San Mateo 9

1Aj pu i Jesús atyajraa ɨ baarcu jetze. Aj mu mi antacɨj utan pujme'en. Tɨ'ɨqui aun a'ará'a aujna chajta'a a'u tɨ e'ema'acan. 2Majta maɨn ɨ seica, aɨ mu a'atɨ ave'ere'eneijte ɨ Jesús jemi saɨj tɨ cɨyaaxara'acaa. Aɨj pu japua a'ujca'atii ɨ utaatzi aɨjna ɨ a'atɨ. Tɨ'ɨj Jesús hua'useij aɨme ɨ tyaɨte, aj pu xaa raamua'areeri'i tɨcɨn metya'atzaahuate'e aɨme. Aj pu'i ayan tiraata'ixaa aɨjna tɨ ti'icu'i tɨcɨn: ―Niyauj, uhuatya'aca'anyechi ɨ a'a tzajta'a. Pu'uri timuaatauuni'iri'i ɨ Dioj ɨ paj cɨn autyajturaa ɨ jemin. ―Ayaa pu tiraata'ixaa. 3Meenti a vejli'i muirátya'acaa seica ɨ maj tye'eyu'uxaca ɨ ruye'ira cɨme'e. Matɨ'ɨj mi meyan tyu'umuá'a ɨ rutzajta'a tɨcɨn: “Amɨ pu a'ij pua'a tirata'aca ɨ Dioj ɨ runyuuca cɨme'e.” 4Ajta Jesús, aɨ pu rusaɨj rú'umua'areeracaa a'ij mej ye'i tya'umua'atzajca'a ɨ rutzajta'a. Aj pu i ayan tihua'uta'ixaa tɨcɨn: ―¿A'ini een cɨn seyan a'ij pua'a tya'umua'atze ɨ rutzajta'a? 5¿Ti'itaani cai eitze'e muare'eri, ni nyej neyan tiraata'ixaate'en ɨ tɨ cɨyaaxara'a yee: “Pu'uri timuaatauuni'iri'i ɨ Dioj ɨ paj cɨn autyajturaa ɨ jemin”, na'ari yee: “Ajchesi, ajta anchuá mɨ a'utaatzi”? 6Aru, ayaa nu hui rɨni sej si raamua'aree ɨ nyaj nyajta ɨ tyaata'a jetze airaanye, nyaa nu xaa nyaɨjna cɨn antinmua'aree iiyan chaanaca japua nyej ni tihua'utauuni'i ɨ maj cɨn autyajturaa ɨ Dioj jemi. Aj pu i ayan tiraata'ixaa ɨ tɨ cɨyaaxara'a tɨcɨn: ―Ajchesi, tipíi mɨ a'utaatzi. Aricu a'ura'a a'u pe e'eche. 7Cɨme'en pu'u ayan tyu'utaxajtaca'a ɨ Jesús, aj pu'i ajchá aɨjna tɨ ti'icui'icaa. Tɨ'ɨj i á'uraa u ruche. 8Majta maɨn ɨ tyaɨte, matɨ'ɨj tyu'useij a'ij tɨ ti'itɨ huarɨj, eecan mu huataujtyamua'ave. Rɨ'ɨ mu tiraatajee ɨ Dioj, maɨjna cɨme'e tɨ aɨn Dioj ari raata'a aɨjna ɨ muare'eri'ira'a ɨ maj cɨn meyan rɨcɨ ɨ tyetyaca. 9Aj pu i Jesús á'uraa. Tɨ'ɨqui i a'ayee a'uré'enye tɨ'ɨj aɨn huaseij aɨjna ɨ a'atɨ, Mateo tɨ antyahuaa. Au pu huiracatii chi'ita maj tzajta'an hua'ajijva'aca'a ɨ mej ti'itɨ'ɨcɨca. Aj pu i ayan tiraata'ixaa tɨcɨn: ―Pata'aj nya jamuan á'ucha'acanye'en. Ajta e'eyan, Mateo ájche. Tɨ'ɨqui á'uraa jamuan. 10Tɨ'ɨqui ayan tyuju'urɨj matɨ'ɨj maun a'ará'a a'utɨ Mateo e'echajca'a. Tɨ'ɨj Jesús ti'icua'acaa, matɨ'ɨj mi u a'uva'aju'un eihua ɨ maj tí'itejijve'e, majta seica ɨ mej meyan che'eta mana'a a'ij pua'a ti'ityetyaɨte. Naijmi'i mu ti'icua'acaa ɨ meesa japua jamuan ɨ Jesús, majta jamuan aɨme ɨ maj á'ujhua'anya'a ɨ Jesús jamuan. 