Apocalipsis 18

1Nyajta seij huaseij ɨ tɨ tajapua ti'ivaɨre'e. Aa pu tajapua va'acáma'acaa aɨjna. Eihua pu huapɨ'ɨ ti'itɨj cɨn antyujmua'aree. Nain japua pu ajta huatátzarajraa iiyan chaanaca japua aɨjna cɨme'e tɨ tyátaave'e a rujetze. 2Aj pu'i ca'anin cɨn huajijhuaca'a ayan tɨcɨn: ―Pu'uri hui á'avatzɨjxɨ, pu'uri xaa hui á'avatzɨjxɨ aujna u Babilonia, ɨ chajta'ana tɨ vivéjmee. Mu'uri hui maun a'uchaatɨme aɨme ɨ tiyaaru'u. Pu'uri ajta hua'achi'i pueen ɨ xaijnyu'ucari ɨ maj xana'avisi'i seijre'e. Au mu a'asaca, matɨj mana'a pua'amua ɨ pina'ase ɨ maj xana'avisi'i seijre'e, ɨ tyaj cai a'atzu hua'axe'eve'e. 3’Ayaa pu hui tiraaruu, a'ini aɨ pu ca'anijra'a hua'uta'a matɨj mana'a pua'amua ɨ mej seij chuejra'a japua e'ema'acan mej mi meyan che'eta mana'a a'ij pua'a huarɨni tɨj ajta huarɨj aɨjna ɨ Babilonia. Aɨj pu hui cɨn Dioj ayan che'eta na'a pueijtzi tihua'uta'asin a'ini eecan pu huapɨ'ɨ nyu'ucamɨ'ɨ aɨjna ɨ Dioj. Aɨme ɨ mej iiyan tie'ijta ɨ chaanaca japua, matɨj mana'a pua'amua jamuan huataujxana'acɨre. Majta aɨme ɨ mej ti'itua'araca iiyan chaanaca japua, aɨ mu hui meri huataujchijtyaanitaca'a maɨjna cɨme'e mej eihua huapɨ'ɨ tí'inyacua'atzacaa mej huapɨ'ɨ tí'ijchaɨca aɨme. ―Ayaa pu tyu'utaxajtaca'a aɨjna ɨ tɨ tajapua ti'ivaɨre'e. 4Nyatɨ'ɨj ni seij huanamuajri'i tɨ ute'e teje'icáxajtaca'a ayan tɨcɨn: ―Sata'aj hui saun huiracɨɨnye mɨ sej nyatyaɨtestyamua'a pueen, sej si cai sajta seyan auta'ɨtzen tɨj aɨjna, tɨ ij cai pueijtzi amuaata'an ɨ Dioj a'ij tɨ aɨn raata'asin aɨjna ɨ jɨita'a. 5Ee xaa, aɨjna ɨ tɨ cɨn ayan huarɨj, aɨ pu hui ari nain cɨn autyajturaa ɨ Dioj jemi. Pu'uri xaahui amiteere'e ijii u tajapua Dioj tɨ e'eseijre'e. Ajta aɨn Dioj, aɨ pu ari ra'utamua'areeri'i tɨj na'a tɨ cɨn a'ij pua'a ti'ityujcha'ɨ. 6’Che'e ayan tiraacɨ'ɨti tɨj ajta aɨn pueijtzi tihua'uta'a ɨ tɨ hua'utyaamue'itɨ. Che'e ajta hui hua'apua tyu'utanajchita tɨj na'a seij cɨme'e tɨ ayan huarɨj tɨ a'ij pua'a een. Ajta aɨn ɨ vaasu tɨ jetzen raya'aca aɨjna tɨ cɨn huataujtɨmue'ira, che'e hui ayan ra'ava'ɨste'en aɨjna cɨme'e ɨ tɨ hua'apua ara'ase ɨ tɨ cɨn huatyátahuan. 