Apocalipsis 19

1Nyatɨ'ɨjta ni hua'unamuajri'i ɨ maj tajapua ca'anin cɨn ti'ichuiicaca'a. Cu xuee eihua huapɨ'ɨ ajtyáxɨɨraca'a aɨme ɨ maj ti'ichuiicaca'a. Meyan tɨcɨn: Aleluuya, tiche'e rɨ'ɨ tiraata'an ɨ taDioj, a'ini aɨ pu ari tu'irajtuaa, aɨ pu jetze a'uve'eme ɨ tyaj cɨn rɨ'ɨ tira'utaseij, ajta ai pu aɨn pueen ɨ tɨ nain cɨn antyujmua'aree. 2Tzaahuati'ira'a pu cɨn hua'axɨjte'e, ajta ayan tiraavijte'e tɨ aɨn pueijtzi hua'ata'aca. Aɨ pu ari ra'uxɨjte aɨjna ɨ jɨita'a tɨ va'acan cɨn ti'ityavaaca'a, aɨjna ɨ jɨita'a tɨ ruhue'ira'a cɨn ramue'itɨca'a ɨ tumin, tɨ ajta ca'anijra'a hua'uta'a aɨme ɨ maj an japuan huachaatɨma'acaa an chaanaca japua mej mi a'ij pua'a huarɨni maɨjna cɨme'e maj jamuan huataujxana'acɨre. Dioj pu ajta pueijtzi raata'a aɨjna cɨme'e tɨ aɨn jɨita'a ayan hua'ucuii aɨme ɨ maj ravaɨre'e ɨ Dioj. 3Majtahua'a mu huajijhuaca'a meyan tɨcɨn: ―Aleluuya, eecan pu jetzen ájcɨtzúuta a'ame tɨj na'a rusen cɨme'e. ―Ayaa mu tyu'utaxajtaca'a. 4Majta aɨme ɨ vaujsi ɨ maj seite japuan muaacua ara'ase, majta ɨ maj muaacua, ɨ maj majta ruuri, naijmi'i mu a'icaujtuuxɨ, mej mi raatyaanajche maɨjna ɨ Dioj ɨ tɨ a'acajca ɨpuari japua. Meyan tɨcɨn: ―Che'e ayan tyaja'ure'enyen. Aleluuya. 5Tɨ'ɨqui saɨj huajijhuaca'a tɨ aun a'utyavaaca'a ajna vejli'i jetzen ɨ maj japuan ti'imuaɨ'ɨvajtaca. Ayan tɨcɨn: Sata'aj rɨ'ɨ tiraata'an saɨjna ɨ Dioj, naijmi'i muan mɨ saj ravaɨre'e ɨ Dioj. Capu amɨn a'ij tɨ pua'a seyan vivejme'en cɨn títyatatí na'ari saj cɨle'enye'en cɨn títyatatí. 6Nyatɨ'ɨj ni nyajtahua'a hua'unamuajri'i aɨme. Cu xuee eihua huapɨ'ɨ ajtyáxɨɨraca'a. Ajta, matɨ'ɨj tyu'utaxajtaca'a, ayaa pu namuajra'acaa tɨj jaj tɨ tetej tzajta'a mɨ'ɨya. Ayaa pu ajta namuajra'acaa cumu mej tenyuuca'an. Meyan tɨcɨn: Aleluuya, tiche'e rɨ'ɨ tiraata'an ɨ Dioj, a'ini pu'uri nain cɨn tie'ijta aɨjna ɨ tavastara'a ɨ tɨ taDioj pueen. 7Tiche'e teyan huatatatyamua'ave'en, tyajta teyan tiraatataujtzi'ire'en, tej ti rɨ'ɨ tiraata'an a'ini pu'uri ajna tyaja'ure'enye tɨ aɨn Canya'a huatyenyaɨche. Ajta aɨn ɨra'ara'an, pu'uri rɨ'ɨ huaujruu. 