Apocalipsis 7

1Nyajta e'eyan muaacuaca huaseij ɨ mej ti'ivaɨre'e u tajapua. Aa mu a'utyáuuca'a. Saɨj pu aun e'eseijra'acaa u jetze pujme'en Teijmata'a, ajta saɨj aujna a'ahua'a Huaahuata pujme'en, ajta saɨj Cuameche pujme'en. Ajta ɨ saɨj, au pu a'utyavaaca'a Tzareeme'en pujme'en. Majta aɨme ɨ maj muaacua, aɨ mu cai hua'ata'acara'a ɨ aaca tɨ huata'aacare ɨ chuej japua na'ari ɨ jaj japua nusu cɨye tzajta'a. 2Nyatɨ'ɨj ni seij huaseij tɨ ti'ivaɨre'e u tajapua. Au pu pujme'en e'eve'ema'acaa a'u tɨ e'ijninyei ɨ xɨcaj. Aɨ pu ru'ityaatɨɨca'a aɨjna ɨ tɨ cɨn Dioj hua'ajtiyú'uxaxɨ áj hua'acuaatze'e tɨ ayan tya'axa maj nu'u tyaɨtestyamua'ame'en pueen. Aj pu'i aɨn tevi ayan ca'anin cɨn hua'utajée aɨme ɨ maj maɨjna cɨn antyujmua'areeraca'a maj a'ij pua'a raaruuren ɨ chaanaca, majta ɨ jaj tɨ ve'e. 3Ayaa pu tihua'uta'ixaa tɨcɨn: ―Caxu xɨ pueijtzi ra'ata'a ɨ chaanaca na'ari ɨ jaj tɨ ve'e nusu ɨ cɨye asta tyana'a cai hua'ajtiyú'uxaxɨ'ɨn hua'acuaatze'e tyaɨme ɨ maj ravaɨre'e ɨ taDioj. ―Ayaa mu tyu'utaxajtaca'a. 4Nyatɨ'ɨj ni neyan tiraanamuajri'i a'achu maj pua'amua ɨ tɨ hua'ajtiyú'uxaxɨ ɨ hua'acuaatze'e. Ayaa mu pua'amuacaa a'achu cumu anxɨte japuan hua'apuate japuan muaacua vi'ira'a. Aɨ mu hua'a jetze ajtyama'acan matɨj mana'a tyaɨtestyamua'ame'en maj pueen ɨ mej a'iraujnejte maɨjna jetze ɨ Israel. 5Majta aɨme ɨ maj maɨjna jetze a'iraujneijte ɨ Judá, ayaa mu ará'axcaa tamuaamuata'a japuan hua'apua vi'ira'a. Majta aɨme ɨ maj maɨjna jetze a'iraujneijte ɨ Rubén, ayaa mu che'eta ará'axcaa tamuaamuata'a japuan hua'apua vi'ira'a. Majta aɨme ɨ maj maɨjna jetze a'iraujnejte ɨ Gad, ayaa mu majta ará'axcaa a'achu cumu tamuaamuata'a japuan hua'apua vi'ira'a. 6Majta aɨme ɨ maj maɨjna jetze a'iraujneijte ɨ Aser, ayaa mu che'eta mana'a ará'axcaa tamuaamuata'a japuan hua'apua vi'ira'a. Majta aɨme ɨ maj maɨjna jetze a'iraujneijte ɨ Neftalí, ayaa mu che'eta mana'a ará'axcaa a'achu cumu tamuaamuata'a japuan hua'apua vi'ira'a. Majta mu meyan che'eta mana'a ará'axcaa a'achu cumu tamuaamuata'a japuan hua'apua vi'ira'a aɨme ɨ maj maɨjna jetze a'iraujneijte ɨ Manasés. 7Aɨme cɨme'en ɨ seica, ɨ maj Simeón jetze a'iraujneijte, ayaa mu majta ará'axcaa a'achu cumu tamuaamuata'a japuan hua'apua vi'ira'a. Majta aɨme ɨ maj Leví jetze a'iraujneijte, ayaa mu che'eta mana'a ará'axcaa a'achu cumu tamuaamuata'a japuan hua'apua vi'ira'a. Majta aɨme ɨ maj Isacar jetze a'iraujneijte, ayaa mu che'eta ará'axcaa tamuaamuata'a japuan hua'apua vi'ira'a. 8Naimi'i mu meyan tamuaamuata'a japuan hua'apua vi'ira'a arastɨma'acaa aɨme ɨ tyaɨtestyamua'ame'en ɨ maj Zabulón jetze a'iraujneijte, majta ɨ maj maɨjna jetze a'iraujneijte ɨ José, ayaa mu che'eta ará'axcaa matɨj ɨ seica, majta aɨme ɨ maj Benjamín jetze a'iraujneijte, ayaa mu che'eta mana'a ará'axcaa. 