Apocalipsis 4

1Tɨ'ɨj raatapua'ajtaca'a tɨ tyu'uxajtaca'a, aj nu ni neyan eenye'eque'e tyu'useij. Seij nu huaseij ɨ pueerta tɨ antacuuni'ihuaca'a u tajapua. Ajta aɨn ɨ nyaj anacaican raanamuajri'i, ajtahua'a pu ti'inye'ixaatya'acaa. Ayaa pu namuajra'acaa tɨj a'atɨ tɨ ucáaji'ihua'a trompeeta jetze. Ayan tɨcɨn: ―Yen vejnyéchi nyej ni timuaataseijrate'en a'ij tɨ tu'ujxe'eve'e tɨ ayan tyaja'ure'enyen majca'i huayee. 2Cɨme'en pu'u ayan tyu'utaxajtaca'a, aj pu aɨn xaijnyu'ucara'ara'an ɨ Dioj, aɨ pu nyeetzi jemi ru'utyía'a. Ayaa nu eenye'en tyu'useij cumu a'u tɨ ɨpuari a'utyejvee u tajapua. Ajta aɨjna japua ɨ ɨpuari a'atɨ pu jetzen acajca. 3Ajta aɨn tɨ jetzen acajca, ayaa pu naa eenye'en ti'itéechan. Ayaa pu seijra'acaa tɨj tetej tɨ huapɨ'ɨ ti'ijnajchi, tɨ pa'u ɨ tetej ajta tɨ tyaumua ajta ɨ tɨ ranaxca. Ajta ayan seijra'acaa tɨj ɨ saɨj ɨ tetej ɨ tɨ pa'u tɨ ajta naa ti'imestí. Cu'uxai pu ajta atavɨjca'a a'u tɨ a'utyavaaca'a ɨ ɨpuari. Ayaa pu rua'aaravi'i seijra'acaa tɨj aɨjna ɨ tetej mej meyan ratamua'amua tɨcɨn esmeralda. 4Ajta, seica ɨ ɨpuari ajta atavaatɨma'acaa a'u tɨ a'utejvee aɨjna ɨ ɨpuari. Seite japuan muaacua pu ara'asicaa aɨjna ɨ ɨpuari. Majta maɨn ɨ vaujsi, aɨ mu acatyé'etyajma'acaa jetzen ɨ seica ɨ ɨpuari. Majta meyan seite japuan muaacua ara'asicaa aɨme ɨ vaujsi. Majta cueinavi'in mu ti'itéchajca'a, majta curun tya'utyarújte'ema'a tɨ ooro cɨn taavijhuaca'a. 5Aɨjna seij japua ɨ ɨpuari meyan tyamaxcɨva'ara'a, majta tenyuuca'a. Ajta, an tɨ a'ave'evee ɨ ɨpuari, tatzari pu a'ataatɨma'acaa tɨ ayan pua'amua arahua'apua. Ajta aɨn ɨ tatzari, ai pu aɨn pueen ɨ xaijnyu'ucara'ara'an ɨ Dioj tɨ arahua'apua cɨn ti'imuare'e. 6Ajta aujna a'u tɨ a'ave'evee, ayaa pu e'enye'en huara'amuaa a chuaata'a aɨjna cɨme'e tɨ naa ti'imestí, tɨ ajta ti'itatza. Ayaa pu seijra'acaa tɨj aɨjna ɨ tetej mej meyan ratamua'amua tɨcɨn cristal. Majta aɨme ɨ maj muaacua ara'ase ɨ maj ruuri, au mu uhuá'upu'ujma'acaa tɨj na'a ti'ipua'amua ɨ ɨpuari. Tɨ'ɨj pɨ na'a mu ti'ise'ij, nain japua, tɨj na'a utya'ɨmɨ, ajta iiyan chaanaca japua. 7Ajta aɨn ɨ tɨ saɨtɨ, ayaa pu araseijre'e tɨj muajye. Ajta ɨ tɨ hua'apua, ayaa pu araseijre'e tɨj puuye. Ajta aɨn tɨ ruuri tɨ hueica, ayaa pu tya'acanyee tɨj tyaata'a, ajta aɨn ɨ tɨ muaacua, ayaa pu seijra'acaa tɨ cua'ɨra'ave tɨ rá'ara'ive. 8Majta aɨme ɨ maj muaacua, ɨ maj majta ji'i ruuri, aɨ mu arajsevica ajtá'anájmee ɨ maj muaacua. Tɨ'ɨj pɨ na'a mu ti'ise'ij nainjapua tɨj na'a utya'ɨmɨ, majta iiyan chaanaca japua. Nain tujca'ari tzajta'a, majta nain tɨca'ari tzajta'a, aɨ mu jemin ti'ichuiicaca'a ɨ Dioj. Camu a'anaj raatapua'ajta mej meyan ti'ichuiica tɨcɨn: Rɨ'ɨ pu ti'iseijre'e, tyamua'a pu urare'enya'acan cɨn seijre'e, xa'apɨ'ɨn pu een seijre'e tɨj na'a rusen cɨme'e ɨ tavastara'a, aɨjna ɨ Dioj tɨ nain cɨn antyujmua'aree, aɨjna ɨ tɨ rusaɨj seijra'acaa, tɨ ajta seijre'e ijii, tɨ ajta seira'a a'ame tɨj na'a rusen cɨme'e. 9Majta meyan rɨ'ɨ tirata'aca, majta rana'amiche'e, aɨ mu majta ti'ijtáujtzi'ira'a mua'aye'i maɨjna tɨ aɨn ɨpuari jetze acajca, tɨ ajta ruuri tɨj na'a rusen cɨme'e. 10Matɨj mana'a meyan rɨcɨ ɨ maj muaacua, ɨ maj majta ruuri, aɨ mu majta meyan rɨcɨ aɨme ɨ maj vaujsi ɨ maj seite japuan muaacua ara'ase. Aɨ mu a'icaujtuuxɨjsin maɨjna jemi ɨ tɨ ɨpuari jetze ajcajca, mej mi raatyaanajche maɨjna tɨ i'i ruuri tɨj na'a rusen cɨme'e, majta raatatuire'esin ɨ jemin ɨ tyu'ujcúrun. Majta meyan ti'ichuiica tɨcɨn: 11Ayaa pu timuaavijte'e mueetzi, mɨ paj tavastara'a pueen, mɨ paj pajta i'i Dioj. Tyej ti teyan rɨ'ɨ timuaata'an, tyej ti teyan muana'amiche'en. Pej pi nain cɨn anti'amua'areera, a'ini muaa paj nain tyu'utaahuaca'a, nain ɨ tɨ seijre'e ijii. Ayaa mu een cɨn huataseijre maɨjna cɨme'e pej peyan tira'utyaaca'anye axe'evi'ira'a cɨme'e. Aɨj mu cɨn meyan huátaavijhuaca'a.

will be added

X\