8Ayaa pu tiraata'a tɨ tyu'utaujchejte aɨjna cɨme'e ɨ cɨɨxuri tɨ mestí, tɨ ajta naa een, tɨ tyámastájye'i, tɨ cai a'atzu chuaamua. Ajta aɨjna ɨ cɨɨxuri tɨ naa een, ai pu aɨn pueen a'ij mej meri huarɨj aɨjna cɨme'e ɨ tɨ xa'apɨ'ɨn een ɨ Dioj jemi. Aɨj pu xaa cɨn ucaujchejtye'esin. 9Ajta ɨ tɨ tajapua ti'ivaɨre'e, ayaa pu tinaata'ixaa tɨcɨn: ―Pata'aj ra'uteyu'uxa yee: “Rɨ'ɨ pu tihua'uta'a aɨme ɨ tɨ Dioj hua'uta'inee mej tyu'ucua'ani jamuan aɨjna ɨ Canya'a ajna xɨcajra'an tɨ jetzen huatényaɨchi.” Aj pu'i ayan tinaata'ixaa tɨcɨn: ―Ayen ti'ayajna ɨ Dioj jemi a'ij nyej nyauchan timué'ixaa. 10Cɨme'en pu'u ayan tinaata'ixaa, nyatɨ'ɨj ni a'icantutzi a'u tɨ a'araɨɨcajme nyej ni raatyaanajche. Ajta aɨn, ayaa pu tinaata'ixaa tɨcɨn: ―Capej hui peyan nyaruuraj a'ini nyaa nu neyan che'eta nyana'a ti'ivaɨre'e ɨ Dioj jemi patɨj muaa, majta aɨme ɨ a'ihuaamua'a ɨ maj meyan tya'anxájta maɨjna cɨme'e a'ij tɨ tyu'utaxajtaca'a ɨ Jesús, majta a'ij tɨ aɨn huarɨj. Pata'aj paɨjna huatyaanajche ɨ Dioj, a'ini aɨjna ɨ nyuucari tɨ cɨme'en raxaj a'ij tɨ tyu'utaxajtaca'a ɨ Jesús, au pu jetze a'uve'eme ɨ xaijnyu'ucari tɨ Dioj jetzen ma'acan ti'ixaxa'a. ―Ayaa pu tyu'utaxajtaca'a aɨjna ɨ a'atɨ. 11Nyatɨ'ɨj ni raaseij tɨ antacuuni'ihuaca'a u tajapua. Ma'acui xaa, cahuaayu'u pu an a'utyavaaca'a. Naa pu ti'icueinara'a, ajta aɨn ɨ tɨ japuan ava'aca, ayaa mu ratamua'amua tɨcɨn, “Ɨ tɨ nain cɨn tya'aste, ajta tɨ tzaahuati'ira'a cɨn ti'ixaxa'a.” Aɨ pu xa'apɨ'ɨn ayan rɨcɨ aɨjna cɨme'e tɨ hua'axɨjte'e ɨ tyaɨte a'ij tɨ tiraavijte'e. Ajta ayaa pu che'eta na'a ti'inya'use'e. 12Yaa pu seijre'e ɨ jɨ'ɨsaara'an jetze tɨj taij tɨ a'ataa. Eecan pu utyarujti'ihuajmee ɨ curuun. Ajta jetzen pu te'eyu'usi'i a'ij tɨ antyahuaa. Ajta, capu a'atɨ yau'eite a'ij tɨ huataujmua'a, silu aɨ pu'u na'a rusaɨj yau'eite. 13Ayaa pu e'enye'en ti'itéchajca'a ɨ cɨɨxuri tɨ tɨtɨ'ɨj, ajta xuure'e raaméiri'ihuajma'acaa. Ayaa mu majta raatamuá'a tɨcɨn, “Aɨjna ɨ nyuucari tɨ cɨme'en raxaj ɨ Dioj.” 14Majta cujta'an huaju'ucaa aɨme ɨ xantaaru'u maj tajapua e'ema'acan. Ayaa mu e'enye'en ti'itéchajca'a ɨ cɨɨxuri, tɨ mestí, tɨ ajta naa een. Naa pu ti'icueina, ajta naa ti'iseijra'acaa ɨ tihua'acɨɨxu, ajta capu a'atzu ti'ichuamuavi'icaa. Aɨ mu cujta'an huaju'ucaa ɨ ma ta'ave'ete'ete aɨme japua ɨ cahuaayu'u maj cueina. 15Ajta aɨn nyuucara'ara'an, ayaa pu hua'aruuren ɨ tyaɨte tɨj a'atɨ ti'itɨ antisijchaca'a aɨjna cɨme'e ɨ chun. Ayaa pu pueijtzi tihua'uta'asin aɨme ɨ mej seij chuejra'a japua e'ema'acan aɨjna cɨme'e ɨ runyuuca. Ca'anyejri pu cɨn tihua'utaijte'esin. Ajta, hua'a japua pu ráavaɨjtzi tɨj na'a ɨ tɨ cɨn huapɨ'ɨ nyu'ucamɨ'ɨ ɨ Dioj, tɨ nain cɨn antyujmua'aree. 16Jetzen ɨ cɨɨxura'ara'an, ajta a'u tɨ ajtave'e ɨ chun, ayaa pu te'eyu'usi'i a'ij maj ratamua'amua tɨcɨn: “Hua'atajtuhuan aɨme ɨ tajtuhuaani, ajta, tɨ tihue'ijte'e aɨme ɨ maj majta tie'ijta”. 