1 Aj pu'i aɨn ta'anxɨvi ayan ucájijhuaca'a ɨ trompeeta jetze. Cɨme'en pu'u ayan huarɨj, nyatɨ'ɨj ni raaseij ɨ xu'ura'ave tɨ ari e'icajve u ute'e, ajta an a'arajve ɨ chaanaca japua. Ajta aɨn, aɨ pu ra'ancure'echuii aɨjna ɨ yaavi ɨ tɨ cɨn ra'antacuuna a'u tɨ e'etyacun tɨ huápɨ'ɨ a'ucatee. 2 Aj pu'i aɨ pu ayan ra'antacú aɨjna tɨ e'etyacun tɨ ayan cai amiteere'e a'achu tɨ ucatee. Cɨme'en pu'u ra'antacú, ayaa pu huitacɨtzujtaraca'a tɨj tya'itacɨtzúuta a'aye'i ɨ hoorno tzajta'a tɨ ve'e. Ajta aɨn ɨ xɨcaj, ajta ɨ maxcɨra'i, aɨ mu a'utanami'ihua mua'araa maɨjna cɨme'e ɨ cɨtzij tɨ a'itacɨtzujtaca'a aujna a'u tɨ e'etyacun. 3 Matɨ'ɨj mi huatuna'ise mu'itacɨ́ cɨtzij tzajta'a. Ayaa mu tihua'uta'a mej mi meyan tyu'uche'eve'en matɨj aɨme ɨ tyaxcate. 4 Ayaa mu tihuéijca maj nu'u cai a'ij pua'a raruuraa ɨ ɨxaj tɨ ajninyei ɨ chuej japua na'ari tu'upi ti'itɨ nusu cɨye. Ai mu'u nu'u aɨn pueen ɨ maj a'ij pua'a hua'aruuren, aɨme ɨ tyaɨte ɨ tɨ cai te'eyu'usi'i hua'acuaatzi jetze maj nu'u tyaɨtestyamua'ame'en pueen ɨ Dioj. 5 Ayaa mu tihau'uta'a mej meyan a'ateeri a'achu cumu anxɨ maxcɨra'i maj pueijtzi hua'uta'an ɨ tetyaca. Majta, camu meyan tihua'uta'a maj hua'ucui'ini. Ajta, aɨjna ɨ maj cɨn pueijtzi hua'uta'asin, ayaa pu che'eta na'a een tɨ pua'a tyaxca raache'en ɨ a'atɨ. 6 Ayaa pu te'eme ajna xɨcajra'a jetze. Ayaa mu rahuauni ɨ tyetyaca maj huacui'ini. Ma ajta, capu a'ij tyu'utarɨ'ɨristari. Eihua mu huapɨ'ɨ jetzen á'ujca'anye maj huacui'ini mej mi cai che'e rajpueijtzi. Ma majta, ca'anyejri mu cɨn tya'utaviicue'ira. 7 Majta maɨn huatuna'ise, ayaa mu seijra'acaa matɨj cahuaayu'use ɨ mej meri hua'acáanajxɨ mej mi japuan huanya'use'en. Ti'itɨ mu ava'arújtya'ama'acaa ɨ rumu'u jetze. Ayaa pu seijra'acaa tɨj curun tɨ ooro cɨn taavijhuaca'a. Majta, hua'anyeerime ayan seijra'acaa matɨj tyaɨte. 8 Ayaa mu majta e'enye'en cácɨjpuajca'a matɨj juuca, majta meyan e'enye'en antátamajca'a matɨj muajyete. 9 Nainjapua mu ti'icácaujnacaa ti'itɨj cɨme'e tɨj tyapuusti'i pueenya'a. Majta, eihua huapɨ'ɨ cá'arajnacaa matɨ'ɨj tirá'ara'ixɨ. Yaa pu e'enya'a namuajra'acaa matɨj aɨme ɨ cahuaayu'u ɨ maj ca'anin cɨn ru'uva'ajaapuajme'e ɨ carreta ɨ maj tzajta'an huatyauuca'a aɨme ɨ maj unya'use'en. 10 Ayaa mu e'enya'a huacuasi matɨj tyaxcate. Ajta aɨjna ɨ hua'amuare'eri'ira'a ɨ maj cɨn meyan e'enya'a a'ateeri anxɨj maxcɨra'i maj pueijtzi hua'uta'asin ɨ tetyaca, aɨ pu hua'acuasi pu seijre'e. 11 Ajta aɨn tɨ tihue'ijte'e, ai pu aɨn pueen ɨ xaijnyu'ucari tɨ nain cɨn antyujmua'aree aujna te'etyacun tɨ huápɨ'ɨ a'ucatee. Ayaa pu antyahuaa hua'anyuuca cɨme'e aɨme ɨ Hebreos tɨcɨn Abadón. Ajta hua'anyuuca cɨme'e ɨ Griego, ayaa pu antyahuaa tɨcɨn Apolión. Ayaa pu huataujmua'a tɨcɨn, “Aɨjna tɨ e'ihuaje'ica”. 