Apocalipsis 15

1Nyatɨ'ɨj ni nyajtahua'a seij huaseij ɨ tɨ tajapua eihua ruxe'eve'e. Eecan nu rɨ'ɨ tira'utaseij. Ai mu aɨn pueen ɨ maj ti'ivaɨre'e u tajapua, ɨ maj arahua'apua ara'ase. Aɨj mu cɨn antyujmua'aree maɨjna cɨme'e ɨ pueijtzi ɨ tɨ ayan ara'ase a'achu cumu arahua'apua. Ai pu aɨn pueen ɨ tɨ nain cɨn te'entipua'ari ɨ tɨ cɨme'en Dioj ayan pueijtzi hua'uta'asin aɨjna cɨme'e tɨ huapɨ'ɨ nyu'ucamɨ'ɨ. 2Nyatɨ'ɨj ni ti'itɨ huaseij. Naa pu ti'imestí. Aa pu aumuaanijmee, cu xuee viidriu na'a, taij tɨ tzajta'an seijre'e. Majta aɨme ɨ maj raatyaamue'itɨ maɨjna ɨ tevi tɨ huapɨ'ɨ tyesi'ire'e, majta ɨ tevi tɨ ravaɨre'e, majta ɨ tɨ cɨn ti'itáa a'aye'i ɨ tɨ cɨn ayan antyahuaa. Au mu huatyáuuca'a a'utɨ avastɨmee aɨjna ɨ viidriu tɨ aumuaanijmee. Aɨ mu te'ityaɨ'ɨca'a rumuajca'a jetze maɨjna ɨ aarpa tɨ Dioj hua'utapueijve mej mi maɨjna cɨn tyu'utacuiina ɨ jemin. 3Majta meyan maɨjna cɨn ti'ichuiicaca'a maɨjna cɨme'e a'ij tɨ huarɨj aɨjna ɨ Moisés tɨ ti'ivaɨra'acaa ɨ Dioj jemi, majta maɨjna cɨme'e a'ij tɨ huarɨj ɨ Canya'a. Meyan tɨcɨn: Eecan paj huapɨ'ɨ rɨ'ɨ naa huarɨj patɨ'ɨj tu'irajtuaa muaa, tavastara'a, mɨ pej Dioj pueen, paj pajta nain cɨn anti'amua'aree. Aɨj tu cɨn rɨ'ɨ tya'utaseij. Tɨj na'a a'ij paj rɨcɨ, xa'apɨ'ɨn paj rɨcɨ, pajta tzaahuati'ira'a cɨn raaxa'apɨ'ɨntare'e, mɨ pej peyan tie'ijta tɨj na'a tɨ yu auca'itɨ a'ame tɨj na'a rusen cɨme'e. 4Naimi'i mu meyan rɨ'ɨ timuaatyajtuaani, majta rɨ'ɨ timuaata'asin, mueetzi, mɨ paj tavastara'a pueen, a'ini muaa paj asaɨj urare'enya'acan cɨn seijre'e ɨ Dioj jemi. Naijmi'i ɨ maj seij chuejra'a japua e'ema'acan, aɨ mu a'uva'aju'u mua'aju'un mej mi muaatyaanajche, a'ini papu'uri tihua'utaseijrate pej peyan xa'apɨ'ɨn huarɨj a'ij tɨ tiraavijte'e. 5Nyatɨ'ɨj ni atanyeeraca'a tɨ pua'a ari tya'antacuuni'i u teyujta'a a'u tɨ e'iracatii aɨjna ɨ tɨ tyá'anxajta aɨjna cɨme'e ɨ Dioj. 6Matɨ'ɨj mi maun a'iraacɨ u teyujta'a aɨme ɨ maj tajapua ti'ivaɨre'e ɨ maj arahua'apua ara'ase. Mu'uri raatɨsima'a ɨ pueijtzi ɨ tɨ ajta arahua'apua ara'ase. Cɨɨxuri mu majta ti'itéecha tɨ ma'a tí'ityatáatɨye'i tyamua'a naa. Majta mu ava'ajɨ'ɨqui'ihuajma'acaa an rutaviitze'e puaasi cɨme'e tɨ ooro cɨn taavijhua. 7Ajta saɨj ɨ maj muaacua ɨ maj ruuri, aɨ pu hua'ura'ɨpɨ'ɨte aɨme ɨ maj arahua'apua ara'ase aɨjna ɨ tuxa'a ɨ tɨ ava'ɨstijmee ɨ tɨ cɨn huapɨ'ɨ nyu'ucamɨ'ɨ ɨ Dioj ɨ tɨ i'iruuri rusen cɨme'e. Saɨj ajta saɨj pu hua'ura'ɨpɨ'ɨte aɨjna ɨ tuxa'a. 8Aj pu'i tyamua'a tyájcɨtzujtaraca'a u teyujta'a aɨjna cɨme'e ɨ muáre'eri'ira'ara'an ɨ Dioj. Ajta, eihua pu huapɨ'ɨ huatátzarajraa. Aj pu'i tyamua'a tya'uhuajɨstyaca'a u teyujta'a aɨjna ɨ cɨtzij. Capu che'e huatarɨ'ɨristaraca'a tɨ saɨj aun a'utyarute u teyujta'a asta mana'a cai ra'antipua'arite'e ɨ maj arahua'apua ara'ase maj pueijtzi hua'uta'an ɨ tɨ ajta arahua'apua ara'ase.

will be added

X\