Apocalipsis 11

1Aj pu'i a'atɨ naatachui ti'itɨ cɨye ɨ maj cɨn tí'itaaca a'achu tɨ huatatee. Ayaa pu tinaata'ixaa tɨcɨn: ―Iya'a i, pata'aj hui raaté'iten a'achu tɨ antayauj ɨ teyuu a'u mej yá'ana'amiche ɨ Dioj, pata'aj pajta raaté'iten a'achu tɨ auyauj aɨjna ɨ maj japuan ti'imuaɨ'ɨvajtaca. Pata'aj pajta hua'uté'iten a'achu maj pua'amua ɨ maj maun rana'amiche. 2Pajta, capaj hui paun ra'itáa a'achu tɨ antayauj aujna u pua'aque tɨ a'aráyaujta'a. Pata'aj rujɨɨme'e raatyajtuaani a'ini Dioj pu ari hua'uta'a ɨ maj seij chuejra'a japua e'ema'acan mej mi meyan a'ateere a'achu cumu hua'apuate japuan hua'apua maxcɨra'i maj maun ra'ave'echetzi'inaxɨ'ɨn maɨjna chajta'a tɨ Dioj ayan rusaɨj huataura'ate. 3’Nyajta inyaa, ayaa nu hui tihua'uta'asin aɨme ɨ maj hua'apua ɨ maj ca'anijra'a ti'ita'aca inyaa cɨme'e ɨ muare'eri'ira'a mej mi meyan a'ateevi'in a'achu cumu seivi'ira'a japuan tamuaamuata'ate japuan hueicate xɨcaj maj tihua'uta'ixaate'en nyeetzi jetze ma'acan. Ayaa mu maɨjna cɨn ti'itéechan maɨjna cɨme'e ɨ maj cɨn ti'ityaujche'eta aɨme ɨ maj ruxaamɨste'e maɨjna tɨ saɨj huamɨ'ɨ. 4Ai mu hui aɨn pueen ɨ huarej ɨ tɨ ti'ihua'apua ɨ tɨ jemin a'atavee ɨ tavastara'a tɨ iiyan tie'ijta chaanaca japua. Ai mu hui majta maɨn pueen ɨ maj hua'apua ɨ ta'antitátzajmee. Aɨ mu xaa jemin seijre'e ɨ tavastara'a. 5Tɨ pua'a a'atɨ ayan ti'ixe'eva'a tɨ a'ij pua'a hua'uruuren, taij pu aijninyei an hua'atenyi'itze'e, ajta hua'amue'itɨcɨ aɨme ɨ maj hua'ajchaɨre'e. Ee xaa, tɨ pua'a hui a'atɨ ayan ti'ijxe'eva'a tɨ a'ij pua'a hua'uruuren, ayaa pu ti'ihuaujxa'apɨ'ɨntare aɨjna jemi ɨ a'atɨ maj maɨn raaje'ica. 6Majta aɨme ɨ maj hua'apua, aɨj mu hui cɨn antyujmua'aréera mua'aju'un maj hua'uta'ijmɨ ɨ viite mej mi cai che'e viiya menti mauj tihue'ixaate'e ɨ tyaɨte. Aɨj mu cɨn meyan tite'entyujmua'areera mua'aju'un maj saɨque raaruuren ɨ jaj tɨ'ij ayan huataujru'ure'en tɨj xuure'e. Ayaa mu che'eta mana'a cɨn tite'entyujmua'areera mua'aju'un maj pueijtzi hua'uta'an aɨme ɨ tyaɨte ɨ mej iiyan seijre'e ɨ chaanaca japua. Nain mu hui cɨn pueijtzi hua'uta'asin ɨ cui'ini'ira'a cɨme'e tɨj na'a tɨ ayan tihua'araanajchi. 7Matɨ'ɨj ra'antipua'arite'en ɨ maj cɨn naatyaxajta, aj pu'i ti'itɨ aun a'itamé a'u tɨ e'etyacun ɨ tɨ huápɨ'ɨ a'ucatee. Aɨ pu hui hua'utenya'usi'ite'esin, ajta hua'acui'ini ajta, hua'utyaamue'itɨ. 8Au mu majta a'utyá'a mua'aju'un ɨ mɨ'ɨchite caaye jetze aujna a'ahua'a chajta'ana jetze tɨ ve'e ɨ tɨ nu'u ayan tyaja'arajtyahuaa tɨcɨn Sodoma, ajta ayan tɨcɨn Egipto. Au pu hua'avastara'a á'utataihuaca'a ɨ curuu jetze. 9Ayaa mu mɨ'ɨchite huáruuren aɨme ɨ tetyaca mej nain japua huachaatɨme, a'u tɨ na'a seij chuejra'a japua, aɨme ɨ mej seij nyuucari cɨn ti'ixaxa'a, a'achu maj pua'amua ara'ase ɨ tyaɨtejra'a. Hueica xɨcaj japuan e'ita'a mu hua'aseira mua'aju'un ɨ mɨ'ɨchite. Majta, camu raata'acara'a tɨ a'atɨ hua'ava'anan. 10Majta aɨme ɨ maj iiyan huachaatɨme ɨ chaanaca japua, eihua mu huataujtyamua'ave'esin maɨjna cɨme'e ɨ mej meri hua'ucuii. Aɨ mu majta maɨjna cɨn ti'iyesten, majta tyu'utaujpueijve'esin ti'itɨ maɨjna cɨme'e ɨ maj cai che'e hua'ɨtziite'e aɨme ɨ maj hua'apua ɨ maj ti'ixaxa'ata'a ɨ Dioj jetze ma'acan, ɨ maj majta nu'u pueijtzi hua'uta'a aɨme ɨ mej iiyan seijre'e i chaanaca japua. 