Apocalipsis 20

1Nyatɨ'ɨj ni seij huaseij tɨ tajapua ti'ivaɨre'e. U ute'e pu áva'acáma'acaa. Aɨ pu ajta yaavi huáchuisima'a aɨjna tɨ cɨn te'ityaanan a'u tɨ e'etyacun tɨ huápɨ'ɨ a'ucatee. Aɨ pu ajta huapijsima'a ti'itɨ cadeena, tɨ vivéjmee. 2Aj pu'i raateevi'i aɨjna ɨ cu'ucu'u, aɨjna tɨ jajcua ɨmɨ huataseijre. Ai pu aɨn pueen ɨ tɨ ayan antyahuaa tɨcɨn tiyaaru'u, ajta Satanás. Aj pu'i ra'ijtápe tɨ ij a'ateevi'in a'achu cumu seivi'ira'a ninye'ira'a. 3Aj pu'i aun ya'ucajrai a'u tɨ e'etyacun. Ajta ra'atyaana. Ti'itɨ pu ajta ancaavi'ijte tɨ'ij cai che'e hua'acuanamua aɨme ɨ mej seij chuejra'a japua e'ema'acan asta na'a cai te'entipua'arite'en sei vi'ira'a ninye'ira'a. Aj pu'i xaa, ayan tyu'ujxe'eve'e maj rá'ijxɨjta tɨ'i a'atzu a'ateevi'in tɨ ruxaahua á'ucha'acanye'en. 4Nyatɨ'ɨj ni ɨpuari tyu'useij, nyajta nyaɨme ɨ mej jetzen acátye'etya'a. Ai mu aɨn pueen ɨ maj ra'ancura'a maj maɨjna cɨn antyujmua'aréera maj hua'uxɨjte'en ɨ tyaɨte. Nyajta e'eyan hua'axaijnyu'uca huaseij aɨme ɨ maj hue'ijveiichixɨ ɨ hua'amu'u jetze maɨjna cɨme'e maj tyu'utaxajtaca'a maɨjna jetze ma'acan ɨ Jesús, majta maɨjna cɨme'e maj ra'astijra'acaa maɨjna ɨ nyuucari tɨ cɨme'en raxaj ɨ Dioj. Majta aɨme, camu raatyanajchaca'a maɨjna ɨ ja'atɨ tɨ huapɨ'ɨ á'atyesi'ire'e, camu majta raatyanajchaca'a ɨ tɨ ravaɨre'e. Camu majta ra'ancura'a ɨ tɨ te'eyu'usi'ihuaca'a ɨ hua'acuaatze'e nusu ɨ hua'amuajca'a jetze a'ij tɨ ye'i antyahuaa aɨjna ɨ a'atɨ tɨ huapɨ'ɨ á'atyesi'ire'e. Aɨ mu majta huatarú jamuan ɨ Cɨriistu'u, majta maɨjna cɨn ti'ityavaaca'a matɨj tajtuhuaani tɨj na'a sei vi'ira'a ninye'ira'a cɨme'e. 5Ai mu aɨn pɨrɨcɨ ɨ maj anacai huatarujsin ɨ mej meri huacuii. Majta ɨ seica, ɨ mej meri huacuii, camu meyan majtahua'a huatarú asta na'a cai te'entipua'arite'en sei vi'ira'a ninye'ira'a. 6Rɨ'ɨ pu tiraata'a ɨ a'atɨ tɨ ayan ti'ijcɨ'ɨti, tɨ ajta huatarujsin hua'a jamuan ɨ maj anáatyá'a mu a'itaju'un hua'a tzajta'a ɨ mɨ'ɨchitye. Rɨ'ɨ pu tiraata'a a'ini Dioj pu ari huataura'ate ɨ rujemi aɨjna ɨ a'atɨ. Capu ajta che'e rɨ'ɨrista a'ame tɨ ajtahua'a huamɨ'ɨni tɨj na'a rusen cɨme'e, silu ayaa pu aɨjna cɨn te'entyaruti tɨ'ij ti'itɨ cɨn ti'ivaɨra'a ɨ Dioj jemi, ajta jemin ɨ Cɨriistu'u. Aɨ pu jamuan tyu'utaijta. Ayaa pu a'ateevi'i a'achu sei vi'ira'a ninye'ira'a. 7Tɨ'ɨj te'entipua'are ɨ sei vi'ira'a ninye'ira'a, aj pu'i ayan huatatuiihua aɨjna ɨ Satanás aujna a'u tɨ e'etyanami'ihuaca'a. 8Tɨ'ɨqui a'itamé tɨ'ij hua'ucuanamuan aɨme ɨ mej seij chuejra'a japua e'ema'acan, matɨj mana'a pua'amua yen seijre'e iiyan chaanaca japua, tɨj na'a Teijmata'a pujme'en, ajta Huaahuata pujme'en, ajta Cuameche, ajta Tzereemen. Aɨme pu tisaɨre'esin ɨ mej meyan huataujmua'a tɨcɨn Gog, ajta aɨme ɨ seica ɨ mej meyan