Apocalipsis 10

1Nyatɨ'ɨj ni nyajtahua'a seij huaseij tɨ ti'ivaɨre'e u tajapua. Eecan pu ruca'anye aɨjna, ajta ute'e pu a va'acáma'acaa. Jaitɨri pu racánajca'a, ajta cu'uxai atavɨjca'a ɨ muura'an jetze. Ayaa pu tyá'ajtaave'e ɨ nyeerima'ara'an tɨj ɨ xɨcaj, ajta ayan seijra'acaa ɨ ɨɨcajra'an tɨj ti'itɨ tɨ tyataasin. 2Aɨ pu ru'ityépijcaa ɨ rumuajca'a jetze ɨ yu'uxari tɨ cɨle'en. Pu'uri autácuuri'ihuaca'a. Aj pu'i a a'araɨ́ɨcataca'a ɨ jaj japua ɨ tɨ ve'e aɨjna cɨme'e ɨ ruɨɨca ru'ɨrɨɨta'a pujme'en. Aɨ pu ajta a'araɨ́ɨcataca'a ɨ chuej japua ɨ seij cɨme'e ɨ ruɨɨca ruutata'a pujme'en. 3Aj pu'i ca'anin cɨn huajijhuaca'a. Ayaa pu namuajra'acaa tɨj muajye tí'iji'ihuaca. Cɨme'en pu'u ayan tyu'ujijhuaca'a, matɨ'ɨj mi huateenyuu aɨme ɨ maj arahua'apua ara'ase. 4Matɨ'ɨj meyan huateenyuu, nyaa nu rá'ayu'uxáche'e. Nyajta e'eyan raanamuajri'i ɨ a'atɨ tɨ ute'e nyaja'utajée ayan tɨcɨn: ―Pata'aj ru'umua'areera a'ij mej tyu'utaxajtaca'a ɨ maj huateenyuu aɨme ɨ maj aráhua'apua ara'ase. Capaj ra'ayu'uxa. 5- 6Ajta aɨn ɨ tɨ tajapua ti'ivaɨre'e ɨ nyaj raaseij tɨ jaj japua a'araɨ́ɨcataca'a, ajta chuej japua ajta a'araɨ́ɨcataca'a, aɨ pu ajméijca'ataca'a, ajta ayan tya'ataujratziiri'i tɨ nu'u ari tyaja'ure'enyejsin ajna xɨcajra'an tɨ jetzen nain te'entipua'ari. Aɨj pu jetze tya'ataujratziiri'i ɨ nyuucajtze'en aɨjna tɨ rusen cɨn ruuri. Ai pu aɨn pueen ɨ Dioj tɨ tajapua huatyataahuaca'a, ajta naijmi'ica tɨ aun e'eseijre'e. Aɨ pu ajta raatyataahuaca'a ɨ chaanaca ɨ tyaj japuan yen seijre'e, aɨ pu ajta raatyataahuaca'a tɨj na'a tɨ japuan ti'iseijre'e, ajta ɨ jaj tɨ ve'e, ajta tɨj na'a tɨ aun e'eseijre'e. 7Ayaa pu tyu'utaxajtaca'a aɨjna ɨ a'atɨ tɨ nu'u ajna a'araurastejsin aɨjna ɨ tɨ ru'avaa ɨ Dioj jemi a'ij tɨ aɨn Dioj tya'ataujratziiri'i hua'a jemi ɨ maj ravaɨra'acaa maɨjna cɨme'e mej jetzen ma'acan ti'ixaxa'ata'a. Ajna pu nu'u ayan a'araurastejsin ajna xɨcajra'an tɨ jetzen ucajijhua ɨ tɨ tajapua ti'ivaɨre'e ɨ tɨ arahua'apua pueen. 8Aj pu'i aɨn ɨ nyaj raanamuajri'i tɨ ute'e tyaja'utaxajtaca'a, ayaa pu tinaata'ixaa tɨcɨn: ―Aricu, aɨjna jemi pata'aj ra'ancura'ɨn ɨ yu'uxari tɨ autacuuri'i muajca'ara'ara'an jetze aɨjna tɨ tajapua ti'ivaɨre'e, tɨ aun japuan huatejvee ɨ jaj japua, tɨ ajta aun japuan huatejvee ɨ chuej japua. 9Nyatɨ'ɨj ni nyaun á'umej nyaɨjna jemi tɨ tajapua ti'ivaɨre'e. Ayaa nu tiraata'ixaa tɨ naata'ɨte'en ɨ yu'uxari tɨ cɨle'en. Aj pu'i ayan tinaata'ixaa tɨcɨn: ―Ya'acui, nya'u. Pata'aj hui raatyajcua'ani. Aɨ pu mua'atzíivitya'a pu a'ame mua'a jucaatze'e. Ajta, ayaa pu mua'améncatya'a a'ame mua'aténi'itze'e tɨj sarate. 10Nyatɨ'ɨj ni ra'ancura'ɨ nyaɨjna ɨ yu'uxari tɨ cɨle'en. Au nu ya'ancura'ɨ ɨ muajca'ara'ara'an jetze aɨjna tɨ tajapua ti'ivaɨre'e. Nyatɨ'ɨj ni raatyajcuaa. Eecan pu naa tinú'ucacarajca'a ɨ neteni jetze'e tɨj sarate. Ajta, nyatɨ'ɨj yá'uxɨj, eecan pu na'atzíjvitya'acaa ye nyajucaatze'e. 11Aj pu'i ayan tinaata'ixaa tɨcɨn: ―Ayaa pu ajta ayan tyu'uxe'eve'e paj pajtahua'a tyu'utaxaj aɨme jemi ɨ tyaɨte ɨ maj seij chuejra'a japua e'ema'acan, ɨ maj majta seij nyuucari cɨn ti'ixaxa'a, pajta hua'a cɨme'en ɨ mej tihue'ijte'e.

will be added

X\