Filipenses 4

1Ayaa pu'u, nye'ihuaamua'a ɨ nyaj amue'ixe'eve'e. Eecan nu á'amuaseijramɨ'ɨ, a'ini muan xu aɨn pueen ɨ nyaj cɨn huatantyamua'ave'e, ɨ nyaj raamue'itɨ. Sahuaujca'anyen ɨ a'amua tzajta'a sej si tyu'utyavaɨre'en sauche'e ɨ tavastara'a jemi, muan mɨ nyaj amue'ixe'eve'e. 2Nyaa nu hue'ijee amɨme, nyaɨjna ɨ Evodia, nyajta nyaɨjna ɨ Síntique, mej mi mua'atyujcɨ'ɨpiire'en mej mi ru'ihuaamua'a mua'ara'ani ɨ tavastara'a jemi. 3Pajta muaa, mɨ paj xaa nyeetzi jetze ajtyavaɨre'e, nyaa nu muahuavii ɨ paj hua'utavaɨre'en amɨme ɨ uuca, a'ini aɨ mu majta ajtyavaɨra'acaa inyeetzi jetze, tyatɨ'ɨj tihua'utá'ixaatya'acaa ɨ nyuucari tɨ cɨn Dioj tu'irajtuaani. Majta jetzen ajtyavaɨra'acaa aɨjna ɨ Clemente, majta hua'a jetze mɨ seica ɨ mej nyeetzi jetze ajtyavaɨra'acaa. Ayaa pu tye'eyu'usi'i ɨ yu'uxari jetze a'ij mej antya'aruu mej mi a'utyáuu mua'ara'ani ruurican para rusen cɨme'e ɨ Dioj jemi. 4A'anaj tɨ na'a nain xɨcaj tzajta'a, ajta nain tɨca'ari tzajta'a, sahuaujtyamua'ave'en muan ɨ tavastara'a jemi. Nyajtahua'a nu tyajamuaata'ixaate'esin yee: Sahuáujtyamua'ave'en. 5Sata'aj naimi'i seyan tiraamua'aree saj cai ti'itɨ tyaura'atya'a, silu sara'uviicue'i tyamua'a naa aɨme ɨ maj saɨque ti'imua'atze. Pu'uri ye vejli'i huatyéjvee ɨ tavastara'a. 6Caxu ti'imuajca ti'itɨj cɨme'e, silu nain xu tiraata'ixaate'en ɨ Dioj jemi a'achu tɨ caj tyajamua'aturaate'e, sata'aj raatahuavii nain cɨme'e, sajta rɨ'ɨ tiraata'an ɨ Dioj. 7Aj pu xaa Dioj amuaata'asin ɨ saj cɨn rɨ'ɨ huarɨni ɨ rutzajta'a. Capu a'atɨ ramua'aree a'ij tɨ ye'i i'i rɨ'ɨri tɨ ayan rɨ'ɨ amuaata'an ɨ rutzajta'a. Aɨ pu xaa Dioj amuaatyápua'arite'esin ɨ a'amuaxaijnyu'uca, ajta ɨ á'amuamua'atziira'a aɨjna cɨme'e ɨ saj jetzen araujca'anye ɨ Cɨriistu'u tɨ i'i Jesús. 8Sajta e'eyan, nye'ihuaamua'a, sata'aj seyan tyu'umua'ati seijna jetze ti'itɨ tɨ ayan ti'ayajna, na'ari ti'itɨ tɨ ayan raavijte'e sej si rɨ'ɨ tiraatyajtuaani nusu ti'itɨ tɨ ayan raavijte'e tɨ tiraacɨ'ɨti seij. Sajta seyan jetzen tyu'umua'ati ti'itɨ tɨ runyáta, ca'ɨn ti'itɨ tɨ naa seijre'e. Tɨ pua'a ti'itɨ ti'ixa'apɨ'ɨn na'ari ayan tiraavijte'e sej rɨ'ɨ tiraata'ixaate'en, sata'aj seijna jetze tyu'umua'ati. 9Ajta ti'itɨ nyej tyajamuaamuá'ate, nusu ti'itɨ saj ra'ancura'a nyeetzi jetze, na'ari nyej tyajámuaata'ixaa, sata'aj seyan huarɨni. Ajta aɨn ɨ Dioj pu amuaatyávaɨre'esin sej si naa rɨ'ɨ tityeetyáuuca. 10Eecan nu huatantyamua'ave'e ɨ nyavastara'a jemi, nyaɨjna cɨme'e ɨ saj sajtahua'a sana'a nya'utámua'areeri'i. Muan xu nyamua'ajcaa tzɨte'e ti'itɨ tɨ na'aturaatya'acaa. Ayaa pu'u, capu tyajamuaata'a a'ij sej ye'i tinaatyavaɨre'en. 11Canu neyan ti'ixa yee canu a'ij ti'ijviicue'i. Canu xaa nya'u. Nu'uri raarɨ'ɨre a'ij nyaj tira'aviicue'iran nyaɨjna cɨme'e a'achu nyaj caj ti'ituave. 