San Mateo 6

1’Rɨ'ɨ xu'u muan saj cai seyan huarɨni ɨ tɨ xa'apɨ'ɨn een me eijre'e hua'a tzajta'a ɨ tyaɨte mej mi amuaaseij. Tɨ pua'a seyan sana'a rɨjca, capu ti'itɨ tyajamuaacɨ'ɨti aɨjna jemi ɨ saj rajya'upua tɨ aɨn tyajámuaatapueijve'en. 2Aɨj pu cɨn, satɨ'ɨj tihua'apueijve'e aɨme ɨ maj cai a'ij ti'ijviicue'i, caxu raxajta me eijre'e yee ayaa tu huarɨj. Ayaa mu xaa rɨcɨ seica ɨ ruteyujta'a, majta caaye jetze aɨme ɨ mej ra'ara'astijre'e hua'aye'ira eijre'ecɨtze'e. Aɨ mu meyan rɨcɨ mej mi aɨn tyaɨte rɨ'ɨ tihua'uta'ixaate'en. Ayaa nu tyaja'amue'ixaate'e tɨcɨn aɨ mu meri nain huamue'itɨ maɨjna cɨme'e ɨ maj tyaɨte rɨ'ɨ tyu'uta'ixaa. 3Ma pajta muaa, tɨ pua'a ti'itɨ paraatapueijve'en ɨ tɨ cai a'ij ti'ijviicue'i, ayaa paj huarɨni tɨ ij cai a'atɨ raamua'aree. 4Ayaa paj huarɨni, tɨ pua'a petyu'utapueijve'en aviitzi cɨme'e, aj pu xaa, aɨn ɨ paj rajya'upua, aɨ pu raseij ɨ tɨ ru'avaa. Ajta, aɨ pu timuaata'asin aɨjna ɨ paj raamue'itɨ. 5’Ajta, satɨ'ɨj muan tényuusime'en ɨ Dioj jemi, caxu seyan eijre'ecɨtze'e rɨjca matɨj ɨ seica ɨ maj nu'u ra'ara'astijre'e hua'aye'ira ɨ mej meyan ti'ijrɨ'ɨre. Tihua'araanajchi mej utyaru'ipi u teyujta'a maj huatyejnyuuni ɨ Dioj jemi, na'ari ɨ mej meyan ajcaacɨ'ɨca aujna caaye jetze mej mi seica hua'useij. Ayaa nu tyaja'amue'ixaate'e tzaahuati'ira'a cɨme'e, amɨ mu'u huamue'itɨ, xaa nya'u. 6Ma pajta muaa, patɨ'ɨj tényuusime'en ɨ Dioj jemi, pauj mi'i utyárutyén aujna a'achi'ita. Pajta te'ityaanan ɨ pueerta cɨme'e. Aj paj xaa pi huatyejnyuuni aɨjna jemi ɨ paj rajya'upua ɨ tɨ cai seijre'e. Ajta e'eyan aɨjna ɨ paj rajya'upua ɨ tɨ ti'ijsise'i aɨj tɨ a'aruuri'ihuaca'a aviitzi cɨme'e, aɨ pu hui muaata'asin ɨ paj raamue'itɨ. 7’Ajta, patɨ'ɨj tényuusime'en ɨ Dioj jemi, capej peyan a'ateevi'in paj tényuusime'en ɨ nyuucari cɨme'e tɨ cai a'ij huataujmua'a. Ayaa mu xaa rɨcɨ aɨme ɨ maj cai ramua'ate ɨ Dioj. Ayaa pu tihua'amityejte'e tɨ Dioj ayan hua'unamua tɨ pua'a meyan a'ateevi'in maj tényuusime'en. 8Caxu seyan che'eta sana'a rɨjca matɨj aɨme, a'ini ayaa pu i een cɨn sacai xɨ huatyenyuu jemin ɨ saj rajya'upua, aɨ pu ari ru'umua'aree ti'itɨj tɨ a'ij tyajamua'aturaate'e. 9Ayaa xu si ti'ijhuaviira. Seyan tɨcɨn: Muaa, ɨ paj ta'iya'upua, au paj e'eseijre'e u tajapua, miche'e rɨ'ɨ yá'unamuajra a'ij paj antyahuaa. 