Apocalipsis 2

1’Pata'aj peyan tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Efeso tɨ cɨme'en yee: “Ayaa pu ti'ixa aɨjna ɨ tɨ hue'itya'aca ru'ɨrɨɨta'a aɨme ɨ xu'ura'ave ɨ maj arahua'apua ara'ase. Ayaa pu ti'ixa aɨjna tɨ hua'a tzajta'a an e'eye'ive ɨ tɨ ooro cɨn taavijhua, tɨ ajta antitátzajmee. 2Nyaa nu hui neyan ti'ijmua'aree a'ij sej titetyújcha'ɨ, saj sajta tyamua'a naa te'eviicue'i. Sajta muan, caxu hua'ancure'evi'itɨcɨ aɨme ɨ maj a'ij pua'a titetyújcha'ɨ silu ayaa xu seri hua'umua'areeri'i aɨme ɨ meyan ruseijrataca'a maj nu'u aɨn pueen ɨ tɨ Dioj hua'antihuau; maj nu'u tyu'utyavaɨre'en tavastara'a jetze ma'acan. Ma majta aɨme, camu aɨn pueen. Ayaa mu'u ruhue'itaca'a. 3Nyaa nu neyan ti'ijmua'aree saj raayɨ'ɨtɨ saj tya'utaviicue'i nain cɨme'e. Muan xu sajta rajpueijtzi xa'aye'i. Ma sajta muan, caxu raatyaxaahuataca'a saj na'ara'astijre'e. 4“Me nyajta inyaa, ayaa nu tyaja'amue'ixaate'e ɨ saj cɨn autyajturaa inyeetzi jemi. Xu'uri raatyaxaahuataca'a sej seyan nyexe'eve'e satɨ'ɨj anacai ti'inyexe'eva'acaa. 5Sata'aj seyan seijna jetze tyu'umua'ati a'ij sej eenye'eque'e ma nuurai. Sata'aj seyan saɨque tyu'umua'ati sej si seyan che'eta rɨ'ɨ titetyújcha'ɨ satɨ'ɨj anacai rɨjcaa. Na'ari sacai seyan huarɨni, nyaa nu nyaun muejmi jemi a'atanyejsin nyej ni amua'ari'i aɨjna ɨ tɨ antitátzajmee ɨ tɨ ajta muejmi jemi seijre'e. Ayaa nu xaa rɨni tɨ pua'a sacai saɨque tyu'umua'ati. 6“Ma sajta muan, xa'apɨ'ɨn xu rɨcɨ aɨjna cɨme'e tɨ cai a'atzu amua'aranajchi a'ij mej ye'i rɨcɨ aɨme ɨ maj meyan hua'atamua'amua tɨcɨn: Ɨ maj ca'anyejri cɨn tie'ijta. Ayaa pu che'eta cai tina'araanajchi inyeetzi. 7Ajta aɨn ɨ tɨ huityajnamua, che'e aɨn rɨ'ɨ tiraanamua a'ij tɨ aɨn xaijnyu'ucara'ara'an ɨ Dioj tihue'ixaate'e aɨme ɨ maj e'etyujsa'ɨri ɨ Dioj jemi. Ajta, aɨjna cɨme'e aɨjna ɨ a'atɨ tɨ tyu'umue'itɨn, ayaa nu raata'asin tɨ aɨn a'atɨ ayan raacua'ani aɨjna jetze ɨ tɨ seijre'e ɨ cɨye tɨ cɨn i'iruuri a'ara'ani, aɨjna ɨ cɨye ɨ tɨ aun a'atavee a'u maj a'utaujtyamua'ave'en jemin ɨ Dioj.” 8’Pata'aj pajta peyan tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Esmirna tɨ cɨme'en yee: “Ayaa pu ti'ixa aɨjna ɨ tɨ aɨn pueen ɨ ta'anajca, ajta ɨ tɨ aɨn pueen ɨ tu'uve'etyajtɨ, aɨjna ɨ tɨ huamɨ'ɨ, tɨ ajta ajtahua'a huatarú. 9Nyaa nu neyan ti'ijmua'aree ɨ saj cɨn rajpueijtzi, sajta muan, sacai a'ij ti'ijviicue'i. Ma sajta muan, nyeetzi jemi xu chijtyaani pueen tyamua'a eihua. Nyaa nu nyajta ramua'aree maj eihua huapɨ'ɨ ti'ihue'itaca aɨme ɨ mej meyan ruseijrataca maj nu'u maɨjna jetze ajtyama'acan ɨ Israel. Ma ajta, capu ayan ti'ayajna silu aɨ mu jemin e'etyujsa'ɨri ɨ Satanás. 