San Mateo 25

1’Ajna xɨcajra'a jetze, ayaa pu Dioj hua'uta'asin ɨ tyaɨte mej mi maun a'utyarute a'u tɨ aɨn e'eseijre'e u tajapua. Ayaa pu che'eta na'a tihua'uruuren a'ij tɨ tihua'uruu ɨ tyaamua ma juuca, tamuaamuata'a maj nu'u ara'asicaa. Aɨ mu tyaja'utɨɨ ɨ tyú'u'aparaatu mej mi maun ra'antinajche aɨjna tɨ huatyenaɨchi. 2Camu rɨ'ɨ me títyaumuámua'arajca'a seica, ɨ maj anxɨvi. Majta maɨn ɨ seica, ɨ maj majta anxɨvi, aɨ mu nu'u xaa rɨ'ɨ me títyaumuámua'arajca'a. 3Majta maɨn ɨ maj cai rɨ'ɨ me títyaumuámua'arajca'a, aɨ mu tyaja'utɨɨ ɨ tyú'u'aparaatu. Aru camu ya'ujáj maɨjna ɨ aceiti ɨ maj cɨn rá'ajtaira. 4’Majta maɨn ɨ maj rɨ'ɨ me títyaumuámua'arajca'a, aɨ mu xaa limeeta tzajta'a ru'ucajtuaa ɨ aceite. Aɨj mu a'ujáj, jamuan ɨ tyú'u'aparaatu. 5A'ini eihua pu nu'u e'etee aɨjna tɨ huatyenaɨchi, tyamua'a pu cutzi tihua'umue'itɨ aɨme ɨ tyaamua. Muaatácu'utzuca'a micu. 6Pu'uri nu'u tyauuma'aca a'atzaj e'ita'a tɨca'a, tɨ'ɨj saɨj ayan huajijhuaca'a tɨcɨn: “Pu'uri ye ve'eme aɨjna tɨ huatyenaɨchi. Xu'iracɨɨnyechi sej si ra'antinajche.” 7Matɨ'ɨj mi huajɨjxɨca'a aɨme ɨ tyaamua. E'eyan mu rɨ'ɨ tyu'uruu ɨ tyú'u'aparaatu. 8’Aj mu mi aɨme ɨ maj cai rɨ'ɨ huaujruu, ayaa mu tihua'utajé ɨ seica tɨcɨn: “Aisɨ, cɨj caj setitaata'a ɨ aceite a'ini pu'uri huityaxɨ'ɨsin tyejmi tɨ ta'aj.” 9Majta maɨn ɨ maj rɨ'ɨ me títyaumuámua'arajca'a, ayaa mu tihua'uta'ixaa tɨcɨn: “Catu xaa nya'u, a'ini ayej nya'ase capu cɨ'ɨti para ityejmi. Capu ajta cɨ'ɨpe para muejmi. Ma sajta muan, sata'aj á'ucɨɨnye hua'a jemi ɨ maj aceite tu'araca sej si raananan para muejmi.” 10’Aj mu mi meyan huarɨj. U mu nu'u mi á'uju'un. Mauche'e mu huaju'uncaa, tɨ'ɨj aɨn a'ará'a aɨjna tɨ huatyenaɨchi. Majta maɨn ɨ tyaamua ɨ maj rɨ'ɨ huaujruu, aɨ mu a'ucɨj jamuan a'u maj tyejé'eyeste maɨjna cɨme'e tɨ huatyenaɨchi. Aj pu i aiityanami'ihuaca'a ɨ pueerta. 11’A'atzu nu'u a'ateevi'ica, majta ɨ seica a'ará'a ɨ tyaamua. Aj mu mi meyan tiraata'ixaa tɨcɨn: “Tavastara'a, muaa ɨ pej i'i tavastara'a, tita'antácuune'e.” 12Aj pu i ayan tihua'uta'ixaa tɨcɨn: “Ayaa nu tyaja'amue'ixaate'e, ayej ti'ayajna. Canu a'atzu a'amuamuajte.” 13Aj pu i Jesús ayan tihua'uta'ixaa tɨcɨn: ―Sata'aj seyan atanyéjnye'eri a'ini caxu ramua'aree a'anaj tɨ xɨcajra'a jetze neyan inyaa uve'enyejsin. 