10Che'e tyaja'ure'enyen ajna xɨcajra'a jetze patɨ'ɨj nain japua tyu'utaijta iiyan chaanaca japua. Miche'e ra'ara'astijre'en a'ij pej ti'ijxe'eve'e iiyan chaanaca japua matɨj meyan che'eta mana'a ra'ara'astijre'en u tajapua. 11Pata'aj pajta taata'an ɨ tɨ ti'icue'iri'i ɨ tɨ ruxe'eve'e nain xɨcaj tzajta'a. 12Titaatauuni'iri'i ɨ tyaj cɨn autyajturaa mueetzi jemi a'ini ayaa tu che'eta tyana'a rɨ'ɨ tihua'utauuni'ira aɨme ɨ maj autyajturaa ityejmi jemi. 13Pajta, capej peyan titaata'acare'en ti ayan titáacɨ'ɨti ɨ tyaj cɨme'en cai ra'aviicue'i silu pata'aj peyan tajapua huanyuuni tɨ ij cai taatyáamue'itɨn aɨjna tɨ a'ij pua'a een. Ayaa tu ti'imuahuavii a'ini muaa pa tie'ijta nainjapua, muaa paj antiá'amua'aree nain cɨme'e, miche'e naimi'i rɨ'ɨ timuaatatyamua'aviste'en para rusen cɨme'e. 14’Aɨj nu cɨn neyan ti'imue'ixaate'e. Tɨ pua'a seyan tihua'utauuni'i ɨ tyaɨte ɨ maj cɨn autyajturaa muejmi jemi, aɨ pu ajta tyajamuaatauuni'ira muejmi aɨjna ɨ saj rajya'upua tɨ aun e'eseijre'e u tajapua. 15Ma ajta, tɨ pua'a sacai seyan tihua'utauuni'i ɨ tyaɨtye ɨ maj cɨn autyajturaa muejmi jemi, aɨjna ɨ saj rajya'upua, capu ajta tyajamuaatauuni'ira muejmi ɨ saj cɨn autyajturaa ɨ jemin. 16’Tɨ pua'a sauritzi'iva'a, caxu seyan acáujtzaahuatya'a a'amuanyeerime jetze matɨj aɨme ɨ seica ɨ mej meyan rɨcɨ eijre'ecɨtze'e. Aɨme ɨ tyaɨtejra'a, ayaa mu acaujtzaahuate'e ɨ hua'anyeerime jetze mej mi seica tyaɨte raamua'aree yee mej ru'itzi'ive'e. 17- 18Ayaa nu tyaja'amue'ixaate'e tzaahuati'ira'a cɨme'e. Mu'uri maɨjna cɨme'en raamue'itɨ nain ɨ tɨ tihua'acɨ'ɨti. Ma pajta muaa, patɨ'ɨj á'itzi'iva'a, pata'aj acáɨsta'amitye'en, pajta tya'ava'ahuaate'en á'amuutze'e aseiiti cɨme'e, mej mi cai raamua'aree ɨ tyaɨte yee pé'itzi'ive'e. Aɨ pu'u a'aya'upua ɨ paj cai rasise'ij, aɨ pu ramua'aree. Ajta aɨjna ɨ a'aya'upua tɨ́ rasise'ij ɨ tɨ ru'avaa, aɨ pu muaata'asin ɨ paj raamue'itɨ. 19’Caxu seyan tya'usaɨra'a