9Nyatɨ'ɨj ni nyajtahua'a atanyeeraca'a, nyajta hua'useij ɨ seica ɨ maj maun e'etyujsaɨra'acaa. Ayaa mu tyamua'a tí'ityamui'icaa. Capu rɨ'ɨristaca'a tɨ a'atɨ hua'uté'iten. A'u tɨ na'a mu e'ema'acantajma'acaa, matɨj mana'a pua'amua maɨn pueen ɨ tyaɨte ɨ maj seij chuejra'a japua e'ema'acan, matɨj mana'a pua'amua ɨ tyaɨte ɨ maj saɨque tí'ijye'ira, majta naijmi'i maj saɨque ti'ixaxa'a. Au mu a'utyauuca'a jemin ɨ Canya'a. Aɨ mu cueinavi'in ti'ityecháatɨma'acaa aɨme, majta tacɨj mu huiitepiitɨma'acaa. 10Ca'anin mu cɨn meyan tí'ityejijhuaca'a tɨcɨn: Ca'anyejri pu cɨn tu'irajtuaa aɨjna ɨ taDioj ɨ tɨ acajca ɨ ɨpuari jetze, ajta aɨjna ɨ Canya'a. 11Majta aɨme ɨ mej ti'ivaɨre'e u tajapua, aɨ mu atavaatɨma'acaa a'u tɨ a'utyavaaca'a ɨ ɨpuari, majta a'u maj a'utyauuca'a aɨme ɨ vaujsi, majta aɨme ɨ maj muaacua ɨ maj ruuri. Matɨ'ɨj mi a'icaujtuuxɨ ɨ jemin ɨ tɨ acajca ɨ ɨpuari jetze mej mi raatyaanajche ɨ Dioj. 12Ayaa mu tyu'utaxajtaca'a tɨcɨn: Che'e ayan tyaja'ure'enyen. Tu'uri teyan rɨ'ɨ tiraata'asin, tyajta teyan rɨ'ɨ tiya'useiira ta'aju'un, a'ini aɨ pu nain tya'umua'aree. Aɨj tu cɨn teyan rɨ'ɨ tirata'acara'a ta'aju'un, tyajta rɨ'ɨ tiraatyatuutuhua'a ta'aju'un. Aɨ pu taDioj jemi seira'a a'ame ɨ muáre'eri'ira'ara'an, ajta ɨ ca'anijra'a tɨj na'a tɨ yu auca'itɨ a'ame tɨj na'a rusen cɨme'e. 13Aj pu'i saɨj ɨ tɨ vastacɨra'i ayan tinaataihua'uri'i tɨcɨn: ―¿A'atyaɨnni maj pueen aɨme ɨ maj cueinavi'in ti'ityechaatɨme? ¿A'uni jetze ma'uva'aju'un? 14Nyatɨ'ɨj ni neyan tiraata'ixaa tɨcɨn: ―Muaa vasta'a, muaa paj ramua'aree pej peyan tinaata'ixaate'en. Aj pu'i ayan tinaata'ixaa tɨcɨn: ―Ai mu hui maɨn pueen ɨ maj tya'utaviicue'iri'i ɨ maj eihua huapɨ'ɨ rajpueiitzi mua'araa. Ai mu meri tyu'uja'usi ɨ tyu'ujcɨɨxu, majta tyu'ucueiinare ɨ tihua'acɨɨxu maɨjna cɨme'e maj ra'ara'astijre maɨjna ɨ Cɨriistu'u ɨ tɨ hua'a jetze ma'acan huamɨ'ɨ. 15Aɨj mu hui cɨn meyan iiya seijre'e jemin ɨ ɨpuari tɨ jetzen acajca aɨjna ɨ Dioj. Aɨ mu majta ravaɨre'e teyujta'a a'u tɨ aɨn Dioj e'eseijre'e. Nain tujca'ari tzajta'a, majta nain tɨca'ari tzajta'a, au mu ravaɨre'e. Ajta aɨn ɨpuari jetze tɨ acajca, aɨ pu hua'achaɨn aɨjna cɨme'e tɨ rusaɨj hua'a jemi huatyaturaasin. 16Camu hui che'e huatyatujritze'esin, camu majta che'e huata'icuj. Capu ajta che'e hua'acucui'i a'ame ɨ hua'amu'u ɨ xɨcaj cɨme'e. Capu ajta che'e hua'ataixɨ'ɨra a'ame ɨ xɨcaj. 17A'ini aɨ pu Canya'a aɨjna jetze a a'utejvee ɨ ɨpuari. Aɨ pu hua'achaɨ a'ame. Aɨ pu hua'avi'itɨn ajna a'u tɨ jajmuaa ɨ maj cɨn ruuri mua'ara'ani. Ajta aɨn Dioj, aɨ pu rɨ'ɨ tihua'uta'asin mej mi cai che'e ti'itɨ cɨn ruxaamɨstya'a.

will be added

X\