Apocalipsis 8

1Tɨ'ɨqui aɨn Canya'a rasujtza'an aɨjna ɨ tɨ cɨn á'avijti'ihuajma'acaa, aɨjna ɨ ta'arahua'apua. Aj pu'i nainjapua tyu'upuá'arajraa u ute'e. Ayaa pu a'atee a'achu cumu e'ita'a hoora tɨ cai ti'itɨ namuajra'acaa. 2Nyatɨ'ɨj ni hua'useij ɨ maj arahua'apua, ɨ maj majta ti'ivaɨre'e u tajapua. Aɨ mu aɨn pueen ɨ maj Dioj jemi huatyauuca. Matɨ'ɨj mi tya'ancura'ɨ ɨ trompeeta, ɨ tɨ ta'arahua'apua. 3Aj pu'i saɨj mu a'uve'eme tɨ ajta ti'ivaɨre'e u tajapua. Aɨ pu jetzen ajtyeechaxɨ aɨjna ɨ maj japuan ti'imuaɨ'ɨvajtaca. Ajta ti'itɨ huiityajajnaca'a cɨtzive'eri. Seij pu raatatɨste ɨ cuaane'e tɨ ij aɨjna rajnajchite'en aɨjna jamuan ɨ nyuucari ɨ maj cɨn raatahuaucara'a ɨ Dioj jemi matɨj mana'a pua'amua ɨ maj rɨ'ɨ ti'iteseijre'e ɨ Dioj jemi. Ajta, aɨjna ɨ hua'anyuuca, an pu e'eseijra'acaa japuan aɨjna ɨ tɨ ooro cɨn taavijhua ɨ maj japuan ti'imuaɨ'ɨvajtaca tɨ ajta jemin a'utejvee aɨjna ɨ ɨpuari. 4Aj pu'i tyamua'a tya'ajcɨtzujtaraca'a aɨjna ɨ cuaane'e aɨjna jamuan ɨ nyuucari ɨ maj cɨn raatahuaucara'a ɨ Dioj jemi. Aɨj pu jetzen ájcɨtzujtaraca'a aɨjna ɨ muajca'ara'ara'an aɨjna ɨ tɨ ti'ivaɨre'e u tajapua. 5Aj pu'i rajtɨɨ aɨjna ɨ cɨtzive'eri, ajta ra'ava'ɨstya'a aɨjna ɨ taij tɨ aun a'uve'eme aɨjna japua ɨ maj japuan ti'imuaɨ'ɨvajtaca. Aj pu'i aya'ucáaxɨre ɨ chaanaca japua. Cɨme'en pu'u ayan huarɨj, aj nu ni raanamuajri'i. Cu xuee muatyényuu. Eecan pu tyamua'a ti'ityáca'arajnajmá'a. Majta tyamaxcɨva'ara'a. Ajta huataujca'atzɨxɨ ɨ chaanaca. 6Majta aɨme ɨ maj arahua'apua ara'ase, ɨ maj majta ti'ivaɨre'e u tajapua, aɨme ɨ maj trompeeta te'itya'ɨca'a, aɨ mu rɨ'ɨ huaujruu mej mi maɨjna tzajta'a ucaajijhua. 7Ajta aɨjna ta'anajca, aɨ pu ucájijhuaca'a aɨjna tzajta'a ɨ trompeeta. Cɨme'en pu'u ayan huarɨj, matɨ'ɨj mi teetej caavatzɨ aɨjna jamuan ɨ taij, xuure'e tɨ ranaxca. Nainjapua pu huavatzɨ iiyan chaanaca japua. Ajta e'icaj pu tyu'ura'ataa. Ajta aɨn ɨ cɨye, e'icaj pu ajta tyu'ura'ataa. Ajta ɨ ɨxaj, naimi'i pu huara'ataa aɨjna. 8Ajta aɨn ɨ tɨ hua'apua ɨ tɨ ti'ivaɨre'e u tajapua, aɨ pu ajta ucájijhuaca'a aɨjna tzajta'a ɨ trompeeta. Ajta ti'itɨ pu atyajrai ɨ jaj jetze ɨ tɨ ve'e. Cu xuee jɨri na'a aɨjna ɨ ti'itɨ ɨ tɨ ajta tyataasima'a. Tɨ'ɨqui a a'ucajrupi a aata'a. Aj pu'i e'icaj saɨque huaujruu ɨ jaj tɨj xuure'e. 9Majta e'icaj mu huacuii ɨ maj maun e'echajca'a. Majta maɨn ɨ baarcu ɨ maj japuan a'acɨɨnyaca'a ɨ jaj, e'icaj mu majta huatyaana'axɨ. 10Ajta aɨn ɨ tɨ hueica, aɨ pu ajta ucájijhuaca'a aɨjna tzajta'a ɨ trompeeta. Cɨme'en pu'u ucájijhuaca'a, aj pu'i xu'ura'ave tɨ ve'e e'icajve u ute'e. Ayaa pu tya'ataaca'a tɨj tatzari. Aj pu'i a a'arajve e'icaca japua ɨ atya'ana, ajta e'icaca japua a'u tɨ a jaixavi'ijmee. 11Ajta aɨn ɨ xu'ura'ave, ayaa pu antyahuaaca'a tɨcɨn Ta'antzijvi'i. E'icaj pu antziivi'i a'araa ɨ jaj. Majta ɨ tetyaca, mui'itɨ mu huacuii maɨjna cɨme'e maj re'i maɨjna ɨ jaj ɨ tɨ antzijvi'i. 12Ajta aɨn tɨ muaacua, aɨ pu ajta ucájijhuaca'a ɨ trompeeta jetze. Cɨme'en pu'u ayan huarɨj, ti'itɨ pu ra'ajtyaatu'a ɨ xɨcaj, ajta ɨ maxcɨra'i, ajta e'icaj ɨ xu'ura'ave mej mi cai che'e meyan a'atáatɨme'eni. E'icaj tujca'ari tzajta'a, camu che'e á'ataaca'a, ajta e'icaj tɨca'ari tzajta'a, camu majta che'e á'ataaca'a. 13Nyatɨ'ɨj ni neyan a'ujnyeeraca'a. Utya'ɨmɨ pu seij rá'ara'acaa ɨ cua'ɨra'ave. Nyatɨ'ɨj ni neyan raanamuajri'i tɨ ayan tí'ixajtacaa tɨcɨn: ―Cui'i xaa, cui'i xaa, cui'i xaa, aɨme hui ɨ maj iiyan japuan huachaatɨme ɨ chaanaca, a'ini eihua mu hui rajpueitzi mua'aju'un matɨ'ɨj meyan ucajijhua ɨ seica ɨ maj hueica ɨ trompeeta jetze. Pu'uri hui tɨn ayan tyaja'ure'enyejsin.

will be added

X\