Apocalipsis 21

1Nyatɨ'ɨj ni raaseij a ute'e tɨ ari jajcuacan cɨn seijre'e. Ajta ɨ chaanaca, ayaa pu che'eta na'a jajcuacan cɨn seijre'e. Ajta a ute'e tɨ mi'ima'acan, ajta ɨ chaanaca tɨ mi'ima'acan, capu che'e me'e je'eseijra'acaa. Ajta ɨ jaj tɨ ve'e, capu ajta che'e seijra'acaa a'ini naijmi'i pu ahuaujpua'arixɨ. 2Nyatɨ'ɨj ni raaseij tɨ áva'acáma'acaa a ute'e a'u tɨ Dioj e'eseijre'e aɨjna ɨ chajta'ana tɨ Dioj huataura'ate. Ayaa pu tyaja'arajtyahuaa tɨcɨn Jerusalén tɨ jajcua. Ayaa pu huaujruu aɨjna ɨ chajta'ana tɨj ajta jɨita'a rɨ'ɨ tyu'utyaujchejte tɨ'ɨj ari huateviche'esin. 3Nyatɨ'ɨj ni raanamuajri'i tɨ ca'anin cɨn tyu'utaxajtaca'a ɨ a'atɨ tɨ aun a'utyavaaca'a jemin ɨ ɨpuari. Ayaa pu tyu'utaxajtaca'a tɨcɨn: ―Xaaseij, muan, a'ini pu'uri hui huataseijre'esin hua'a jemi ɨ tetyaca aɨjna ɨ chi'ira'an ɨ Dioj. Aɨ pu huatyaturaasin hua'a jemi, majta aɨme, aɨ mu tyaɨtejra'an pueenya'a mua'aju'un. Ajta ɨ Dioj, aɨ pu rusaɨj seira'a a'ame hua'a jemi. 4Rɨ'ɨ pu hui tihua'uta'asin mej mi cai che'e ti'itɨj cɨn ruxaamɨstya'a. Camu che'e cui'ini. Camu che'e maɨjna cɨn ruxaamɨstya'a mua'aju'un maɨjna cɨme'e tɨ saɨj huamɨ'ɨ. Camu majta che'e ruyeinyaj mua'aju'un, camu che'e meyan tirajpueiitzi mua'aju'un maɨjna cɨme'e tɨ ti'itɨ hua'acucui'i, a'ini aɨjna ɨ tɨ mi'ima'acan, aɨ pu ari ahuaujpua'arixɨ. ―Ayaa pu tyu'utaxajtaca'a aɨjna ɨ a'atɨ. 5Ajta aɨn ɨ tɨ ɨpuari jetze acajca, ayaa pu tyu'utaxajtaca'a tɨcɨn: ―Ma'acui xaa, naijmi'i ɨ tɨ ti'iseijre'e, nyaa nu hui raajajcuare'en. Ajta ayan tɨcɨn: ―Auteeyu'uxa aɨjna, a'ini nyaa nu tzaahuati'ira'a cɨn ti'ixaxa'a nyaɨjna cɨme'e tɨ ayan ti'ayajna. 6Aj pu'i ayan tinaata'ixaa tɨcɨn: ―Pu'uri icu. Antipua'araca'a. Nyaa nu hui nyaɨn pueen i nyaj anajca, nyajta i nyaj uve'etyajtɨ. Nyaa nu jajcua ɨmɨ huataseijre, nyajta nain nu tyu'utaahuaca'a tɨ yen ti'iseijre'e. Nyajta nu nain cɨn raanaijmi'ire'e tɨj na'a tɨ ajta ti'iseijre'e. A'atɨ tɨ na'a tɨ nyeetzi jemi a'ujca'anyen nyej ni neyan tiraata'an ɨ́ tɨ tira'aturaate'e ɨ tzajta'an, huaapua'a nu tiraata'asin nyaɨjna ɨ jaj tɨ aun e'iraninyei a'u tɨ a'ajaijxa. Jaj nu xaa tiraata'asin tɨ cɨn ruuri a'ame tɨj na'a rusen cɨme'e. 7Ajta aɨn tɨ tyu'utyaamue'itɨ, ayaa pu ti'ijcɨ'ɨti. Nyaa nu Diojra'an pueenya'a na'ame, ajta aɨn, niyauj pu pueenya'a a'ame. 8’Majta aɨme matɨj mana'a pua'amua maj