San Mateo 27

1Yaa ruijmua'a yee, á'ara'apua'a, aɨme ɨ mej ti'ijta teyujta'a, majta hua'a vaujsi ɨ tyaɨte, aɨ mu raaxa'apɨ'ɨntare rujɨɨmua'a a'ij mej ye'i huarɨni mej mi raaje'ica ɨ Jesús. 2Mara'anajɨ'ɨque'e ɨ muajca'ara'ara'an jetze, matɨ'ɨj mi ya'uvi'itɨ. Aj mu mi raatatui aɨjna ɨ tajtuhuan, tɨ ayan antyahuaa tɨcɨn Pilaatu. 3Ajta aɨjna ɨ Judás, tɨ'ɨj raamua'areeri'i tɨcɨn pueijtzi mu raata'asin ɨ Jesús, eecan pu a'ij pua'a raata'a. Ajta, yáuutuaa hua'a jemi aɨjna ɨ tumin tɨ seite japuan tamuaamuata'a ara'ase. Ayaa pu tihua'uta'ixaa aɨme ɨ mej ti'ijta, ajta aɨme ɨ hua'a vaujsi tɨcɨn: 4―Nyaa nu autyajturaa ɨ Dioj jemi a'ini nyajámuaatátui a'atɨ tɨ cai ti'itɨj cɨn ata'ɨtza'ara sej si raaje'ica. Majta meyan tiraata'ixaa tɨcɨn: ―Capu a'atzu ta jetze ruxe'eve'e ityejmi. Muaa paj puéenya'a. 5Aj pu i Judás a ya'ajhuá'axɨ ɨ tumin a chuaata'a aujna teyujta'a. Tɨ'ɨqui á'uraa. Tɨ'ɨj i ma'a a'ahua'a a'acáujcue'imi'in. 6Majta maɨn ɨ mej ti'ijta teyujta'a, aɨ mu raara'aje'ipɨ maɨjna ɨ tumin. Majta meyan tyu'utaxajtaca'a tɨcɨn: ―Capu a'ij tyu'uta'aca tyej yáuutuaani aɨjna ɨ tumin a'u tɨ a'usaɨre'e ɨ tumin teyujta'a tɨ ma'acan, a'ini ai pu aɨn pueen ɨ tyaj cɨn tyu'unajchitaca'a tyej ti ya'uraini ɨ xuure'e. 7Matɨ'ɨj mi meyan raaxa'apɨ'ɨntare a'ij mej ye'i huarɨni maɨjna cɨme'e ɨ tumin. Ayaa mu maɨjna cɨn chuej huananai mej meyan ratamua'amua tɨcɨn Chuej tɨ japuan ti'imɨjhuaca aɨjna tɨ xa'ari tí'ita'ahuaca. Ayaa mu raxe'eva'acaa mej mi maun hua'ava'anaamɨn aɨme ɨ mej seij chuejra'a japua e'ema'acan. 8Ayaa mu majta ratamua'amua tɨj na'a ajna'ɨmɨ tɨ yu e'ire'enye tɨcɨn Chuej maj japuan ra'urá'axɨre ɨ xuure'e. 9Ajna'ɨmɨ pu arauraste a'ij tɨ ajmi'i tiraataxajtaca'a aɨjna ɨ Jeremías tyaacan tɨ Dioj jetze ma'acan ti'ixaxa'ata'a tɨcɨn: “Aɨme ɨ maj Israel jetze ajtyama'acan, ayaa mu raaxa'apɨ'ɨntare mej tiraanajchite'en a'achu cumu seite japuan tamuaamuata'a tumin tɨ i'i plaata tɨ ij aɨn hua'utatuire'en aɨjna ɨ a'atɨ. Majta e'eyan raara'aje'ipɨ maɨjna ɨ tumin. 10Ayaa mu majta huarɨj tɨj tinaataij ɨ tavastara'a. Chuej mu huananai a'u tɨ ti'imɨjhuacara'a aɨjna tɨ xa'ari tí'ita'ahuaca.” 