Apocalipsis 12

1Aj pu'i ti'itɨ huataseijre u ute'e ɨ nyaj cɨn rɨ'ɨ tya'utaseij. Jɨita'a pu seijra'acaa tɨ ayan eenye'en ti'itechajca'a cɨɨxuri cɨme'e tɨ naa tí'ityatáatɨye'i tɨj ɨ xɨcaj. Ajta maxcɨra'i japua ujvaaca'a aɨjna ɨ jɨita'a. Aɨ pu curuun ajta u'utyarujtya'acaa tɨ jetzen seijra'acaa ti'itɨ cumu xu'ura'ave. Ayaa mu ara'asicaa a'achu cumu tamuaamuata'a japuan hua'apua. 2Pu'uri autájucaca'a, ajta ruyeinyaca'a aɨjna cɨme'e tɨ ra'acui'icaa a'ini pu'uri tɨn tiyauj a'ame. 3Ajtahua'a saɨj huataseijre. Ma'acui xaa, aɨjna ɨ cu'ucu'u ɨ tɨ pa'u, ɨ tɨ vivéj. Arahua'apuaca pu huijmu'u, ajta tamuaamuata'a ava'ahuajmee. Aɨ pu ajta ru'utyarujtya'acaa ɨ curuun ɨ tɨ arahua'apua. 4Ajta, rucuasi pu cɨn hua'ajcura'ana e'icaca aɨme ɨ xu'ura'ave ɨ maj ute'e e'eseijre'e. Aj pu 'i hua'ajájpuaca'a. Aj pu'i huaje'icaahua'axɨ iiyan chaanaca japua. Ajta aɨn ɨ cu'ucu'u, aa pu vejli'i jemin a'utyeechaxɨ aɨjna ɨ jɨita'a tɨ ari tɨn tiyauj a'ame tɨ'ij raatyacɨ'ɨme tɨ'ɨj huanu'eihua ɨ unyaaca'i. 5Aj pu'i tiyauj a'araa, tyaatacan. Ai pu aɨn pueen tɨ ca'anyejri cɨn tihua'utaijte'esin matɨj mana'a pua'amua ɨ maj chaanaca japua je'ema'acan. Ajta aɨn unyaaca'i, Dioj pu ya'uvi'itɨ u tajapua a'u tɨ e'eseijre'e ɨ ɨpuari tɨ japuan acajca ɨ Dioj. 6Aɨjna ɨ jɨita'a, a pu huatauruu aujna pujme'en a'u tɨ cai a'a a'atɨ, a'u tɨ ajta Dioj rɨ'ɨ ya'uruurijtze. Au pu e'eteeri a'achu cumu seivi'ira'a japuan tamuaamuata'ate japuan hueicate xɨcaj. Ajta aɨn ɨ Dioj, aɨ pu rachaɨ́ a'ame. 7Matɨ'ɨj mi autyajhuii maj huatenya'use'en ɨ tajapua. Aɨjna ɨ Miguel, majta ɨ maj jamuan ti'ivaɨra'acaa, aɨ mu ranya'usi'itya'acaa maɨjna ɨ cu'ucu'u, majta maɨjna ɨ maj ravaɨra'acaa ɨ cu'ucu'u. 8Matɨ'ɨj mi hua'utyaamue'itɨ maɨjna ɨ cu'ucu'u, majta aɨme ɨ maj ravaɨra'acaa. Capu che'e hua'uta'a maj maun a'utyauuca u tajapua. 9Matɨ'ɨj mi ye'icajrai maɨjna ɨ cu'ucu'u tɨ vivéj, aɨjna ɨ cu'ucu'u tɨ jajcua jɨmɨ seijra'acaa, aɨjna ɨ tej teyan ratamua'amua tɨcɨn tiyaaru'u, tyajta ɨ tyej teyan ratamua'amua tɨcɨn Satanás. Ai pu aɨn pueen aɨjna ɨ tɨ hua'acuanamua matɨj mana'a pua'amua yen seijre'e iiyan chaanaca japua. Aj mu mi aye'icajrai iiyan chaanaca japua, jamuan ɨ maj ravaɨra'acaa. 10Nyatɨ'ɨj ni raamua'areeri'i tɨ a'atɨ aun tajapua a'utyaavaaca'a. Tɨ'ɨqui ca'anin cɨn tyu'utaxajtaca'a ayan tɨcɨn: ―Pu'uri hui xaa ayan tyaja'ure'enye