɨriistu'u, miche'e maɨn rɨ'ɨ tyajamuaata'an, majta jamuaatyapua'arite'en. 8Anacaican cɨme'e, ayaa nu naijmi'i rɨ'ɨ tirata'aca nyaɨjna ɨ Dioj ɨ nyaj ravaɨre'e nyaɨjna cɨme'e saj seyan tira'atzijre'e ɨ Dioj. Jamuan ɨ Jesús tɨ ajta i'i Cɨriistu'u, ayaa nu rɨ'ɨ tirata'aca, a'ini nain japua chaanaca japua mu'uri ramua'aree sej seyan tya'atzaahuate'e. 9- 10Ajta aɨn ɨ Dioj, ɨ nyaj ravaɨre'e nain cɨn a'achu nyaj a'anca'anyaacan cɨn neyan tihua'uta'ixaate'en ɨ nyuucari tɨ cɨme'en raxaj aɨjna tɨ yaujra'an pueen ɨ Dioj, aɨ pu ru'umua'aree nyaj a'anaj tɨ na'a neyan amua'atámua'areeri nyatɨ'ɨjta rahuavíiraj na'aye'i. Ayaa nu ti'ijhuavii tɨ ayan nata'acare'en ɨ Dioj nyaj nyaun a'amuamuaara na'ara'ani tɨ pua'a ayan Dioj tirá'aca'ane. 11Eihua nu á'amuaseijramɨ'ɨ nyej ni ca'anijra'a amuaata'an sej si saɨjna jetze araujca'anyen ɨ xaijnyu'ucara'ara'an ɨ Dioj sej si eitze'e tya'utaviicue'i. 12Ee xaa nya'u, ayaa nu ti'ijxe'eve'e inyaa, tej ti teyan che'eta tyana'a ca'anijra'a huatáta'an ityejmi jemi, aɨjna cɨme'e tyej tyaxá'a tya'atzaahuate'e taxe'evi'ira'a cɨme'e. 13Ayaa nu nyajta ti'ijxe'eve'e, nye'ihuaamua'a, saj seyan raamua'aree nyaj mui'itɨ neyan raaxa'apɨ'ɨntare nyaj nyaun a'atanyén muejmi jemi. Tɨj na'a nyaj anacai neyan tiraaxa'apɨ'ɨntarej nyaj neyan huarɨni, tɨj na'a tɨ yu e'ire'enye, ti'itɨ pu naata'ijmɨjri'i nyej ni cai nyaun á'ume'en. Ayaa nu ti'ijxe'eva'acaa nyej neyan che'eta nyana'a tiraamue'itɨn muejmi cɨme'e ɨ nyaj cɨn tyu'utatu'ire'en ɨ Dioj jemi a'ij nyej nyeri tiraamue'itɨ hua'a tzajta'a ɨ seica ɨ tyaɨte ɨ maj seij chuejra'a japua huachaatɨme. 14Ayaa nu nyeri nyaɨjna cɨn tya'atanratziiri'i ɨ Dioj jemi nyej ni tihua'uta'ixaate'en aɨme ɨ maj raayɨ'ɨtɨ hua'anyuuca aɨme ɨ maj Grecia e'ema'acan, nyej ni nyajta tihua'uta'ixaate'en aɨme ɨ maj seij chuejra'a japua e'ema'acan. Capu amɨn a'ij tɨ pua'a eihua metyáumua'aree nusu tɨ pua'a macai ti'itɨ a'ij tya'umua'aree, nyauche'e nu neyan tihua'uta'ixaate'esin naijmi'ica. 15Aɨj nu cɨn eihua nu a'anca'anyaacan cɨn neyan raxe'eve'e nyaj nyajta tyajamuaata'ixaate'en ɨ nyuucari cɨme'e tɨ cɨn Dioj a'amuajapua huanyuuni, muan, mɨ sej Roma e'eche. 16Capu nyetevi'iraste'e aɨjna ɨ nyuucari, silu aɨj nu cɨn rɨ'ɨ tirata'aca ɨ Dioj, a'ini ɨ nyuucari jetze pu ma'acan ɨ muáre'eri'ira'ara'an ɨ Dioj ɨ tɨ cɨn hua'ajapua huanyuuni naijmi'ica ɨ mej ra'ara'astijre'esin, anacaican aɨme ɨ maj Israel jetze ajtyama'acan, majta e'eyan aɨme ɨ mej seij chuejra'a japua e'ema'acan. 17Aɨjna ɨ nyuucari jetze pu ajta seijre'e a'ij tɨ huarɨj ɨ Dioj mej mi maɨn tyaɨte meyan urare'enya'acan cɨn huatyaturan ɨ jemin. Ayaa mu xaa nya'u urare'enya'acan cɨn huatyaturaasin ɨ Dioj jemi tɨj na'a rusen cɨme'e, maɨjna cɨme'e mej meri tya'atzaahuate'e. Aɨj