Apocalipsis 5

1Nyatɨ'ɨj ni ayan eenye'en tyu'useij, tɨ aɨjna ɨ tɨ acajca ɨ ɨpuari jetze, ru'ɨrɨɨta'an pu ru'ityépijcaa ɨ yu'uxari ɨ tɨ ruxa'ajta'a tya'asɨɨmue'ihuaca'a, ajta, á'avijti'ihuaca'a arahua'apuaca cɨme'e ɨ xɨjca. 2Nyajta a'atɨ huaseij tɨ ute'e ti'ivaɨre'e. Aɨjna ɨ a'atɨ eecan pu huapɨ'ɨ uraca'anye. Ca'anin pu cɨn tyu'utahuau. Ayaa pu tɨcɨn: ―¿A'ataani ayan huataujcɨ'ɨpua tɨ aɨn ra'ajsújtza'anaxɨ'ɨn ɨ tɨ cɨn á'avi'ijti'ihuajmee, ajta ɨ tɨ raataxɨjta ɨ yu'uxari? ―Ayaa pu tyu'utaxajtaca'a. 3Tɨ'ɨqui ayan te'irajraa. Tɨj na'a aujna a'ahua'a u ute'e, ajta iiyan chaanaca japua, ajta u tajete, capu ma'a a'atɨ tɨ ayan tyu'utaujcɨ'ɨpua ɨ tɨ ayan tiraatáxɨjta, ajta tɨ ra'useij a'ij tɨ te'eyu'usi'ihuaca'a. 4Nyajta inyaa, eihua nu huapɨ'ɨ nyeyeinyaca'a nyaɨjna cɨme'e maj cai ratyauva'aca'a seij tɨ ayan tyu'utaujcɨ'ɨpua ɨ tɨ ayan tiraatáxɨjta ɨ yu'uxari nusu tɨ ra'useij, ajta tɨ ra'ujijve'en. 5Tɨ'ɨqui saɨj tɨ hua'a jetze ajtyama'acantacaa aɨme ɨ vaujsi, ayaa pu tinaata'ixaa tɨcɨn: ―Capaj ayeinya. Ma'acui xaa, aɨjna mej meyan ratamua'amua tɨcɨn Ɨ muajye ɨ tɨ hua'a jetze ajtyama'acan aɨme ɨ maj Israel jetze airaanye, aɨjna ɨ maj majta meyan ratamua'amua tɨcɨn Aɨjna ɨ tɨ David jetze airaujnejte, aɨ pu ari tyu'utyaamue'itɨ tɨ'ij aɨn ayan tira'asujtza'anaxɨ'ɨn ɨ ta'arahua'apuaca cɨn á'avi'ijti'ihuajmee, tɨ ajta raatáxɨjta. 6Nyajta neyan eenye'en tyu'useij tɨj ti'itɨ ɨ Canya'a ayaa seijra'acaa tɨj ɨ mej meri raaje'ica. Au pu a'utyavaaca'a jemin ɨ ɨpuari. Aɨ pu ajta hua'a tzajta'a seijra'acaa ɨ maj muaacua ɨ maj ruuri, majta aɨme ɨ ma a'atacaitɨma'acaa aɨme ɨ vaujsi. Ajta aɨjna ɨ Canya'a, arahua'apuaca pu ájta'ahuájma'acaa, ajta arahua'apuaca'ame'en pu ájjɨ'ɨsíjma'acaa. Ajta aɨn jɨ'ɨsaara'an ɨ ta'arahua'apua, ai pu aɨn pueen ɨ xaijnyu'ucara'ara'an ɨ Dioj ɨ tɨ nainjapua u ya'utaityaca'a iiyan chaanaca japua. 7Ajta aɨn ɨ Canya'a, au pu a'uve'eme aɨjna jemi ɨ tɨ a'acajca ɨ ɨpuari jetze. Tɨ'ɨqui ra'ancure'epi aɨjna ɨ yu'uxari ɨ tɨ ɨrɨɨta'an seijra'acaa aɨjna ɨ tɨ ɨpuari jetze acajca. 8Tɨ'ɨj ra'ancure'epi aɨjna ɨ yu'uxari, aɨme ɨ maj muaacua ɨ maj ruuri, majta aɨme ɨ vaujsi ɨ maj seite japuan muaacua ara'ase, aɨ mu meyan a'ɨmɨ a'icaujtuuxɨ maɨjna jemi ɨ Canya'a. Matɨj mana'a pua'amua te'itya'ɨca'a maɨjna ɨ aarpa, majta tuxa'a tɨ ooro cɨn tí'itaavijhuaca'a. Cuaanye'e pu ava'ɨstijma'acaa aɨjna jetze ɨ tuxa'a. Ajta aɨjna ɨ cuaane'e, ai pu aɨn pueen maj raatahuaviiri'i ɨ Dioj aɨme ɨ maj rɨ'ɨ tí'ityeseijre'e ɨ Dioj jemi. 9Matɨ'ɨj mi meyan jajcuacan cɨn tyu'utachuiicaca'a