14’Ajta, ayaa pu che'eta na'a Dioj hua'uruuren ajna xɨcajra'a jetze tɨj ɨ a'atɨ ayan tihua'uruu ɨ mej ti'ijvaɨra'acaa. Tɨ'ɨj nu'u ari a'uye'imɨɨca ma a'ahua'a yee, anacai pu hua'utajee aɨme ɨ mej ti'ijvaɨra'acaa. Tihuéijca aɨjna cɨme'e ɨ tɨ aɨn tí'ijchaɨca'a. 15’Ayaa pu tiraata'a seij a'achu cumu anxɨj vi'ira'a ɨ tumin. Ajta ɨ saɨj, ayaa pu tiraata'a a'achu cumu hua'apua vi'ira'a. Ajtahua'a ɨ saɨj, sei vi'ira'a pu tiraata'a. Ayaa pu tihua'uta'a aij me tiraayɨ'ɨtɨ. Tɨ'ɨqui á'uraa. 16Ajta nu'u aɨn tɨ anxɨj vi'ira'a ancura'a, aɨ pu autyejche tɨ tyu'umuare'en tumin cɨme'e. Ajta e'eyan, raamue'itɨ anxɨj vi'ira'a aɨjna cɨme'e tɨ ajmi'i ra'ancura'a. 17Ayaa pu che'eta na'a huarɨj aɨjna ɨ a'atɨ tɨ ra'ancura'a a'achu cumu hua'apua vi'ira'a. Raamue'itɨ hua'apua vi'ira'a, icu. 18Ajta nu'u aɨn tɨ ra'ancura'a aɨjna ɨ sei vi'ira'a, capu tiraamuáriste. Aa pu a'ahua'a a'ará'a. Ra'atyéichajraa a chuaata'a. Au pu ra'ava'ana ɨ tumin tɨ raatanyaɨjte ɨ vastara'ara'an. 19’Pu'uri nu'u á'ateevi'icaa, ajta aɨn ɨ hua'avastara'a, uve'enye. Ajta autyejche tɨ raaxa'apɨ'ɨntare'en ɨ tumin cɨme'e. 20Ajta aɨn tɨ anxɨj vi'ira'a ancura'a, aɨ pu ajta a'ará'a ɨ seica ɨ anxɨj vi'ira'a. Ayaa pu tiraata'ixaa tɨcɨn: “Nyavastara'a. Ayaa papu'u caj tinaata'a anxɨj vi'ira'a cɨme'e. Casi'i, aij nu cɨn raamue'itɨ seica tɨ ayan che'eta na'a tya'ara'ase anxɨj vi'ira'a.” 21’Ayaa pu tiraata'ixaa aɨjna ɨ vastara'ara'an tɨcɨn: “Xa'apɨ'ɨn paj huarɨj, muaa ɨ paj cai a'anaj á'ɨtze. Rɨ'ɨ pej ti'itevi. Aɨj paj cɨn tya'ara'aste. Aɨj nu cɨn neyan ti'imueijcate'en eihua cɨme'e, iiya inyeetzi jemi tyata'aj huatatyamua'ave'en naijmi'i.” 22’Ajta aɨn tɨ hua'apua vi'ira'a ancura'a, aɨ pu ajta yara'a. Ayaa pu ajta tiraata'ixaa tɨcɨn: “Nyavastara'a, muaa paj peyan tinyeijca paɨjna cɨme'e hua'apua vi'ira'a ɨ tumin. Casi'i, aij nu cɨn raamue'itɨ seica tɨ ayan che'eta na'a tya'ara'ase hua'apua vi'ira'a.” 23’Ajta aɨn ɨ vastara'ara'an, ayaa pu tiraata'ixaa tɨcɨn: “Xa'apɨ'ɨn paj huarɨj, muaa ɨ paj cai a'anaj a'ɨtzee. Rɨ'ɨ pej ti'itevi. Cɨj paj cɨn ra'ara'aste. Aɨj nu cɨn neyan ti'imueijcate'en eihua cɨme'e, iiya inyeetzi jemi tyata'aj huatatyamua'ave'en naijmi'i.” 24’Ajta nu'u aɨn tɨ sei vi'ira'a ancura'a, aɨ pu ajta yara'a. Ayaa pu tiraata'ixaa tɨcɨn: “Nyavastara'a. Nyaa nu neyan raamua'areeri'i pej peyan tya'ajaaxaijve'e. Ayaa paj tihueijte'e mɨ seica mej mi tyu'uhuaste'en, mata'a tyu'utzaana. Aru nain pu ti'imuacɨ'ɨti mueetzi. Ayaa paj tihueijte'en mej mi ráahuastɨ́ra'ani ɨ imue'eri, mata'aj raara'asaɨre'en tɨ'ɨj ti'icɨɨre. Ajta e'eyan nain timuaacɨ'ɨti mueetzi. 