11Ajta aɨn ɨ Jesús, au pu a'utyavaaca'a jemin aɨjna ɨ tajtuhuan. Aj pu i aɨn tajtuhuan ayan tiraataihua'uri'i tɨcɨn: ―¿Ni muaa pa paɨn pueen ɨ paj hua'arey aɨme ɨ mej Israel jetze ajtyama'acan? Ayaa pu tyu'utanyúu aɨjna ɨ Jesús: ―Aa ni'ijta nya'u, a'ij pej ye'i ti'ixa muaa. 12Ma ajta aɨn Jesús, matɨ'ɨj jetzen tya'ujpuá'ajte aɨme ɨ mej ti'ijta teyujta'a, majta hua'avaujsi, capu ti'itɨj xajtaca'a. 13Aj pu i Pilaatu ayan tiraataihua'uri'i tɨcɨn: ―¿Ni pacai peyan hua'unamuajri'i ɨ mej eihua mueetzi jetze tya'ujpuá'ajte? 14Ajta aɨn Jesús, capu ti'itɨj xajtaca'a. Capu ajta saɨque tyu'utaxajtaca'a, ni seij cɨme'e ɨ maj cɨn jetzen tya'ujpuá'ajte. Aɨj pu cɨn, eecan pu a'ij yá'useijracaa aɨjna ɨ tajtuhuan. 15Ajta ajna matɨ'ɨj tí'iyestyajcaa ɨ tyaɨte, ayaa pu tí'ijrɨ'ɨrajcaa aɨjna ɨ tajtuhuan tɨ ayan saɨj huatatuaani tɨ e'ityanami'i, a'atɨ tɨ na'a maj raatahuavii. 16Meenti saɨj e'ityanami'ihuaca'a tɨ ayan antyahuaa tɨcɨn Barrabás. Naimi'i mu ramua'atyajcaa maɨjna ɨ Barrabás, tɨ a'ij pua'a ti'ityevistaca'a. 17Matɨ'ɨj ajtyáxɨɨraca'a eihua ɨ tyaɨte, Pilaatu pu ayan tihua'utaihua'uri'i tɨcɨn: ―¿A'ini seti'ijxe'eve'e muan? ¿Ni qui nyaraatatuaani nyaɨjna ɨ Barrabás, na'ari nyamɨjna mɨ Jesús, ɨ tɨ jee i'i Cɨriistu'u? 18Ayaa pu tihua'utaihua'uri'i a'ini ayaa pu raamua'areeri'i tɨcɨn mara'anchueera'aca'a ɨ Jesús. Aɨj mu cɨn raatatuiiri'i ɨ tajtuhuan. 19Auche'e pu anticaica ɨ ɨpuari japua aɨjna ɨ Pilaatu tɨ'ɨj ɨra'ara'an ayan tiraataiti'iri'i tɨcɨn: “A'ij nu pua'a tyu'umaaraca'a nyaɨjna cɨme'e ɨ tevi tɨ cai a'anaj ti'itɨj cɨn autyajturaa. Eihua nu rajpueijtzica'a ijii nyaɨjna cɨme'e. Capaj ti'itɨj cɨn jetzen tí'ipua'ajtya'a.” 20Majta maɨn ɨ maj ti'ijta u teyujta'a, majta aɨme ɨ hua'avaujsi, aɨ mu ca'anijra'a hua'uta'a ɨ tyaɨte mej mi meyan rájhuavii ɨ tajtuhuan tu ij aɨn huatatuaani aɨjna ɨ Barrabás. Ayaa mu majta tirajhuaviiri'i tɨ ij aɨn tyu'uta'an mej mi raaje'ica maɨjna ɨ Jesús. 21Ajtahua'a pu ayan tihua'utaihua'uri'i tɨcɨn: ―¿A'ini seti'ijxe'eve'e muan? ¿A'atajni naatatuaani aɨme ɨ maj hua'apua? Ayaa mu tyu'utanyúu tɨcɨn: ―Barrabás. 