11Majta maɨn ɨ fariseos, aɨme ɨ mej eihua huapɨ'ɨ ti'ijxe'eve'e ɨ ruye'ira matɨ'ɨj meyan raaseij a'ij tɨ rɨjcaa ɨ Jesús, ayaa mu tihua'utaihua'uri'i aɨme ɨ maj jamuan á'ujhua'anya'a. Meyan tɨcɨn: ―¿A'ini een cɨn amɨn a'amua maestru pu ti'icua'aca, ajta ti'iya'aca hua'a jamuan ɨ maj hua'ajijve'e ɨ mej ti'itɨ'ɨcɨca, ajta jamuan ɨ maj cai xa'apɨ'ɨn titetyújcha'ɨ? 12Tɨ'ɨj ayan tya'unamuajri'i ɨ Jesús. Aj pu i ayan tihua'uta'ixaa tɨcɨn: ―Ayaa nu tyaja'amue'ixaate'e. Cɨme'en aɨme ɨ tyaɨte ɨ maj a'ucɨ'ɨca'a jemin tɨ ya'anaca. Capu ruxe'eve'e maj u a'uju'un ɨ maj re'en aɨjna jemi ɨ tɨ ya'anaca, silu aɨ mu xaa a'uré'eninyei ɨ tɨ ya'anaca jemi ɨ mej ti'icucui'i. 13Sericu, sata'aj tihuaujmua'aten saɨjna cɨme'e sej si yau'eitaa xa'ara'ani a'ij tɨ huataujmua'a eijna i nyuucari aɨjna cɨme'e maj raxe'eve'e mej mi á'ujcu'uvaa rujɨɨmua'a. Me nyajta, canu a'atzu raxe'eve'e mej tyu'utamuaɨ'ɨvajta. Ayaa pu che'eta na'a een inyeetzi jemi, canu nyaɨjna cɨn ye ve'eme nyaj aɨme huata'inyen ɨ tɨ ayan tihua'amityejte'e maj xa'apɨ'ɨn rɨcɨ silu aɨme ɨ maj meyan ru'umua'aree ɨ rutzajta'a ɨ maj cai xa'apɨ'ɨn rɨcɨ. 14Matɨ'ɨj mi seica ave'ere'enye. Aɨme mu aɨn pueen ɨ maj Juan jamuan á'ujhua'anya'a. Aɨ mu ave'ere'enye ɨ Jesús jemi. Matɨ'ɨj mi meyan tiraataihua'uri'i tɨcɨn: ―¿A'ini een cɨn teyan ti'ita'itzi'ive'e ityan, majta aɨme ɨ fariseos? Aru ɨ maj mueetzi jamuan á'ujhua'an, camu hui meyan rɨcɨ. 15Ayaa pu tyu'utanyu aɨjna ɨ Jesús, tɨcɨn: ―Tɨ pua'a a'atɨ huatyenyaɨche, aj pu i ru'amiincustyamua'a huata'inyesin mej mi tyu'uyesten. Aj pu i tihue'imin. ¿Ni tzaa meyan tyú'uritzi'ive'en tɨ pua'a hua'a jamuan ti'iyeste ɨ a'atɨ? Capu xaa nya'u. Ma ajta xaa, aj pu tyaja'ure'enyejsin ɨ xɨcajra'a maj jetzen ra'avi'itɨn ɨ a'atɨ. Aj mu xaa ɨ amiincustyamua'ame'en ru'ítzi'ive'en, a'ini capu che'e a'ahua'a ɨ hua'amiincu. A'ini nyauche'e nu ye huatyejvee, camu ru'itzi'ive'en ɨ nya'amiincustyamua'a. 16’Niche'e seij amuaata'ixaate'en ɨ nyuucari. Tɨ pua'a a'atɨ aɨjna cɨn ti'icu'unya'apua cɨɨxuri cɨme'e tɨ mi'ima'acan, capu ayan ti'ijcu'unya'apuan aɨjna cɨme'e ɨ cɨɨxuri tɨ cai xɨ a'anaj á'usini'i. Na'ari cai, huatyatzu'uta pu a'ame aɨjna ɨ cɨɨxuri tɨ jajcua tɨ'ɨj huatyaja'usini'ihua. Ra'atyásujtza'anaxɨ'ɨsin ɨ tɨ mi'ima'acan. Aj pu i ɨ tɨ anásujtza'ani, eitze'e pu va'atɨ a'ame. 17Ajta, camu meyan raruure mej ru'ucajtu'ani