Apocalipsis 1

1Yaa nu nyaɨjna cɨn tyu'utaxajta nyaɨjna cɨme'en ɨ nyuucari ɨ tɨ ru'avaataca'a ɨ Dioj jemi, tɨ ajta cɨme'en raxa ɨ Jesús tɨ ajta Cɨriistu'u pueen. Dioj pu ayan raata'a tɨ aɨn Cɨriistu'u ajta hua'utaseijrate'en aɨme ɨ maj ravaɨre'e mej mi raamua'aree tɨ Dioj ari ayan raaxa'apɨ'ɨntare a'ij tɨ ca'anacan tyaja'ure'enyejsin. Ajta aɨn Cɨriistu'u, ayaa pu aɨjna cɨn hua'uta'ixaa aɨjna cɨme'e tɨ saɨj a'utaityaca'a tɨ jemin ti'ivaɨre'e ɨ ute'e tɨ ij ayan raataseijrate'en aɨjna ɨ Juan. 2Nyaa nu neyan tyaja'amue'ixaate'e tɨ ayan ti'ayajna aɨjna ɨ nyuucari tɨ Dioj jemi e'ema'acan, tɨ cɨme'en raxa a'ij tɨ huarɨj aɨjna ɨ Jesús tɨ ajta Cɨriistu'u pueen. 3Che'e rutyamua'ava'a aɨjna ɨ a'atɨ tɨ ayan hua'anamuajriste'e aijna i nyuucari tɨ Dioj jemi a'uve'eme. Miche'e majta rutyamua'ava'a aɨme ɨ mej meyan ranamua, majta meyan ra'astijre'e a'ij tɨ te'eyu'usi'i aijna jetze, a'ini pu'uri tɨn tyaja'ure'enyejsin. 4Nyajta inyaa, i nyaj i'i Juan, ayaa nu tyaja'amuayu'use'e mɨ sej saun e'etyujsa'ɨri aráhua'apuaque'e a'u tɨ huaca'a u Asia. Che'e aɨn rɨ'ɨ tyajamuaata'an, ajta amuaatyápua'arite'en aɨjna tɨ jajcua ɨmɨ seijra'acaa, tɨ ajta ijii seijre'e, tɨ ajta ayan auj seira'a a'ame para rusen cɨme'e. Che'e ayan che'eta na'a amuaaruuren aɨjna xaijnyu'ucara'ara'an tɨ aun e'eseijre'e a'u tɨ Dioj á'ujca ɨpuari japua. Aɨ pu arahua'apua cɨn ti'ivaɨre'e. 5Che'e ajta aɨn rɨ'ɨ tyajamuaata'an, ajta amuaatyápua'arite'en aɨjna ɨ Jesús tɨ ajta Cɨriistu'u pueen. Aɨ pu cai a'anaj ti'itɨ cɨn atya'ɨtza'ara aɨjna cɨme'e tɨ ayan tya'anxájta ɨ Dioj jetze ma'acan. Ai pu ajta aɨn pueen ɨ tɨ anacai a'itáraa hua'a tzajta'a aɨme ɨ mɨ'ɨchite. Ai pu ajta aɨn pueen tɨ tihue'ijte'e naijmi'ica ɨ mej títyatatí iiyan chaanaca japua. Aɨ pu taxe'eve'e, ajta ruxuure'e cɨn tacaijxɨ ɨ tyaj cɨn autyajturaa ɨ Dioj jemi. 6Aɨ pu ajta ayan taata'a tyej ti jamuan tyu'utaijta, ajta tej ti tyajta raatyavaɨre'en tyaɨjna ɨ Diojra'an, ɨ tɨ ajta rajya'upua ɨ Cɨriistu'u. Tiche'e teyan rɨ'ɨ tirata'acare'en tɨj na'a rusen cɨme'e. Che'e aɨn ajta nain cɨn tyu'utaijta, tɨj na'a tɨ yu jauca'itɨ a'ame tɨj na'a rusen cɨme'e. 7Casi'i, xaaseij, aɨ pu jaitɨri jetze yava'acányejsin. Naimi'i mu raseijran matɨj mana'a maj raaje'ica. Majta naimi'i ɨ hua'atyaɨtestyamua'a, matɨj mana'a pua'amua iiyan seijre'e ɨ chaanaca japua, aɨ mu ruyeinyen maɨjna cɨme'e maj huataujxaamɨste'esin matɨ'ɨj raaseij. 