Apocalipsis 17

1Aj pu'i saɨj tɨ tajapua ti'ivaɨre'e, tɨ ajta seij huityatɨɨca'a ɨ cutzape'e tɨ arahua'apua ara'ase, aɨ pu mu a'uve'eme, ajta ayan tinaata'ixaa tɨcɨn: ―Iya'a i, nyaa nu muaataseijrate'esin aɨjna tɨ cɨn Dioj ra'uxɨ́jte'en aɨjna ɨ jɨita'a tɨ va'acan cɨn ti'ityavaaca'a, tɨ ajta raamue'itɨca'a ɨ tumin ɨ ruhue'ira'a cɨme'e. Ai pu aɨn pueen ɨ tɨ aun á'ujca ɨ jaj japua tɨ ve'e. 2Majta aɨme ɨ mej tie'ijta iiyan chaanaca japua, aɨ mu huataujxana'acɨre maɨjna jamuan ɨ jɨita'a. Majta aɨme ɨ maj iiyan huachaatɨme chaanaca japua, aɨ mu majta huatyaata'aru maɨjna cɨme'e tɨ aɨn jɨita'a ayan hua'uta'a maj majta jamuan tyu'uxana'acɨre'en. 3Aj pu'i aɨn xaijnyu'ucara'ara'an ɨ Dioj, aɨ pu nyaja'uví'itɨ ajna a'u tɨ cai e'e ti'itɨ. Au nu jɨita'a huaseij tɨ aɨjna japua a'ujcatii ɨ ti'itɨ tɨ pa'u. Ajta aɨn ɨ ti'itɨ, eihua pu jetzen e'eyu'usi'ihuaca'a ɨ tɨ cɨn ayan antyahuaaca'a, tɨ ajta cɨn a'ij pua'a ti'ijxa ɨ Dioj. Arahua'apuaca pu huijmu'u aɨjna ɨ ti'itɨ, ajta tamuaamuata'a pua'amuaca ava'ahuajmee. 4Ti'inacamua ɨ tɨ ti'ityeechan, ajta cɨj caj ti'ipa'uvi'i. Eihua pu huapɨ'ɨ ucarujti'ihuaca'a aɨjna ɨ tɨ ooro cɨn taavijhua, ajta tetej tɨ huapɨ'ɨ ti'ijnajchi, ajta peerla ti'itɨ. Aɨ pu ajta ru'ityatɨɨca'a ɨ cutzape'e ɨ tɨ ooro cɨn taavijhua. Ajta aɨjna jetze ɨ cutzape'e, ti'itɨ pu ava'ɨsti ɨ tɨ tyú'uxana'avi'iste'e, ajta ɨ tɨ cɨn huataujxana'acɨre aɨjna ɨ jɨita'a. 5Ajta ayan te'eyu'usi'ihuaca'a ɨ cuaatzajra'an jetze a'ij tɨ antyahuaa. Nyajta inyaa, canu yau'eitaa na'araa nyaɨjna ɨ nyuucari tɨ jetzen te'eyu'usi'ihuaca'a tɨ cɨme'en yee: “Babilonia, ɨ tɨ va'acan cɨn ti'itejvee. Hua'ana'ana aɨme ɨ juuca ɨ maj ramue'itɨcɨ ɨ tumin ɨ ruhue'ira'a cɨme'e. Ai pu aɨn pueen tɨ jetzen aun a'uve'eme ɨ tɨ tyú'uxana'aviste'e iiyan chaanaca japua.” 6Nyatɨ'ɨj ni raaseij tɨ aɨn jɨita'a tahuáaca'a aɨjna cɨme'e ɨ hua'axuure'e aɨme ɨ maj rɨ'ɨ ti'iteseijre'e ɨ Dioj jemi, majta aɨme ɨ maj huácuiihuaca'a maɨjna cɨme'e maj ra'astijre'e maɨjna ɨ Jesús. Eecan nu a'ij tya'utaseij nyatɨ'ɨj raaseij. 7Ajta aɨn ɨ tɨ tajapua ti'ivaɨre'e, ayaa pu tinaata'ixaa tɨcɨn: ―¿A'ini een cɨn peyan tya'utaseij? Nyaa nu muaata'ixaate'esin a'ij tɨ huataujmua'a aɨjna tɨ cai amiteere'e aɨjna cɨme'e ɨ jɨita'a, ajta aɨjna ɨ ti'itɨ tɨ japuan ava'aca, ɨ tɨ ajta arahua'apuaca huijmu'u, ajta tɨ tamuaamuata'a ava'ahuajmee. 8Aɨjna ɨ ti'itɨ paj hui raaseij, aɨ pu ajmi'i huataseijre, ajta ijii, capu che'e ya'a a'ahua'a. Ajta, auche'e pu a'itaméj aujna a'utɨ e'etyacun tɨ cai a'ij amiteere'e a'achu tɨ ucatee. Majca'i huayee pu ajta á'apua'aren aɨjna ɨ ti'itɨ. Majta aɨme ɨ mej yan huachaatɨme iiyan chaanaca japua, ɨ maj cai á'ayu'usi'ihuaca'a aɨjna jetze ɨ yu'uxari a'ij maj antya'aruu, aɨjna ɨ yu'uxari tɨ jajcua jɨmɨ jetzen te'eyu'usi'ihuaca'a matɨj mana'a pua'amua ruuri huatyájturaa ɨ Dioj jemi, ayaa mu rɨ'ɨ tiya'useiira mua'aju'un matɨ'ɨj raaseij maɨjna ɨ ti'itɨ a'ini aɨ pu ajmi'i huataseijre, ajta ajna'ɨmɨ i'iruurica'a, ajta cai