11Tɨ'ɨj tyauma'aca hueica xɨcaj japuan e'ita'a, xaijnyu'ucara'ara'an ɨ Dioj, aɨ pu huatyajturaa aɨme jemi ɨ maj hua'apua. Ajtahua'a pu hua'utatɨste ɨ hua'axaijnyu'uca ɨ maj cɨn ruuri. Matɨ'ɨj mi ajhuiixɨ. Majta eihua tyu'utatzɨn aɨme ɨ maj hua'useij. 12Matɨ'ɨj mi raanamuajri'i tɨ a'atɨ ca'anin cɨn u e'icájijhuaca'a u ute'e ayan tɨcɨn: ―Iya'a, sajcɨɨnyechi seyujna ute'e, jaitɨri jetze u tajapua. Matɨ'ɨj mi ticɨj, mahua'aseiiraca ɨ maj hua'ajchaɨra'acaa. 13Cɨme'en mu'u ticɨj, aj pu'i huatyaujca'atzɨjxɨ ɨ chaanaca tyamua'a naa. Ajta e'icaj pu a'avatzɨ ɨ tihua'achi'i ɨ tɨ aun a'uvaatɨma'acaa. Majta aráhua'apua vi'ira mu huacuii ɨ tyaɨte tɨ'ɨj huatyaujca'atzɨjxɨ. Majta aɨme ɨ seica ɨ tyaɨte, eihua mu huapɨ'ɨ tyu'utatzɨn, majta rɨ'ɨ tiraatyeejee ɨ Dioj. 14Pu'uri mu a'uma'a ɨ maj cɨn rajpueijtzi ɨ tɨ hua'apua. Ajta pu'uri tɨn tyaja'ure'enyejsin ɨ tɨ hueica ɨ maj cɨn rajpueijtzi mua'aju'un. 15Aj pu'i aɨn tɨ ute'e ti'ivaɨre'e, aɨjna tɨ arahua'apua pueen, aɨ pu ajta ucájijhuaca'a. Nyajta hua'unamuajri'i maj ca'anin cɨn tí'ixajtacaa u ute'e, meyan tɨcɨn: Pu'uri xaa te'entyajrupi ɨ tavastara'a, aɨjna ɨ tɨ Dioj ra'antihuau. Pu'uri nain cɨn antyujmua'aree tɨ tihua'utaijte'en aɨme ɨ maj huachaatɨme anna chaanaca japua. Aɨ pu tihua'utaijte'esin tɨj na'a tɨ yu auca'itɨ a'ame tɨj na'a rusen cɨme'e. 16Majta aɨme ɨ vaujsi ɨ maj seite japuan muaacua ara'ase, ɨ maj majta hua'ɨpuari japua e'ere'eti ɨ Dioj jamuan, aɨ mu a'icaujtuuxɨ, majta raatyanajchaca'a ɨ Dioj. 17Meyan tɨcɨn: Rɨ'ɨ tu timuaata'aca, tavastara'a, mɨ paj Dioj pueen, mɨ paj pajta nain cɨn anti'amua'aree, mɨ paj pajta seijre'e ijii, mɨ paj pajta seijra'acaa jajcua ɨmɨ. 18Majta aɨme ɨ maj seij chuejra'a japua e'ema'acan, matɨj pua'amua, eihua mu huapɨ'ɨ nínyu'ucacuca'a. Pajta muaa, papu'uri huatanyu'ucaca'a. Pu'uri ajna tyaja'ure'enye ajna xɨcajra'a paj jetzen hua'axɨjte'en aɨme ɨ mej meri huacuii. Pata'aj rɨ'ɨ tihua'uta'an paɨme ɨ maj muavaɨre'e, aɨme ɨ mej mueetzi jetze ma'acan ti'ixaxa'a, majta aɨme ɨ maj mueetzi jemi rɨ'ɨ ti'iteseijre'e. Pata'aj rɨ'ɨ tihua'uta'an matɨj pua'amua mua'astijre'e, capu amɨn tɨ pua'a meyan va'acan cɨn títyatatí na'ari cɨleenya'a cɨn metítyatatí. Pata'aj pajta hua'antipua'arite'en aɨme ɨ mej meri hua'upua'ari aɨme ɨ mej iiyan chaanaca japua huachaatɨme. Ayaa mu tyu'utaxajtaca'a aɨme ɨ maj seité japuan muaacua ara'ase. 19Aj pu'i aɨn ɨ teyuu a'u tɨ Dioj e'eseijre'e u tajapua, aɨ pu antácuunyaraca'a. Ajta aun teyujta'a seijra'acaa aɨjna ɨ chi'i tɨ cɨle'en tɨ ajta tzajta'an urácatii ɨ nyuucari tɨ cɨn tya'ataujratziiri'i ɨ Dioj. Matɨ'ɨj mi huatyamaxcava'axɨ aujna teyujta'a, majta tyenyuuca'a. Eihua pu ca'anin cɨn ti'ityáca'arajnajmá'a. Huatyaujca'atzɨjca'a ɨ chuej, majta caavatzɨ ɨ tyeetej.

will be added

X\