u á'amuachi'ita eihua ɨ tɨ huapɨ'ɨ ti'inajchi sej si saun tya'urájchaɨca. Tɨ pua'a seyan huarɨni, aj mu mi tyajcuási raatéte'enyaxɨ'ɨsin ɨ caanari. Ajta ɨ tyapuusti'i, tyamua'a pu tyu'utyaujchuitaamua'asin. Majta aɨme ɨ nahua'ari, au mu utyaruti ca'anyejri cɨme'e. Matɨ'ɨj mi tyá'unahua'an. 20Ma sajta muan, sata'aj tya'uhuásaɨre'en u tajapua eihua ɨ tɨ huapɨ'ɨ ruxe'eve'e ɨ Dioj jemi. Capu ti'itɨ ruchuitáamua'aca aujna, capu ajta ti'itɨ a'uvaɨjtzi. Camu majta utyaru'ipi ɨ nahua'ari maujna. 21Ayaa pu te'eme: ti'itɨ tɨ na'a tɨ muejmi tyajá'amua'a, tɨ eitze'e timuaatyava'ɨri, muan xu tyu'umua'atzíitya'a xa'aju'un saɨjna cɨme'e. 22’Ajta hui, amɨjna mɨ mua'ajɨ'ɨ, ai pu aɨn pueen ɨ paj cɨn a'ucha'acan. Tɨ pua'a re'enye'en pua'ajjɨ'ɨsíjme'eni, tyamua'a paj naa me tyaunyee. 23Ma ajta, tɨ pua'a cai ti'itɨ vaɨre'e mua'a jɨ'ɨ, ayaa pu hue'en cumu tɨj huatɨca'a. Ajta mua'axaijnyu'uca, tɨ pua'a peyan rɨ'ɨ raatyá'avaa, ayaa pu che'eta na'a ti'ivaɨre'e ɨ paj cɨn huáye'iven hua'a tzajta'a ɨ tyaɨte. Ajta tɨ pua'a peyan cai rɨ'ɨ tiraatyá'avaa ɨ mua'axaijnyu'uca tɨ ij cai che'e mua'ayee mu á'uvi'itɨjcare'en, ¿ni cai ayan tye'iráame cumu tɨj huatɨca'a? Capu a'atzu huanyeeri'i. 24’Capu a'atɨ raayɨ'ɨtɨ tɨ hua'apuaca jemi tyu'utyavaɨre'en. Tɨ pua'a tyu'utatese'en tɨ ayan huarɨni, seij pu ticháɨra'a a'ame tɨ ti'ira'ijte'e, ajta ɨ seij, aɨ pu raxe'eva'a a'ame tɨ tiraatáijte'e. Na'ari cai, nain pu cɨn tiraatyavaɨre'esin ɨ seij, ajta aɨ pu cai ra'ara'astijre'e ɨ saɨj tɨ ti'ira'ijte'e. Cɨme'en aɨjna ɨ Dioj, ajta cɨme'en aɨjna ɨ tumin, capu a'atɨ ayan raayɨ'ɨtɨ tɨ tyu'utaijti'ire'en ruxa'aj na'a aɨme jemi ɨ maj hua'apua. 25’Aɨj nu cɨn neyan tyaja'amue'ixaate'e cɨme'en aɨjna yee: Caxu saɨjna cɨn ti'imuajca yee: “¿A'iqui tyeti'icua'ani?”, nusu yee: “¿A'iqui tyetí'ityeye'en?”, na'ari yee: “¿Ti'itaqui cɨn tyetyu'utátachejte'esin?” ¿Ni cai eitze'e ruxe'eve'e ɨ Dioj jemi saj ruuri xa'ara'ani, cai ɨ cue'ira? ¿Ni cai ayan che'eta na'a eitze'e ruxe'eve'e ɨ Dioj jemi a'amuahue'ira'a tɨ ruuri, cai ɨ saj cɨn tyu'utyaujchejte'en? A ni'ijta nya'u. 26Casi'i, hui sahua'uséij