22Aj pu i Pilaatu ayan tihua'utaihua'uri'i tɨcɨn: ―¿Ari mɨ'ɨ, ɨ Jesús? ¿A'ini ti'itɨj cɨn nyaráaruuren? Naimi'i mu meyan tyu'utanyúu tɨcɨn: ―Pata'aj rá'utatan curuu jetze. 23Pilaatu pu ajtahua'a ayan tihua'utaihua'uri'i tɨcɨn: ―¿A'ini een cɨme'e? ¿Ti'itajni cɨn autyajturaa tyej ti teyan raaruuren? Aj mu mi eitze'e ca'anin cɨn huajijhuaca'a tɨcɨn: ―Pata'aj rá'utatan curuu jetze. 24Pilaatu pu rú'umua'areeracaa tɨ cai a'ij ti'irɨ'ɨri hua'a jemi, silu mu'uri tɨn autyahuijsima'a mej tyú'ujnya'usite'esin cha'a mana'a. Aɨj pu cɨn anaujmueijte jaj cɨme'e mejseiiraca ɨ tyaɨte. Ayaa pu tihua'uta'ixaa tɨcɨn: ―Canu nyaɨn pueen ɨ tɨ raaje'icatan amɨjna mɨ tyaata'a, silu muan xu'u pueen. 25Naimi'i mu meyan tyu'utanyúu tɨcɨn: ―Che'e ayan eenye'en tɨ titáacɨ'ɨti itejmi, ajta tɨ tihua'ucɨ'ɨti ɨ tayaujmua'a aɨjna cɨme'e ɨ tyaj raaje'ica. 26Aj pu i Pilaatu raatátuaa aɨjna ɨ Barrabás hua'a jemi. Ajta raataijtaca'a maj ra'ityavajxɨ'ɨn maɨjna ɨ Jesús. Aj pu i hua'utatui mej mi rá'utatan. 27Aj mu mi maɨn xantaaru'u ya'ujáj ajna tɨ tajtuhuan e'irajca. Majta hua'utajee naijmi'ica ɨ ruxa'a xantaaru'u mej mi tyujsaɨre'en jemin ɨ Jesús. 28Matɨ'ɨj mi tiracá'ari'iri'i nain ɨ tɨ tí'ityechajca. Majta siicu'uri mu ru'ucaachejte tɨ pa'u, xu'umuavi'ican cɨme'e. 29Majta curun mu raatyataave tɨ tzicare'e cɨme'e cɨstíjhuaca'a. Aɨj mu ra'ava'arujti'iri'i. Majta, itzɨj mu ru'ityéechuite ɨrɨɨta'an. Aj mu mi titunutaxɨ jemin. Ayaa mu tirá'uxaahuari'iri'i tɨcɨn: ―¿A'ini pana'a, muaa paj tihue'ijte'e aɨme ɨ maj Israel jetze ajtyama'acan? 30Majta ra'atyétzi'itzica'imua'axɨ, majta rajví'i maɨjna ɨ itzɨj. Mui'i mu ra'ava'avajxɨ an múutze'en maɨjna cɨme'e. 31Matɨ'ɨj rá'uxáahuari'ira, aj mu mi rú'ijchuiiri'i maɨjna ɨ siicu'uri tɨ pa'u, xu'umuavi'ican cɨme'e. Majta ru'ucaachejte ɨ siicu'ura'ara'an. Matɨ'ɨj mi ya'ujáj mej mi rá'utatan ɨ curuu jetze. 32Matɨ'ɨj auju'uncaa, saɨj mu antinájchaca'a tɨ seij chuejra'a japua e'ema'acan tɨ ayan tyaja'arajtyahuaa tɨcɨn Cirene. Ajta aɨn ɨ tyaata'a, ayaa pu antyahuaa tɨcɨn Simón. Aj mu mi raataijtaca'a tɨ aɨn ra'anchueni cúrujra'an ɨ Jesús. 