Apocalipsis 3

1’Pata'aj peyan tiraataiti'i paɨjna tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Sardis tɨ cɨme'en yee: “Ayaa pu ti'ixa aɨjna tɨ jemin seijre'e ɨ xaijnyu'ucara'ara'an ɨ Dioj tɨ arahua'apuaca cɨn ti'imuare'e. Nyaa nu nyajta ru'ityá'a ɨ xu'ura'ave ɨ maj arahua'apua ara'ase. Ayaa nu neyan ti'ijmua'aree ɨ saj cɨn ti'imuare'e. Ayaa mu ti'ixaxa'a saj nu'u ruuri saɨjna cɨme'e saj eihua ti'imuare'e. Ma sajta muan, nyeetzi jemi xu seyan mɨ'ɨchi. 2Sata'aj atanyéjnye'ere, sata'aj sajta rɨ'ɨ raaruuren saɨjna tɨ auj muejmi jemi seijre'e, tɨ ajta ari tɨmua'a mɨ'ɨni, a'ini ayaa pu tina'amitejte'e inyeetzi saj cai ti'itɨj cɨn arauraste ɨ Dioj jemi. 3“Sata'aj seyan ra'utamua'aree ɨ saj ra'ancura'a, ɨ saj sajta raanamuajri'i. Sata'aj saɨjna cɨn aráurasten, sajta saɨque tyu'umua'ati. Tɨ pua'a sacai seyan atanyéjnye'ere, nyaa nu mu a'uve'ema'a na'ame muejmi jemi tɨj nahua'ari. Sajta muan, caxu ramua'areeran a'atzaj nyaj pua'a nyaun a'atanyejsin muejmi jemi. 4“Ma majta, seica mu muejmi jemi seijre'e ɨ maj cai meyan ti'itɨ cɨn titya'atura ɨ rujetze. Aɨ mu á'ujhua'anya'a mua'aju'un inyeetzi jamuan, majta á'ujhua'anya'a mua'aju'un maj cueiinavi'in tyu'uchán, a'ini ayaa pu tihua'uvijte'e aɨme. 5“Aɨjna ɨ tɨ ti'imue'itɨn, ayaa pu hui é'enye'e ti'ityecháa a'ame cueinavi'ican. Nyajta inyaa, canu ra'urauuna tɨ cɨn antyahuaa ɨ yu'uxari jetze ɨ mej jetzen a'ayu'usi'i aɨme ɨ maj rusen cɨn huatyaturaasin ɨ Dioj jemi, silu nyaa nu nyajta neyan tiraataxajta ɨ tɨ cɨn antyahuaa jemin ɨ niya'upua, nyajta hua'a jemi ɨ mej jemin ti'ivaɨre'e ɨ niya'upua. 6Ajta aɨn ɨ tɨ huityajnamua, che'e aɨn a'atɨ tyamua'a tiraanamua a'ij tɨ tihue'ixaate'e ɨ xaijnyu'ucara'ara'an ɨ Dioj aɨme ɨ mej e'etyujsa'ɨri jemin ɨ Dioj.” 7’Pata'aj pajta tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Filadelfia tɨ cɨme'en yee: “Pata'aj peyan tɨcɨn yee ayaa pu ti'ixa aɨjna ɨ Dioj ɨ tɨ rɨ'ɨ tirajcha'ɨ, aɨjna ɨ tɨ ajta tzaahuati'ira'a cɨn ti'ixaxa'a. Aɨ pu yee ajta aɨjna cɨn antyujmua'aree tɨ hua'ata'aca mej mi maun a'utyarute a'u tɨ e'irajca aɨjna ɨ tɨ jetzen huanyej ɨ David tyaacan. Tɨ pua'a aɨn tya'antacuuna, capu rɨ'ɨri tɨ a'atɨ te'ityaanan. Ajta, tɨ pua'a aɨn te'ityaanan, capu ajta rɨ'ɨri tɨ a'atɨ tya'antacuuna. 