navij limeetajra'a tzajta'a tɨ racue'iríihuajmee ɨ viinu ɨ maj mauchan raataahuaca'a. Tɨ pua'a meyan raaruuren, aɨjna ɨ viinu tɨ jajcua, aɨ pu rajtyásujtza'ana ɨ navij tɨ racue'iríihuajmee. Tɨ'ɨqui a'uváɨjtzi ɨ navij, ajta ɨ viinu. Aɨj pu cɨn ayan ruxe'eve'e tɨ iru'ucajtu'ani navij tzajta'a tɨ jajcua aɨjna ɨ viinu tɨ ajta jajcua. Ayaa pu eenye'eque'en tya'utaviicue'ira ɨ tɨ ruxa'aj ti'ijájcua. Aɨ pu aɨjna cɨn tye'eviicue'i ɨ tɨ hua'apua. 18Auche'e pu tihue'ixaatya'acaa tɨ'ɨj seij ave'ere'enye, tɨ ti'ijta u hua'a teyujta'a. Aj pu i titunutaca'a jemin aɨjna ɨ Jesús. Ayaa pu tiraata'ixaa tɨcɨn: ―Niyauj pu hui a'ame'ere. Mu a'uta'iyi'i pata'aj ra'ajtamuare'en, tɨ i aɨn auj ruuri a'ara'ani. 19Jesús pu ájche. Tɨ'ɨqui aun ya'ume jamuan aɨjna ɨ ya'upuaara'an aɨjna tɨ a'ame'ere. Majta mu a'uju'un aɨme ɨ maj Jesús jamuan á'ujhua'anya'a. 20Meenti aɨn jɨita'a aun a'utyavaaca'a tɨ ari ayan a'atyee tɨ ti'icu'i a'achu cumu tamuaamuata'a ninye'ira'a japuan hua'apua. Tɨ'ɨj pɨ na'a pu uva'axujxu'ure. Aɨ pu ave'ere'enye ɨ Jesús jemi. Aj pu i ra'ajtamuárej tɨj na'a tya'uvíjpi'i ɨ cɨɨxura'ara'an jetze. 21Aɨj pu cɨn ayan huarɨj, a'ini rusaɨj pu ayan tyu'umuá'a tɨcɨn: “Tɨ pua'a aɨ na'a caj tyajtamuare'en tɨj na'a tya'uvíjpi'i ɨ cɨɨxura'ara'an jetze, aj nu xaa rujni.” 22Aj pu i Jesús pɨ a'ure'eve tɨ'i raaseij ɨ jɨita'a. Aj pu i ayan tiraata'ixaa tɨcɨn: ―Niyauj, huatya'aca'anye mua'a tzajta'a. Petya'atzaahuatye'e nyej timuaahuaate'enche'e. Aɨj paj cɨn peri huaruj. Cɨme'en pu'u ayan tyu'utaxajtaca'a, aj pu i huaruj aɨjna ɨ jɨita'a. 23Tɨ'ɨqui aun a'ará'a a'u tɨ e'eche ɨ ya'upuaara'an ɨ tɨ á'ame'erajcaa. Tɨ'ɨj utyajrupi u chi'ita, aj pu i hua'useij ɨ tyaɨte, aɨme ɨ mej ti'icɨ'ɨsite'e jamuan ɨ seica ɨ maj jeihua ruyein. 24Aj pu i ayan tihua'uta'ixaa tɨcɨn: ―Sericu, xu'irácɨɨnye muan, a'ini capu mɨ'ɨchi mɨ tyamueij, silu cutzu pu'u. Ma majta, aɨ mu raatya'atzájraa maɨjna cɨme'e a'ij tɨ tyu'utaxajtaca'a. 25Aj pu i Jesús huare'ityaca'a a pua'aque. Au pu utyajrupi a'u tɨ aucá'a aɨjna ɨ tyamueij. Aj pu i ra'ajví'i muajca'ara'ara'an jetze. Ajta aɨn ɨ tyamueij, tɨ'ɨqui aɨn ájche. 26Tɨ'ɨqui nainjapua a'u tɨ na'a maj a'uchaatɨma'acaa, naimi'i mu raamua'areeri'i a'ij tɨ ti'itɨ huarɨj. 