12Nyaa nu ramua'aree a'ij nyej ye'i huarɨni tɨ pua'a nyaj cai a'ij ti'ijviicue'i nusu tɨ pua'a yee nyeti'ituaave inyaa. Nyaa nu nyeri raarɨ'ɨre nyej nain cɨn tyu'utyamue'itɨn nyaɨjna cɨme'e ɨ nyaj uxa na'ari tɨ pua'a nye'icua. Ajta tɨ pua'a ti'itɨ na'ava'aturaate'en, na'ari tɨ pua'a nyacai ti'itɨj ticha'ɨ, nyajta neyan raarɨ'ɨre nyej tyu'utyamue'itɨn. 13Nain nu cɨn tyu'utyamue'itɨn, nyaɨjna cɨme'e nyej Cɨriistu'u jetzen aranca'anye. 14Ma sajta muan, xa'apɨ'ɨn xu huarɨj saɨjna cɨme'e seyan tinaatavaɨ iiya nyaj aɨjna cɨn tí'ityesa'aca'a. 15Sajta muan, mɨ sej Filipos e'eche, xu'uri ramua'aree a'ij tɨ e'enya'a satɨ'ɨj xa'ichu'i tya'ara'aste anacaican ɨ saj cɨj rá'antzaahua ɨ nyuucari tɨ cɨme'en raxa ɨ Dioj. Nyatɨ'ɨj neri huirama'aca nyaujna Macedonia, muan xu'u naatavaɨ saɨjna cɨme'e ɨ tyej naijmi'i tyu'umuarej. Muan xu xaa tinaatapueijve inyeetzi. Sajta muan xu tya'ancura'a nyeetzi jemi. A'u tɨ na'a mu tyujsa'ɨrihua'a mɨ seica, camu a'atzu meyan huarɨj satɨj muan. 16Ajta, nyatɨ'ɨj nyaun a'utyavaaca'a aujna Tesalónica, caxu seij sana'a tinyaja'utaiti'iri'i aɨjna cɨme'e ɨ tɨ tina'aturaatya'aca'a. 17Canu xaa rahuauca saj sajtahua'a tinaata'an, silu aij nu'u huauuca ɨ tɨ tyajamuáacɨ'ɨti auúche'e. 18Nain nu neri ancura'a. Nyajta xaa nya'u eitze'e auche'e. A'ini Epafrodito ari tinaata'a a'achu saj caj tinyaja'utaiti'iri'i, eihua nu tí'ijcha'ɨ nyeri. Ɨ saj tinyaja'utaiti'iri'i, yaa pu een tɨj muaɨ'ɨvejri tɨ naa tyáará'i, tɨ naa een, tɨ ra'araanajchi ɨ Dioj. 19Ajta aɨn ɨ Dioj ɨ nyej ti'ijvaɨre'e, aɨ pu nain tyajamuaatapueijve'esin ruxé'evi'ira'a cɨme'e a'achu tɨ caj tyajamua'aturaate'e. Ayaa pu tyajamuaata'asin a'ij tɨ tiraavijte'e, a'ini aɨn pu nain tí'ijcha'ɨ jamuan aɨjna ɨ Cɨriistu'u, ɨ tɨ i'i Jesús. 20Tiche'e eecan tiraatataujtzi'ire'e ɨ Dioj, aɨjna ɨ tyaj rajya'upua. Tiche'e rɨ'ɨ tiraataxaj para rusen cɨme'e. Che'e ayajna. 21Sata'aj hua'utataujte'en nyeetzi jetze ma'acan naijmi'ica ɨ maj a'utyáuu ɨ Dioj jemi aɨjna cɨme'e tɨ aɨn Cɨriistu'u hua'a japua huanyúu. Majta ɨ nye'ihuaamua'a ɨ maj ayajna huati, aɨ mu majta huá'ataujte'e. 22Naijmi'i ɨ maj ya huati ayajna, ɨ maj ya huatyauu ɨ Dioj jemi, aɨ mu á'amuataujte'e tzɨte'e, aɨme ɨ maj hua'a jetze ajtyama'acan ɨ hua'atyaɨtestyamua'a aɨjna tɨ i'i Cesar. 23Che'e aɨn ɨ tavastara'a, aɨjna ɨ Cɨriistu'u tɨ i'i Jesús, che'e aɨn rɨ'ɨ tyajá'amuacháɨ a'ara'ani.

will be added

X\