Filipenses 1

1Inyaa, i nyej i'i Pablo, ajta aijna i Timuteeyu, ityan i tyej ravaɨre'e tyaɨjna ɨ Jesús ɨ Cɨriistu'u, ayaa tu tyajá'amuayu'use'e naijmi'ica muan mɨ sej ra'atzaahuate'e saɨjna ɨ Jesús ɨ Cɨriistu'u, majta maɨme ɨ mej tyaja'amue'ijte'e, majta maɨme ɨ mej tyaja'amuavaɨre'e ti'itɨj cɨme'e, naijmi'ica tu tyajá'amuayu'use'e mɨ sej huachaatɨme saujna Filipos. 2Che'e aɨn Dioj ɨ tɨ ta'iya'upua, ajta aɨn ɨ tavastara'a aɨjna ɨ Jesús tɨ ajta i'i Cɨriistu'u, miche'e maɨn rɨ'ɨ tyaja'amuachaɨj mua'ara'ani, miche'e majta amuaatyápua'arite'en ɨ a'amuaxaijnyu'uca jetze mɨ saj mui'i sej si xa'apɨ'ɨn ru'ihuaamua'a xa'ara'ani tyamua'a naa. 3Eecan nu nyetyamua'ave'e ɨ Dioj jemi a'anaj tɨ na'a nyej huauhuau ɨ Dioj jemi muejmi cɨme'en nyatɨ'ɨjta amua'utámua'aree. 4A'anaj tɨ na'a nyej huahuauca ɨ Dioj jemi naijmi'ica cɨme'en muan, eecan nu tí'ijtaujtzi'ire'e ɨ Dioj jemi nyatɨ'ɨjta a'amuaamua'areera. 5Ayaa nu'u caj ti'irɨcɨ inyaa aɨjna cɨme'e ɨ sej naatavaɨ tyej ti hua'uta'ixaate'en ɨ tyaɨte tyaɨjna ɨ nyuucari tɨ cɨme'en raxa ɨ Dioj. Sanaatávaɨ ɨ jajcua, sajta ijii. 6Nyaa nu nyajta ápɨ'ɨn tyajá'umua'aree tɨ aɨjna ɨ tɨ autyejche tɨ rɨ'ɨ amuaaruuren ɨ a'amua tzajta'a, aɨ pu xaa nya'u raanaijmi'ire'esin ajna xɨcajra'a jetze tɨ'ɨj ajtahua'a uvé'enyen aɨjna ɨ Jesús tɨ ajta ayan antyahuaa ɨ Cɨriistu'u. 7Ayáa pu tiraavijte'e nyej neyan ti'ihuánmua'aten muejmi cɨme'e a'ini muejmi nu a'amua jemi á'anca'anye. Tɨ pua'a neyan i'inami'ihua, na'ari tɨ pua'a nyaj aɨjna jetze huatanyuuni ɨ nyuucari tɨ aɨjna jetze raxa ɨ Dioj, na'ari neyan tiraataxaj yee tyamua'a pu i'i xa'apɨ'ɨn amɨjna i nyuucari, naimi'i tu ra'ancura'ave ɨ tyaj cɨn rajpueitzi, tyajta a'achu tɨ caj taatapueijve ɨ Dioj. 8Dioj pu ramua'aree nyaj eihua a'ij pua'a tya'anyamua'ate muejmi cɨme'e. Ayaa nu che'eta a'amua jetze ánca'anye a'ij tɨ aɨn ajta a'amua jetze á'ujca'ane aɨjna ɨ Jesús tɨ ajta i'i Cɨriistu'u. 9Ayaa nu ti'ijhuavii ɨ Dioj jemi naijmi'i cɨme'e mɨ sej ru'ihuaamua'a, sej si eitze'e huaujxe'eve'en rujɨɨmua'a tɨj na'a tɨ yu auca'itɨ a'ame, sata'aj cai ti'itɨj cɨn auta'ɨtzen, sata'aj seyan raayɨ'ɨtɨhua'an eitze'e, sata'aj nain cɨn rɨ'ɨ me tityaumuámua'aree ɨ Dioj jemi. 10Nyajta nu neyan ti'ijxe'eve'e tɨ ij ayan amuaatámitejte'en ɨ tɨ eitze'e ruxe'eve'e, tɨ ij cai ti'itɨ a'amua tzajta'a tasiseiirihua'an tɨ a'ij pua'a een, tɨ ij cai a'atɨ ti'itɨj cɨn muejmi jetze tya'upuá'ajte'en ajna xɨcajra'a jetze tɨ'ɨj yaj uvé'enyen aɨjna ɨ Cɨriistu'u ɨ tɨ Dioj an yá'ujra ɨ ɨpuari japua. 