33Matɨ'ɨj mi maun a'ará'a a'u tɨ ayan tyaja'arajtyahuaa hua'anyuuca cɨme'e tɨcɨn Gólgota. Gólgota, ayaa pu huataujmua'a tɨcɨn Mɨ'ɨchi Mu'ujremi. 34Au mu raata'a ti'itɨ tɨ raaye'en, viinu tɨ antzina tɨ ranaxca. Tɨ'ɨj ra'ajtamua'a, capu rá'imɨ'ɨ a'araa. 35Matɨ'ɨj mi rá'utatai ɨ curuu jetze. Majta, huahuajcaca'a maj ti'ihuaujmue'itɨn tetej cɨme'e mej mi raamua'aree ti'itɨ tɨ a'ij racɨ'ɨti seij ajta seij ɨ cɨɨxura'ara'an ɨ Jesús. Ayaa mu tityaará'ujpijte. 36Majta a'ujrá'asaca'a mej mi ráachaɨn. 37Majta taabla cɨleenye'en áutatai a'utɨ á'ujmu'u ɨ Jesús. Ayaa mu anacai ra'uyu'uxaca'a ɨ taabla jetze aijna ɨ maj cɨn jetzen tya'ujpuá'ajte tɨcɨn: “Ai pu aɨn pueen i Jesús, ɨ tɨ hua'arey aɨme ɨ maj Israel jetze ajtyama'acan.” 38Majta jamuan hua'utatai hua'apuaca ɨ nahua'ari. Seij mu áutatai ɨrɨɨta'an ɨ Jesús, majta ɨ saɨj, autata'an. 39Majta maɨn ɨ maj a'ure'eninyéica'a, matɨ'ɨj raaseij, aɨ mu aicamu'uvajra maj cai rá'acu'uvajca'a. A'ij mu pua'a tí'ijjeevaca'a. 40Meyan tɨcɨn: ―Muaa, mɨ paj nu'u raatyáuuna ɨ teyuu, pajta nu'u hueica xɨcaj cɨn pajtahua'a ra'ajtaahua, aisɨ nya'u, pata'aj asaɨj ajapua huanyuuni. Tɨ pua'a muaa paɨn pueen ɨ yaujra'an ɨ Dioj, acajra'a hui amɨjna jetze mɨ curuu. 41Ayaa mu che'eta mana'a tirá'uxaahuari'iri'i aɨme ɨ maj ti'ijta teyujta'a, majta aɨme ɨ maj tyu'ujmua'ate ɨ nyuucari cɨme'e tɨ ti'ijta, majta hua'avaujsi. 42Ayaa mu tyu'utaxajtaca'a tɨcɨn: ―Amɨ pu ari hua'ajapua huanyu ɨ seica. Ma ajta amɨn, capu raayɨ'ɨtɨ tɨ rujapua huanyuuni. Amɨɨ pu nu'u tarey itejmi i tyaj Israel jetze ajtyama'acan; che'e amɨn acajra'ani mɨ curuu jetze. Aj tu xaa ra'antzaahuate'esin. 43Aɨ pu hui nu'u ra'atzaahuate'e ɨ Dioj. Che'e Dioj japuan huanyuuni ijii tɨ pua'a ayan raxe'eve'e a'ini ayaa pu amɨn tyu'utaxajtaca'a tɨ cɨme'en yee: “Nyaa nu nyaɨn pueen ɨ yaujra'an ɨ Dioj.” 44Majta maɨn ɨ maj jamuan huaju'uncaa, aɨ mu meyan che'eta ra'uxaahuari'iri'i. 45Tɨ'ɨj ajna tyaja'ure'enye a'atzaj tacuarixpua, aj pu'i huatyatɨca'araca'a nainjapua ɨ chuej. 