pu cɨn ayan te'eyu'usi'i ɨ yu'uxari jetze tɨcɨn: “Aɨjna tɨ urare'enya'acan cɨn huatyajturaa ɨ Dioj jemi ɨ rutzajta'a, aɨ pu ruurican huatyaturaasin aɨjna cɨme'e tɨ araujca'anye aɨjna cɨme'e tɨ tya'atzaahuate'e.” 18Ma ajta, ute'e pu e'eve'ema'acan aɨjna tɨ jeijre'e seijre'e tɨ rɨ'ɨ huapɨ'ɨ nyu'ucamɨ'ɨ ɨ Dioj aɨjna cɨme'e a'ij maj rɨcɨ ɨ tyaɨte aɨjna tɨ a'ij pua'a een, aɨjna cɨme'e ɨ maj meri ma ruurai ɨ Dioj, majta e'ij pua'a tihua'ajchaɨ ɨ ruxa'aj tyaɨte, majta meyan tihue'ijmɨ maj cai che'e ranajche ɨ Dioj tzaahuati'ira'a cɨme'e. Ayaa mu een cɨn hua'aruure mej mi a'ij pua'a ti'itetyaɨtesta mua'ara'ani. 19Ajta tɨj na'a tɨ ayan í'irɨni tɨ a'atɨ ayan tira'amitejtya'a a'ij tɨ een ɨ Dioj, matɨj mana'a pua'amua ɨ tyaɨtye meyan ru'umua'aree ɨ rutzajta'a a'ini Dioj pu rusaɨj ari hua'utaseijrate. 20Tɨj na'a tɨ Dioj raatyataahuaca'a ɨ chaanaca tɨ yu e'ire'enye, tyamua'a pu naa ayan tihua'amityejtya'a a'aye'i aɨme aɨjna ɨ tyaj cai rasise'ij tajɨ'ɨ cɨme'e. Aɨ pu xaa ayan tira'amitejtya'a a'aye'i a'ij tɨ een ɨ muáre'eri'ira'ara'an ɨ Dioj, ajta tɨ ayan huatyaturan tɨj na'a tɨ yu auca'itɨ a'ame, tɨj na'a rusen cɨme'e, a'ini ayaa pu een ɨ Dioj. Ayaa pu tira'amitejtya'a a'aye'i aɨjna cɨme'e tɨ Dioj ari raatyataahuaaca'a. Aɨj pu cɨn, capu rɨ'ɨri tɨ a'atɨ ayan jetzen seij tyá'ujpuaapua'are'en. Aɨme mu rujɨɨmua'a meyan púeenya'a. 21Aɨ mu ramua'atyajcaa ɨ Dioj. Majta raatyaxaahuataca'a maɨjna cɨme'e maj cai che'e ranajchaca'a maɨjna tɨ i'i Dioj, camu majta rɨ'ɨ tiraata'acaa. Ma majta aɨme, aɨj mu jetze ucajrupi maj maɨjna jetze tyu'umua'ati ɨ mua'atziira'a tɨ cai ti'itɨ vaɨra'acaa. Capu che'e huatarɨ'ɨristaraca'a tɨ ayan tihua'utamitejte'en tzaahuati'ira'a cɨme'e. 22Meenti mauj meyan tí'ixajtacaa tɨcɨn tyan tu yee rɨ'ɨ metityaumuámua'aree, capu ayan tye'irájraa. E'itze'e mu cai mauumúmua'araa mua'araa. 23Ayaa pu tihua'aruurajcaa asta mana'a cai raatapua'ajtaca'a mej meyan rɨ'ɨ tiraata'an maɨjna ɨ Dioj tɨ cai a'anaj mɨ'ɨni. Ayaa mu'u seij huatyaanajche tɨ ayan seijre'e tɨj tevi na'ari tɨj pina'a nusu tɨj ti'itɨ tɨ muaacuaca ajtaɨɨcajmee ca'ɨn ti'itɨ tɨ a'usinuuran. 24Aɨj pu cɨn Dioj ayan mahua'uhua'axɨ mej mi meyan ra'ara'astijre'en naijmi'i tɨj na'a tɨ e'ij pua'a een tɨ ayan tihua'amitejte'e ɨ hua'a tzajta'a, ti'itɨ tɨ na'a tɨ e'ij pua'a een ɨ maj cɨn huaujtyamua'ave'en. Aɨ mu majta meyan ti'ijrɨ'ɨraa mua'araa ɨ rujetze tɨj na'a tɨ tyu'utyévi'iraste. 25Ayaa pu aɨjna cɨn tihua'uruu a'ini aɨ mu ya'uhua'axɨ maɨjna tɨ cɨme'en raxa ɨ Dioj tzaahuati'ira'a cɨme'e mej mi ra'ara'astijre'en maɨjna tɨ hue'itzi na'a pueen. Aɨ mu meyan hua'utyanajchaca'a, majta hua'utyavaɨ aɨme tɨ Dioj hua'utaahuaca'a. Camu che'e mi ravaɨra'acu mua'araa maɨjna ɨ Dioj, ɨ tyej teyan rɨ'ɨ tirata'aca tɨj na'a rusen cɨme'e. Che'e ayan tyaja'ure'enyen. 