San Mateo 4

1Tɨ'ɨqui aɨn ɨ xaijnyu'ucara'ara'an ɨ Dioj, aɨ pu ya'uvi'itɨ aɨjna ɨ Jesús ɨ jɨri jetze tɨ'ij aɨn tiyaaru'u tyu'utese'en tɨ raamue'itɨn aɨjna ɨ Jesús. 2Ajta aɨn Jesús, au pu e'etee a'achu cumu hua'apuate xɨcaj tɨ cai ti'icua'a. Aj pu i huata'icuataca'a. 3Ajta e'eyan aɨn tiyaaru'u e'ire'enye aɨjna ɨ Jesús jemi tɨ ij raamue'itɨn. Ayaa pu tiraata'ixaa tɨcɨn: ―Tɨ pua'a peyan yaujra'an pueen ɨ Dioj. Pata'aj raataijte'en amɨjna mɨ tetej tɨ'ij pan huatyáujtaahua. 4Ajta Jesús, ayaa pu tyu'utanyúu tɨcɨn: ―Ayaa pu te'eyu'usi'i tɨcɨn: “Capu aɨ na'a ruxe'eve'e ɨ pan tɨ cɨn tya'utaviicue'i ɨ tevi, silu ajta pu aɨn ruxe'eve'e nain ɨ nyuucari tɨ e'ema'acan ɨ Dioj jemi.” 5Tɨ'ɨqui aɨn tiyaaru'u ajtahua'a ya'uvi'itɨ aɨjna ɨ Jesús anna Jerusalén. Teyuu pu japuan ra'antítuaa a'u tɨ avá'apa'atzara'a. 6Ajta ayan tiraata'ixaa tɨcɨn: ―Tɨ pua'a hui yaujra'an paj pueen ɨ Dioj, ancájvetzi, a'ini ayaa pu te'eyu'usi'i ɨ yu'uxari jetze tɨcɨn: Dioj pu huaja'utaiti ɨ mej títyatatí ɨ jemin mej mi muáachaɨn. Majta mueetzi mamuá'atɨni rumuajca'a cɨme'e. Aɨme mu a muaatyejchajtza tɨ'ij cai ti'itɨ a'ij muaruuraa. 7Jesús pu ayan tiraata'ixaa tɨcɨn: ―Ma ajta, ayaa pu che'eta na'a ayan te'eyu'usi'i ɨ yu'uxari jetze tɨcɨn: “Capej peyan tirá'axaahuari'ira ti'itɨ cɨme'e tɨ Dioj ayan ti'itɨ cɨn huarɨni.” 8Ajta aɨn ɨ tiyaaru'u, ajtahua'a pu ya'uvi'itɨ a'ahua'a yee jɨri jetze tɨ ajtee. Aj pu i raataseijra nain japua, tɨj na'a seij chuejra'a japua a'u maj a'uchaatɨme ɨ tyaɨte. Raataseijra a'achu tɨ va'atɨ aun huatacá'a. 9Ayaa pu tiraata'ixaa tɨcɨn: ―Nain nu muatapueijve'esin nyeijna tɨ pua'a peyan huarɨni paj titunuta, pej pi'i natyanajche. 10Aj pu i Jesús ayan tiraata'ixaa tɨcɨn: ―Aricu, muaa paj ji'i tiyaaru'u, a'ini ayaa pu te'eyu'usi'i ɨ yu'uxari jetze tɨcɨn: “Sata'aj raatyaanajche saɨjna ɨ tavastara'a ɨ a'amua Dioj. Aɨ xu'u huatyávaɨre'en.” 11Aj pu i á'uraa aɨjna ɨ tiyaaru'u. Capu che'e a'ij ráaruu. Matɨ'ɨj mi huataseijre ɨ mej títyatatí ɨ tajapua mej mi raatyavaɨre'en maɨjna ɨ Jesús. 12Tɨ'ɨj Jesús raamua'areeri'i tɨ aityanami'ihuaca'a aɨjna ɨ Juan, aj pu'i á'uraa aujna chuejra'a japua tɨ ayan tyaja'arajtyahuaa tɨcɨn Galileeya. 13Au pu a'arajraa aujna Nazaret. Tɨ'ɨqui aun a'ucáanye aujna Capernaum, chajta'a tɨ a'utacá'a aujna tɨ a'avastɨme ɨ jaj tɨ a'utacá'a ajna vejli'i seij chuejra'a japua tɨ ayan tyaja'arajtyahuaa tɨcɨn Zabulón, ajtahua'a seij chuejra'a japua tɨ ayan tyaja'arajtyahuaa tɨcɨn Neftalí. 14Ayaa pu tyuju'urɨj tɨ ij ayan aráurasten a'ij tɨ tyu'utaxajtaca'a aɨjna tɨ ti'ixaxa'ata'a ɨ Dioj jetze ma'acan aɨjna ɨ Isaías. 