11Sata'aj seyan huarɨni ti'itɨ tɨ í'ixa'apɨ'ɨn aɨjna jemi ɨ Jesús tɨ ajta i'i Cɨriistu'u tij na'a tɨ yu á'uca'a. Aj mu mi xaa eihua rɨ'ɨ tiraata'asin ɨ Dioj. 12Casi'i, nye'ihuaamua'a, ayaa nu ti'ijxe'eve'e saj raamua'aree eijna cɨme'e, a'ij tɨ ti'itɨ naaruu, ɨ nyatɨ'ɨri tyu'utyavaɨ nyuucajtze'en ɨ Dioj mej mi eitze'e raanamua. 13Pu'uri eijre'e seijre'e nyaj nami'i nyaɨjna cɨme'e nyej ti'ivaɨre'e ɨ Cɨriistu'u jetze ma'acan. Tyamua'a mu ramua'aree aɨ́me ɨ xantaaru'u ɨ maj racha'ɨ aɨjna tɨ va'acan cɨn ti'ityejvee, majta ɨ seica. Naimi'i mu ramua'aree. 14Majta ɨ seica ɨ nye'ihuaamua'a, ɨ maj majta ti'ixa ɨ Cɨriistu'u jetze ma'acan, mu'uri aujca'anyajca'a maɨjna cɨme'e nyaj nami'i. Mu'uri ti'ixa ca'anisíj cɨme'e. Camu ti'itɨj cɨn ti'itzɨɨne'e. 15Ma majta seica meyan ti'ixa ɨ Cɨriistu'u jetze ma'acan, a'ini eihua mu chueere nyeetzi cɨme'e, mej nye'ijchaɨre'e. Majta seica meyan ti'ixa tzaahuati'ira'a cɨme'e. 16Aɨme ɨ mej ti'ixa tzaahuati'ira'a cɨme'e, ayaa mu rɨcɨ a'ini mene'ixe'eve'e. Aɨ mu ramua'aree nyaj nami'i aɨjna cɨme'e nyej nyaɨjna cɨn tí'ixajtacaa Cɨriistu'u jetze ma'acan. 17Ma majta ɨ seica, aɨ mu rujɨɨmua'a mana'a a'ij tirajtyau mej tyu'utaxaj ɨ Cɨriistu'u jetze ma'acan. Camu ti'ixa tzaahuati'ira'a cɨme'e silu ayaa mu ti'imua'atze tɨ pua'a meyan ti'ixa, aj nu ni eitze'e tirajpueitzi na'ame iiyu nyaj nami'i. 18Aru, ¿a'ini i'irɨni? Ai pu aɨn pueen ɨ tɨ eitze'e ruxe'eve'e ɨ mej ti'ixaxa'a ɨ Cɨriistu'u jetze ma'acan. Aɨj nu cɨn nyetyamua'ave'e. Capu nye jetze ruxe'eve'e a'ij mej ye'i ti'ixa, tɨ pua'a metí'ixajta huataujnyátacan cɨme'e nusu macai. Ayej ti'ayajna. Me nyajta inyaa, eitze'e nu maa nyetyamua'ave'e. 19Ayaa nu'u, nyaa nu ramua'aree tɨ xa'apɨ'ɨn tye'iráame nyeetzi jemi a'ini muan xu rahuavii ɨ Dioj jemi. Ajta aɨn ɨ xaijnyu'ucara'ara'an ɨ Cɨriistu'u, aɨ pu i ajta naatavaɨ. 