San Mateo 7

1’Caxu cha'a sana'a seica jetze tí'ipua'ajtya'a ɨ seij tɨ i cai Dioj ayan muejmi jetze tya'ujpuá'ajte'en ca'anin cɨme'e. 2Ayaa pu'u, satɨ'ɨj seyan ti'ijxajtzi'ira ɨ ruxa'a tevi, ayaa pu che'eta na'a Dioj muejmi tyajámuaaxájtzi'i. A'achu saj caj tiraata'an ɨ seij, ayan che'eta na'a tyajamuáacɨ'ɨti. 3¿A'ini een cɨn seyan rasise'ij a'amue'ihuaara'a ɨ tɨ'ɨri cɨle'en cɨn tya'utyajturaa ɨ Dioj jemi? Ma sajta muan caxu rusise'ij ɨ saj va'acan cɨn autyajturaa jemin ɨ Dioj. 4Ajta, tɨ pua'a peri va'acan cɨn autyajturaa ɨ Dioj jemi, ¿a'ini ti'irɨ'ɨri pej peyan tiraata'ixaate'en pamɨjna tɨ cɨle'en cɨn autyajturaa a'ij tɨ ti'itɨj cɨn tya'utyajturaa? 5Muaa, ɨ paj cai peyan metyáumua'aree, pauj mi'i nain cɨn tyu'utyetzaahuate'en aɨme jemi ɨ paj cɨn autyajturaa. Aj pu xaa raavíitya'a a'ame pej peyan tiraata'ixaate'en ɨ seij a'ij tɨ ti'itɨj cɨn tya'utyajturaa. 6’Caxu seyan tihue'ixaatya'a ɨ nyuucari tɨ cɨme'en raxa ɨ Dioj hua'a tzajta'a aɨme ɨ maj tyu'uxana'avijte'e mej mi cai amuá'amuaxaahuari'ira matɨj ɨ tzɨ'ɨcɨ mej tyu'uche'evaca. Ajta caxu seyan tihué'ijcatya'a ɨ tɨ Dioj jemi e'ema'acan aɨme ɨ maj cai ti'ityevi'ira'a. Na'ari cai, ayaa mu rɨni matɨj ɨ tuiixu ɨ xarij tzajta'a a'utɨ a'ajmuaa. A'ij mu pua'a tyajamuaataxajta tyaja'amue'ixaate'esin, majamuajcháɨra'a mu mua'aju'un huapɨ'ɨ. 7’Sata'aj seyan sauj rahuauca ɨ Dioj jemi, a'ini aɨ pu tyajamuaata'asin. Tɨ pua'a seyan rahuauca ɨ jemin, aj xu xaa raatyauuni jemin ɨ Dioj. Sauche'e sajta tye'ejtyatu'axa'an ɨ pueerta jetze. Dioj pu xaa tya'antacuuna, aamuata'asin ɨ saj cɨme'en rahuavii. 8Ayaa pu te'eme a'ini tɨ pua'a a'atɨ ayan ti'ijhuauca, aɨ pu ajta ra'ancura'asin. Tɨ pua'a a'atɨ ti'itɨj huauuca, aɨ pu raatyauuni. Ajta tɨ pua'a a'atɨ ayan tye'ejtyátu'asixɨ'ɨn ta'apueerta, Dioj pu xaa tya'antacuuna. 9’¿A'ini tyajamua'amitejte'e muejmi? Tɨ pua'a mua'ayauj ayan ti'imuahuaviira ɨ pan paj raataɨ'ɨte'en, ¿ni amɨ tetej paraatátɨstejsin? Capaj xaa nya'u tetej raatátɨstejsin silu pan paj raataɨ'ɨte'esin. 10Na'ari, tɨ pua'a ayan ti'imuahuaviira paj hue'ité raata'an, ¿ni qui peyan cu'ucu'u paraatapijte'esin? Capaj xaa nya'u cu'ucu'u raatapijte'esin silu hue'ité paj raata'asin. 11Ee sein, ayej ti'ayajna, muan xu cai uraré'en ɨ a'amua tzajta'a. Ma sajta muan, sauche'e xu ramua'aree