che'e me iya'ahua'a. Ajta, auche'e pu huataseijre'esin. 9’Aijna ɨ nyuucari, tɨ hui a'atɨ yau'eitaa a'ara'ani, ruxe'eve'e tɨ aɨjna jetze tyu'umua'ati tyamua'a naa. Aɨjna ɨ tɨ arahua'apuaca huijmu'u, ayaa pu hui huataujmua'a tɨcɨn: Aɨjna ɨ jɨri tɨ arahua'apua ara'ase tɨ japuan á'ujca aɨjna ɨ jɨita'a. 10Aɨ mu majta aɨn pueen ɨ maj tie'ijta, ɨ maj majta arahua'apua ara'ase. Mua'anxɨvi ɨ mej meri á'upua'araca'a. Saɨj pu'u auj ti'itɨ cɨn ti'itejvee. Ajta ɨ saɨj, capu xɨ seijre'e. Ɨ tɨ ayan huataseijre'esin, ayaa pu hui tyu'ujxe'eve'e tɨ cɨj na'a caj tye'eteevi'in. 11Ajta aɨn ɨ ti'itɨ tɨ ajmi'i huataseijre, ajta ijii capu che'e ya'a a'ahua'a, ai pu aɨn pueen ɨ ta'arahueica. Aɨ pu ajta hua'a jetze ajtyama'acan aɨme ɨ maj arahua'apua ara'ase. Aɨ pu hui ajta á'apua'aren. 12’Ajta aɨjna ɨ tɨ tamuaamuata'a ava'ahuajmee, ayaa pu hui huataujmua'a tɨcɨn tamuaamuata'a mu ara'ase ɨ maj ti'ijta. Majta aɨme, camuuxɨ maɨjna cɨn titye'entyajrupi mej mi tyu'utaijta. Mauche'e mu ra'ancura'asin mej mi cɨj mana'a caj titye'eteevi'in a'achu cumu sei oora maj tyu'utaijta jamuan ɨ ti'itɨ. 13Naijmi'i mu meyan ruxa'aj ti'imua'atze. Majta maj raatatuire'en maɨjna ɨ ti'itɨ matɨj mana'a ɨ maj cɨn antyujmua'aree, ajta ɨ hua'amuare'eri'ira'a. 14Aɨ mu hui raatenya'usi'ite'esin maɨjna ɨ Canya'a. ’Ajta aɨn ɨ Canya'a, aɨ pu hua'utyaamue'itɨ a'ini ai pu aɨn pueen ɨ tavastara'a ɨ tɨ ajta tihueijte'e aɨme ɨ tɨ hua'avasta'a pueen ɨ tyaɨte. Ai pu hui ajta aɨn pueen ɨ tajtuhuan tɨ naijmi'ica tie'ijte'e ɨ seica ɨ tajtuhuaani. Majta aɨme ɨ mej jemin seijre'e ɨ Canya'a, ai mu aɨn pueen ɨ tɨ hua'utajée, tɨ ajta hua'antihuau. Ai mu majta aɨn pueen ɨ maj cai atya'ɨtza'ara ɨ jemin. 15Aj pu'i ayan tinaata'ixaa tɨcɨn: ―Aɨjna ɨ jaj tɨ ve'e ɨ paj hui raaseij, ɨ tɨ ajta japuan á'ujca aɨjna ɨ jɨita'a tɨ ramue'itɨcɨ ɨ tumin ɨ ruhue'ira'a cɨme'e, ai mu aɨn pueen ɨ tyaɨtestyamua'ame'en aɨjna ɨ jɨita'a, majta ɨ tyaɨtejra'an, majta ɨ mej seij chuejra'a japua e'ema'acan, ɨ maj majta seij cɨn ti'ixaxa'a ɨ nyuucari. 16Ajta aɨjna tɨ tamuaamuata'a ava'ahuajmee, ɨ mej tie'ijta aɨjna jamuan ɨ ti'itɨ, aɨ mu rajchaɨ́ɨra'a mua'aju'un maɨjna ɨ jɨita'a tɨ ramue'itɨcɨ ɨ tumin ɨ ruhue'ira'a cɨme'e. Majta hua'are'itixɨ'ɨsin ɨ tyaɨte ɨ maj rá'ajaahuatya'acaa. Majta ca'anyejri cɨn tiracá'ari'ira tɨj na'a ɨ tɨ ti'itéechan. Majta raatyacɨ'ɨsin ɨ hue'ira'ara'an. Majta ra'atyátaira. 17’Ayaa pu te'eme, a'ini Dioj pu ayan ca'anijra'a hua'uta'asin mej mi meyan tira'ara'asten a'ij tɨ aɨn ti'ijxe'eve'e maɨjna cɨme'e maj ruxa'a mana'a tyu'umua'ati. Majta raatatuire'en ɨ ti'itɨ jemi matɨj mana'a ti'itɨ ɨ maj cɨn antyujmua'aree. Ayaa mu ráruurén asta na'a cai ayan tya'araurasten a'ij tɨ Dioj ari tiraataxajtaca'a. 18Ajta, aɨjna ɨ jɨita'a ɨ paj raaseij, ai pu aɨn pueen ɨ chajta'ana tɨ ve'e ɨ tɨ tihue'ijte'e aɨme ɨ tajtuhuaani ɨ mej ti'itɨ cɨn títyatatí a'u tɨ na'a iiyan chaanaca japua. ―Ayaa pu tinaata'ixaa aɨjna ɨ tɨ tajapua ti'ivaɨre'e.

will be added

X\