tɨcɨn: Ayaa pu tiraavijte'e paj muaa peyan ra'ancure'epin, pajta raatáxɨjta a'ini mamuaaje'ica. Pajta muaa, papu'uri tyu'utanajchitaca'a paɨjna cɨme'e ɨ a'axuure'e ɨ maj cɨn té'echaɨca'a ɨ Dioj jemi, pej pi tyu'utatuiire'en ɨ Dioj jemi ɨ tyaɨte maj nainjapua e'ema'acan. Aɨ mu hua'a jetze ajtyama'acan matɨj mana'a seij jetze maj airaujneijte nusu a'achu pua'amua ɨ maj seij nyuucari cɨn ti'ixaxa'a nusu matɨj mana'a pua'amua ɨ maj tyaɨtestyamua'ame'en pueen. A'u tɨ na'a mej e'eseijre'e seij japua ɨ chuej, au mu e'ema'acan. 10Pajta muaa, papu'uri peyan rɨ'ɨ hua'uruu mej mi meyan maɨn tyaɨtestyamua'ame'en pueenya'a mua'ara'ani aɨjna ɨ tɨ ti'ijta, mej mi majta ti'itɨj cɨn tyu'utyavaɨre'en maɨjna jemi ɨ Dioj. Ma majta aɨme, aɨ mu tyu'utaijta iiyan chaanaca japua. Ayaa mu tyu'utachuiicaca'a. 11Nyatɨ'ɨj ni atanyeeraca'a. Nyatɨ'ɨj ni hua'unamuajri'i aɨme ɨ maj u tajapua ti'ivaɨre'e. Ma mui'icá huapɨ'ɨ. Capu a'atzu rɨ'ɨri tɨ hua'uté'iten, ni capu amiteere'e a'achu maj pua'amua. Ayaa mu pua'amua matɨj ɨ xu'ura'ave. Aɨ mu maun atavaatɨma'acaa maɨjna jetze ɨ ɨpuari, majta aɨme jetze ɨ maj muaacua ɨ maj ruuri, majta aɨme jetze ɨ vaujsi. 12Aɨ mu meyan ca'anin cɨn tyu'utachuiicaca'a tɨcɨn: Tiche'e teyan rɨ'ɨ tiraata'an tyaɨjna ɨ Canya'a ɨ maj raaje'ica. Ee xaa, ayaa pu tiraavijte'e tɨ aɨn ayan tira'ancura'an aɨjna tɨ Dioj cɨn tiraijcate'en, ajta tɨj na'a tɨ jemin ti'iseijre'e ɨ Dioj, ajta ɨ mua'atziira'a ɨ tɨ cɨn tyu'utaijta, ajta ɨ muáre'eri'ira'ara'an ɨ tɨ cɨn nain cɨn tyu'utyamue'itɨn. Tiche'e rɨ'ɨ tiraata'an, tyajta ahuatatzaahuate'en tyaɨjna jemi, tiche'e tyajta huatatyamua'ave'en tyaɨjna jemi ɨ Canya'a. Ayaa mu tyu'utáchuiica'a. 13Nyatɨ'ɨj ni neyan tihua'unamuajri'i mej ti'ichuiica, matɨj mana'a pua'amua maj u tajapua e'eseijre'e, majta aɨme mej iiyan seijre'e ɨ chaanaca japua, majta aɨme, matɨj pua'amua u tajete mej e'eseijre'e, majta aɨme ɨ maj japuan e'eseijre'e ɨ jaj tɨ ve'e, majta matɨj mana'a pua'amua a'aseijre'e ɨ jaj tzajta'a. Naimi'i mu meyan ti'ichuiicaca'a tɨcɨn: Tiche'e rɨ'ɨ tiraata'an tyaɨjna ɨ tɨ acajca ɨ ɨpuari jetze, tyajta tyaɨjna ɨ Canya'a. Tiche'e rɨ'ɨ tiraata'an, tiche'e tyajta rɨ'ɨ tirajcha'ɨ, tyajta rɨ'ɨ tiraatyajtuaani, tyajta rɨ'ɨ tiraata'an ɨ tɨ nain cɨn antyujmua'aréera a'ara'ani tɨj na'a tɨ yu auca'itɨ a'ame tɨj na'a rusen cɨme'e. 14Majta aɨme ɨ maj muaacua ɨ maj ruuri, ayaa mu tyu'utaxajtaca'a tɨcɨn: ―Che'e ayan tyaja'ure'enyen. Majta aɨme ɨ vaujsi, aɨ mu a'icaujtuuxɨ, majta raatyanajchaca'a ɨ Dioj.

will be added

X\