Filemón 1

1- 2Inyaa, i nyaj i'i Pablo, ayaa nu een cɨn aityanami'i aɨjna cɨme'e nyaj ra'astijre'e ɨ Cɨriistu'u tɨ ajta Jesús pueen. Jamuan ɨ nye'ihuaara'a aɨjna ɨ Timuteeyu, ayaa tu tyaja'amuayu'use'e mɨ pej i'i Filemón, mɨ pej tajamuan ti'imɨjhuaca, mɨ tyej muaxe'eve'e eihua, ajta aɨjna tɨ i'i Apia, aɨjna ɨ jɨita'a tɨ tajuu pueen tɨ ajta tya'atzaahuate'e, ajta mɨ Arquipo, ɨ tɨ ayan che'eta na'a te'eviicue'i tyatɨj ityan. Tyan tu tihua'ayu'use'e naijmi'ica ɨ mej aun e'etyujsa'ɨri a'u pe e'eche. 3Ajta aɨn Dioj ɨ tyaj rajya'upua, ajta aɨn tavastara'a, aɨjna ɨ Jesús tɨ ajta i'i Cɨriistu'u, miche'e rɨ'ɨ tyajamuaachaɨn, miche'e majta amuatyapua'arite'en ɨ a'amua tzajta'a. 4Tɨj na'a nyaj amua'utámua'aree, ayaa nu rɨ'ɨ tirata'aca na'aye'i ɨ Dioj nyatɨj nyana'a ti'ijhuavii. 5Ayaa nu een cɨn tí'ijtaujtzi'ire'e na'aye'i nyaɨjna cɨme'e nyej neyan ti'inamua pej eihua huapɨ'ɨ ra'astijre'e ɨ tavastara'a, aɨjna ɨ Jesús. Pajta nu'u eihua huapɨ'ɨ hua'axe'eve'e aɨme ɨ mej tyaɨtestyamua'ame'en pueen ɨ Dioj. 6Ayaa nu ti'ijhuavii ɨ Dioj jemi pej pi peyan huata'aseijrata huataujnyáatacan cɨme'e paj nain cɨn ra'astijre'e ɨ tavastara'a mej mi ɨ seica raamua'aree tzaahuati'ira'a cɨme'e a'ij tɨ een tɨj na'a pua'amua titáacɨ'ɨti aɨjna cɨme'e tyej ra'atzaahuate'e ɨ Cɨriistu'u. 7Eecan nu nyetyamua'ave'e mueetzi jemi. Ee xaa nya'u, rɨ'ɨ paj naata'a aɨjna cɨme'e paj ca'anijra'a hua'uta'a aɨme ɨ mej tyaɨtestyamua'ame'en pueen ɨ Dioj. 8Nyaa nu xaa nyaɨjna cɨn antinmua'aree nyej ti'itɨj cɨn timuaataijte'en a'ij pej ti'itɨ huáruuren aɨjna cɨme'e tɨ Cɨriistu'u na'antihuau. 9Me nyajta cai, canu neyan rɨni nyaj timuaataijte'en ca'anyejri cɨme'e. Aɨ pu'u na'araanajchi nyej neyan timuaatahuavii a'ini eihua nu muaxe'eve'e inyaa, i nyaj neri vastacɨra'i pueen, nyajta neri a'ityanami'i nyaɨjna cɨme'e nyej ra'astijre'e ɨ Cɨriistu'u tɨ ajta i'i Jesús. 10Ayaa nu ti'imuahuavii nyaɨjna cɨme'e ɨ niyauj aɨjna ɨ Onésimo, tɨ ari ajta tya'atzaahuate'e aɨjna cɨme'e nyaj neyan raateya'upuataca'a ayujna a'u nyaj a'ityanami'i. 11Jajcua ɨmɨ, capu ti'itɨ timuaatyavaɨ. Ma ajta aɨn, pu'uri tinaatyava'ɨri inyeetzi, ajta pu mueetzi ti'ityava'ɨri. 12Nu'uri ni raataiti mueetzi jemi nyaɨjna ɨ nyaj eihua huapɨ'ɨ raxe'eve'e. 13Ayaa nu ti'ijxe'eva'acaa tɨ ye huatyaturanche'e nyaa jamuan tɨ ij naatavaɨre'enche'e mueetzi jetze ma'acan nyej nyau ye a'ityanami'i nyaɨjna cɨme'e