huataujmua'a tɨcɨn Magog. Ayaa mu ara'ase a'achu tɨ caj tí'itej ɨ sej tɨ huaca a'utɨ avastɨmee ɨ jaj tɨ ve'e. Ajta aɨn ɨ cu'ucu'u hua'ajsaɨre'esin mej mi huatenya'use'en. 9Matɨ'ɨj mi nain japua á'ujhua'anya'a tɨj na'a caj tɨ auyauj ɨ chuej japua. Matɨ'ɨj mi rajnáj a'u mej tya'utyá'ɨnaamuaca'a aɨme ɨ maj rɨ'ɨ ti'iteseijre'e ɨ Dioj jemi, majta rajnáj maɨjna ɨ chajta'ana tɨ huapɨ'ɨ hua'araanajchi aɨme ɨ maj tyaɨtestyamua'ame'en pueen ɨ Dioj. Ajta, taij pu u e'icajve u tajapua. Ajta hua'utyaatai aɨme ɨ maj jamuan á'ujhua'anya'a ɨ tiyaaru'u. 10Ajta aɨn ɨ tiyaaru'u tɨ hua'ucuanamua, au pu e'etyériihuaca'a a'utɨ a a'alaguun a'u tɨ azufre a'ataa, a'u tɨ ajta e'eseijre'e aɨjna ɨ a'atɨ tɨ huapɨ'ɨ á'atyesi'ire'e, ajta aɨjna tɨ ravaɨra'acaa, aɨjna tɨ hue'itzi cɨn ti'ixaxa'ata'a aɨjna jetze ma'acan tɨ huapɨ'ɨ á'atyesi'ire'e. Au mu mi rajpueiitzi mua'aju'un nain xɨcaj tzajta'a, ajta nain tɨca'ari tzajta'a tɨj na'a rusen cɨme'e. 11Nyatɨ'ɨj ni ɨpuari huaseij tɨ ve'e. Naa pu ti'icueinara'a. Nyajta nyaɨjna huaseij ɨ tɨ acajca. Ajta ɨ chaanaca, ajta aɨjna ɨ tajapua, aa huaujpua'arixɨ maɨjna jemi. Camu che'e me'e e'eseijra'acaa. 12Nyatɨ'ɨj ni nyaɨme huaseij ɨ mej meri huacuii, ɨ mej vivejme'en cɨn títyatatyá'acaa, majta ɨ maj cɨle'enya'a cɨn ti'ivaɨra'acaa. Au mu a'are'evaacaa maɨjna jemi ɨ ɨpuari. Majta seica ra'utacuuraca'a ɨ yu'uxari. Majta seij autacuuraca'a ɨ yu'uxari tɨ jetzen te'eyu'usi'i a'ij maj antya'aruu ɨ mej meyan ruuri huatyaturaasin ɨ Dioj jemi. Dioj pu ajta hua'uxɨjte aɨme ɨ mej meri huacuii maɨjna cɨme'e a'ij tɨ te'eyu'usi'ihuaca'a ɨ yu'uxari jetze, ɨ tɨ jetzen ayan tya'axa a'ij maj huarɨj matɨ'ɨj mauj ruuricaa, saɨj ajta saɨj. 13Matɨj mana'a pua'amua ɨ maj aujamɨ ɨ jaj tzajta'a, aɨ mu huatarú. Majta ɨ seica, ɨ maj huacuii a'utɨ na'a, capu amɨn ti'itɨ pɨrɨcɨ ɨ tɨ hua'ucuii na'ari a'utɨ a'utyajturaa ɨ hua'axaijnyu'uca, naijmi'i mu majtahua'a huatarú. Ajta Dioj pu naijmi'ica a'uxɨ́jte aɨjna cɨme'e a'ij mej titetyújchaɨca'a matɨ'ɨj mauj ruuricaa. 14Cɨme'en pu'u hua'uxɨjte, aɨ pu ra'upua'ari naijmi'ica tɨ ti'ityacui'ica, ajta aujna a'u maj a'utyajturaa ɨ mej meri huacuii, ɨ tɨ ayan tyaja'arajtyahuaa tɨcɨn Hades. Naijmi'ica pu atyaahua'axɨ aɨjna jetze ɨ a'alaguun tɨ azufre cɨn á'ataaca'a. Ai pu aɨn pueen ɨ maj hua'apuacajretze huacui'ini, maj maun a'utyaturaasin maujna jetze ɨ a'alaguun tɨ azufre cɨn a'ataa. 15Tɨ pua'a cai ayan te'eyu'usi'ihuacajche'e a'ij tɨ saɨj antyahuaa aɨjna jetze ɨ yu'uxari tɨ jetzen te'eyu'usi'ihuaca'a a'ij maj antya'aruu aɨme ɨ maj ruuri huatyaturaasin ɨ Dioj jemi, ayaa pu ti'ijruuren aɨjna ɨ a'atɨ tɨ cai á'ayu'usi'ihuaca'a. Dioj pu ra'atyajraisin aɨjna jetze ɨ a'alaguun tɨ azufre cɨn a'ataa.

will be added

X\