a'ij pua'a ti'ityetyújcha'ɨ nyeetzi jemi, ayaa pu tihua'acɨ'ɨti maj maun a'utyaturan a'alaguun tɨ azufre cɨn a'ataasin. Ai pu aɨn pueen ɨ maj cɨn hua'apuacajretze huacui'ini. Au mu a'utyaturaasin aɨme ɨ maj cai á'ujca'anye maj rajpueijtzi nyeetzi jetze ma'acan, majta aɨme ɨ maj cai tya'atzaahuate'e, majta aɨme ɨ maj huá'anahua'aca naijmi'ica, ɨ tɨ'ɨrii, ma juuca, majta ma tyetyaca. Majta seica maun a'utyaturaasin. Ai mu aɨn pueen ɨ mej ti'ityacui'ica, majta ɨ maj ruxana'acɨre'e, majta ɨ maj ti'ichyahuaara, majta aɨme ɨ maj rana'amiche maɨjna ɨ tɨ cai Dioj pueen, majta matɨj mana'a pua'amua ti'ihue'itaca. Matɨj mana'a pua'amua mej meyan e'en, au mu a'utyaturaasin a'alaguun. ―Ayaa pu tyu'utaxajtaca'a aɨjna ɨ Dioj. 9Aj pu'i, saɨj pu a e'ire'enye inyeetzi jemi. Ai pu aɨn pueenya'a saɨj tɨ tajapua ti'ivaɨre'e tɨ hua'a jetze ajtyama'acan ɨ maj arahua'apua ara'ase, ɨ maj ru'ityatú'utujma'acaa ɨ cutzape'e tɨ ajta arahua'apua ara'ase. Ajta aɨjna tzajta'a ɨ cutzape'e, aɨ pu uramuaaca'a saɨj ajta saɨj ɨ cu'ini'ira'a ɨ maj cɨn rajpueijtzica'a ɨ tyaɨtye ɨ maj yan seijra'acaa japuan i chaanaca, ɨ tɨ ajta arahua'apua ara'ase. Ayaa pu tinaata'ixaa tɨcɨn: ―Iya'a ji, nyaa nu hui timuaataseijrate'esin nyaɨjna ɨ tɨ jemin tya'ataujratziiri'i ɨ Canya'a tɨ ɨra'ara'an pueenya'a a'ame. 10Cɨme'en pu'u ayan tinaata'ixaa, aj pu'i aɨn xaijnyu'ucara'an ɨ Dioj huatyajturaa inyeetzi jemi. Aj pu'i aun nyaja'uví'itɨ a'u tɨ jɨri a'utacá'a, tɨ huapɨ'ɨ ajtee, tɨ ajta va'atɨ a a'utacá'a. Aj pu'i tinaataseijrate aɨjna ɨ chajta'ana ɨ Dioj tɨ huataura'ate tɨ ayan tyaja'arajtyahuaa tɨcɨn Jerusalén. Au pu u tajapua e'icáma'acaa aujna tɨ Dioj e'eseijre'e. 11Naa pu ti'ityamastajye'icaa tɨj ajta Dioj huapɨ'ɨ naa seijre'e. Ajta aɨjna ɨ tɨ tyamastajye'icaa, ayaa pu seijra'acaa tɨj tetej tɨ huapɨ'ɨ ti'ijnajchi, tɨ ajta naa ti'itatza tɨj aɨjna ɨ cristal. Ayaa pu ajta seijra'acaa tɨj aɨjna ɨ jaspe. 12Jaxu'u pu cɨn tira'anami'i au tɨ va'atɨ autacá'a, tɨ tyamua'a te'ejtee. Tamuaamuata'a japuan hua'apua pu ará'axcaa a'u tɨ a'apueerta. Majta aɨme ɨ maj majta tamuaamuata'a japuan hua'apua ara'ase aɨme ɨ maj tajapua ti'ivaɨre'e, au mu e'itya'upu'uma'acaa a'u tɨ a'apueertajme saɨj ajta saɨj. Ajta, ɨ pueerta jetze, seij jetze ajta seij, ayaa pu te'eyu'usi'ihuaca'a a'ij maj antya'aruu aɨme ɨ tyaɨtestyamua'ame'en ɨ maj hua'a jetze airaujneijte aɨme jetze ɨ yaujmua'ame'en aɨjna ɨ Israel tyaacan. 