Apocalipsis 13

1Nyatɨ'ɨj ni a'atɨ tɨ huapɨ'ɨ á'atyesi'ire'e huaseij. Aɨ pu ɨ jaj tzajta'a tɨ ve'e a'itama'acaa. Tamuaamuata'a pua'amuaca pu ava'ahuajmee, ajta arahua'apuaca huijmu'u. Curuun pu tya'utyarujti'ihuaca'a ɨ ru'ahuaj jetze seij ajta seij, ajta ayaa pu te'eyu'usi'i aɨjna jetze ɨ muura'an a'ij tɨ antyahuaa tɨ a'ij pua'a namuajre'e ɨ Dioj jemi. 2Ayaa pu seijra'acaa aɨjna ɨ ti'itɨ ɨ nyaj raaseij. Ayaa pu eenya'a seijra'acaa tɨj jɨripu. Ayaa pu e'enye'en tiɨɨcajmee tɨj juutze'e. Ayaa pu ajta een anténi tɨj muajye. Ajta aɨn ɨ cu'ucu'u, aɨ pu nain raatatui aɨjna ɨ ti'itɨ ɨ rumuare'eri'ira'a, ajta tɨj na'a tɨ cɨn tie'ijta, ajta ɨ tɨ cɨn eihua antyujmua'aree. 3Cu xuee ti'ipueijti'ihuaca'a saɨj ɨ muura'an tɨ'ij huamɨ'ɨni. Ajta, ajtahua'a pu huaruj aɨjna ɨ tɨ ti'ipueijti'ihuaca'a. Aɨj pu cɨn naijmi'i matɨj mana'a maj yan huachaatɨme iiyan chaanaca japua, eecan mu rɨ'ɨ tira'utaseij, majta ra'ara'astijre maɨjna ɨ ti'itɨ. 4Majta maɨn ɨ tyetyaca aɨ mu raatyanajchaca'a maɨjna ɨ cu'ucu'u a'ini pu'uri aɨn cu'ucu'u raatatui aɨjna ɨ ti'itɨ tɨ huapɨ'ɨ á'atyesi'ire'e ɨ tɨ cɨn antyujmua'aree. Majta maɨn tyaɨte raatyanajchaca'a maɨjna ɨ ti'itɨ. Ayaa mu tɨcɨn: ―¿A'ataani ayan een tɨj amɨjna mɨ ti'itɨ? ¿A'ini auj ti'irɨ'ɨri tɨ a'atɨ raatyenya'usi'ite'en tɨ ij raatyamue'itɨn? Capu xaa nya'u a'atɨ. ―Ayaa mu tyu'utaxajtaca'a. 5Ca'anijra'a pu raata'a tɨ'ij a'ujtzaahuatya'a huapɨ'ɨ ɨ Dioj jemi. Ayaa pu tiraata'a tɨ ayan a'ateevi'in tɨ aɨjna cɨn antyujmua'aréera tɨ eihua huapɨ'ɨ a'ij pua'a ti'ixajta. Ayaa pu á'atyeere a'achu cumu hua'apuate maxcɨra'i japuan hua'apua. 6Aj pui'i autyejche tɨ a'ij pua'a ti'ixajta ɨ Dioj jemi aɨjna cɨme'e tɨ rusaɨj ayan huaujruu tɨj ɨ Dioj. Eecan pu a'ij pua'a tira'ixaa aɨjna ɨ Dioj, ajta aɨme ɨ maj aun e'eseijre'e ɨ Dioj jemi u tajapua. Aɨ mu ti'ivaɨre'e matɨj chi'ira'an ɨ tɨ tzajta'an seijre'e ɨ Dioj. 7Ajta aɨn ɨ cu'ucu'u aɨ pu ca'anijra'a raata'a tɨ'ij hua'utenya'usi'ite'en aɨme ɨ maj rɨ'ɨ ti'iteseijre'e ɨ Dioj jemi. Ajta ayan tiraata'a tɨ'ij hua'utyamue'itɨn. Ayaa pu ajta tiraata'a tɨ aɨjna cɨn antyujmua'aréera tɨ'ij tihua'utaijte'en matɨj mana'a pua'amua yen seijre'e iiyan chaanaca japua, aɨme tyaɨtejra'a, majta aɨme tyaɨtejra'a, majta aɨme ɨ maj seij chuejra'a japua e'ema'acan, tɨj na'a ɨ tɨ seijre'e ɨ hua'anyuuca. 8Matɨj mana'a pua'amua iiyan huachaatɨme ɨ chaanaca japua, aɨ mu rana'amicha'a mua'aju'un, matɨj mana'a ɨ maj cai á'ayu'usi'ihuaca'a ɨ yu'uxari jetze ɨ tɨ ra'a aɨjna ɨ Canya'a ɨ tɨ huamé'ere tɨ'ɨj cai xɨ huataseijra'a ɨ chaanaca. Aɨjna ɨ yu'uxari, ai pu aɨn pueen tɨ jetzen te'eyu'usi'i a'ij tɨ antyahuaa saɨj ajta saɨj matɨj mana'a pua'amua ruuri huatyájturaa jemin ɨ Canya'a tɨj na'a rusen cɨme'e. 9Tɨ pua'a a'atɨ huityajnamua, che'e aɨn tyamua'a naa tiraanamua. 