8“Nyaa nu ramua'aree a'ij saj rɨcɨ. Casi'i, xaaseij. Nu'uri neyan amuaata'a sej si seyan ruxaahua saun a'utyarute. Ajta, capu rɨ'ɨri tɨ a'atɨ amuaata'ijmɨ. Nyaa nu ramua'aree tɨ cai eihua amú'uca'anisti'i. Ma sajta muan, sauche'e xu ra'ara'astijre'e a'ij nyaj tyajamue'ixaa. Caxu sajta nyaxaahua. 9“Ma'acui xaa, ayaa nu hua'aruuren nyaɨme ɨ maj meyan ruseijrata maj nu'u Israel jetze ajtyama'acan. Camu xaa nya'u aɨjna jetze ajtyama'acan silu meti'ihue'itaca mu'u. Aɨ mu jemin e'etyujsa'ɨri ɨ Satanás. Ayaa nu ca'anyejri cɨn hua'aruuren mej mi mu a'uva'aju'un mej titunutaxɨ'ɨn muejmi jemi mej mi majta raamua'aree nyaj a'amuaxe'eve'e. 10A'ini muan xu seyan ra'ara'astijre'e a'ij nyej neri tyajamueijca, saj seyan che'eta sana'a tya'utaviicue'i nyatɨj nyajta inyaa tya'utaviicue'iri'i, ayaa nu rɨ'ɨ tyaja'amuacha'ɨ tɨ ij cai ayan tyajamuaacɨ'ɨti ajna maj jetzen meyan á'aviicue'ira'a mua'aju'un, ajna xɨcajra'a tɨ'ɨj ayan tyaja'ure'enyejsin tɨ'ij hua'a japua rájveti naijmi'ica ɨ maj iiyan huachaatɨme ɨ chaanaca japua. Mi'i mu a'uva'aju'un maj titunutaxɨ'ɨsin muejmi jemi mej mi majta raamua'aree nyaj a'amuaxe'eve'e. 11“Mu nu a'icáame inyaa ca'anacan. Rɨ'ɨ xu'u, sata'aj seyan huarɨni sata'aj rɨ'ɨ tirajchaɨ́ xa'ara'ani ɨ sej seri tí'ijcha'ɨ ɨ Dioj jemi. Caxu raata'acare'en tɨ a'atɨ amuaanáhue'iran ɨ curuun ɨ sej seri raatyaamue'itɨ. 12“Ajta aɨn tɨ tyu'umue'itɨn, ayaa nu ti'itɨj cɨn tiraataijcate'esin tɨ'ij ti'ityavaa a'ame u teyujra'an ɨ nyeDioj. Aɨ pu aun a'uracaí a'ame tɨj na'a rusen cɨme'e. Nyajta nu ra'acácheti nyaɨjna jetze ɨ tɨ cɨn antyahuaa ɨ nyeDioj, nyajta ɨ tɨ cɨn tyaja'arajtyahuaa chajta'ara'an ɨ nyeDioj, aujna u Jerusalén ɨ tɨ jajcua, ɨ tɨ ajta aun e'icaanye u tajapua a'u tɨ e'eseijre'e ɨ nyeDioj. Nyajta nu neyan jetzen ra'acachajtza ɨ nyaj jajcuacan cɨn antyahuaa. 13“Ajta aɨn a'atɨ tɨ huiityajnamua, che'e tyamua'a naa tiraanamua a'ij tɨ aɨn xaijnyu'ucara'ara'an ɨ Dioj ayan tihue'ixaate'e aɨme ɨ mej e'etyujsa'ɨri ɨ Dioj jemi.” 14’Pata'aj pajta peyan tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Laodicea. Peyan tɨ cɨme'en yee: “Ayaa pu ti'ixa aɨjna tɨ ayan tzaahuati'ira'a cɨn ti'ixaxa'a tɨcɨn: Ayan ti'ayajna, aɨjna tɨ ajta tzaahuati'ira'a cɨn a'ij ti'ixa Dioj cɨme'en. Ajta capu ayan ti'ihue'itaca. Aɨ pu ajta aɨn pueen ɨ tɨ Dioj jamuan tyu'utaahuaca'a tɨj na'a tɨ ti'iseijre'e ijii. 15“Nyaa nu ramua'aree a'ij sej titetyújcha'ɨ. Caxu a'ujca'anyaacan cɨn na'ancure'evi'itɨ inyeetzi. Caxu sajta ca'anyejri cɨn naatamuari, silu cha'ana'a xu'u seyan titetyújcha'ɨ. Ayaa pu tina'araanajchi saj a'ujca'anyaacan cɨn na'ancure'evi'itɨn na'ari ca'anyejri cɨn saj naatamuarite'en. 16Ayaa xu ti'ivaɨre'e tɨj jaj tɨ cɨj na'a ti'ipɨstí. Caxu seyan ti'ivaɨre'e tɨj jaj tɨ eihua pɨsti nusu tɨ eihua cɨmuajra. Aɨj nu cɨn neyan á'amuaruuren tɨj a'atɨ tɨ ayan jaj aijtzitzee tɨ cai xa'apɨ'ɨn rámencate'e. Nyaa nu ca'anyejri cɨn ma amúuhua'axɨjsin. 17“Ayaa xu ti'ixaxa'a yee sej seri chijtyaani saj pueen, tɨ yee eihua huapɨ'ɨ rɨ'ɨ tyajamuaavaɨ, tɨ yee cai ti'itɨ tyajamua'aturaate'e. Ma sajta muan, caxu seyan ti'ijmua'aree saj xana'avisi'i, sajta seyan a'ij pua'a hua'aseijrate'e hua'a jemi ɨ tyaɨte. Muan xu xaa cai a'ij ti'ijviicue'i, sajta aracucu'unijmee, sajta seyan muamua'avijmee. 18“Aɨj nu cɨn, neyan tyaja'amuahuavii sej si nyeetzi jemi raananan saɨjna ɨ ooro tɨ taij jetze ruta'ahuaca sej si seyan huataujchijtyaanita. Sata'aj seyan nyeetzi jemi raananan ɨ cɨɨxuri tɨ naa ti'icueina sej si saɨjna cɨn ucaujchejtya'axɨ'ɨn tɨ ij cai ayan seijra'a ɨ saj cɨn ti'itevi'ira'a saɨjna cɨme'e saj muamua'avijmee. Sata'aj sajta nyeetzi jemi raananan saɨjna ɨ ti'itɨ ɨ saj araujhuaate'en ɨ rujɨ'ɨ jetze tɨ'ij rɨ'ɨristan sej ti'itɨ huaseij. 19“Ayaa nu huá'atya'axɨ'ɨca, nyajta pueijtzi hua'ata'aca aɨme ɨ nyaj hua'axe'eve'e. Aɨj pu cɨn, sata'aj saɨque tyu'umua'ati, sajta a'ujca'anyaacan cɨn na'ara'astijre'en. 20“Ma'acui xaa, nyaa nu a'ityejvee ta'apueerta, nyete'ejtyaatua'axa. Tɨ pua'a a'atɨ ayan naanamua nyaj rajée, tɨ pua'a aɨn ajta tina'antacuunye'en, aj nu ni jemin utyaruti tyej ti naimi'i tyu'ucua'ani tyajɨɨmua'a. 21“Ajta aɨn ɨ tɨ tyu'umue'itɨn, ayaa nu raata'asin tɨ nyajamuan a'ujyeijxɨ'ɨn a'u nyej teje'ijta a'ini ayaa pu tinaaruu inyeetzi. Nyatɨ'ɨj tyu'utyaamue'itɨ, aj nu ni an niya'upua jamuan a'ujyeijxɨ a'u tɨ aɨn teje'ijta. 22Ajta aɨn ɨ a'atɨ tɨ huiityajnamua, che'e tyamua'a naa tiraanamua a'ij tɨ aɨn xaijnyu'ucara'ara'an ɨ Dioj ayan tihue'ixaate'e aɨme ɨ mej e'etyujsa'ɨri ɨ Dioj jemi.”

will be added

X\