Apocalipsis 16

1Nyatɨ'ɨj ni seij huaseij ɨ a'atɨ tɨ aun a'utyavaaca'a u teyujta'a. Tɨ'ɨqui ca'anin cɨn tyu'utaxajtaca'a tɨcɨn: ―Sericu, sata'aj hui a ya'ucáxɨre'en ɨ chaanaca japua tɨj na'a ɨ tɨ ava'ɨsti ɨ cutzape'e jetze ɨ tɨ arahua'apua ara'ase mej mi raamua'aree tɨ huapɨ'ɨ nyu'ucamɨ'ɨ ɨ Dioj. 2Cɨme'en pu'u ayan tyu'utaxajtaca'a aɨjna, aj pu'i saɨj u a'uve'eme. Tɨ'ɨqui aya'ucajrai ɨ chaanaca japua ɨ cutzape'e jetze tɨ aramuaaca'a. Aj pu'i hua'a japua rajve aɨjna ɨ tɨ cɨn i'icá'atzata ɨ tɨ a'ij pua'a tya'aaca, ajta ɨ tɨ a'ij pua'a seijra'acaa. Ayaa pu tihua'uruu aɨme tɨ hua'a jetze te'eyu'usi'ihuaca'a a'ij tɨ antyahuaa aɨjna ɨ ti'itɨ, majta aɨme ɨ maj raatyanajchaca'a. 3Ajta, ɨ tɨ hua'apua, aɨ pu ajta aya'ucajrai ɨ cutzape'e ɨ tɨ aramuaaca'a japuan ɨ jaj tɨ ve'e. Cɨme'en pu'u ayan huarɨj, aj pu'i saɨque huaujruu ɨ jaj tɨj xuure'e tɨ airamɨ'ɨyaca'a tevi jetze tɨ huamɨ'ɨ. Ajta, naijmi'i ɨ maj jaj tzajta'a chajca'a, aɨ mu huacuii. 4Ajta ɨ tɨ hueica, aɨ pu aya'ucajrai aɨjna ɨ saɨj ɨ tɨ cutzape'e jetze aramuaaca'a ɨ atya'ana tzajta'a, ajta japuan a'u tɨ a'ajaijxajmee. Cɨme'en pu'u ayan huarɨj, tɨj na'a tɨ ti'iseijre'e saɨque pu huaujruu tɨj xuure'e. 5Nyatɨ'ɨj ni raanamuajri'i ɨ tɨ aɨjna cɨn antyujmua'aree ɨ jaj, aɨ pu ayan tyu'utaxajtaca'a tɨcɨn: ―Xa'apɨ'ɨn paj hui huarɨj paɨjna cɨme'e paj hua'uxɨjte, muaa, mɨ paj jajcua jɨmɨ seijra'acaa, pajta ijii paj pauj seijre'e. 6Naa pu hui xa'apɨ'ɨn a'ini aɨme ɨ tetyaca mu'uri hua'ucuii aɨme ɨ maj mueetzi jemi rɨ'ɨ ti'iteseijre'e, majta aɨme ɨ maj mueetzi jetze ma'acan ti'ixaxa'ata'a. Aɨj paj cɨn peri hua'uta'a maj majta xuure'e huaye'en. Ayaa mu hui eenye'eque'e ra'antimue'itɨ. 7Nyatɨ'ɨj ni raanamuajri'i tɨ a'atɨ tɨ aun a'utyavaaca'a jetzen a'u maj tyaja'amuaɨ'ɨvajtaca. Ayaa pu tyu'utaxajtaca'a tɨcɨn: ―Ee xaa nya'u, tavastara'a, mɨ pej Dioj pueen, mɨ paj hui pajta nain cɨn anti'amua'aree. Tzaahuati'ira'a paj cɨn hua'axɨjte'e. Naa pu tiraavijte'e a'ij pej tihua'uta'a. 8Ajta ɨ tɨ muaacua, aɨ pu aya'ucajrai ɨ cutzape'e aɨjna japua ɨ xɨcaj. Ajta ayan tiraata'a aɨjna ɨ xɨcaj tɨ huá'uta'ixɨ'ɨri. 9Majta aɨme ɨ tetyaca, huá'ataixɨ'ɨ aɨjna cɨme'e tɨ huapɨ'ɨ tyajxɨcacaa. Majta a'ij pua'a tiraatajée ɨ Dioj ɨ tɨ aɨjna cɨn antyujmua'aree tɨ pueijtzi hua'ata'aca. Camu raatyaxaahuataca'a aɨjna tɨ a'ij pua'a een a'ij maj rɨcɨ, camu majta rɨ'ɨ tiraata'a ɨ Dioj. 10Ajta ɨ tya'anxɨvi, aɨ pu ajta aya'ucajrai aɨjna ɨ cutzape'e aɨjna japua a'u tɨ a'acajca aɨjna ɨ ti'itɨ tɨ a'ij pua'a een. Cɨme'en pu'u ayan huarɨj, huapɨ'ɨ pu huatyatɨca'araca'a a'u tɨ teje'ijta. Majta aɨme ɨ tetyaca, aɨ mu ava'ujche'eve'e ɨ runyanu jetze maɨjna cɨme'e mej eihua huapɨ'ɨ rajpueijtzica'a. 11Majta eihua mu a'ij pua'a tiraatajée maɨjna ɨ Dioj ɨ tɨ tajapua e'eseijre'e maɨjna cɨme'e mej eihua huapɨ'ɨ rajpueijtzica'a. Camu majta a'atzu raatyaxaahuataca'a a'ij maj rɨjcaa tɨ a'ij pua'a een. 12Ajta ɨ tɨ arájsevi, aɨ pu ajta aya'ucajrai ɨ cutzape'e aɨjna japua ɨ jatya'ana ɨ tɨ ve'e tɨ ayan tyaja'arajtyahuaa tɨcɨn Eufrates. Cɨme'en pu'u ayan huarɨj, aj pu'i nainjapua atyaaxɨ'ɨ ɨ jatya'ana. Ayaa pu een cɨn atyaaxɨ'ɨ mej mi antacɨɨnye aɨme ɨ mej tie'ijta a'u tɨ e'ijninyei ɨ xɨcaj. 13Nyatɨ'ɨj ni hua'useij ɨ maj hueica ɨ maj a'ijnyájxɨ hua'atene'etze'e aɨjna ɨ cu'ucu'u, ajta aɨjna ɨ ti'itɨ tɨ a'ij pua'a een, ajta aɨjna tɨ hua'a jetze ma'acan ti'ixaxa'a hue'itzi cɨme'e. Ayaa mu seijra'acaa matɨj tyaacujse. Ai mu aɨn pueen ɨ xaijnyu'ucari ɨ maj a'ij pua'a een. 14Ai mu majta aɨn pueen ɨ xaijnyu'ucari ɨ maj tiyaaru'u jetze ajtyema'acan. Au mu á'ujhua'an nainjapua ɨ chaanaca japua mej mi hua'ajsaɨre'en aɨme ɨ mej tie'ijta iiyan chaanaca japua mej mi huatenya'use'en ajna xɨcajra'an tɨ huapɨ'ɨ ruxe'eve'e tɨ'ɨj aɨn huataseijre'en ɨ Dioj tɨ nain cɨn antyujmua'aree. 15Ayaa pu tɨcɨn: “Ma'acui xaa, yaa nu hui uve'enyejsin tɨj nahua'ari tɨ aviitzi cɨn utyaru'ipi ɨ hua'a chi'ita. Rɨ'ɨ pu tiraata'a aɨjna tɨ a'atanyee, ajta cɨn ti'ityeechan tɨ'ij cai mua'avi'i á'ucha'acanye'en, mejseij ɨ tyaɨte ɨ tɨ cɨn ti'ityevi'ira'a.” Yaa pu tyu'utaxajtaca'a. 16Majta aɨme ɨ maj hueica, au mu hua'ajsaɨj aujna a'ahua'a tɨ ayan tyaja'arajtyahuaa hua'anyuuca cɨme'e ɨ hebreos tɨcɨn Armagedón. 17Ajta ɨ tɨ arahua'apua, aɨ pu aya'ucajrai ɨ cutzape'e. Cɨme'en pu'u ayan huarɨj, aj pu'i saɨj ca'anin cɨn tyu'utaxajtaca'a tɨ aun a'utyavaaca'a teyujta'a. Aujna, a'u tɨ a'utejvee ɨ maj japuan ti'imuaɨ'ɨvajtaca, ayaa pu tyu'utaxajtaca'a aɨjna tɨcɨn: ―Pu'uri icu, antipua'araca'a. 18Matɨ'ɨj mi huatyamaxcava'axɨ, majta tenyuuca'a. Eihua pu ajta tí'ica'arajnaca'a. Ajta eecan huapɨ'ɨ huataujca'atzɨjxɨ ɨ chaanaca. Tɨj na'a tɨ yu e'ire'enye maj yan huataseijre ɨ tyetyaca iiyan chaanaca japua, capu a'anaj ayan huataujca'atzɨjxɨ. Eecan pu huapɨ'ɨ xaa huataujca'atzɨjxɨ. 19Ajta aɨjna ɨ chajta'ana ɨ tɨ ve'e, hueica pu autatzi'ityaca'a. Ajta á'avatzɨjxɨ ɨ hua'achajta'ana ɨ mej seij chuejra'a japua e'ema'acan. Aɨ pu Dioj, ajta ra'utamua'areeri'i aujna u Babilonia tɨ'ij pueijtzi raata'an tɨ'ij tiraacɨ'ɨti ɨ tɨ cɨn huapɨ'ɨ nyu'ucamɨ'ɨ ɨ Dioj. 20Ajta tɨj na'a a'u tɨ a'araahuachi ɨ jaj tzajta'a, aɨ pu ahuáujpua'arixɨ. Capu ajta che'e seijra'acaa a'u tɨ á'ujɨrime. 21Majta mu teetej caavatzɨ, tyamua'a mevivejmá'a. Tyamua'a pu tijetyéjma'acaa a'achu cumu hueicate kiilu. Aɨme pu japua rajve ɨ tetyaca. Majta aɨme ɨ tetyaca, a'ij mu pua'a tiraatajée maɨjna ɨ Dioj maɨjna cɨme'e ɨ teetej a'ini eihua mu rajpueijtzica'a mej meyan caavatzɨ ɨ teetej.

will be added

X\