nyaj tihue'ixaate'e ɨ tyaɨte Cɨriistu'u jetze ma'acan. 14Me nyajta inyaa, canu ti'ijxe'eva'acaa paj cai naata'acare'en nyej neyan Onésimo japuan huanyuuni. Tɨ pua'a peyan ti'itɨj cɨn naatyavaɨre'enche'e, ayaa nu ti'ijxe'eva'acaa pej peyan huarɨni axe'evi'ira'a cɨme'e. Canu xaa nya'u ti'ijxe'eva'acaa paj ca'anyejri cɨn peyan huárɨniiche'e. 15- 16Tij cai ayan een cɨn a'atzu a'atee tɨ mu e'ij huarupi tɨ ij ajtahua'a mueetzi jemi huatyaturan para rusen cɨme'e, tɨ ij aɨn huatyaturan mueetzi jemi tɨj mue'ihuaara'a pej eihua raxe'eve'e. Capu che'e ca'anyejri cɨn muatyavaɨre'esin silu a'ihuara'a pu a'ame. Eecan pu ruxe'eve'e inyeetzi jemi aɨjna ɨ a'atɨ. Aru eitze'e pu ruxe'eve'e mueetzi jemi a'ini tevi pu pueen, ajta a'ihuara'a pueen ɨ tavastara'a jemi. 17Aɨj nu cɨn neyan muahuavii tɨ pua'a peyan tinaaséijri'i nyej a jamuan ti'imuare'e. Pata'aj peyan che'eta pana'a ra'ancure'evi'itɨn paɨjna ɨ Onésimo patɨj tina'ancure'evi'itɨ inyeetzi. 18Tɨ pua'a ti'itɨj cɨn a'ij pua'a muaruu na'ari tɨ pua'a ti'itɨj cɨn timua'achaɨre'e, nyeetzi paj huajijve'en. 19Nyamuajca'a nu cɨn ti'imuayu'use'e. Inyaa, i inyaj i'i Pablo, nyaa nu ti'imuanajchite'en. Me nyajta inyaa, canu a'atzu nyaɨjna cɨn timuaata'ixaate'esin nyaɨjna cɨme'e ɨ pej tina'achaɨre'e paɨjna cɨme'e tɨ timuaacɨ'ɨti paj ruuri pua'ame para rusen cɨme'e. 20Ayaa nu ti'ijxe'eve'e, nye'ihuaara'a pej pi ti'itɨj cɨn naatavaɨre'en ɨ tavastara'a jemi. Pata'aj ca'anijra'a naata'an ɨ Cɨriistu'u jemi. 21Ayaa pu tina'amitejte'e tɨ ayan ti'ayajna pej peyan huarɨni a'ij nyej ti'imuahuavii. Aɨj nu cɨn ye ti'imuayu'use'e. Nu'uri ramua'aree pej peyan eitze'e rɨni a'ij nyaj cai ti'imuahuavii. 22Ajta aɨjna cɨme'e, pata'aj peyan huarɨni. Pata'aj seij rɨ'ɨ huáruuren ɨ cuaartu nyej ni nyaun huiracatii, a'ini ayaa nu rachu'eve'e tɨ Dioj naata'acare'en nyej nyajtahua'a nyaun a'atanyén mueetzi jemi aɨjna cɨme'e pej peyan raatahuaviiri'i ɨ Dioj jemi. 23Aɨ pu ajta ye muataujte'e aɨjna ɨ Epafras tɨ nyaj jamuan ye a'ityanami'i, aɨjna cɨme'e tɨ ajta ra'astijre'e ɨ Cɨriistu'u tɨ ajta i'i Jesús. 24Aɨ mu majta ye muataujte'e aɨme, aɨjna ɨ Marcos, ajta ɨ Aristarco, ajta Demas, ajta ɨ Lucas. Ai mu aɨn pueen ɨ mej nyaj jamuan ti'imuare'e. 25Ajta aɨn tavastara'a, aɨjna ɨ Jesús tɨ ajta i'i Cɨriistu'u, che'e aɨn ruxé'evi'ira'a cɨn rɨ'ɨ tyajamuaachaɨn. Yaa pu'u, che'e ayan tyaja'ure'enyen.

will be added

X\