15Ayan tɨcɨn: Ayaa pu te'eme aujna chuejra'a japua a'u mej e'eche ɨ tyaɨte ɨ maj cai Israel jetze ajtyama'acan, aujna tɨ huatacá'a u Zabulón, ajta ɨ seij chuejra'a japua u Neftalí, ajta seij ɨ juye tɨ aun e'etyéenyana a'u tɨ a'avastɨme ɨ jaj tɨ ve'e, ajta utavan pujme'en ɨ Jordán, ajta u Galileeya a'u maj a'uchaatɨme ɨ maj cai Israel jetze ajtyama'acan. 16Aɨme ɨ tyaɨte, a'ini capu hua'a jemi raatyajtuaa ɨ mej seijra'acaa ɨ tɨca'ari tzajta'a, aɨ mu raaseij tɨ u a'ajtátzaca'a, tyamua'a náa, majta aɨme ɨ maj a'uchaatɨma'acaa a'u maj yajpuéijtzica'a, ayaa mu e'enya'a, xuee maj cuj mɨ'ɨchica'a, a'ini ayaa pu hue'eenya'a, xuee tɨ huatɨca'a. Aj pu'i hua'a jetze huatátzarajraa. ―Ayaa pu tyu'utaxajtaca'a. 17Tɨ'ɨqui aɨn Jesús autyejche tɨ tihua'amua'aten. Ayaa pu tihue'itixáatya'ajraa tɨcɨn: ―Sata'aj saɨque tyu'umua'ati ɨ a'amua tzajta'a a'ini pu'uri tɨn tyaja'ure'enyejsin tɨ tyu'utaijta ɨ Dioj iiyan chaanaca japua. 18Ajta ɨ Jesús, aa pu e'ejtyama'acaa ajna vejli'i tɨ a'avastɨme ɨ jaj tɨ ayan tyaja'arajtyahuaa tɨcɨn Galileeya. Tɨ'ɨj i aɨme huaseij ɨ maj hua'apua ɨ maj ru'ihuaamua'a pueen. Aɨme mu aɨn pueen aɨjna ɨ Simón, ajta juutzajra'an aɨjna ɨ Andrés. Ajta aɨjna ɨ Simón, ayaa mu majta ratamua'amua tɨcɨn Pedro. Aɨ mu xajmua'ari cɨn hue'ité vivi'iracaa. Ayaa mu'u tí'ijrɨ'ɨrajcaa aɨme. 19Aj pu i Jesús ayan tihua'uta'ixaa tɨcɨn: ―Mu sa'utauriyi'i nyeetzi jemi. Nyaa nu tyajá'amuamua'aten sej si cai che'e seyan hue'ité tí'iviivi'ira'an silu tyaɨte xu'u si tisaɨre'esin inyeetzi jemi. 20Cɨme'en pu'u ayan tihua'uta'ixaa, aj mu mi raatapua'ajtaca'a. Matɨ'ɨj mi atyaja'upíitɨraa ɨ xajmua'ari, matɨ'ɨj mi a'ucɨ́j jamuan. 21Tɨ'ɨj ijta'i a'ayee a'uré'enye. Ajtahua'a pu hua'apuaca huaseij ɨ maj ru'ihuaamua'a pueen. Saɨj pu ayan antyahuaa tɨcɨn Jacobo. Ajta ɨ juutzajra'an, ayaa antyahuaa tɨcɨn Juan. Aɨ pu hua'ape'eri ɨ Zebedeo. Au mu a'arátya'acaa ɨ canuuhua'a jetze. Hua'a jamuan pu arácatii ɨ hua'ataata. Xajmua'ari mu rɨ'ɨ ti'iruurajca'a tɨ ti'isujtza'ani. Tɨ'ɨj i Jesús hua'utajee mej mi jamuan á'ujhua'anye'en. 22Aj mu mi raatapua'ajtaca'a. Matɨ'ɨj mi aitacɨj ɨ canuuhua'a jetze. A mu yáurai ɨ rutaata. Matɨ'ɨj mi a'ucɨj jamuan ɨ Jesús. 23Tɨ'ɨj aɨn ɨ Jesús autyejche tɨ á'ucha'acanye'en nain japua tɨj na'a au tɨ huatacá'a u Galileeya, aɨ pu tihua'amua'atyahua'a ɨ tyaɨte tɨj na'a tɨ seijre'e hua'ateyuu tzajta'a. Aɨ pu cɨn tihue'ixa'atyahua'a ɨ nyuucari tɨ cɨme'en raxa ɨ Dioj tɨ tie'ijta nain japua ɨ chaanaca. Ajta Jesús tihua'uhuaa naijmi'ica ɨ mej tí'icucui'i. Capu ti'iseicaj na'a ɨ cui'ini'ira'a. Aɨ pu nain cɨn tyu'uhuaataca'a. 24Aj mu mi raamua'areeri'i tɨj na'a aun tɨ huatacá'a seij ɨ chuejra'a japua tɨ ayan tyaja'arajtyahuaa tɨcɨn Siria. Aɨj mu huámua'areeri'i a'ij tɨ ti'itɨj huáruu aɨjna ɨ Jesús. Matɨ'ɨj mi u huaja'araavi'itɨ ɨ mej ti'icucui'i, tɨ ti'imui'i ɨ cui'ini'ira'a. Seica mu huapɨ'ɨ tí'icucui'icaa, ajta seica, capu huá'aca'anisti'iraca'a. Ajta seica, tiyaaru'u pu hua'a tzajta'a seijra'acaa, majta seica ɨ tɨ hua'acátyauunyéjma'acaa, majta seica mu cɨyaaxavi'i. Naijmi'ica pu tihua'uhuaa. 25Eihua mu ajtyáxɨɨraca'a ɨ tyaɨte, ɨ maj maun a'araacɨ aujna chuejra'a japua u Galileeya. Majta seica, au mu a'araacɨ tɨ ayan tyaja'arajtyahuaa tɨcɨn tamuaamuata'a tɨ chajta'atajme, majta seica maujna a'ahua'a u Jerusalén, majta seica tɨj na'a aun tɨ huatacá'a u Judea. Seica mu majta a'itacɨj ɨ maj utavan pujme'en e'echajca'a u Jordán. Eihua mu jamuan á'ujhua'anya'a.

will be added

X\