8Ayaa pu ti'ixa aɨjna ɨ tavastara'a, tɨ ajta Dioj pueen tɨ seijre'e, tɨ ajta jajcua ɨmɨ seijra'acaa, ajta tɨ seijra'a a'ame tɨj na'a rusen cɨme'e. Ayan tɨcɨn: “Nyaa nu nyaɨn pueen ɨ ta'anajca, nyajta, ɨ nyatu'uve'etyajtɨ.” 9Me nyajta inyaa, i nyaj i'i Juan, inyaj a'amue'ihuaara'a pueen, ayaa nu che'eta nyana'a a'amua jamuan rajpueijtzi nyaɨjna cɨme'e nyaj Cɨriistu'u jetze ajtyama'acan. Naimi'i tu tyu'utaijta Cɨriistu'u jamuan. Tyajta naimi'i tu teyan te'eviicue'i. Au nu a'ucatii aujna aata'a tɨ a'araahuachi tɨ ayan tyaja'arajtyahuaa tɨcɨn Patmos. Au nu a'ityanami'ihuaca'a nyaɨjna cɨme'e nyaj tihua'uta'ixaa nyaɨjna cɨme'en ɨ nyuucari tɨ cɨn raxa ɨ Dioj, tɨ ajta aɨjna cɨn raxa a'ij tɨ huarɨj aɨjna ɨ Jesús. 10Tɨ'ɨj ari ajna pɨti'irɨjcaa matɨ'ɨj rana'amiche ɨ tavastara'a, aɨn xaijnyu'ucara'ara'an ɨ Dioj ayan rajve nyeetzi jemi. Nyatɨ'ɨj ni nyeyan raanamuajri'i u nyahuarita'a tɨ a'atɨ ca'anin cɨn naatajée. Ayaa pu namuajra'acaa tɨj tɨ pua'a a'atɨ ucaajijhua trompeeta jetze. 11Ayan tɨcɨn: ―Pata'aj hui ra'utyeeyu'uxa ɨ yu'uxari jetze a'ij pej ti'iseij. Pajta hua'utaiti hua'a jemi ɨ mej aráhua'apuaque'e e'etyujsa'ɨri ɨ Dioj jemi, aun tɨ huaca'a u Asia. Tɨj na'a aujna u Efeso, ajta aujna u Esmirna, ajta aujna u Pérgamo, ajta aujna u Tiatira, ajta aujna u Sardis, ajta aujna u Filadelfia, ajta aujna u Laodicea. 12Nyatɨ'ɨj ni pɨ a'ure'eve nyej ni raaseij nyaɨjna ɨ a'atɨ tɨ neje'ejeevaca'a. Nyatɨ'ɨj neyan huarɨj, ayaa nu eenye'eque'e tyu'useij ti'itɨ tɨ japuan antitátzajmee, ooro tɨ cɨn taavijhuaca'a. Ayaa pu pua'amua ara'asicaa arahua'apua ɨ cantiira'a. 13Ajta, au pu e'ita'a aɨjna tɨ japuan antitátzajmee, seij pu aun huatyavaaca'a tɨ ayan seijra'acaa tɨj tevi. Ayaa pu e'enye'en tya'ucávɨjcaa cɨɨxuri cɨme'e tɨ tɨtɨ'ɨj, ajta puaasi pu cɨn ava'ajɨ'ɨqui'ihuaca'a tɨ ooro cɨn taavijhua. 