mɨ pina'ase ɨ maj ute'e rá'ara'a. Camu a'atzu ti'ihuastya, camu majta ti'itza'anaca, camu majta rasa'ɨri ɨ imue'eri ɨ ruchi'ita. Ma ajta, aɨ pu tihua'ami'icuaca aɨjna ɨ a'amuaya'upua aun tɨ e'eseijre'e u tajapua. Ajta eihua xu eitze'e jetzen ruxe'eve'e macai aɨme mɨ pina'ase. Aɨ pu rɨ'ɨ tyajá'amuacháɨ a'ame. 27Capu a'atzu ti'ivaɨre'e tɨ a'atɨ ayan á'ucha'acanye'en ayan te'entímuastɨ́ aɨjna cɨme'e yee a'iqui te'eme. Capu a'atzu raatyava'ɨri tɨ eitze'e a'ateevi'in. 28’Ajta, ¿a'ini een cɨn seyan ti'itzɨɨnye'e saɨjna cɨme'e yee ti'itajqui cɨn tyu'utyaujchejte'en? Casi'i muaan, xaaseij mɨ xuuxu'u a'ij tɨ tyé'ejvivausi ma a'ahua'a tɨ huapa'atza. Capu ti'imɨjhuaca mɨ xuuxu'u, capu ajta ti'itzaca. 29Me nyajta inyaa, ayaa nu tyaja'amue'ixaate'e, aɨjna ɨ rey, aɨjna ɨ Salomón tyaacan, eecan pu huapɨ'ɨ tí'ijchaɨca'a. Ma ajta, capu a'anaj náa é'enye'en tyu'utyaujchejte tɨj mɨ xuuxu'u. 30Ayaa pu'u, Dioj pu ayan naa é'enye'en rɨ'ɨ ti'iruure mɨ ɨxaj tɨ ijii aun e'eseijre'e au tɨ a'upa'atza. Ajta e'eyan, ara'apua'a rasijchen. Tɨ'ɨj huatyaahuan, aj mu mi raatyataira chuej tzajta'a tá'ajtaavijhua. Dioj pu xaa eitze'e rɨ'ɨ a'amuaruure cai aɨjna tɨ rɨ'ɨ raaruu mɨ ɨxaj. ’Muan xu hui cai a'atzu tya'atzaahuate'e xaa nya'u. 31Aɨj nu cɨn neyan tyaja'amue'ixaate'e. Caxu seyan ti'imuajca saɨjna cɨme'e yee: “¿Ti'itajqui tyacua'ani?”, nusu yee: “¿Ti'itajqui teyé'en?”, na'ari yee: “¿Ti'itajqui cɨn tetyu'utátachejte'esin?” 32Aɨme ɨ maj cai ramua'ate ɨ Dioj tzaahuati'ira'a cɨme'e, ai mu aɨn pueen ɨ maj cɨn rahuauca. Ma ajta, aɨn ɨ a'amuaya'upua tajapua tɨ e'eseijre'e, aɨ pu ari ramua'aree nain tɨj na'a ɨ tɨ tyajamua'aturaate'e. 33Ayaa pu'u, sauj mi'i raatahuáun tɨ Dioj tyajamue'ijte'en, sajta saj ra'ara'astijre'en a'ij tɨ aɨn ti'ijxe'eve'e. Tɨ pua'a seyan huarɨni, Dioj pu ajta tyajamuaata'asin naijmi'i eijna ɨ tɨ tyajamua'aturaate'e. 34Ayej xaa nya'u ti'ayajna. Caxu ti'imuajca saɨjna cɨme'e yee a'iqui te'eme ruijmua'a. Ruijmua'a xu sijta ti'ityesa'a xa'aju'un saɨjna cɨme'e ɨ tɨ tyajamuaacɨ'ɨti ajna. Amɨ pu'u auche'e ɨ saj cɨn ti'ityese'en ijii.

will be added

X\