a'ij sej ye'i huarɨni sej si hua'utapueijve'en ɨ a'amuayaujmua'a ti'itɨ tɨ i'ire'en. Ajta ɨ a'amue'iya'upua, eihua pu eitze'e hua'uta'asin ɨ tɨ ti'ire'en aɨme ɨ maj rahuavíira mua'aju'un. 12’Aɨj xu cɨn seyan huarɨni nain cɨme'e. Sata'aj seyan che'eta sana'a hua'aruuren ɨ ruxa'aj tyaɨte a'ij sej ti'ijxe'eve'e mej meyan amuaaruuren muejmi. Ayaa pu huataujmua'a nain tɨ tye'eyu'usi'i ɨ yu'uxari jetze Moisés tɨ ra'uyu'uxaca'a, ajta ɨ seica jetze ɨ maj ra'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan. 13’Sej si a'ara'asti au tɨ Dioj e'eseijre'e, ayaa xu huarɨni. Aun xu a'utyarute ɨ pueerta jetze tɨ cɨj antyéeyauj. Ee xaa, seij pu seijre'e ɨ pueerta tɨ antyéeyauj. Au pu pujme'en e'entyéninye'i ɨ juye tɨ ajta a'uyauj. Mui'itɨ mu maun a'utyaru'ipi, majta aɨj mu japuan cɨɨnye ɨ juye tɨ a'uyauj. Matɨ'ɨj maun a'uré'enyen a'u tɨ aupuá'ari, naimi'i mu huaujpua'arixɨ'ɨsin micu. Meyá'ujɨsin ɨ ruxaijnyu'uca tɨ auj ruuricaa. 14Ma ajta ɨ saɨj ɨ pueerta, aɨ pu hui cɨj antyéeyauj, ajta aɨn ɨ juye tɨ aun antyeninye'i, cɨj pu a'uyauj. Ajta eecan pu muare'eri tɨ a'atɨ japuan huame'en tɨ ij aun a'ara'asti Dioj tɨ e'eseijre'e tɨ ij ruurican a'utyaváa a'ara'ani Dioj jemi. Ajta, camu mui'i ɨ mej meyan tiraatyauuni. 15’Rɨ'ɨ xu'u muan hua'a jemi ɨ mej ti'ihue'itaca. Ayaa mu ti'ixaxa'a tɨcɨn: “Dioj jetze ma'acan tu ti'ixaxa'a.” Ma mu ve'ere'enye ma mua'ajcánta. Ayaa mu á'ujhua'an a'amua tzajta'a. Cu xuee ma cai ti'itɨj a'ij ruure. Ma ajta, capu ayan ti'ayajna. Ayaa mu e'en tzaahuati'ira'a cɨme'e matɨj ɨ jɨɨra'avete ɨ maj ti'ityacui'ica. Eecan mu tihua'ari'iraca ɨ tyaɨte ɨ tihuá'a. Majta huá'acuanamuáj. 16Rɨ'ɨri sej si seyan tihuá'umua'ati saɨjna cɨme'e a'ij mej ye'i rɨcɨ. Ayaa xu che'eta sana'a tihuá'umua'ati satɨj ti'ijmua'ate seij ɨ cɨye tɨ pua'a cai re'enye'en taca'a. Casi'i, jetzen aɨjna ɨ tɨ tyetzicare'e, capu aɨjna jetze taaca ɨ uuva, capu ajta aɨjna jetze taca'a ɨ huarej, jetzen aɨjna ɨ itzíjca'ixa'a. 17Ayaa pu ti'en, nain ɨ cɨye tɨ ti'ire'en, re'enye'en pu ti'itaca'a. Ajta, nain ɨ cɨye tɨ cai ti'ire'en, capu ajta re'enye'en ti'itaca'a. 18Capu a'atzu a'ij ti'irɨ'ɨri tɨ aɨn cɨye tɨ ti'ire'en, ayan taca'a aɨjna tɨ cai re'en. Ajta, cɨme'en aɨjna ɨ cɨye tɨ cai re'en, capu ajta irɨ'ɨri tɨ re'enye'en tyu'utáca'an. 19Ma ajta aɨme ɨ tyaɨte, ayaa mu e'en tɨj ɨ cɨye tɨ cai ti'ire'en. Dioj pu ayan che'eta na'a hua'aruuren matɨj ɨ tyaɨte meyan ti'iruure ɨ cɨye tɨ cai re'en. Aɨ mu tyé'ijveichixɨ'ɨsin, majta ra'antyataira. 