14Cueinara'an pu huijmu'ucaa, ajta cueinavi'ican pu cácɨjpuajca'a. Ayaa pu seijra'acaa tɨj canya'a muxa tɨ cueina, tɨ ajta seijre'e tɨj ɨ seeri. Eecan pu ajta ayan seijra'acaa ɨ ɨ'ɨsaara'an jetze tɨj taij tɨ a'ataa. 15Ajta, ayaa pu seijra'acaa ɨ ɨɨcajra'an jetze tɨj ti'itɨ tɨ camueijri'ihua, tɨ mestí. Naa pu ti'ityamastajye'icaa tɨj coobre maj an ya'uxɨre ɨ taij tzajta'a. Ajta, tɨ'ɨj aɨn tí'ixajtacaa, ayaa pu namuajra'acaa tɨj jatya'ana tɨ sihuajna tɨ huatamɨ'ɨyaca'a. 16Aɨ pu ru'ɨrɨɨta'a ru'itya'acaa ɨ rumuajca'a jetze, ɨ xu'ura'ave ɨ maj arahua'apua ara'ase. Ajta aɨn ɨ nyuucari tɨ jetzen e'ijninyeica'a, ayaa pu seijra'acaa tɨj chun tɨ ruxa'ajta'a tya'ajcámɨɨmɨ́jmee. Ajta ayaa pu tya'ataaca'a ɨ rujetze tɨj ɨ xɨcaj tɨ nain cɨn a'iraxɨ'ɨxɨre. 17Cɨme'en nu'u raaseij, aj nu ni a'arajve a'u tɨ a'araɨɨcajme. Cu xuee nyaj cu huamɨ'ɨni. Ma ajta aɨn, ru'ɨrɨɨta'a cɨn ɨ rumuajca'a na'ajtamuare. Ayaa pu tinaata'ixaa tɨcɨn: ―Capej hui ti'itzɨɨnya'a. Nyaa nu nyaɨn pueen ɨ nyaj anajca, ajta nyaj uve'etyajtɨ. 18Nyaa nu nyaɨn pueen ɨ nyaj i'iruuri. Nyaa nu huamɨ'ɨ. Me nyajta, ijii, nyajtahua'a nu i'iruuri para rusen cɨme'e. Nyajta nu nyaɨjna cɨn antinmua'aree nyej ni raaxa'apɨ'ɨntare'en maj huacui'ini na'ari maj ruuri mua'ara'ani, nyajta nyej ni hue'ityaanan aujna a'u maj a'acui'ini na'ari nyaj hue'irajtuaani nyaujna. 19’Ma'acui xaa, pata'aj paɨjna autyeeyu'uxa ɨ pej peri raaseij, ɨ tɨ ijii seijre'e, ajta ɨ tɨ auj seijre'e, ajta tɨ auj ayan tyaja'ure'enyejsin. 20’Aɨme cɨme'en ɨ xu'ura'ave ɨ maj aráhua'apua ara'ase ɨ paj hua'useij ɨ nyaj hue'itya'aca nya'ɨrɨɨta'a pujme'en ɨ nyamuajca'a jetze, ajta aɨjna ɨ tɨ arahua'apua tɨ japuan antitátzajmee, ayaa nu'uri timuaata'ixaate'esin matɨj mana'a pua'amua ru'avaataca'a mueetzi jemi. Maɨjna ɨ xu'ura'ave ɨ maj arahua'apua ara'ase, ai mu aɨn pueen ɨ maj maɨjna cɨn antyujmua'aree mej mi hua'uchaɨn ɨ maj e'etyujsa'ɨri hua'a teyujta'a. Ajta, ɨ tɨ arahua'apua tɨ japuan antitátzajmee, ai mu maɨn pueen ɨ tyaɨte ɨ maj aráhua'apuaque'e e'etyujsa'ɨri ɨ maj rana'amiche ɨ Dioj.

will be added

X\