17Nyatɨ'ɨj ni a'atɨ huaseij tɨ ti'ivaɨre'e u tajapua. Antyɨ'ɨmɨ pu a'utyavaaca'a ɨ xɨcaj jetze. Ca'anin pu cɨn hua'utajée matɨj mana'a pua'amuacaa ɨ pina'ase ɨ maj cɨ'ɨcacaj, ɨ maj majta rá'ara'ive u ute'e. Ayan tɨcɨn: ―Iiya'a xu'u hui, mu a'uva'aju'un sej si seyan tyu'ucua'ani saɨjna cɨme'e tɨ Dioj ayan tyaja'amuamin. 18Sej si hui raacua'ani saɨjna ɨ hua'ahue'ira'a aɨme ɨ maj tie'ijta na'ari hua'ahue'ira'a ɨ hua'acapitan ɨ xantaaru'u. Sajta seyan raacua'ani hua'ahue'ira'a saɨme ɨ tyetyaca ɨ maj eihua rucaca'anye, sajta hui hua'ahue'ira'a ɨ cahuaayu'u, sajta hua'ahue'ira'a saɨme ɨ maj avé'etye'ete. Nain xu hui cua'ani hua'ahue'ira'a ɨ tetyaca, capu amɨn a'ij tɨ pua'a meyan ruxaahua á'ujhua'anye'en nusu maj ca'anyejri cɨn ti'imuara'acaa. Capu amɨn a'ij ajta tɨ pua'a mej vivejme'en títyatatí nusu meyan cɨle'enye'en cɨn ti'ivaɨre'e. Muan xu hui xaa hua'acua'ani ɨ hua'ahue'ira'a. ―Ayaa pu tyu'utaxajtaca'a aɨjna tɨ tajapua ti'ivaɨre'e. 19Nyatɨ'ɨj ni hua'useij maj e'etyujsaɨra'acaa aɨjna ɨ a'atɨ tɨ huapɨ'ɨ á'atyesi'ire'e, majta aɨme ɨ maj yan tie'ijta i chaanaca japua. Hua'a jamuan ɨ ruxantaaru'ustyamua'a, aɨ mu e'etyujsaɨj mej mi raatyenya'usi'ite'en maɨjna ɨ tɨ ava'aca ɨ cahuaayu'u japua, majta maɨme ɨ xantaaru'ustyamua'ame'en. 20Ajta aɨjna ɨ a'atɨ tɨ huapɨ'ɨ á'atyesi'ire'e, aɨ pu huatévi'iri'ihuaca'a aɨjna jamuan tɨ hue'itzi cɨn ti'ixaxa'ata'a aɨjna jetze ma'acan. Ajta, aɨjna ɨ tɨ huapɨ'ɨ á'atyesi'ire'e, aɨ pu tyu'umuarej ɨ maj cɨn rɨ'ɨ tira'utaseij. Ayaa pu een cɨn hua'ucuanamua aɨme ɨ maj ra'ancura'a maɨjna ɨ maj hua'a jetze a'ayu'usi'i a'ij tɨ antyahuaa aɨjna ɨ ja'atɨ. Majta ratyaanajchaca'a aɨjna ɨ ti'itɨ tɨ ayan éenya'a seijre'e tɨj aɨjna ɨ ja'atɨ tɨ huapɨ'ɨ á'atyesi'ire'e. Cɨme'en maj huavívi'iri'ihuaca'a aɨme ɨ maj hua'apua, matɨ'ɨj mi man huaje'etyaahua'axɨ ruuricaa ajna a'ahua'a a'alaguun a'u tɨ azufre cɨn a'ajtaasin. 21Ajta, aɨjna tɨ cahuaayu'u japua ava'aca, aɨ pu ayan hua'aruu ɨ seica ɨ maj ra'astijra'acaa maɨjna tɨ huapɨ'ɨ á'atyesi'ire'e. Aɨ pu rusaɨj hua'ucuii aɨjna cɨme'e ɨ runyuuca tɨ ayan ti'ivaɨre'e tɨj chun tɨ e'ijninyei tene'etze'en. Majta naijmi'i ɨ pina'ase, aɨ mu huáju'uxai tyamua'a eihua maɨjna cɨme'e ɨ hua'ahue'ira'a aɨme ɨ maj huácuiihuaca'a.

will be added

X\