tɨ aɨn ɨ TaDioj ari hue'irajtuaa aɨme ɨ maj ra'astijre'e. Pu'uri nain cɨn antyujmua'aree tɨ i'i tihua'utaijte'en naijmi'ica tɨj na'a rusen cɨme'e. Pu'uri hui nain cɨn tiraijca aɨjna ɨ Cɨriistu'u tɨ ari ra'antihuau, a'ini pu'uri ya'ucajrai aɨjna tɨ tihua'axajtzi'i ɨ ta'ihuaamua'a. Nain xɨcaj tzajta'a, ajta nain tɨca'ari tzajta'a, aɨ pu hui ayan tihua'axajtzi'i aɨjna jemi ɨ Dioj. 11’Majta maɨn ɨ ta'ihuaamua'a, aɨ mu maɨjna cɨn ra'antimue'itɨ maɨjna cɨme'e tɨ aɨn Canya'a ra'iraaxɨre ɨ ruxuure'e tɨj muaɨ'ɨvejri ɨ Dioj jemi, majta mu ra'antimue'itɨ maɨjna cɨme'e mej meyan tihua'utá'ixaatya'acaa aɨjna cɨme'e ɨ nyuucari ɨ tɨ cɨme'en raxa ɨ Cɨriistu'u. Camu a'atzu raataxaahuataca'a maj ra'astijre'e. Capu amɨn a'ij tɨ pua'a a'atɨ ayan hua'anyeecha tɨ hua'ucui'ini. Mauche'e mu ra'aviicue'i. 12’Sata'aj seyan huaujtyamua'ave'en mɨ saj seyun seijre'e tajapua, sajta muan, mɨ saj seyun ti'ivaɨre'e. Sajta muan, mɨ saj seyun huachaatɨme saujna chaanaca japua, sajta muan, mɨ saj saun a'utyauuca ɨ jaj japua, cui'i xaa, a'ini muejmi jemi ari huataseijre aɨjna ɨ tiyaaru'u. Ajta i'inyu'ucamɨ'ɨ huapɨ'ɨ a'ini pu'uri ramua'aree tɨ cai che'e a'ateeri, a'ini Dioj pu'uri ra'ityánajsin. ―Yaa pu tyu'utaxajtaca'a aɨjna ɨ Dioj. 13Ajta aɨn ɨ cu'ucu'u, tɨ'ɨj raamua'areeri'i tɨ aun e'ejve ɨ chaanaca japua, aj pu'i raatavén aɨjna ɨ jɨita'a ɨ tɨ tiyauj a'araa. 14Ajta Dioj pu ayan tiraata'a aɨjna ɨ jɨita'a tɨ raavaɨre'en tɨ'ij ca'anacan ticheni a'u tɨ a'ij eenya'a aɨjna jemi ɨ cu'ucu'u. Ajta Dioj pu ti'ijmi'icua a'ame. Aj pu'i aun a'ará'a a'u tɨ cai a'a a'atɨ, a'u tɨ ajta Dioj rɨ'ɨ tiya'uruurijtze. Au pu e'eteeri a'achu cumu hueica ninye'ira'a japuan e'ita'a. 15Aj pu'i aɨn cu'ucu'u eihua jaj aijxɨ́re an rutene'etze'e tɨ'ij ya'ujáujte'en, ajta ra'ujamɨste'en aɨjna ɨ jɨita'a. 16Ajta aɨn ɨ chuej, aɨ pu raatavaɨ aɨjna cɨme'e tɨ a'utátzi'ite tɨ'ij atyarute ɨ jaj, ɨ tɨ ra'ijxɨ́re ɨ cu'ucu'u an rutene'etze'e. 17Aj pu'i aɨn cu'ucu'u raatajaaxaijvi'iri'i aɨjna ɨ jɨita'a. Ajta á'uraa. Aj pu'i autyejche tɨ hua'utenya'usi'ite'en aɨme ɨ seica, ɨ maj yaujmua'ame'en pueen aɨjna ɨ jɨita'a. Ai mu aɨn pueen ɨ mej meyan ra'astijre'e a'ij tɨ tihue'ijte'e ɨ Dioj, ɨ maj majta tya'anxájta maɨjna cɨme'e ɨ Jesús. Ajta aɨn ɨ cu'ucu'u, aɨ pu aun huateechaxɨ a'apueiri japua, a'u tɨ a'avastɨme ɨ jaj tɨ ve'e.

will be added

X\