Filipenses 2

1Muan xu Cɨriistu'u jetze ruca'anye ɨ a'amua tzajta'a. Aɨ pu ajta rɨ'ɨ amuaata'aca tɨ aɨn amue'ixe'eve'e ɨ Cɨriistu'u sej si xa'apɨ'ɨn huarɨni, a'ini xu'uri ra'ancure'evi'itɨ ɨ xaijnyu'ucara'ara'an, sajta seica xu tihua'umua'atziire'e, sajta xu seica a hua'acu'uve. 2Aɨj nu cɨn a'amuahuavii saj rɨ'ɨ tinaata'an nain cɨme'e, sej si seyan ruxa'aj tyu'umua'ati naa tyamua'a naijmi'i, sej si seyan ruxa'a títyaahuaujxe'eve'en, sej si ruxa'aj tirájtyauve'en seij ajta mɨ seij, sej si muan rujɨɨmua'a raahuauni. 3Che'e cai a'atɨ rusaɨj rajtyauve'en ɨ tɨ cɨn ahuaujtzaahuate'en. Ajta che'e cai a'atɨ tyáuura'atya'a, silu che'e aɨn ayan tiraatámitejte'en tɨ eitze'e ti'ivaɨre'e ɨ saɨj cai aɨjna. 4Che'e cai a'atɨ aɨ na'a rahuauca aɨjna ɨ tɨ jetzen ruxe'eve'e rusaɨj, silu che'e ajta raatavaɨre'e ɨ saɨj aɨjna cɨme'e tɨ ajta aɨjna jetze ruxe'eve'e. 5Sata'aj seyan che'eta sana'a tyu'umua'ati a'ij tɨ tyu'umuá'a aɨjna ɨ Cɨriistu'u tɨ ajta i'i Jesús. 6Ajta aɨn ɨ Cɨriistu'u, ayaa pu i éenya'a i'i Dioj, capu ayan tira'amityejtya'aca'a tɨ ayan tityauura'atya'a tɨ ayan auche'e ruxa'a e'enye'en ɨ Dioj jemi. 7Silu aa pu ti'ityia'a ɨ ruxé'evi'ira'a cɨme'e ɨ tɨ cɨn ti'ityavaa a'araa u tajapua. Aj pu i aɨn huaseijre tɨj ɨ a'atɨ mej ti'ira'ijte'e. Ayaa pu huanu'eihuaca'a tyatɨj ityan. 8Ajta pu ayan tevi pueenya'a tyatɨj ityan. Ajta aɨn, capu va'acan cɨn ti'ityavaaca'a, silu huataura'a tɨ huamɨ'ɨni. Huamɨ'ɨ, icu, ɨ curuu jetze. 9Aɨj pu cɨn Dioj antyɨ'ɨmɨ ra'antítuaa. Aj pu i raata'a tɨ tye'entyaruti ti'itɨj cɨme'e tɨ eitze'e ve'e cai maa ti'itɨ. 10- 11Aɨj pu cɨn, ajna xɨcaajra'an jetze tɨ'ɨj tye'entipua'arite'en nain, matɨ'ɨj raamua'aree tɨcɨn: “Pu'uri tie'ijta ɨ Jesús” aj mu xaa, titunutaxɨ'ɨn naimi'i ɨ mej e'eseijre'e u tajapua, majta ɨ mej yan seijre'e iiyan chaanaca japua, majta ɨ mej e'eseijre'e u tajete, mata'aj naimi'i meyan raataxaj yee, “Ai pu tavastara'a pueen aɨjna ɨ Jesús tɨ i'i Cɨriistu'u.” Ayaa mu maɨjna cɨn huarɨn, aj mu mi rɨ'ɨ tiraata'asin ɨ Dioj ɨ tyaj rajya'upua. 12Sajta muan, mɨ nyáa amue'ixe'eve'e, a'anaj tɨ na'a nyaj a'ucatii a'amua jamuan, a'anaj tɨ na'a, ayaa xu huarɨj nyatɨj tyajamue'ixaa. Sajta ijii, nyaj ya a'ɨmɨ huataca, sata'aj seyan che'eta sana'a huarɨni. Sauche'e xu seyan rɨjca, a'ij nyaj tyaja'amue'ixaate'e. Sata'aj raanaijmi'ire'en ɨ tɨ auj tyajamua'aturaate'e a'amua tzajta'a. Rɨ'ɨ xu'u muan nain cɨme'e, sej si cai ti'itɨj cɨn auta'ɨtzen ɨ Dioj jemi. 13Ayaa pu'u, a'ini Dioj pu amuaata'aca ɨ ca'anijra'a, sej si seyan rɨjcaa ɨ tɨ í'ixa'apɨ'ɨn a'ij tɨ aɨn tira'araanajchi. Ajta aɨ pu tyajámuaatavaɨre'esin sej si raanaijmi'ire'en. 14- 15Naijmi'i tɨ na'a tɨ ayan ruxe'eve'e sej seyan huarɨni, sata'aj cai cɨme'en runyuustya'a, na'ari saj cai cɨme'en a'ij pua'a tyu'urixaatya'a tɨ'ij cai a'atɨ ti'itɨ cɨn muejmi jetze tya'upuá'ajte'en, sej si seyan ti'ityeré'enye'en ɨ a'amua tzajta'a, sej si seyan tyaɨtestyamua'ame'en éenya'a xa'aju'un ɨ Dioj, sej si cai ti'itɨj cɨn autyaturan ɨ Dioj jemi, iiyan chaanaca japua saj huapuasaaruve'en hua'a tzajta'a ɨ maj a'ij pua'a ti'ityetyaɨte, ɨ maj cai xa'apɨ'ɨn metityaumuámua'aree. Sajta hua'a tzajta'a á'ucɨɨnye sej tihua'uta'ixaate'en ɨ nyuucari tɨ cɨn Dioj taajajcuare'e ityejmi. Ayaa xu saɨjna cɨn huarɨn, muan xu huaseijre'en a eijre'e hua'a jemi ɨ tyaɨte. Xuee saj cu muan hua'atatzavi'ira aɨme. 16Aɨj nu cɨn ahuantzaahuate'esin nyajna xɨcajra'an jetze tɨ'ij ajtahua'a uve'enyén aɨjna ɨ Cɨriistu'u. Ayaa nu neyan ahuantzaahuate'esin tɨ eecan naa tinaavaɨ nyej nyaɨjna cɨn ti'ityesa'acaa, ajta ayan naa tinaavaɨ nyaɨjna cɨme'e ɨ nyej tyu'umuarej. 