Filipenses 3

1Pu'uri ijii, nye'ihuaamua'a, sata'aj huaujtyamua'ave'en jemin ɨ tavastara'a. Nu'uri neyan tyajamuaataiti'iri'i. Nu'uri nyajtahua'a nyana'a tyajá'amue'iti'i. Capu nya'una'aviste'e nyeetzi jemi nyej neyan rɨcɨ, a'ini aɨ pu a'amuacháɨj a'ame. 2Rɨ'ɨ xu'u muan, aɨme jemi ɨ tyetyaca ɨ mej meyan á'ujhua'an matɨj ɨ tzɨ'ɨcɨ ɨ tɨ cai a'atɨ hua'aya'amua. A'ij mu pua'a rɨcɨ aɨme ɨ tyetyaca, maj ruhue'ira'a ájtasí'iche. Tyu'ɨtziite'e, micu. 3Me tyajtá ityan, ai tu aɨn pueen ɨ tyaj tanavi a'antisi'iche tzaahuati'ira'a cɨme'e. Ajta aɨn xaijnyu'ucara'ara'an ɨ Dioj, aɨ pu xaa taata'aca tyej rɨ'ɨ tirata'acare'en ɨ Dioj. Eecan tu jetzen huatátatyamua'ave'esin ɨ Cɨriistu'u tɨ ajta i'i Jesús. Tyajta ityan, catu xaa ra'atzaahuate'e tyaɨjna cɨme'e ɨ tyaj rajtyau ɨ tatzajta'a. 4Tɨ pua'a seij ayan tira'amitejte'e tɨ ayan tiraavijte'e tɨ ra'atzaahuatya'a aɨjna ɨ tɨ tirajtyau ɨ rutzajta'an, che'e aɨn raamua'aree tɨ eitze'e ayan tiraavijte'e inyeetzi jemi. 5Tɨ'ɨj tyauma'aca arahueica xɨcaj nyej jetzen huanu'eihuaca'a, mana'antísijchaca'a ɨ nyenavi jetze. Hua'a jetze nu ajtyama'acan ɨ mej jee yaujmua'ame'en aɨjna Israel tyaacan. Nyajta i'i huaacɨxa'ara'an aɨjna ɨ Benjamín tyaacan. Hua'a jetze nu ajtyama'acan ɨ mej jee hebreo pueen. Ayaa nu huanu'eihuaca'a. Nyajta nu hua'anyuuca cɨn ti'ixaxa'a. Cɨme'en aɨjna ɨ yu'uxari tɨ ra'uteyu'uxaca'a aɨjna ɨ Moises tyaacan, nyaa nu i'i fariseeyu. 6Ayaa nu rɨ'ɨ huapɨ'ɨ tí'ityesa'aca'a nyaɨjna cɨme'e ɨ nyeye'ira. Aɨj nu cɨn a'ij pua'a tihuá'ajtya'axɨ'ɨca'a ɨ mej ra'atzaahuatya'acaa maɨjna ɨ Jesús. Nyajta, canu a'anaj ti'itɨj cɨn autyajturaa aijna cɨme'e ɨ nyej tiye'iraca'a. 7Nain a'achu tɨ caj ti'ipua'amua, eecan pu nyejetze ruxe'eva'aca'a ɨ nyej nyejmi'i tiye'iraca'a. Ajta ijii, ayaa pu tina'amitejte'e inyeetzi tɨ cai che'e ti'itɨj vaɨre'e aɨjna cɨme'e nyej nyeri ravaɨre'e nyaɨjna ɨ Cɨriistu'u. 8Ajta e'eyan, ɨ tɨ eitze'e ruxe'eve'e, a'ij tɨ ti'itɨ tinaacɨ'ɨtíiche'e, pu'uri ayan tina'amitejte'e tɨcɨn yee tyu'ɨtziite'e. Niche'e yee maruuhua'axɨn. Ai pu'u, eecan pu eitze'e tinaatyáva'ɨrihua'an nyaj raamua'ati nyaɨjna ɨ nyavastara'a aɨjna ɨ Cɨriistu'u tɨ ajta i'i Jesús. Nyaɨjna cɨme'e ɨ Cɨriistu'u, nain nu ma huahua'axɨ. Cu xuee, xaɨri pu'u pueenya'a aɨjna tɨ ajmi'i na'aránajchaca'a. Ayaa pu tina'amitejte'e ijii tɨ ayan een cɨme'e. Nyaa nu má rúuraaxɨ nyaɨjna cɨme'e nyej ni tyu'utyáamue'itɨn ɨ Cɨriistu'u jemi. 9Ayaa nu'u ti'imua'atze nyaɨjna cɨme'e, nyej ni huatyavaa na'ara'ani ɨ Cɨriistu'u jemi, nyej ni cai ti'itɨ cɨn autyaturan ɨ Dioj jemi. Canu che'e neyan ti'imua'atze yee nyaa nu rɨ'ɨ ti'itevi nyaɨjna cɨme'e nyej yee nain cɨn ra'ara'astijre a'ij tɨ tya'axa ɨ yu'uxari jetze, silu ayaa pu tira'amitejte'e ɨ Dioj ɨ nyej rɨ'ɨ ti'itevi, aɨjna cɨme'e