10“Caxu ratzɨɨnya'a ɨ saj rajpueiitzi xa'aju'un. Casi'i, aɨjna ɨ tiyaaru'u aɨ pu aun amua'utyatuaasin seica jamuan a'u maj tityaja'anaamɨca. Ayaa pu aɨjna cɨn á'amuaruuren mej mi amuaatyeeseij tɨ pua'a seyan tina'astijra'a nusu sacai. Ayaa xu pua'an xɨcaj rajpueiitzi xa'aju'un a'achu cumu tamuaamuata'a xɨcaj. Tɨ pua'a seyan nain cɨn tya'utaviicue'i inyeetzi jemi, sajta cai a'ij sana'a tɨ pua'a meyan amuaacui'ini, nyaa nu nyaɨjna amuaata'asin nyaɨjna ɨ curuun ɨ saj cɨn i'iruuri xa'aju'un tɨj na'a rusen cɨme'e. 11Ajta aɨn ɨ tɨ huityajnamua, che'e aɨn rɨ'ɨ tiraanamua a'ij tɨ aɨn xaijnyu'ucara'ara'an ɨ Dioj tihue'ixaate'e aɨme ɨ maj e'etyujsa'ɨri ɨ Dioj jemi. Ajta, aɨjna ɨ a'atɨ tɨ tyu'umue'itɨn, capu a'atzu racɨ'ɨti tɨ aɨn ayan che'eta rajpueiitzi a'ara'ani matɨj aɨme ɨ maj yá'ujɨsin ɨ ruxaijnyu'uca ɨ tɨ auj ruuricaa.” 12’Pata'aj pajta peyan tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Pérgamo tɨ cɨme'en yee: “Ayaa pu ti'ixa aɨjna ɨ tɨ ru'ityeechui ɨ chun ɨ tɨ ruxa'ajta'a tya'ajcámɨɨmɨ́jmee. 13Nyaa nu hui ramua'aree a'u saj a'uchaatɨme, aujna a'u tɨ teje'ijta aɨjna ɨ Satanás. Ma sajta muan, sauche'e xu na'astijre'e inyeetzi. Caxu raatyaxaahuataca'a saj na'atzaahuate'e inyeetzi sajna xɨcajra'a tɨ jetzen seijra'acaa aɨjna ɨ Antipas tyaacan, aɨjna tɨ ayan huataujseijrataca'a tɨ aɨn nyeetzi jetze ma'acan ti'ivaɨra'acaa. Capu ti'itɨ cɨn autyajturaa inyeetzi jemi aɨjna ɨ a'atɨ. Ma majta, aɨ mu raaje'ica muejmi tzajta'a, maujna a'u tɨ teje'ijta aɨjna ɨ Satanás. 14“Ma sajta muan, ti'itɨ xu cɨn autyajturaa inyeetzi jemi. Au mu e'eseijre'e muejmi jemi seica ɨ mej meyan tira'astijre'e maɨjna ɨ nyuucari ɨ maj cɨn meyan che'eta tihua'amua'ate tɨj ajta aɨn Balaam tyaacan tiraamuá'ate aɨjna ɨ Balac tyaacan tɨ ayan hue'itzi cɨn hua'utyamue'itɨn aɨme ɨ maj Israel jetze ajtyama'acantacaa, mej mi meyan raacua'ani maɨjna ɨ hue'ira'a ɨ maj raamua'ɨvajtaca'a aɨme jemi ɨ maj cai dioj pueen, ajta maj tyu'uxana'acɨre'e. 15Ayaa mu che'eta mana'a seijre'e muejmi jemi seica ɨ mej meyan majta ra'astijre'e ɨ hua'aye'ira aɨme ɨ maj ca'anejri cɨn tie'ijta ɨ mej jee nicolaítas. Ma sajta muan, ayaa xu sauj hua'ata'aca maj maun é'eseijra'a. 16“Aɨj nu cɨn, neyan tyaja'amue'ixaate'e yee sata'aj saɨque tyu'umua'ati. Na'ari sacai seyan huarɨni, nyaa nu muejmi jemi a'atanyejsin, nyej ni hua'utyenya'usi'ite'en aɨme aɨjna cɨme'e nyej neyan tyu'utaijta saj ca'anyejri cɨn hua'utamuarite'en. 17“Ajta aɨn tɨ huityajnamua, che'e aɨn tyamua'a naa tiraanamua a'ij tɨ aɨn xaijnyu'ucara'ara'an ɨ Dioj tihue'ixaate'e aɨme ɨ maj e'etyujsa'ɨri ɨ Dioj jemi. Ajta aɨn ɨ tɨ tyu'umue'itɨn, ayaa nu raatapueijve'esin aɨjna ɨ cue'ira tɨ ute'e é'eviitzi'i. Nyajta nu tetej raatátɨstejsin tɨ cueinara'a. Ajta aɨjna jetze ɨ tetej jajcuacan cɨn pu te'eyu'usi'i a'ij tɨ ari antyahuaa aɨjna ɨ a'atɨ. Ajta capu ma'a a'atɨ ayan ramua'aree a'ij tɨ te'eyu'usi'i silu aɨ pu ɨ a'atɨ ramua'aree ɨ nyaj raatátɨstejsin nyaɨjna ɨ tetej.” 