20Eecan nu raachú'eve'e, ayaa nu nyajta ti'ijxe'eve'e nyej nij cai a'anaj ti'ityevi'ira'a ɨ Dioj jemi. Huapɨ'ɨ nu raxe'eve'e nyej neyan a'ahuánca'anye'en nyej neyan rɨ'ɨ tyu'utanseijrata mej mi raamua'aree ɨ nyaj Cɨriistu'u nu jetze nyaca'anye tɨ pua'a neyan ira'ateevi'in nyej i'iruuri na'ara'ani na'ari nyaj huamɨ'ɨni. 21Ayaa pu tina'amitejte'e inyeetzi, tɨ pua'a neyan ira'ateevi'in nyaj i'iruuri na'ara'ani, nain nu cɨn tyu'utyavaɨre'esin nyaɨjna jemi ɨ Cɨriistu'u. Me nyajta, tɨ pua'a nyaa huamɨ'ɨni, nyaa nu xaa tyu'utyamue'itɨ ɨ tajapua. 22Tɨ pua'a neyan ira'ateevi'in nyaj i'iruuri na'ara'ani, aj nu xaa nya'u nain ti'iseijran aɨjna cɨme'e nyej ti'imuare'e. Aj nu xaa nya'u tyu'utyamue'itɨ. Aɨj nu xaa cai mua'aree ti'itɨj tɨ eitze'e i'ixa'apɨ'ɨn, tij nyaj ira'ateevi'in nyaj ruuri nusu nyaj ca'anacan huamɨ'ɨni. 23Eecan nu ramua'areeri'ira'a i nyaxaijnyu'uca cɨme'e. Canu xaahui ramua'aree ti'itɨj tɨ eitze'e na'araanajchi. Eecan pu ayan nya'astɨ a'aye'i nyaj a'ura'ani nyata'aj a'utyaváa na'ara'ani ɨ Cɨriistu'u jemi. Eitze'e pu í'ixa'apɨ'ɨn tzɨte'e nyaj a'ura'ani. 24Ma ajta eitze'e pu a'amua jetze ruxe'eve'e nyaj ruuri na'ara'ani. 25Ayej nya'ase, ayan ti'ayajna nyaj yan huacai na'ara'ani. Ayan nu huacai na'ara'ani sej si eitze'e rá'antzaahuate'en, sej si eitze'e huaujtyamua'ave'en. 26Aɨj pu cɨn nyatɨ'ɨjtahua'a ya huacai na'ara'ani a'amua jemi, eecan xu huataujtyamua'ave'esin, sajta rɨ'ɨ tiraata'an ɨ Cɨriistu'u tɨ i'i Jesús, a'ini'i aɨ pu naatavaɨ inyeetzi. 27Ma'acui xaa, huapɨ'ɨ pu ruxe'eve'e sej seyan huarɨni a'ij tɨ tiraavijte'e, satɨj tiraanamuajri'i seijna jetze ɨ nyuucari tɨ jetzen raxa ɨ Dioj. Tɨ pua'a nyaun nya'atanyen nyej tyajamuaata'ixaate'en na'ari nyej ya'umua'ati ya'ɨmɨ, ayaa nu raxe'eve'e nyej ni raamua'aree saj sauj tya'atzaahuate'e naijmi'i. Sata'aj naijmi'i tyu'utyese'en tɨ ij cai a'atɨ a'amuamue'itɨn sej si cai che'e rá'atzaahuate'en ɨ nyuucari tɨ jetzen raxa ɨ Dioj. 28Muan xu cai seyan tihue'itzɨɨne'e setyu'utatése'e sej tihuaurixaate'en hua'a jamuan ɨ maj amuájchaɨre'e. Tɨ pua'a seyan huarɨni, aj mu xaa raamua'aree maj huatyáapua'are. Ma sajta muan, Dioj pu amue'irájtuani. 29Ayaa pu'u na'a, a'ini Dioj pu amuaata'a sej rajpueitzi xa'ara'ani Cɨriistu'u jetze ma'acan, sajta rá'antzaahuate'en. 30Ayaa tu teri taxa'a antyu'uuve tyaɨjna cɨme'e satɨj anacaican naaseij ɨ nyaj cɨn ti'ityesa'acaa, sajta sauche'e xu ranamuajran nyej ti'itese'e nyauche'e.

will be added

X\