13U Teijmata'a pujme'en, hueicaque pu a'apueerta, ajta Tzareeme'en pujme'en, ajta hueicaque pu ajta a'apueerta. Ayaa pu che'eta na'a, hueicaque tya'apueerta ajta u Cuameche pujme'en, ajta u Huaahuata pujme'en hueicaque pu ajta a'apueerta. 14Ajta tamuaamuata'a japuan hua'apua pu tya'ara'ase ɨ tɨ tajé'este ɨ tɨ ajta japuan ájtaavijhuaca'a ɨ jaxu'u tɨ cɨn cura'anami'ihuaca'a ɨ chajta'ana. Ajta aɨjna jetze ɨ tɨ tajé'este, ayaa pu te'eyu'usi'i a'ij maj antya'aruu aɨme ɨ maj majta tamuaamuata'a japuan hua'apua ara'ase, ɨ tɨ ajta Canya'a hua'antihuau mej mi maɨn tyajá'uxajtanye'en maɨjna jetze ma'acan. 15Ajta aɨn tɨ ti'ine'ixaatya'acaa, aɨ pu ti'itɨ huiitechuaaca'a cumu ti'itɨ cɨye tɨ ooro cɨn taavijhuaca'a. Ai pu aɨn pueenya'a tɨ cɨn raaté'iten a'achu tɨ caj auyauj ɨ chajta'ana, ajta a'achu tɨ caj antayauj ɨ pueerta, ajta a'achu tɨ ajtee ɨ jaxu'u. 16Ruxa'aj pu huatatɨtɨ'ɨjmee. Ayaa pu che'eta naa huatatee tɨj ajta auyauj. Ajta aɨn raate'itee ɨ chajta'ana aɨjna cɨme'e ɨ cɨye. Ayaa pu huatatee ɨ chajta'ana a'achu cumu hua'apua vi'ira'a kiloometru. Ayaa pu che'eta na'a auyauj, ayaa pu che'eta na'a ajtee. 17Aɨ pu ajta raate'itee aɨjna ɨ jaxu'u. Ayaa pu che'eta na'a tiraate'itee matɨj ti'ijrɨ'ɨre ɨ tetyaca. Ayaa pu ajtee a'achu cumu hueicate japuan anxɨvi meetru. 18Ajta ɨ jaxu'u, tetej pu cɨn ájtaavijhuaca'a mej meyan ratamua'amua tɨcɨn jaspe. Ajta aɨn ɨ chajta'ana, nain pu cɨn taavijhuaca'a aɨjna cɨme'e ɨ ooro tɨ naa tyá'ajtaave tɨj ɨ viidriu. 19Ajta aɨjna ɨ tɨ tajé'este, tɨ ajta japuan ájtaavijhuaca'a aɨjna ɨ jaxu'u ɨ tɨ cɨn cura'anami'i ɨ chajta'ana, naa pu rɨ'ɨ tirúurijhuaca'a tɨj na'a tɨ e'eseijre'e aɨjna cɨme'e ɨ tetej tɨ huapɨ'ɨ ti'ijnajchi. Aɨjna tɨ saɨj, aɨn pueenya'a ɨ jaspe. Ajta ɨ tɨ hua'apua, zafiro pu pɨrɨcɨ. Ajta ɨ tɨ hueica, aɨ pu pueenya'a aɨjna ɨ ágata tɨ sɨɨchira'a. Ajta ɨ tɨ muaacua, aɨ pu pɨrɨcɨ ɨ esmeralda, tɨ ru'aarara'a. 20Ajta ɨ ta'anxɨvi, ai pu aɨn pueen aɨjna ɨ ónice tɨ yu'uxare'e. Ajta ɨ ta'arajsevi, aɨ pu pɨrɨcɨ aɨjna ɨ cornalina tɨ i'ipa'u. Ajta ɨ saɨj, ɨ tɨ arahua'apua, crisólito pu pɨrɨcɨ tɨ tyaumuara'a. Ajta ɨ saɨj, ɨ ta'arahueica, berilo pu pɨrɨcɨ tɨ ru'aarara'a seijre'e, ɨ tɨ ajta cɨj caj ti'ityaumuara'a. Ajta ɨ tɨ aramuaacua, aɨ pu