25Aɨj nu cɨn ti'itzɨɨnya'acaa inyaa. Aj nu cɨn nyaun a a'ahua'a a'ará'a. Nyara'atyeichajraa. Nyatɨ'ɨj ni ra'ava'ana a chuaata'a. Ya'acui nya'u, mueetzi tɨ a'a.” 26’Ajta aɨn vastara'ara'an, ayaa pu tiraata'ixaa tɨcɨn: “Muaa, mɨ pej a'ij pua'a ti'itevi, eecan paj hua'ɨna'ase'e. Capej ti'itɨ cɨn nyavaɨre'e. Tɨ pua'a peyan ramua'aree nyej neyan tihueijte'en mej mi tyu'uhuaste'en tɨ i ayan nain tinaacɨ'ɨti inyeetzi, ¿ni tzaa pajta peyan ramua'aree nyaj nyajta neyan tihueijte'en mej mi raara'asaɨre'en tɨ ij ajta nain tinaacɨ'ɨti inyeetzi? 27Tɨ pua'a peyan ti'ijmua'areera, ¿a'ini een cɨn pacai peyan huarɨj pej pi cai paun yáuutuaa ɨ tumin hua'a jemi ɨ maj tumin tí'inya'ɨjtya nyej ni a'atzu raamue'itɨn? Tɨ pua'a peyan huárɨniiche'e, aj nu xaa ra'ancurá'aniiche'en ɨ tɨ nyeetzi nya'a nyatɨ'ɨj ya uve'enyén. Pa'uta'ɨtzee huapɨ'ɨ.” 28’Aj pu nu'u i ayan tihua'uta'ixaa aɨme ɨ seica ɨ mej vejli'i huatyáuu tɨcɨn: “Sata'aj yeehui ra'ari'i saɨjna ɨ sei vi'ira'a, sajta raata'an saɨjna tɨ tamuaamuata'a vi'ira'a ti'ituave. 29Matɨj mana'a pua'amua ɨ mej eihua tí'ijcha'ɨ, eitze'e pu tihua'acɨ'ɨti. Ayaa pu te'eme mej meyan ti'ijchaɨ mua'ara'ani nain a'achu tɨ caj ruxe'eve'e. Majta maɨn ɨ maj cai ti'itɨj ticha'ɨ, aɨ mu tihua'ari'ira aɨme ɨ maj cɨj mana'a tí'ijcha'ɨ mej mi cai che'e ti'ijchaɨ mua'ara'ani. 30Sajta muan, sata'aj ma ya'urajraini saɨjna ɨ tɨ cai ti'itɨj vaɨre'e ma pua'aque a'u tɨ a'utɨca'a. Au pu ruyeinixɨ'ɨn, ajta ancura'ujcɨ'ɨxɨjsin aɨjna cɨme'e tɨ rajpueijtzi.” ―Ayaa pu tihua'uta'ixaa aɨjna ɨ vastara'ara'an. 31’Ajna xɨcajra'a nyej jetzen yava'acányejsin inyaa, i nyaj nyajta tyaata'a jetze a'iraanye, nyatɨ'ɨjtahua'a huataseijre'en aɨme jamuan ɨ mej ti'ivaɨɨre'e u tajapua, naa pu seira'a a'ame mej mi rɨ'ɨ tya'utaseij ɨ tyaɨte, tyamua'a naa. Nyaa nu antiyeijxa ɨ ɨpuari japua mej mi raamua'aree ɨ nyaj inyaa nain cɨn antinmua'aree iiyan chaanaca japua. 32’Matɨ'ɨj mi nyeetzi jemi hua'ajsaɨre'esin naijmi'ica ɨ tyaɨtejra'a i mej iiyan seijre'e ɨ chaanaca japua. Nyajta inyaa, ayaa nu che'eta nyana'a hua'apuaqué hua'ajsaɨre'esin tɨj ajta a'atɨ ayan hua'apuaqué tihua'ajsaɨ ɨ ruya'amua. Au pu hua'ajsaɨj ɨ canya'axɨ saɨjta'a, ajta aɨme ɨ caurasi, ajta saɨjta'a. 33’Majta maɨn ɨ maj rɨ'ɨ ti'ityetyaɨte ayaa mu e'en matɨj ɨ canya'axɨ. Nya'ɨrɨɨta'a nu hua'ajsaɨre'esin. Majta aɨme ɨ maj e'ij pua'a ti'ityetyaɨte ayaa mu e'en matɨj ɨ caurasi. Nyauutata'a nu hua'ajsaɨre'esin nyaɨme. 34’Nyajta inyaa, i nyej i'i Rey, ayaa nu tihua'uta'ixaate'esin nyaɨme ɨ mej e'ejti nya'ɨrɨɨta'a tɨcɨn: “Iiya'a xu'u ij muan, mɨ saj rɨ'ɨ tiraata'a ɨ niya'upua, sata'aj seyan ra'ancura'an ɨ tɨ ayan tyajá'amuacɨ'ɨti, a'ij tɨ tyu'uxa'apɨ'ɨntari'ihuaca'a tɨj na'a tɨ Dioj raatyataahuaca'a ɨ chaanaca, sej si saun a'utyarute a'u tɨ Dioj e'eseijre'e. 35Ayaa pu te'eme a'ini muan xu