27Tɨ'ɨj Jesús aun a'arajraa, ma hua'apua mu raatavén ɨ maj aracúcu'unijma'acaa, mua'antijíihua. Meyan tɨcɨn: ―Muaa paj i'i yaujra'an aɨjna ɨ David tyaacan, tá'ancu'uvajxɨ'ɨ. 28Tɨ'ɨj Jesús utyajrupi u chi'ita, aj mu mi ave'ere'enye ɨ jemin. Aj pu i ayan tihua'utaihua'uri'i tɨcɨn: ―¿Ni seyan na'antzaahuate'esin nyej tyajamuaahuaate'en? Matɨ'ɨj mi meyan tɨcɨn: ―Ai nya'u tyacai, tavastara'a. 29Aj pu i hua'arámuara'axɨ ɨ huá'a jɨ'ɨ jetze. Ayaa pu tihua'uta'ixaa tɨcɨn: ―Aɨjna cɨme'e saj tya'antzaahuate'e, ayaa pu te'eme. Xu'uri huaruj. 30Cɨme'en pu'u ayan tyu'utaxajtaca'a, aj mu mi man unyéjnye'eraca'a aɨme ɨ maj hua'apua. Eihua pu tihueijca aɨjna ɨ Jesús maj nu'u cai a'atɨ ixaatya'a. 31Ma majta, matɨ'ɨj a'ucɨj, aj mu mi autyajhuii mej meyan raataxaj me eijre'e nainjapua a'ij tɨ Jesús hua'uruu. 32Matɨ'ɨj huiiraju'uncaa u chi'ita, seica mu tɨ ti'icui'i a ye'iré'enejti'ire. Capu tya'anrɨ'ɨrajcaa aɨjna ɨ a'atɨ. 33Aj pu i Jesús raatamuari ɨ tiyaaru'u tɨ tzajta'an seijra'acaa. Ajta e'eyan autyejche tɨ tyu'utaxaj aɨjna tɨ ti'icui'ica'a. Majta maɨn ɨ tyaɨte, eihua mu huataujtyamua'ave. Meyan tɨcɨn: ―Ee xaa nya'u. Catu a'anaj ti'itɨ teyan tyu'uséij tɨj na'a iiyan huatyacá'a Israel, tyatɨj tauchan teri tyu'useij ijii tɨ a'atɨ ayan raayɨ'ɨtɨ. 34Ma majta aɨme ɨ fariseos, ayaa mu tyu'utaxajtaca'a tɨcɨn: ―Aɨjna ɨ Jesús, aɨ pu aɨjna jetze araujca'anye tɨ tihue'ijte'e ɨ tiyaaru'use tɨ'ij ayan hua'utamuarite'en ɨ tiyaaru'use ɨ maj tyaɨte tzajta'a seijre'e. 35Nain japua pu á'ucha'acanya'a ɨ Jesús a'u tɨ na'a maj a'uchaatɨma'acaa, chajta'a, tɨ vivéjmee nusu tɨ cɨle'enyejmee. Tihua'amua'atyahua'a pu a'aye'i hua'a teyujta'a aɨjna cɨme'e ɨ nyuucari tɨ cɨme'en raxa ɨ Dioj tɨ nainjapua tie'ijta. Ajta naijmi'ica pu tyu'uhuaa, nain ɨ maj cɨn ti'icui'icaa nusu ɨ tɨ cai huá'aca'anisti'iraca'a. 36Tɨ'ɨj aɨme huaseij ɨ tyaɨte, eecan pu huataujxaamɨjte hua'a jemi a'ini eihua mu huamue'itɨche maɨjna cɨme'e ɨ mej rajpueijtzica'a. Majta ruxaamɨjte. Ayaa mu éenya'a tɨj canya'axɨ ɨ maj cai a'atɨ huá'acujta'a á'ucha'acanya'a. 37Aj pu i Jesús ayan tihua'uta'ixaa aɨme ɨ maj jamuan á'ujhua'anya'a tɨcɨn: ―Ee xaa nya'u, ayej ti'ayajna, mu'uri mui'itɨ ɨ mej meri rɨ'ɨ huaujruu tɨ Dioj tihua'utaijte'en. Ma ajta, ɨ maj ti'imɨjhuaca hua'a cɨme'en, camu mui'i. 38Aɨj pu cɨn, ayaa pu tyu'ujxe'eve'e. Sata'aj seyan ti'ijhuaviira saɨjna ɨ tavastara'a tɨ ayan hua'uruuren mej mi tyaɨtestyamua'ame'en pueenye'en mua'ara'ani, tɨ i aɨn tavastara'a hua'ure'itixɨ'ɨn ɨ mej ti'imɨjhuaca mej mi hua'ajsaɨre'en ɨ Dioj jemi.

will be added

X\