10Tɨ pua'a pɨti'ihuaujxa'apɨ'ɨntare'en, mej seij huatevi'iran maj ra'ityaanan, aɨ mu xaa raatévi'ira. Tɨ pua'a a'atɨ tityaacui'ini chun cɨme'e, ayaa pu tyu'ujxe'eve'e tɨ ayan che'eta aɨjna cɨn tyu'umɨ'ɨni. Ayaa pu Dioj ayan tihua'utajée aɨme ɨ maj rɨ'ɨ ti'iteseijre'e ɨ jemin mej mi tya'utaviicue'i, mej mi majta ra'atzaahuate'e. 11Nyatɨ'ɨj ni seij huaseij ɨ ti'itɨ tɨ a'itanyej a chuaata'a. Hua'apuaca pu ava'ahuajmee tɨj canya'a. Ayaa pu ajta ti'ixaxa'a tɨj ɨ cu'ucu'u. 12Aɨ pu ra'ara'astijre aɨjna jetze ma'acan ɨ ti'itɨ ɨ ta'anajca tɨj na'a ɨ tɨ cɨn antyujmua'aree. Ayaa pu ca'anyejri cɨn tihue'ijte'e matɨj mana'a mej iiyan seijre'e chaanaca japua mej mi ratyaanajche maɨjna ɨ ta'anajca tɨ huaruj ɨ tɨ ti'ipueijti'ihuaca'a aɨjna cɨme'e ɨ tɨ huamɨ'ɨ. 13Ayaa pu ti'imɨjhuaca aɨjna ɨ tɨ ravaɨre'e mej mi ti'itɨj cɨn rɨ'ɨ tira'utaseij. Ee xaa, nya'u, ayaa pu raayɨ'ɨtɨ tɨ taij u e'icajraiini u ute'e, mejseiiraca ɨ tyaɨte. 14Aɨ pu hua'acuanamua ɨ tyaɨte ɨ mej yan seijre'e iiyan chaanaca japua aɨjna cɨme'e tɨ ca'anijra'a rata'aca tɨ ayan huarɨni aɨjna jetze ma'acan ɨ ta'anajca. Aj pu'i ayan tihuéijca mej mi ratyatáahuan ti'itɨ tevijra'a tɨ ayan seijre'e tɨj aɨjna ɨ ti'itɨ ta'anajca, aɨjna ɨ tɨ tyu'upueijti'ihuaca'a aɨjna cɨme'e ɨ chun, ajta aɨjna ɨ ti'itɨ tɨ huaruj. 15Ajta aɨn ɨ ta'anajca, ayaa pu ajta tiraata'a aɨjna ɨ tɨ ravaɨre'e tɨ'ij xaijnyu'ucari raatátɨsten aɨjna ɨ ti'itɨ tevijra'a tɨ'ij tyu'utaxaj. Ayaa pu ajta tiraata'a tɨ aɨjna cɨn antyujmua'aréera tɨ ayan tihua'utaijte'en maj raaje'ica a'atɨ tɨ na'a ɨ tɨ cai á'ujca'anye tɨ raatyaanajche aɨjna ɨ ti'itɨ tɨ tevijra'a. 16Aɨ pu ajta tihue'ijte'e mej mi anaujyu'uxaxɨ'ɨn ɨ rumuajca'a jetze na'ari maj araujyu'uxaxɨ'ɨn ɨ rucuaatzi jetze naijmi'i ɨ tyaɨte. Capu tihua'utauuni'ira tɨ pua'a a'atɨ ayan cɨle'en cɨn ti'itejvee nusu va'acan cɨn ti'itejvee, tɨ pua'a chijtyaani pueen nusu cai a'ij ti'ijviicue'i. Capu ajta tɨ pua'a meyan ruxaahua á'ujhua'anye'en na'ari maj ca'anejri cɨn ti'imuare'e. 17Tɨ pua'a cai a'atɨ a'ayu'usi'ihua a'ij tɨ antyahuaa aɨjna ɨ ti'itɨ na'ari ɨ tɨ cɨn ti'itej, capu rɨ'ɨrista a'ame tɨ aɨjna ɨ a'atɨ ti'itɨ huananan. Capu ajta rɨ'ɨrista a'ame tɨ ti'itɨ huatuaani. 18Aɨj pu cɨn, ayan tyu'ujxe'eve'e tɨ a'atɨ rɨ'ɨ metyaúumua'araj. Che'e aɨn yau'eitaa a'ara'ani a'ij tɨ huataujmua'a aɨjna ɨ tɨ cɨn ti'itej a'ij tɨ antyahuaa aɨjna ɨ ti'itɨ. Aɨjna ɨ tɨ cɨn ti'itej, au pu a'uve'eme aɨme tzajta'a ɨ tyetyaca. Ayaa pu ti'itej a'achu arájsevi sieentu japuan hueicate japuan arájsevi.

will be added

X\