20Aɨj nu cɨn neyan tyaja'amue'ixaate'e tɨcɨn: Ayaa xu eenye'eque'en huá'umua'ati saɨjna cɨme'e a'ij mej ye'i rɨcɨ. 21’Ma majta maɨn ɨ mej meyan ti'inyejee tɨcɨn: “Nyavastara'a, casi'i nyavastara'a”, camu naimi'i maun a'utyaruti a'u tɨ teje'ijta ɨ Dioj. Ai mu'u maun a'utyaruti ɨ mej meyan rɨcɨ a'ij tɨ ti'ijxe'eve'e ɨ Dioj. 22Ayaa pu te'eme ajna xɨcajra'a jetze tɨ'ɨj Dioj ayan hua'axɨjte'en ɨ tyaɨte. Mui'itɨ mu meyan tinaatá'ixaate'esin maɨjna cɨme'e yee: “Nyavastara'a, casi'i nyavastara'a, tyan tu tyu'utaxajtaca'a anyuucajtze'en tyatɨ'ɨj auj ruuricaa. Tyajta anyuucajtze'en cɨn hua'utamuari ɨ tiyaaru'u maj hua'a tzajta'an seijra'acaa. Ayaa tu che'eta tyana'a, eihua tyu'umuarej tyaɨjna cɨme'e tyaj mueetzi jetzen arátaca'anyajca'a.” 23Me nyajta inyaa, ayaa nu hui tihua'uta'ixaate'esin tɨcɨn: “Canu a'anaj amuaamuá'a a'atyaɨnni saj pueen. Caxu a'atzu nyetyaɨtestyamua'a pueen. Sericu, saj huii iiyacui inye jemi, mɨ sej a'ij pua'a rɨcɨ.” 24’Aɨj pu cɨn, a'atɨ tɨ na'a tɨ ayan nyanamua, ajta tɨ ayan ra'ara'astijre'e a'ij nyej ti'ixaxa'a, ayaa pu hui che'eta na'a me tyauumua'aree tɨj aɨjna ɨ a'atɨ tɨ huataujchi'ite tetyá japua. 25Aj mu mi huatyeviiyaca'a. Ajta cámɨ'ɨyixɨ ɨ jaj. Ajta huata'aacaraca'a. Ajta aɨn ɨ chi'ira'an, capu a'ave a'ini tetej japua pu rá'ajtaahuaca'a. 26Ma ajta, aɨjna ɨ a'atɨ tɨ ayan nyanamua, ajta capu ayan ra'ara'astijre'e a'ij nyej ti'ixaxa'a, ayaa pu che'eta na'a een tɨj aɨjna ɨ a'atɨ tɨ cai ti'itɨj mua'aree. Aɨjna ɨ a'atɨ huataujchi'ite a'u tɨ á'usaata'a. 27Aj mu mi huatyeviiyaca'a. Ajta cámɨ'ɨyixɨ ɨ jaj. Ajta huata'aacaraca'a. Ca'anacan pu a'ave ɨ chi'ira'an. Eecan pu ya'urai aɨjna ɨ a'atɨ tɨ huataujchi'ite a'u tɨ á'usaata'a. Ayaa pu che'eta na'a ti'ijruuren ɨ a'atɨ tɨ cai ra'ara'astijre'e aij nyej ti'ixaxa'a. ―Ayaa pu tihua'uta'ixaa aɨjna ɨ Jesús. 28Tɨ'ɨj Jesús ra'antipua'ari tɨ tihua'uta'ixaa, eihua mu huajɨ́jxɨca'a maɨjna cɨme'e a'ij tɨ tihua'umuá'ate. 29Capu cha'a na'a tihua'umuá'ate matɨj ɨ seica ɨ mej tihua'amua'atyahua'a ɨ yu'uxari jetze, silu ayaa pu'u cumu seij tɨ ti'ityejvee ti'itɨj cɨme'e tɨ ve'e.

will be added

X\