Apocalipsis 6

1Nyatɨ'ɨj ni raaseij tɨ aɨn Canya'a seij asujtza'an ɨ tɨ cɨn á'avijti'ihuaca'a ɨ yu'uxari. Cɨme'en pu'u ayan huarɨj, aj nu ni raanamuajri'i seij tɨ hua'a jetze ajtyama'acan ɨ maj ruuri, ɨ maj majta muaacua. Ayaa pu ca'anin cɨn tyu'utaxajtaca'a. Cu xuee maj cuj huatyejnyuuni. Ayan tɨcɨn: ―Iya'a ii. 2Nyajtahua'a nu atanyeeraca'a tɨ pua'a a a'utejvee aɨjna ɨ cahuaayu'u ɨ tɨ cueinara'a. Ajta aɨn tɨ ava'aca, aɨ pu tú'unamɨ'ɨ huitechuiica'a rumuajca'a jetze. Ajta aɨ pu huiirajraa tɨ ij hua'antimue'itɨn. A'u tɨ na'a pu a'uye'icaa hasta na'a cai naijmi'ica antimue'itɨ. 3Tɨ'ɨqui ajtahua'a rasujtza'an. Nyatɨ'ɨj ni neyan tiraanamuajri'i tɨ'ɨj aɨn tɨ hua'apua tɨ ajta hua'a jetze ajtyama'acan ɨ maj ruuri, ɨ maj muaacua, ayaa pu tyu'utaxajtaca'a tɨcɨn: ―Iya'a ii. 4Cɨme'en pu'u ayan tyu'utaxajtaca'a, saɨj pu huiirajraa ɨ cahuaayu'u tɨ pa'usáarara'a. Ajta ayaa pu tiraata'a aɨjna tɨ ava'aca tɨ ij aɨn ayan hua'ɨtziite'en ɨ tyaɨte ɨ maj yan seijre'e i chaanaca japua mej mi cai che'e ru'ihuaamua'a mua'ara'ani silu mej mi huaujcui'ini saɨj ajta saɨj. Aɨ pu cɨn, aɨ pu ra'ancure'echuii seij ɨ chun ɨ tɨ ve'e, ɨ tɨ ajta tya'ajcámɨɨmɨ́jmee ruxa'ajta'a. 5Aj pu'i hueicacajretze rajsujtza'an. Nyatɨ'ɨj ni neyan tiraanamuajri'i tɨ ajta saɨj tɨ hua'a jetze ajtyama'acan ɨ maj ruuri, ɨ maj muaacua, aɨ pu ayan tyu'utaxajtaca'a tɨcɨn: ―Iya'a ii. Nyatɨ'ɨj ni nyajtahua'a atanyeeraca'a. Ma'acui xaa, a pu a'utyejvee saɨj ɨ cahuaayu'u tɨ xu'umuara'a. Ajta aɨn ɨ tɨ ava'aca, aɨ pu ráachuisima'a ɨ maj cɨn tya'acá'ita'ara. 6Nyatɨ'ɨj ni a'atɨ huanamuajri'i. Cu xuee hua'a tzajta'a a'a tyaja'utaxajtaca'a ɨ maj ruuri, aɨme ɨ maj muaacua. Ayan tɨcɨn: ―Sei mediida ɨ triigu, ayaa pu che'eta na'a ti'ijnáachi a'ame tɨj a'atɨ ayan tiramue'itɨn sei xɨcaj cɨme'e. Ajta hui hueica mediida ɨ triigu tɨ tɨ́tɨ'ɨjmé'en huíjmueiyujmee, ayaa pu che'eta na'a ti'ijnáachi a'ame tɨj a'atɨ ayan tiramue'itɨn sei xɨcaj cɨme'e. Ma sajta muan, caxu yá'ujɨpuan a'u maj tyaja'ahuaste'e aceituuna ti'itɨ na'ari uuva ti'itɨ silu miche'e maɨjna cɨn huataujvaɨre'en. Ayaa pu tyu'utaxajtaca'a. 7Tɨ'ɨqui ayan ɨ tɨ muaacua asujtza'an. Cɨme'en pu'u ayan rasujtza'an, aj nu ni raanamuajri'i tɨ aɨn ɨ tɨ muaacua tɨ ajta hua'a jetze ajtyama'acan ɨ maj ruuri. Ayaa pu tyu'utaxajtaca'a tɨcɨn: ―Iya'a ii. 8Nyajtahua'a nu atanyeeraca'a. Nyatɨ'ɨj ni raaseij nyaɨjna ɨ cahuaayu'u ɨ tɨ cɨj ti'ityaumuara'a. Ajta aɨn ɨ tɨ ava'aca, ayaa pu antyahuaa tɨcɨn i nyaj hua'acui'ica. Ajta ɨ saɨj ɨ tɨ cujta'an huama'acaa, ayaa pu ajta antyahuaa tɨcɨn i nyaj hua'a chi'i pueen ɨ mɨ'ɨchite. Dioj pu ayan hua'uta'a mej mi maɨjna cɨn antyujmua'aréera e'ica aɨme ɨ maj yan huachaatɨme ɨ tyaɨte iiyan chaanaca japua mej mi hua'ucui'ini aɨme ɨ tyaɨte maɨjna cɨme'e maj tyújnya'usi'ite'en nusu tujri cɨme'e na'ari cui'ini'ira'a cɨme'e o aɨme cɨme'e ɨ ti'ityaɨn ɨ maj ti'ityacɨ'ɨmaca. 