18’Pata'aj pajta peyan tiraataiti'i paɨjna ɨ tɨ aɨjna cɨn antyujmua'aree tɨ hua'acha'ɨ aɨme ɨ maj maun e'etyujsa'ɨri u Tiatira tɨ cɨme'en yee: “Ayaa pu yee ti'ixa aɨjna tɨ yaujra'an pueen ɨ Dioj, tɨ ajta ayan é'enye'en aj jɨ'ɨsíjmee tɨj taij tɨ atyújmeme, tɨ ajta ayan eenye'en tiɨɨcajmee tɨj coobre ti'itɨ ɨ maj tiracámeijri'i. 19“Nyaa nu ramua'aree a'ij sej titetyújcha'ɨ. Muan xu hui seyan ruxe'eve'e seij sajta seij. Sajta, seyan ruxé'evi'ira'a cɨn ti'ivaɨre'e. Sajta te'eviicue'i tyamua'a naa. Sajta ijii, eitze'e xu rɨ'ɨ titetyújcha'ɨ sacai sejmi'i. 20“Ma ajta, aɨ pu cai na'araanajchi a'ij saj rɨcɨ. Muan xu rata'aca tɨ aɨn jɨita'a ayan a'utyavaaca muejmi jemi, aɨjna ɨ jɨita'a tɨ ayan antyahuaa tɨcɨn Jezabel. Ayaa pu ruseijrata tɨ Dioj jetze ma'acan ti'ixaxa'a. Ma ajta, capu aɨn pueen a'ini aɨ pu ayan hue'itzi cɨn tihua'amua'ate mej mi tyu'uxana'acɨre'en mej mi majta meyan raacua'ani maɨjna ɨ hue'ira'a ɨ maj ramua'ɨvajtaca'a aɨme jemi ɨ maj cai dioj pueen. 21Nu'uri a'atee nyaj raata'a tɨ saɨque tyu'umua'ati. Ma ajta aɨn, capu a'atzu á'ujca'anye tɨ ayan saɨque huarɨni aɨjna cɨme'e tɨ ti'ixana'acɨra'a. 22“Ma'acui xaa, ayaa nu an ya'arajɨsin utaatzi japua a'u maj a'acu'ucutzu ɨ mej ti'icucui'i. Majta aɨme ɨ maj jemin ti'ixana'acɨre'en, ayaa nu eihua huapɨ'ɨ pueijtzi hua'uta'asin tɨ pua'a macai raatyaxaahuata mej meyan a'ij pua'a rɨcɨ tɨj ajta aɨjna. 23Nyajta nu hua'acui'ini nyaɨme ɨ yaujmua'ame'en aɨjna ɨ jɨita'a. Majta naimi'i, a'achu maj pua'amua e'etyujsa'ɨri ɨ Dioj jemi, aɨ mu ramua'areeran nyaj nyaɨn pueen ɨ tɨ ru'umua'aree a'ij tɨ tira'amitejte'e seij ɨ rumua'atziira'a jetze, ajta a'ij tɨ tya'umua'atzɨ ɨ rutzajta'a. Nyajta, ayaa nu amuaata'asin seij nyajta seij a'ij tɨ ayan tiraavijte'e aɨjna cɨme'e a'ij tɨ saɨj ti'ityújchaɨca'a. 24- 25“Saj sajta muan, mɨ seica, mɨ saj saun Tiatira e'eche, mɨ saj sajta cai seyan tira'astijre'e saɨjna ɨ nyuucari, caxu saɨjna huarɨ'ɨre ɨ mej ee eihua huapɨ'ɨ ruxe'eve'e ɨ Satanás jemi. Aɨj nu cɨn, canu maa a'ij ti'itɨj cɨn tyaja'amueijcate'en, silu sata'aj seyan huarɨni saj sauj ra'astijra'a a'ij sej seri tiraarɨ'ɨre. Sata'aj seyan huarɨni, asta nyana'a cai nyajtahua'a ya uvé'enyen. 26“Ajta aɨn tɨ tyu'umue'itɨn, tɨ ajta ayan che'eta na'a rɨ'ɨ ti'ityujcha'ɨ nyatɨj inyaa, asta na'a cai nain te'entipua'are, nyaa nu nyaɨjna cɨn tí'iraijcate'en tɨ ij aɨn tihua'utaijte'en aɨme ɨ maj seij chuejra'a japua a'uchaatɨme. 27Ca'anyejri pu cɨn tihue'itya'a a'ame. Ayaa pu che'eta na'a tihua'antipua'arite'esin aɨme ɨ maj rájchaɨre'e tɨj a'atɨ ayan tiraatyataaraxɨ'ɨn ɨ xa'ari tɨ xarij cɨn taavijhua. Ayaa nu che'eta nyana'a ti'itɨ cɨn tí'iraijcate'en tɨj ajta aɨn niya'upua ayan ti'itɨ cɨn tinyeijca. 28Nyajta neyan huatyaturan ɨ jemin tɨ ij aɨn ayan tatzava'a a'ara'ani tɨj aɨjna ɨ xu'ura'ave tɨ e'ijninyei tapua'arijma'aca. 29Ajta aɨn tɨ huityajnamua, che'e aɨn a'atɨ tyamua'a naa tiraanamua a'ij tɨ aɨn xaijnyu'ucara'ara'an ɨ Dioj ayan tihue'ixaate'e aɨme ɨ maj e'etyujsa'ɨri ɨ Dioj jemi.”

will be added

X\