17Muan xu tyu'utamuaɨ'ɨvajta saɨjna cɨme'e sej ti'ivaɨre'e ɨ Cɨriistu'u jemi, sajta saɨjna cɨme'e saj ra'atzaahuate'e. Ajta, tɨ pua'a menyaje'icatan ayajna mej mi raanaijmi'ire'en ɨ saj cɨn seri seyan tyu'utamuaɨ'ɨvajtaca'a, nyauche'e nu nyetyamua'ave'e nyaɨjna cɨme'e nyaj a'atzu tyajámuaatavaɨ. Muejmi nu jetze nyetyamua'ave'e. 18Sajta muan, sata'aj seyan che'eta sana'a huaujtyamua'ave'en, sajta nyeetzi huata'an ɨ nyaj cɨn huatántyamua'ave'en. 19Ajta, tɨ pua'a ayan naata'acare'en ɨ nyavastara'a aɨjna ɨ Jesús, ayaa nu raxe'eve'e nyaj ca'anacan Timuteeyu tyu'utaiti'i muejmi jemi nyej ni huatantyamua'ave'en nyatɨ'ɨj raamua'aree a'ij tɨ tyaja'amuavaɨre'e muejmi. 20Capu maa a'atɨ ayajna tɨj amɨjna tɨ ayan che'eta na'a ti'imua'atze nyatɨj inyaa, tɨ ajta ayan rahuauca tzaahuati'ira'a cɨme'e aɨjna tɨ a'amua jetze ruxe'eve'e. 21Ma majta mɨ seica, naimi'i mu rahuauca ɨ tɨ hua'a jetze ruxe'eve'e. Camu a'atzu rahuauca ɨ tɨ jetzen ruxe'eve'e ɨ Cɨriistu'u tɨ i'i Jesús. 22Aru xu'uri muan ramua'aree tɨ aɨn Timuteeyu, pu'uri tyu'utaséijrataca'a tɨ cai auta'ɨtze a'ini pu'uri tinaatyavaɨ aɨjna cɨme'e nyej tihua'uta'ixaa ɨ nyuucari tɨ cɨme'en raxa ɨ Dioj. Eecan pu tyu'umuarej nya jamuan tɨj saɨj yaujra'an ti'imɨjhuaca jamuan ɨ taatajra'an. 23Aɨj nu cɨn nyéjxe'eve'e nyaj raataite muejmi jemi nyatɨj nyeri tiraamua'areeri'i a'ij tɨ ye'i tinaatyavaɨre'esin inyeetzi. 24Me nyajta inyaa, nyauche'e nu rachu'eve'e ɨ nyavastara'a, nyej ni nyasaɨj ca'anacan a'atanyén. 25Ajta, ayej nya'ase, ayaa pu ruxe'eve'e nyaj anacaican muejmi jemi raataite ɨ nye'ihuaara'a, aɨjna ɨ Epafrodito. Ai pu aɨn pueen ɨ saj muan nyaja'utaiti'iri'i inyeetzi jemi tɨ aɨn tinaata'an ti'itɨ tɨ na'aturaate'e. Aɨ pu tyu'umuarej nya jamuan, tyajta naijmi'i tu tyu'utyésa'aca'a. 26Eecan pu xaa á'amuaseijramɨ'ɨ. Ajta e'ij pua'a raata'a aɨjna cɨme'e ɨ sej raamua'areeri'i tɨ aɨn tijcui'inyaca'a. 27Ayej xaa nya'u ti'ayajna tɨ ti'icui'ica'a. Tɨn pu huamɨ'ɨ. Ma ajta Dioj pu rá'acu'uvajca'a aɨjna. Ajta ayan che'eta na'a ná'acu'uvajca'a inyeetzi nyej ni cai nyaxaamɨstye'eche'e. Pu'uri naacɨ'ɨ ɨ nyaj cɨn rajpueitzi na'aye'i. 28Aɨj nu cɨn nyeri eitze'e raxe'eve'e nyej raataite muejmi jemi sej si huaujtyamua'ave'en satɨ'ɨjtahua'a raaseij. Me nyajta inyaa, nyej ni cai che'e neyan ti'inyaxaamɨjtya'a. 29- 30Sata'aj ra'ancure'evi'itɨn ɨ tavastara'a jetze ma'acan. Sata'aj huaujtyamua'ave'en aɨjna jemi ɨ Epafrodito. Sajta rɨ'ɨ tihuá'ajchaɨca ɨ tyetyaca tɨj amɨjna, saɨjna cɨme'e tɨ tɨn huamɨ'ɨ tɨ ti'imuara'aca'a ɨ Cɨriistu'u jetze ma'acan. Aɨ pu ayan huataujtuaa tɨ huamɨ'ɨni tɨ'ij tinaavaɨre'en inyeetzi. Capu ayan tyajamuaacɨ́'ɨ muejmi sej si seyan huarɨni a'ini saj cai ya a'ahua'aca'a.

will be added

X\