7Aɨ pu hui hua'ujtzaahua rusaɨj, ajta huataujseijrataca'a aɨjna cɨme'e tɨ eihua huapɨ'ɨ tí'ijchaɨca'a. Che'e ruxa'a na'a tiraacɨ'ɨti tɨ'ij rajpueiitzi a'ara'ani, ajta tɨ huataujxaamɨste'en. Ayaa pu hui ti'ixaj ɨ rutzajta'a tɨcɨn yee: “Aɨ pu aɨjna cɨn ti'itejvee ɨ jɨita'a tɨ tie'ijta, ajta ayan tɨcɨn tɨ cai rusaɨjtaca'a, tɨ cai a'anaj ruxaamɨjtya'a a'ame.” 8Aɨj pu hui cɨn ca'anacan japuan rávaɨjtzi sei xɨcaj cɨme'e tɨ rajpueiitzi a'ara'ani. Aj pu xaa tijcui'ini, ajta ruxaamɨjtya'a a'ame. Ajta ayan tirajpueiitzi a'ame tujri cɨme'e. Ajta huatyatairi'ihua, a'ini eihua pu raayɨ'ɨtɨ ɨ rumuare'eri'ira'a cɨme'e ɨ tavastara'a, aɨjna ɨ Dioj tɨ ra'uxɨ́jte'en. ―Ayaa pu tyu'utaxajtaca'a aɨjna ɨ a'atɨ tɨ tajapua ti'ivaɨre'e. 9Ajta aɨme ɨ tajtuhuaani ɨ mej tie'ijta iiyan chaanaca japua, ɨ maj majta jamuan huataujxana'acɨre, majta jamuan huataujchijtyaanitaca'a, matɨ'ɨj raaseij a'utɨ á'ajcɨtzu aɨjna cɨme'e tɨ tyataasin, aɨ mu ruyeinixɨ'ɨn, majta ijhuan maɨjna cɨme'e ɨ chajta'ana. 10Majta maɨn, a mu ɨmɨ a'uhuistɨra'asin maɨjna cɨme'e maj ratzɨɨnye'e ɨ tɨ cɨn rajpueiitzi a'ame. Ayaa mu ti'ixaata mua'aju'un tɨcɨn: ―Cui'i xaa, cui'i xaa, muaa mɨ hui pej chajta'ana pueen tɨ ve'e, mɨ paj eihua ti'itɨj cɨn anti'amua'aree, mɨ paj hui Babilonia pueen, sei xɨcaj pu cɨn ayan tyaja'ure'enye tɨ Dioj ma'uxɨ́jte'e. 11- 12Majta aɨme ɨ mej ti'itu'araca iiyan chaanaca japua, aɨ mu majta ruyeinixɨ'ɨn, majta ruxaamɨstya'a mua'aju'un maɨjna cɨme'e ɨ chajta'ana a'ini capu che'e ma'a a'atɨ tɨ tihua'unanai ɨ mej ti'itua'araca ti'itɨ tɨ na'a mej ti'itɨcɨ, tɨ pua'a ooro, nusu plaata, na'ari tetej tɨ tyamua'a ti'ijnajchi, ti'itɨ peerla. Majta seica cɨɨxuri ti'itua'araca. Capu che'e a'atɨ tihua'ananairan ɨ tɨ ti'imestí, ɨ tɨ nacamua, tɨ ta'ati, tɨ pa'u. Camu majta che'e hua'ananaira mua'aju'un ɨ cɨye maj tu'araca tɨ eihua ti'ijnajchi na'ari ti'itɨ coobre nusu tyapuusti'i nusu aɨjna ɨ tetej ɨ maj racaamete, ɨ maj cɨn tya'antamɨɨmɨte'en ɨ tyapueij na'ari ɨ chun. 13Camu majta che'e meyan tihua'ananairan ɨ maj cue'ira ti'ina'achita'an ti'itɨ tzanca, na'ari ti'itɨ tɨ na'a tɨ naa tya'aaca nusu cuaane'e na'ari ti'itɨ mirra, na'ari cuaane'e tɨ cueina, ti'itɨ nahuaj, na'ari aceiti, na'ari hariina tɨ re'en, ti'itɨ triigu, ajta ya'amuaate maj seijre'e huaacasi, na'ari canya'axɨ, ajta cahuaayu'u. Ajta, aɨjna ɨ carreta maj ru'uva'ajaapuaj maj mua'aye'i ɨ cahuaayu'u, majta aɨme ɨ maj ca'anyejri cɨn ti'imuare'e ruxa'aj tyaɨte jemi, camu mij che'e tihua'ananairan. 