46Tɨ'ɨj tyaja'ure'enye ajna e'ita'a tacuarixpua, aj pu i Jesús ca'anin cɨn huajijhuaca'a ɨ runyuuca cɨme'e tɨcɨn: ―Eloi, eloi, ¿lama sabactani? Eijna i nyuucari, ayaa pu huataujmua'a tɨcɨn: “Mɨ pej ni'i Dioj, mɨ pej ni'i Dioj, ¿a'ini een cɨn pi nyajáuujɨsin?” 47Seica maj maun huatyauuca'a maraanamuajri'i. Ayaa mu tyu'utaxajtaca'a tɨcɨn: ―Aɨ pu hui huatajee aɨjna ɨ Elías tɨ ajmi'i Dioj jetze ma'acan ti'ixaxa'ata'a. 48Cɨme'en mu'u meyan tyu'utaxajtaca'a, aj pu i saɨj a'utáichajraa. Ti'itɨj pu u a'uva'atɨɨ tɨ urajta'ati. Ajta raatyaru'unye nahuaj cɨme'e ta'antzijvi'i. Ra'antijɨ'ɨque'en cɨye jetze, aj pu i ra'ajchui tɨ ij Jesús huaye'en aɨjna jetze. 49Majta seica, ayaa mu tiraata'ixaa tɨcɨn: ―Che'e ayan eenye'en. Aisɨ tɨ pua'a ya tanyen aɨjna ɨ Elías tɨ ij aɨn ra'acajtuani. 50Ajta aɨjna ɨ Jesús, ajtahua'a pu ca'anin cɨn huajijhuaca'a. Aj pu i huamɨ'ɨ. 51Ajta aɨjna ɨ cɨɨxuri tɨ itzijhua, aun tɨ huatávivɨ́jma'aca teyujta'a, cɨme'en pu'u huamɨ'ɨ aɨjna ɨ Jesús, aj pu i e'ita'a acásujtza'an. Ajta huataujca'atzɨjxɨ ɨ chuej, ajta e'ita'a a'utatapuaj ɨ tetej. 52Ajta tya'antacuunirixɨ a'u maj a'ava'anami'ihuajma'acaa ɨ maj huacuii. Dioj pu ajtahua'a hua'utatɨste ɨ hua'axaijnyu'uca mui'icaca ɨ maj huacuii, aɨme ɨ mej mejmi'i ra'ara'astijre. Majtahua'a mu i'iruuri mua'araa. 53Majta aiitacɨj a'u maj a'ava'anami'ihuajma'acaa. Majta maɨn, tɨ'ɨj huatarú aɨjna ɨ Jesús, aɨ mu a'utyajrupi u chajta'a. Au mu a'utaseijre jemin ɨ tyaɨte ɨ maj mui'i. 54Ajta aɨjna ɨ hua'acapitan ɨ xantaaru'u ɨ maj anxɨte ará'axcaa, majta ɨ maj jamuan tí'ichaɨca'a, nain mu tyu'useij a'ij tɨ tyu'urɨj, ajta tɨ huataujca'atzɨjxɨ ɨ chuej. Eecan mu tyu'utatzɨn. Majta meyan tyu'utaxajtaca'a tɨcɨn: ―Tarɨ'ɨ pu aɨn puéenya'a yaujra'an ɨ Dioj. 55Majta seica, a mu'u ɨmɨ a'utyáuu meti'iseijraca'a ɨ ma juuca. Mi'i mui'i. Aɨ mu á'ujhua'anya'a maɨjna ɨ Jesús jamuan tɨj na'a tɨ u a'arajraa u Galileeya, majta ɨ maj ravaɨra'acaa tɨj na'a tɨ ayan ruxe'eve'e. 56Ai mu aɨn pueen: aɨjna ɨ Mariiya, Magdala tɨ e'ema'acan, ajta seij tɨ ayan che'eta antyahuaa tɨcɨn Mariiya. Hua'anaana pu pueen aɨjna ɨ Jacobo, ajta aɨjna ɨ José. Saɨj pu ajta hua'ajamuan a'utyavaaca'a, aɨjna tɨ hua'anaana aɨme yaujmua'ame'en aɨjna ɨ Zebedeeyu. 