San Mateo 28

1Tɨ'ɨj mu á'umej aɨjna ɨ xɨcaj mej jetzen rusa'upi, tapua'arijma'aca, aɨjna ɨ Mariiya, Magdala tɨ e'ema'acan, ajta ɨ saɨj tɨ ajta Mariiya, u mu á'uju'un mej mi ya'utyeeseij a'u maj ya'ava'ana. 2Ca'anin pu cɨn huataujca'atzɨjxɨ ɨ chuej a'ini saɨj tɨ ti'ivaɨre'e u tajapua, aɨ pu e'ivacaanye u ute'e. Aa pu e'ire'enyaa a'u maj ra'ava'ana. Ya'usíjcɨripuajraa aɨjna ɨ tetej tɨ cɨn ujnámi'ihuaca'a tɨ únú'ujcun. Ajta japuan antiyeijxɨ. 3Eecan pu tyátaava'a cueiinavi'i cɨme'e i tɨ cɨn ti'ityeechan tyamua'a naa aɨjna ɨ a'atɨ. 4Majta maɨn ɨ mej tí'ichaɨca'a, ayaa mu huapɨ'ɨ ruvivájcaa, majta a'itavátzɨ maɨjna cɨme'e mej huapɨ'ɨ tyu'utatzɨn. Cu xuee maj cuj huacui'ini. 5Ajta aɨn tɨ ti'ivaɨre'e u tajapua, ayaa pu tihua'uta'ixaa aɨme ɨ juuca tɨcɨn: ―Caxu ti'itzɨɨnya'a, a'ini nyajmua'aree sej u ya'ava'ahuau saɨjna ɨ Jesús ɨ maj rá'utatai. 6Capu hui ya a'ahua'a a'ini pu'uri ayan huatarú tɨj ajmi'i tyu'utaxajtaca'a. Casi'i, mu sa'uju'un sata'aj ya'useij a'u maj ra'atyeetye. 7Sajta, sata'aj á'ucɨɨnye iye'itzi cɨme'e sej si huaja'uta'ixaate'en aɨme ɨ maj jamuan á'ujhua'anya'a tɨ cɨme'en yee: “Aɨ pu ari huatarú, ajta anacai pu nu'u a'uma'a a'ame aujna Galileeya tɨ ij aɨn huaja'uchu'eve'en aujna. Au xu nu'u yé'eseijran.” Nu'uri amuaatá'ixaa. 8Majta maɨn ɨ juuca, ca'anacan mu a'ucɨj. Mauche'e mu ti'itzɨɨnya'acaa. Ma majta, muaataujtyamua'ave eihua. Au mu a'uruáachajraa mej mi tihua'uta'ixaate'en aɨme ɨ maj Jesús jamuan á'ujhua'anya'a. 9Ajta, iye'itzi cɨn, Jesús huaja'utyau. Ayaa pu tihua'utataujte tɨcɨn: ―¿A'ini sana'a? Majta maɨn, a mu a e'ire'enye jemin. Majta ra'ave'evi'iraxɨ ɨɨcajra'an jetze. Majta rɨ'ɨ tiraata'a. 10Aj pu i Jesús ayan tihua'uta'ixaa tɨcɨn: ―Caxu ti'itzɨɨnya'a. Sericu muan sata'aj tihua'uta'ixaate'en ɨ nye'ihuaamua'a maj á'ucɨɨnye maujna Galileeya. Au mu hui nyeje'eseijran. 11Mauche'e mu huaju'uncaa aɨme ɨ juuca, seica mu aun á'uju'un u chajta'a. Ai mu aɨn pueen seica ɨ mej tí'ichaɨca'a. Majta meyan tihua'uta'ixaa aɨme ɨ mej ti'ijta teyujta'a nain a'ij tɨ ti'itɨ huarɨj. 12Majta maɨn ɨ mej ti'ijta teyujta'a, aɨ mu tyujsaɨj hua'ajamuan ɨ vaujsi mej mi raaxa'apɨ'ɨntare'en a'ij mej ye'i huarɨni. Aj mu mi tumin hua'uta'a ɨ xantaaru'u, eihua. 13Ayaa mu tihua'uta'ixaa tɨcɨn: ―Ayaa xu huarɨni muan. Sata'aj seyan tihua'uta'ixaate'en yee: “Seica mu a'uva'aju'un tɨca'ɨmɨ aɨme ɨ maj Jesús jamuan á'ujhua'anya'a tyatɨ'ɨj cu'utzuca'a ityan. Aɨ mu yá'utɨɨ ɨ tevijra'an aviitzi cɨme'e.” 14Ajta tɨ pua'a raamua'aree ɨ tajtuhuan a'ij tɨ ti'itɨ huarɨj, tyan tu teyan tiraata'ixaate'esin tɨ ij cai ti'itɨ cɨn a'ij amuaaruuren muejmi. 15Majta tumin mu a'utɨɨ aɨme ɨ xantaaru'u. Majta meyan che'eta mana'a huarɨj matɨj maɨn seica hua'utaityaca'a. Tɨj na'a tɨ yu e'ire'enye, ayaa mu ti'ixaxa'a nainjapua aɨme ɨ maj Israel jetze ajtyama'acan tɨ ayan ti'ayajna. 16Majta maɨn ɨ maj tamuaamuata'a japuan seij mua'ara'axcaa, au mu á'uju'un aujna Galileeya. Au mu a'ará'a jɨri jetze tɨj anacai tihua'uta'ixaa aɨjna ɨ Jesús maj nu'u maun a'atanyén. 17Matɨ'ɨj raaseij, aj mu mi rɨ'ɨ tiraata'a. Ma majta maɨn, camu rɨ'ɨ ra'atzaahuatya'acaa tɨ ayan aɨn puéenya'a. 18Aj pu i Jesús e'ire'enye vejli'i hua'ajemi. Ayaa pu tihua'uta'ixaa tɨcɨn: ―Pu'uri naata'a nyej neyan nain cɨn antinmua'aree tɨj na'a tɨ aun e'eseijre'e u tajapua, ajta tɨj na'a tɨ iiyan seijre'e chaanaca japua. 19Aɨj xu cɨn a'ucɨ́jxɨ'ɨn nainjapua seij chuejra'a japua sej si hua'utyamue'itɨn ɨ tyaɨte mej mi na'ara'astijre'en. Sajta hua'umuaɨ'ɨhuan nyuucajtze'en ɨ tɨ ni'iya'upua, sajta nyuucajtze'en ɨ nyej i'i yaujra'an, sajta nyuucajtze'en ɨ xaijnyu'ucara'ara'an ɨ Dioj. 20Sajta muan, setihua'umua'atyahua'an mej mi nain cɨn ra'ara'astijre'en a'ij nyej neri tyajamuaataij muejmi. Nyajta inyaa, rɨ'ɨ nu huatyavaa na'ame a'amua jemi tɨj na'a tɨ yu auca'itɨ a'ame asta na'a cai nain te'entipua'arite'en.

will be added

X\