14Ayaa pu tyaja'ure'enye a'ij tɨ ajmi'i tye'eyu'usi'ihuaca'a ayan tɨcɨn: ―Aɨjna tɨ tyamua'a ti'ire'en, ɨ paj huapɨ'ɨ raxe'eva'acaa, capu che'e seira'a a'ame mueetzi jemi. Ajta, naijmi'i tɨj na'a tɨ huapɨ'ɨ ti'ijnajchi, ajta tɨ naa seijre'e ɨ paj cɨn a'atzaahuate'e asaɨj, papu'uri tyaja'urai. Capej che'e ti'ityauni. 15Majta aɨme ɨ maj ti'itu'araca, ɨ maj majta maɨjna cɨn huatyaujchijtyaanitaca'a maɨjna cɨme'e mej tihua'ananairaca'a, aɨ mu a'ɨmɨ huahuistɨra'asin, maɨjna cɨme'e maj ratzɨɨnya'a mua'aju'un tɨ Dioj pueijtzi raata'a. Maujyeinixɨ'ɨn, majta ca'anin cɨn muaataujxaamɨste'esin. 16Ayaa mu ti'ixaata mua'aju'un tɨcɨn: ―Cui'i xaa, cui'i xaa, muaa pej chajta'ana pueen, tɨ ve'e. Ɨ paj paɨjna ti'itéchajca'a ɨ tɨ mestí tɨ naa e'en, pajta paɨjna cɨme'e tɨ nacamua, pajta ɨ tɨ pa'u cɨme'e. Ɨ paj uca'arujti'iri'i paɨjna ɨ tɨ ooro cɨn taavijhua, pajta paɨjna cɨme'e ɨ tetej tɨ huapɨ'ɨ ti'ijnajchi, pajta paɨjna cɨme'e ɨ peerla ti'itɨ. 17Sei oora pu hui cɨn, naijmi'i tyu'ura'axɨ tɨj na'a tɨ huapɨ'ɨ ti'inajchicaa. Majta aɨme ɨ maj ramɨjhuaca maɨjna ɨ baarcu, majta aɨme ɨ mej ti'imɨjhuaca maɨjna jetze ɨ baarcu ɨ maj a'acɨɨnye ɨ jaj japua, majta naijmi'i ɨ maj hue'ité vivi'i, au mu ɨmɨ huahuistɨraa. 18Matɨ'ɨj raaseij maɨjna ɨ cɨtzij tɨ ajtyɨ'ɨmɨ ajcɨtzujtaca'a, tɨ tya'ajtaiira ɨ chajta'ana, matɨ'ɨj mi huataujyeinyajraa. Meyan tɨcɨn: ―¿Ti'itajni maa chajta'a seijra'acaa tɨj amɨjna? Capu hui me'e e'e chajta'a. 19Matɨ'ɨj mi ti'itɨ avá'ujratziiraxɨ ti'itɨ tɨ muiiní ɨ rumu'ujetze, maj ruyein, majta ruxaamɨste'e. Ayaa mu ti'ityejíjhuaca'a tɨcɨn: ―Cui'i xaa, cui'i xaa, muaa hui chajta'ana tɨ ve'e, a'ini mueetzi mu jetze huataujchijtyaanitaca'a matɨj mana'a pua'amua mej tihue'ijtya'acaa aɨme ɨ maj baarcu jetze antacɨ'ɨca ɨ jaj japua. Aɨ mu hui cɨn huataujchijtyaanitaca'a maɨjna cɨme'e pej eihua huapɨ'ɨ tí'ijchaɨca'a. ―Ayaa mu tyu'utaxajtaca'a aɨme ɨ tyaɨte. 