tinaami nyatɨ'ɨj huata'icuataca'a. Muan xu sajta jaj naata'a nyatɨ'ɨj huata'imɨ. Muan xu sajta na'ancure'evi'itɨ ɨ á'amuachi'ita tɨ'ɨj cai a'atɨ nyexe'eva'acaa. 36Ayaa xu tinaatéechejte nyatɨ'ɨj cai tí'ityechajca. Nyatɨ'ɨj tijcui'inyaca'a, muan xu sajta naatyeeseij. Ajta, nyatɨ'ɨj aityanami'ihuaca'a, muan xu sajta náamuaaraca'a.” 37’Majta maɨn ɨ maj rɨ'ɨ ti'ityetyaɨte, ayaa mu tinaata'ixaate'esin tɨcɨn: “Tavastara'a, ¿a'anajni teyan timuaami tyatɨ'ɨj muaaseij ɨ paj i'icuataca'a? ¿A'anajni teyan jaj timuaata'a tyatɨ'ɨj muaaseij paj i'imɨ'ɨcaa? 38¿A'anajni teyan timua'ancure'evi'itɨ ɨ tachi'ita ityan tyatɨ'ɨj raamua'areeri'i paj cai a'ij tamuari? Ari i'i, ¿a'anajni tyej teyan huarɨj tyaj timuaatéechejte'en patɨ'ɨj cai ti'itɨj cɨn tí'ityechajca? 39¿A'anajni teyan muaamuaaraca'a patɨ'ɨj aityanami'ihuaca'a na'ari tyej teyan muaatyeeseij patɨ'ɨj ti'icui'icaa?” 40’Nyajta inyaa, i nyaj i'i Rey, ayaa nu tihua'uta'ixaate'esin tɨcɨn: “Ayaa nu tyaja'amue'ixaate'e tɨ ayan ti'ayajna, satɨj sana'a saj seyan hua'uruu aɨme ɨ nye'ihuaamua'a, ayaa xu che'eta sana'a naaruu inyeetzi. Capu amɨn a'ij tɨ pua'a seyan raatavaɨ saɨj ɨ nye'ihuaara'a tɨ cai ti'itɨj cɨn ti'ityejvee, tɨ cai a'atzu ruxe'eve'e.” 41’Aj nu ni neyan tihua'uta'ixaate'esin aɨme ɨ mej e'ejti nyauutata'a tɨcɨn: “Sericu muan, mɨ tɨ Dioj a'ij pua'a tyajamuaata'asin. Saj huii inyeetzi jemi sej si saun a'utyarute taij tzajta'a tɨ Dioj ayan rɨ'ɨ ráaruurijtze aɨjna ɨ tiyaaru'u, majta aɨme ɨ mej ti'ijvaɨre'e, aɨme ɨ xaijnyu'ucari ɨ mej a'ij pua'a e'en. 42Sericu muan, a'ini caxu tinaami nyatɨ'ɨj huata'icuataca'a. Muan xu sajta cai jaj naata'a nyatɨ'ɨj i'imɨ'ɨcaa. 43Capu a'atɨ naamuá'a. Ayaa pu i éenya'a, caxu ná'anvi'itɨ á'amuachi'ita. Canu ti'ityéchajcaa. Ma sajta muan, caxu tinaatéechejte. Nyatɨ'ɨj tijcui'inyaca'a, caxu sajta naatyeeseij, caxu sajta náamuaaraca'a nyatɨ'ɨj aityánami'ihuaca'a.” 44Aɨ mu majta meyan tinaata'ixaate'esin tɨcɨn: “Tavastara'a, ¿a'anajni teyan timuaaseij paj huata'icuataca'a, nusu paj i'imɨ'ɨcaa, na'ari paj cai a'atɨ mua'atyajcaa, na'ari pej ti'icui'icaa, ca'ɨn pej aityánami'ihuacaa, tyajta cai muaatavaɨ ityan?” 45’Aj nu ni neyan huatanyuusin tɨcɨn: “A'ini caxu seyan raatavaɨ seij ɨ nye'ihuaara'a tɨ cai ti'itɨj cɨn ti'ityejvee, saɨj tɨ cai ruxe'eve'e, caxu sajta naatavaɨ inyeetzi.” 46’Majta maɨn, au mu a'ujú'un tɨ ij pueijtzi huá'ucɨ'ɨti tɨj na'a rusen cɨme'e. Majta maɨn ɨ maj rɨ'ɨ ti'ityetyaɨte, au mu a'ujú'un a'u tɨ Dioj e'eseijre'e mej mi ruuri mua'ara'ani jemin tɨj na'a rusen cɨme'e.

will be added

X\