26Aɨj pu cɨn Dioj ayan hua'uta'a mej mi meyan ra'ara'astijre'en ti'itɨj tɨ a'ij pua'a eenya'acan cɨn e'iraninyeica ɨ hua'a tzajta'a, tɨj na'a tɨ tyu'utyevi'iraste'e. Ajta aɨme ɨ maj juuca ɨ maj hua'a jetze ajtyama'acantaca'a, aɨ mu tiratápuaapua'ajtyahua'a mej meyan titye'entyaujnyaxcan tyetyaca jamuan a'ij tɨ aɨn Dioj tihu'autyajtuaa. Ayaa mu'u een cɨn huarɨj mej mi meyan saɨque huarɨni tɨ cai aɨn Dioj ayan eenye'eque'en tihua'utyajtuaa. 27Majta aɨme ɨ tyetyaca, ayaa mu che'eta mana'a tiratápuaapua'ajtyahua'a mej meyan tihua'antyanyaxcan ɨ juuca a'ij tɨ tiraaxa'apɨ'ɨntare ɨ Dioj. Ayaa mu eenye'eque'en huarɨj maɨjna cɨme'e maj ruxa'a tyetyaca jamuan huaujxana'acɨre'en aɨjna cɨme'e ɨ tɨ a'ij pua'a een tɨ hua'a tzajta'a e'iráninyeica'a. Ayaa mu huarɨj maɨjna cɨme'e tɨ tyu'utyevi'iraste'e ɨ ruxa'aj tyetyaca jamuan. Aɨj pu cɨn pu'uri tihua'ucɨ'ɨ a'ij tɨ tiraavijte'e aɨjna cɨme'e ɨ mej eihua huapɨ'ɨ a'ij pua'a huarɨj. 28Ajta, a'ini capu ayan tihua'amityejtya'acaa tɨ ayan raavijtya'acaa mej meyan raamua'ati ɨ Dioj, aɨ pu ayan hua'uta'a mej meyan tyu'umua'ati a'ij mej tirajtyau rujɨɨmua'a aɨjna cɨme'e ɨ rumua'atziira'a. Ayaa mu'u huarɨj maɨjna cɨme'e tɨ cai ti'itɨj vaɨre'e, ajta mej mi meyan ti'ijrɨ'ɨraa tɨj na'a tɨ cai ayan tiraavijte'e. 29Nain pu hua'a jemi seijre'e tɨ a'ij pua'a een. Aɨj mu cɨn huataujxana'acɨra'ataca'a, majta a'ij pua'a titetyújchaɨca'a. Eecan mu ti'inyacua'atzaca'a. Ee xaa nya'u a'ij mu pua'a ti'ityetyaɨtestaca'a. Aɨj mu jetze ucajrupi: aɨ mu ti'ityaura'atya'acara'a ɨ tyi'ara'an ɨ ruxa'aj tevi. Majta ti'ityacui'ica. Eihua mu majta rutya'axɨ'ɨcaa. Majta rucuanamuajca'a rujɨɨmua'a. Majta mu a'ij pua'a hua'aruurajcaa ɨ ru'ihuaamua'a. Ee xaa nya'u, ayaa mu rɨcɨ. A'ij mu pua'a tyu'ujepe'e. 30Hue'itzi mu cɨn tihue'ixaate'e ɨ ruxa'a tyaɨte, majta rajchaɨre'e ɨ Dioj. Majta ruxé'evi'ira'a cɨn hua'utyaxaahua'ajtaca'a ɨ ruxa'a tyaɨte. Majta a'ujtzáahuatya'a. Ayaa mu ruseijrataca'a maj nu'u huapɨ'ɨ ruxe'eve'e. Aɨj mu majta jetzen ucajrupi a'ij mej ye'i huarɨni mej mi a'ij pua'a tihua'utzájra'amua'an. Camu majta hua'astijre'e ɨ ruvaujsimua'a. 31Camu a'atzu meyan ti'ijrɨ'ɨre tɨ xa'apɨ'ɨn een seijre'e. Eihua mu majta cai arauraste ɨ maj cɨn tya'ataujratziiri'i. Camu majta hua'axe'eve'e ɨ rutyaɨtestyamua'a. Camu a'atzu xaa nya'u hua'acu'uvaa mua'aye'i ɨ ruxa'aj tyaɨte. 32Rumua'atziira'a mu cɨn ru'umua'aree a'ij tɨ Dioj ari tiraaxa'apɨ'ɨntare tɨ ayan tiraavijte'e tɨ ayan tiraacɨ'ɨti tɨ huamɨ'ɨni aɨjna ɨ a'atɨ tɨ ayan ti'ijrɨ'ɨre. Capu hua'a jetze ruxe'eve'e. Mauche'e mu meyan rɨcɨ. Majta ca'anijra'a hua'ata'aca ɨ seica mej mi meyan che'eta mana'a ti'ijrɨ'ɨraa mua'ara'ani.

will be added

X\