9Tɨ'ɨqui ɨ ta'anxɨvi asujtza'an. Nyatɨ'ɨj ni nyaɨme huaseij ɨ hua'axaijnyu'uca aɨme ɨ maj maɨjna cɨn huácuiihuaca'a maɨjna maj ra'ara'astijre maɨjna ɨ nyuucari tɨ cɨme'en raxa ɨ Dioj, majta maɨjna cɨme'e maj ra'ancura'a ɨ nyuucari Cɨriistu'u tɨ raatyajtuaa ɨ hua'a jemi. Majta aɨme an mu e'ejtya'acaa ɨ ɨpuari jete. 10Majta ca'anin cɨn jíjhuacaa tɨcɨn: ―Tavastara'a, mɨ paj urare'enya'acan cɨn seijre'e, mɨ paj tzaahuati'ira'a cɨn ti'ixaxa'a, ¿a'achuni auj a'ateeri asta pana'a cai peyan tiraaxa'apɨ'ɨntare'en paɨme cɨme'e ɨ maj taacuii, pej pi pueijtzi hua'uta'an paɨme ɨ maj an japuan huachaatɨme anna chaanaca japua? 11Tɨ'ɨqui hua'ure'epijte ɨ cɨɨxuri ɨ tɨ tɨtɨ'ɨjme, tɨ ajta ti'icueina. Ayaa pu tihua'uta'ixaa maj nu'u mauj a'atzu tyu'uchu'eve'en asta na'a cai ayan tya'araurasten a'achu tɨ ari hua'uxa'apɨ'ɨntari'iri'i aɨme jemi ɨ maj ruxa'aj ti'itɨj cɨn ti'ivaɨra'acaa, ajta aɨme ɨ hue'ihuaamua'a ɨ maj meyan che'eta mana'a eenye'eque'e cui'ini matɨj aɨme. 12Tɨ'ɨqui ɨ ta'arajsevi asujtza'an. Nyatɨ'ɨj ni nyajtahua'a atanyeeraca'a. Ma'acui xaa nya'u. Eecan pu huapɨ'ɨ huataujca'atzɨ ɨ chaanaca. Ajta aɨn ɨ xɨcaj, huatyaxu'umuaraca'a. Ayaa pu seijra'acaa tɨj aɨjna ɨ cɨɨxuri tɨ xu'umua ɨ maj cɨn ti'ityaujche'etyahua'a mua'aye'i tɨ pua'a meyan maujxaamɨjte'e. Ajta aɨjna ɨ maxcɨra'i, aɨ pu huatyapa'uraca'a. Ayaa pu seijra'acaa tɨj xuure'e. 13Majta aɨme ɨ xu'ura'ave, aɨ mu meyan che'eta mana'a a'ajvatzɨjxɨ ɨ chuej japua tɨj aɨjna ɨ taca'ira'an ɨ huarej tɨ auj seijre'e tɨ'ɨj huaseevi'i a'aye'i. Tɨ pua'a aɨn cɨya'ara'an huataujruurajxɨ'ɨn aaca cɨme'e, naijmi'i pu cávaɨjtzi ɨ taca'ira'an. 14Ajta ɨ tajapua tɨ je'eseijre'e, aɨ pu ahuáujpua'arixɨ. Ayaa pu che'eta na'a huateeseijre tɨj ajta a'atɨ yu'uxari huatyeejire. Ajta tɨj na'a a'utɨ a'u jɨrime, ajta tɨj na'a a'utɨ a'arahuáchijmee ɨ jaj japua, naijmi'i pu huara'axɨ. Capu che'e mu'u e'e seiraa a'araa ɨ jɨri. 15Majta naimi'i ɨ maj yan japuan seijra'acaa iiyan chaanaca japua, a mu ahuauravaataca'a a'ahua'a tyasta'ana tzajta'a majta jaij tzajta'a aujna jɨri jetze. Ayaa mu huarɨj aɨme ɨ maj ti'itɨj cɨn títyatatí, tɨ pua'a tajtuhuan pueen nusu presideenti pueen na'ari ɨ maj tihue'ijte'e ɨ xantaaru'u nusu ɨ macai maj chijtyaani pueen nusu ɨ maj eihua ruca'anyejme. Naimi'i matɨj mana'a pua'amua yen seijre'e iiyan chaanaca japua, meyan huatauravaataca'a. Capu amɨn a'ij tɨ pua'a ruxa'a mana'a á'ujhua'anya'a a'ij tɨ tihua'araanajchi, na'ari ca'anyejri mu cɨn ti'imuara'acaa. 16Ayaa mu tihua'utajée maɨjna ɨ jɨri, majta maɨjna ɨ tetej tɨcɨn: ―Sata'aj yeehui tajapua rájveti sej si ta'ava'anan tɨ ij cai taaseij aɨjna ɨ tɨ acajca ɨ ɨpuari japua, ajta tɨ ij cai pueijtzi taacɨ'ɨti aɨjna jemi ɨ Canya'a ɨ tɨ ari nyu'ucamɨ'ɨ. 17Ee xaa, pu'uri yeehui ayan tyaja'ure'enye aɨjna xɨcajra'a mej jetzen pueijtzi taata'asin maɨjna cɨme'e mej meri nínyu'ucacu, majta capu a'atɨ raayɨ'ɨtɨ tɨ tya'utaviicue'i aɨjna cɨme'e.

will be added

X\