20Sajta muan, mɨ saj tajapua e'eseijre'e, sata'aj huataujtyamua'ave'en, sajta muan, mɨ saj rɨ'ɨ ti'iteseijre'e ɨ Dioj jemi, sajta muan, mɨ tɨ Dioj amua'antihuau, sej si'i tihua'uta'ixaate'en ɨ tyaɨte, sajta muan, mɨ saj Dioj jetze ma'acan ti'ixaxa'ata'a. Sata'aj huataujtyamua'ave'en saɨjna cɨme'e tɨ Dioj ayan tyajamuaaxa'apɨ'ɨntari'iri'i aɨjna cɨme'e tɨ ra'uxɨ́jte aɨjna ɨ jɨita'a. 21Aj pu'i saɨj tɨ tajapua ti'ivaɨre'e, tɨ ajta eihua huapɨ'ɨ ruca'anye, aɨ pu tetej ájtɨ tɨ ayan seijra'acaa tɨj aɨjna ɨ maj cɨn tyá'atɨ'ɨxɨca. Aj pu'i ra'atyájrai ɨ jaj tzajta'a tɨ ve'e. Ayaa pu tyu'utaxajtaca'a tɨcɨn: ―Ayaa pu hui che'eta na'a eenye'eque'e raatyáuuna aɨjna ɨ chajta'ana tɨ ve'e, tɨ ayan tyaja'arajtyahuaa tɨcɨn Babilonia. Capu che'e me'e e'e seira'a a'ame. 22Camu che'e meyan namuaara mua'aju'un aɨme ɨ mej ti'icuinaca aɨjna jetze ɨ aarpa nusu aɨme ɨ maj ti'icuinaca ruchuicari cɨme'e. Camu hui majta namuaara mua'aju'un muejmi jemi aɨme ɨ mej ti'icɨ'ɨsita tuuturu'u jetze na'ari aɨme ɨ maj ucaají'ihua mua'aye'i ɨ trompeeta jetze. Majta aɨme ɨ mej ti'imɨjhuaca, matɨj mana'a pua'amuaca, a'ijtɨ mana'a tiraayɨ'ɨtɨ, camu hui che'e muejmi jemi seira'a mua'aju'un. Camu xaa nya'u a'atzu. Camu majta che'e namuaara mua'aju'un aɨme ɨ mej tyá'atɨ'ɨxɨca. 23’Ajta, capu hui che'e a'atáa a'ame muejmi jemi ɨ taij tɨ huatatza a'aye'i ɨ hua'achi'i tzajta'a. Capu ajta che'e ayan namuaara a'ame maj xaahuaani cɨn tyu'utaxaj aɨme ɨ maj mauchan huanényaɨchaca'a, ajta maj mauchan huavɨɨche, a'ini aɨme ɨ maj muejmi jemi ti'itu'araca'a, ai mu maɨn pueenya'a ɨ mej yan japuan seijra'acaa ɨ chaanaca, ɨ maj majta vivejme'en cɨn títyatatyá'aca'a. Pajta peyan tihua'ucuanamua matɨj mana'a pua'amua ɨ maj seij chuejra'a japua e'ema'acan paɨjna cɨme'e pej peyan huata'aseijrataca'a paj huapɨ'ɨ naa seijre'e aɨme jemi mej mi meyan huarɨni tɨ a'ij pua'a een ɨ Dioj jemi. 24Ai pu ajta aɨn pueen tɨ hua'ucuii naijmi'ica aɨme ɨ maj Dioj jetze ma'acan ti'ixaxa'ata'a, majta aɨme ɨ maj rɨ'ɨ ti'iteseijra'acaa ɨ Dioj jemi. Ee xaa nya'u, aɨ pu hua'ucuii matɨj mana'a pua'amua huácuiihuaca'a iiyan chaanaca japua, tɨj na'a jajcua ɨmɨ, tɨ ajta ijii.

will be added

X\