12 Pu'uri seij mu a'umej ɨ maj cɨn pueijtzi mua'ara'ani. Ajta auche'e hua'apua a'atura tɨ ayan tyaja'ure'enyen. 13 - 14 Aj pu'i aɨn tɨ arájsevi, aɨ pu ajta ucájijhuaca'a ɨ trompeeta jetze. Cɨme'en pu'u ayan ucájijhuaca'a, nyatɨ'ɨj ni a'atɨ huanamuajri'i tɨ aun tí'ixajtacaa a'u tɨ a'utejvee aɨjna ɨ maj japuan ti'imua'ɨvajtaca. Ayaa pu tiraata'ixaa aɨjna tɨ ucájijhuaca'a tɨcɨn: ―Pata'aj hue'ixɨ́jtaxɨ'ɨn aɨme ɨ maj muaacua ɨ maj majta aityanami'i aujna vejli'i atya'ana jetze tɨ ve'e tɨ ayan tyaja'arajtyahuaa tɨcɨn Eufrates. 15 Aj pu'i huá'uxɨjtaca'a aɨme ɨ maj muaacua, ɨ maj majta aityanami'ihuaca'a asta ajna tyaja'ure'enyen ɨ xɨcajra'an mej jetzen huacui'ini a'icaj ɨ tyaɨte ɨ maj yan japuan huachaatɨme. Pu'uri pɨti'ihuaujxa'apɨ'ɨntare a'atzaj tɨ pua'a, ti'itani xɨcajra'an, ajta ti'itani maxcɨra'ira'an, ajta ti'itani ninye'ira'a tɨ ayan huarɨni. 16 Majta maɨn ɨ xantaaru'u, ɨ maj avé'etye'ete, ayaa mu ara'asicaa a'achu cumu seite vi'ira'a pua'amuaj maj ma'a, majta ayaa mu pua'amua a'achu cumu tamuaamuata'a vi'ira'a ɨ mej meyan pua'amua maj ma'a. Ayaa nu tyu'unamuajri'i a'achu maj pua'amua ara'asicaa. 17 Nyajta, ayaa nu e'enye'en hua'useij ɨ cahuaayu'u nyatɨ'ɨj neyan tyu'umaaraca'a. Aɨme ɨ maj avé'etye'ete, ayaa mu antyaujna ɨ rutaviitze'e ti'itɨj cɨme'e tɨ ayan seijre'e tɨj taij tɨ a'ataa, ajta ɨ tɨ cuatumua, ajta ɨ tɨ tyaumua. Majta aɨme ɨ cahuaayu'u, ayaa mu e'enya'a huijmu'u matɨj muajyete. Ajta ɨ tɨ an hua'atenye'e jetze e'ijninyeica'a ɨ taij, jamuan ɨ cɨtzij, ajta aɨjna tɨ tyaumua tɨ ayan tya'aaca tɨj tyapuusti'i. 18 Matɨ'ɨj e'icaj huácuiihuaca'a ɨ tetyaca ɨ tɨ hueica jetze ɨ maj cɨn pueijtzi hua'uta'a, aɨjna cɨn ɨ taij, ajta aɨjna ɨ cɨtzij, ajta aɨjna ɨ tɨ ayan tya'aaca tɨj tyapuusti'i, tɨj na'a pua'amua a'ijninyeica'a aɨn hua'atenye'etze'e ɨ cahuaayu'u. 19 Ee xaa nya'u, ayaa mu tiraayɨ'ɨtɨ mej ti'ityacui'ini maɨjna cɨme'e ɨ rutenye'e. Ayaa mu majta e'enye'en huacuasi matɨj cu'ucu'use, majta meyan e'enye'en huijmu'u. Majta ɨ maj cɨn pueijtzi hua'uta'a ɨ tetyaca. 20 Majta maɨn ɨ seica ɨ maj yan japuan seijra'acaa iiyan chaanaca japua, ɨ maj cai huácuiihuaca'a maɨjna cɨme'e ɨ cui'ini'ira'a, camu raataxaahuataca'a ɨ maj ti'itɨ huátaahuan ɨ tɨ cai Dioj pueen. Camu majta raatapua'ajtaca'a mej meyan rana'amiche'en maɨjna ɨ tiyaaru'u na'ari maɨme ɨ ti'itɨ tevijra'a tɨ ayan taavijhua ooro cɨme'e na'ari plaata cɨme'e nusu coobre cɨme'e ca'ɨn tetej cɨme'e o cɨye cɨme'e, ti'itɨ tɨ na'a, maj cai atanyéjnye'e, majta cai huitanajca'amua, majta cai cɨɨnivej. 21 Majta aɨme ɨ tyaɨte, camu majta raatapua'ajtaca'a maj cai ti'ityacui'ica. Majta maɨjna ɨ chahueiiri camu majta raatapua'ajtaca'a maj cai ramuara'a maɨjna ɨ tɨ tyu'utyáhueiitaca'a tɨ'ij aráurasten ɨ hua'aye'ira. Majta ɨ tyaɨte, mauche'e mu meyan ruxana'acɨra'acaa, majta tyú'unahue'iracaa.