nyaj ra'atzaahuate'e ɨ Cɨriistu'u. 10Ai pu aɨn pueen ɨ nyej raxe'eve'e nyata'aj raamua'ati nyaɨjna ɨ Cɨriistu'u, nyajta raamua'ati ɨ muare'eri'ira'a ɨ tɨ cɨn Dioj ra'ajjáj ɨ Cɨriistu'u hua'a tzajta'a ɨ mɨ'ɨchite, nyajta rajpueiitzi na'ame ɨ Cɨriistu'u jamuan, nyej ni neyan seira'a na'ara'ani tɨj aɨjna ɨ Cɨriistu'u tɨ'ɨj huamɨ'ɨ. 11Aɨj nu cɨn rachu'eve'en nyaj raata'ase ajna xɨcajra'an jetze matɨ'ɨj a'itacɨɨnye ɨ mɨ'ɨchite tɨ pua'a nyacai a'ij huarɨni inyaa. 12Caxɨɨ nu xaa nya'u raata'asaca'a nyaɨjna ɨ nyaj cai xɨ a'uta'ɨtza'ara'an; canu nyajta xɨɨ nain ra'ara'astijre. Nauche'e nu huátain nyej ni raata'ase nyaɨjna ɨ tɨ cɨme'en naata'asaca'a ɨ Cɨriistu'u tɨ i'i Jesús tɨ ij aɨn huataura'ate'en inyeetzi. 13Nye'ihuaamua'a, canu neyan tyaja'amue'ixaate'e yee nu'uri raanaijmi'ire, silu ayaa nu'u rɨcɨ: canu che'e neyan nyaɨjna cɨn ti'imua'atze yee ɨ tu'uve'etyajtɨ silu nyeti'itese'e nyej ni raata'ase ɨ ta'anajca. 14Ayaa nu een cɨn rɨcɨ, nyej ni raata'ase a'u tɨ a'utavɨɨ ɨ úmi'inari, nyej ni ti'itɨ huamué'itɨn ɨ tɨ cɨn Dioj nye'ejee u ute'e ɨ Cɨriistu'u jemi, aɨjna jemi tɨ ajta i'i Jesús. 15Naimi'i a'achu tyaj caj ti'ityapua'amua ɨ tyej teri vaujsi, tiche'e teyan che'eta tyana'a tyu'umua'ati. Na'ari cai tɨ pua'a seyan saɨque tyu'umua'ati ti'itɨj cɨme'e, tɨ cai ayan tyajámuaavijte'e, Dioj pu tyajámuaataseíjrate'esin. 16Aɨj tu'u, tiche'e teyan ra'ara'astijre'en tyaɨjna cɨme'e ɨ tyej teri raata'asaca'a. 17Nye'ihuaamua'a, sata'aj seyan ti'ityete'en nyatɨj rɨcɨ inyaa. Sajta muan, ayaa xu tyu'umua'ati saɨjna cɨme'e ɨ mej meyan rɨcɨ a'ij tyej tyajamue'ixaa. Nyajta nu xaa huányeinixɨ nyaɨjna cɨme'e ɨ nyej neri'itahua'a neyan tyaja'amue'ixaate'e. 18Rɨ'ɨ xu'u muan, a'ini mui'i nu tyajámuaata'ixaa, nyaɨjna cɨme'e ɨ nyej neri'itahua'a neyan tyajamuaata'ixaate'esin, nyajta nu nyeyéenyen huányeinixɨ'ɨsin nyaɨjna cɨme'e, ɨ maj mui'itɨ saɨque meyan ti'imua'atze. Ayaa mu rɨcɨ, cu xuee maj cu rájchaɨre'e ɨ Cɨriistu'u tɨ aɨn huamɨ'ɨ ɨ curuu jetze. 19Ayaa pu tihua'acɨ'ɨti ɨ maj ya'uraini ɨ hua'axaijnyu'uca tɨ auj ruuricaa. Ma'ahúaujpua'arixɨ'ɨsin, micu. Eitze'e pu hua'a jetze ruxe'eve'e mej eihua tyu'ucua'ani, aɨj pu cɨn hua'axaye pu pueen ɨ hua'a Dioj. Majta meyan á'ujtzaahuate'e maɨjna cɨme'e ɨ maj cɨn tyu'utatyévi'ira'ata. Ai mu'u jetze tyu'umua'ati aɨjna tɨ e'eseijre'e iiyan chaanaca japua. 20Me tyajta ityan, au tu e'ema'acan u tajapua. Tyajta eecan tu rachu'eve'e tɨ aun e'ivacaanyen aɨjna tɨ tu'irajtuaani, ɨ tavastara'a, aɨjna ɨ Jesús tɨ i'i Cɨriistu'u. 21Aɨ pu saɨque taaruuren tɨj na'a aɨn raatyahue'ira'a tɨ naa seijre'e, aɨjna ɨ rumuare'eri'ira'a cɨme'e, ɨ tɨ cɨn tyu'utyamue'itɨn naijmi'i tɨ ye seijre'e iiyan chaanaca japua, ajta naijmi'i tɨ an e'eseijre'e u tajapua.

will be added

X\