pɨrɨcɨ ɨ topacio tɨ naa ti'ityaumuara'a, tɨ ajta naa ti'itatza. Ajta ɨ seica, ayaa pu ti'en. Ɨ tɨ tamuaamuata'a, aɨ pu pɨrɨcɨ ɨ crisoprasa tɨ naa ti'ityaumuara'a, tɨ ajta cɨj ti'iru'aarara'a. Ajta ɨ tɨ tamuaamuata'a japuan saɨj, jacinto pu pueen tɨ tyaɨjravi'in cɨn nacamua. Ajta aɨn tɨ tamuaamuata'a japuan hua'apua ara'ase, ai pu aɨn pueenya'a aɨjna ɨ amatista tɨ naa ti'ijámua'ara. 21Ajta aɨjna ɨ pueerta tɨ tamuaamuata'a japuan hua'apua ara'ase, aɨ pu cɨn taavijhuaca'a aɨjna cɨme'e ɨ peerla, saɨj ajta saɨj ɨ pueerta, seij cɨme'e ɨ peerla. Ajta ɨ caaye jetze, nain pu ooro cɨn taavijhuaca'a tɨ ajta ayan naa ti'itatza tɨj aɨjna ɨ viidriu. 22Nyajta nu neyan raaseij tɨ cai teyuu ma'a a'ahua'acaa aujna chajta'ana a'ini a'u tɨ na'a aujna chajta'ana meyan rana'amiche maɨjna ɨ tavastara'a, ɨ Dioj, aɨn tɨ nain cɨn antyujmua'aree, majta maɨjna ɨ Canya'a. 23Capu ajta ruxe'eve'e tɨ aɨn xɨcaj hua'atatzavi'ira tujca'ari tzajta'a hua'a japua ɨ tyaɨte. Capu ajta ruxe'eve'e tɨ aɨn maxcɨra'i tatzava'a tɨca'ari tzajta'a a'ini aɨjna ɨ tɨ Dioj cɨn rusaɨj tyámastájye'i, ai pu aɨn pueen tɨ hua'atatzavi'ira hua'a japua. Ajta aɨjna ɨ Canya'a, ai pu aɨn pueen ɨ tatzari tɨ hua'a jemi huatatza. 24Ajta aɨjna tɨ hua'atátza hua'a japua ɨ maj maun huachaatɨme chajta'a, aɨ pu hua'atatzavi'ira a'ame hua'a japua aɨme ɨ mej seij chuejra'a japua e'ema'acan. Majta aɨme ɨ maj tihue'ijte'e aɨme ɨ maj yan huachaatɨme i chaanaca japua, au mu a'uva'aju'u mua'aju'un u chajta'a mej mi rɨ'ɨ tiraatyajtuaani ɨ Dioj nain cɨme'e ɨ maj cɨn rutyamua'ave'e, majta nain cɨn mej tí'ijcha'ɨ tɨ eihua huapɨ'ɨ ti'ijnajchi. 25Camu a'anaj te'ityanajsin tujca'ari tzajta'a a'u tɨ a'apueerta aujna chajta'a. Capu ajta a'anaj huatyatɨca'ari aujna. 26Au mu ya'ara'asin ɨ maj va'acan cɨn títyatatí, ajta ɨ tɨ eihua huapɨ'ɨ ti'ijnajchi, tɨ ajta naa ti'iseijre'e. Ayaa mu raruuren matɨj mana'a pua'amua seij chuejra'a japua mej e'ema'acan. 27Capu rɨ'ɨrista a'ame tɨ ti'itɨ tɨ xana'avi'ira'a pueen aun a'utyaturan aujna chajta'ana. Capu ajta hua'ata'acare'en mej mi maun a'utyarute aɨme ɨ maj a'ij pua'a ti'ityujcha'ɨ na'ari aɨme ɨ mej ti'ihue'itaca silu aɨme mu'u maun a'utyaruti ɨ maj cɨme'en ayan te'eyu'usi'i a'ij mej antya'aruu aɨjna jetze ɨ yu'uxari ɨ mej meyan ruurican huatyaturan maɨjna jemi ɨ Canya'a.

will be added

X\