57Tɨ'ɨj ari huachúmua'ancaa, saɨj pu a e'ire'enye tɨ Arimatea e'ema'acan. Chijtyaani'i pu pɨrɨcɨ aɨjna. Ayaa pu antyahuaa tɨcɨn José. Aɨ pu ajta ra'atzaahuatya'acaa aɨjna ɨ Jesús. 58Aɨ pu a e'ire'enye jemin aɨjna ɨ Pilaatu. Ajta rájhuaviiri'i tɨ aɨn raatatuiire'en tevijra'an ɨ Jesús tyaacan. Ajta aɨn Pilaatu tyu'utaijtaca'a maj nu'u meyan raatatuire'en. 59Ajta José, tɨ'ɨqui ra'acajtɨɨ ɨ tevijra'an. Ajta ra'irá'ijcataca'a saavana cɨme'e tɨ jajcua. 60Aɨ pu auchan ru'ure'ijche u tete'e ɨ tetej tzajta'a para rusaɨj mej mi maun ra'ava'anan tɨ'ɨj huamɨ'ɨni. Ma ajta au pu ra'atyeetye tevijra'an ɨ Jesús tyaacan. Ayaa pu aɨjna cɨn huarɨj, aj pu i ru'ujná tetej cɨme'e tɨ sicɨɨrara'a. Ajta á'uraa. 61Ajta aɨjna ɨ Mariiya, Magdala tɨ e'ema'acan, ajta ɨ saɨj, ɨ Mariiya, au mu a'ujtyá'aca'a ajna vejli'i ta'iraninyei a'u maj ye'etyeetye. 62Yaa ruijmua'a yee, matɨj meri rɨ'ɨ huaujruu mej mi huaujsa'upe'en, aɨme ɨ mej ti'ijta teyujta'a, majta maɨn ɨ fariseeyu, aɨ mu a e'ire'enye jemin aɨjna ɨ Pilaatu. 63Ayaa mu tiraata'ixaa tɨcɨn: ―Tavastara'a, ayaa tu ra'utamua'areeri'i tɨ ayan tyu'utaxajtaca'a aɨjna ɨ tɨ ti'ihue'itacara'a. Tɨ'ɨj auj ruuricaa, ayaa pu tyu'utaxajtaca'a tɨcɨn: “Hueica xɨcaj nu jetze huatarujsin.” 64Aɨj pu cɨn, ayaa tu raxe'eve'e pej raataijta mej mi tyu'uchaɨn a'u tɨ a'ava'anami'i asta cai mu a'ume'en hueica xɨcaj. Na'ari cai, í'irɨni mej meyan e'ire'enyén, maraanahua'an ɨ tevijra'an aɨme ɨ maj Jesús jamuan á'ujhua'anya'a. Aj mu xaa meyan hue'itzi cɨn tihua'uta'ixaate'esin ɨ tyaɨte tɨ cɨn pu'uri huatarú. Ajta eitze'e pu a'ij pua'a te'eme cai tɨ'ɨj anacai ayan tyu'uhue'itaca'a aɨjna cɨme'e tɨ ayan nu'u yaujra'an pueen ɨ Dioj. 65Aj pu i ayan tihua'uta'ixaa aɨjna ɨ Pilaatu tɨcɨn: ―Ayaa pu te'eme. Meti'icháɨj mu mua'aju'un. Sericu muan, sajta rujáxu'umua'an xarij cɨme'e, ajta úmi'inari cɨme'e, a'ij sej tiraayɨ'ɨtɨ tɨ ij cai a'atɨ ramuara'a ɨ tevijra'an. 66Matɨ'ɨj mi a'ucɨj. Majta rɨ'ɨ raaruu xarij cɨme'e, majta úmi'inari cɨme'e tɨ ij cai a'atɨ ra'antacuuna. Majta u hua'utyahuii aɨme ɨ mej tí'icha'ɨ.

will be added

X\