San Mateo 24

1Aj pu i Jesús huiirajraa teyujta'a. Tɨ'ɨj huirama'aca, aɨ mu a e'ire'enye aɨme ɨ maj jamuan á'ujhua'anya'a. Aj mu mi raatajé tɨ nu'u raaseij ɨ seica ɨ chi'i tɨ huáuu jetzen ɨ teyuu. 2Ajta aɨn Jesús, ayaa pu tihua'uta'ixaa tɨcɨn: ―Casi'i muan, ¿ni seri nain ti'iseij tɨ huáuu iiyacui? Ayaa nu tyaja'amue'ixaate'e tɨ ayan ti'ayajna. Ajna xɨcajra'a mej jetzen nain huatyáuuna ɨ chi'i tɨ ya cure'evee, capu che'e seira'a a'ame jaxu'u jetze tetej tɨ ru japua ticaitɨmee. Nain mu huatyáuuna tyamua'a naa. 3Aj mu mi a'ucɨj. Au mu a'ará'a jɨri jetze tɨ ayan tyaja'arajtyahuaa tɨcɨn Aceituunajremi. Au pu a'utacaica aɨjna ɨ Jesús. Matɨ'ɨj mi a e'ire'enye jemin aɨme ɨ maj jamuan á'ujhua'anya'a mej mi tyu'utaihua'un aviitzi cɨme'e. Meyan tɨcɨn: ―Pata'aj taata'ixaate'en a'anaj tɨ ayan ti'irɨni. ¿Ti'itaani a'ij ti'iseira'a a'ame tɨ'ɨj tyaja'ure'enyen ajna xɨcajra'a pej jetzen pajtahua'a áva'acányesin, ajta tɨ'ɨj ajna pɨ ti'irɨjca tɨ tye'entipua'ari nain ɨ tɨ ti'iseijre'e iiyan chaanaca japua? 4Jesús pu ayan tyu'utanyúu tɨcɨn: ―Rɨ'ɨ xu'u muan, tɨ ij cai a'atɨ amuaacuanamuan. 5Mui'itɨ mu hui huataseijre'esin nyenyuucajtze'e, meyan tɨcɨn: “Nyaa nu nyaɨn pueen ɨ Cɨriistu'u, tɨ Dioj an nya'ujyéijtza ɨ ɨpuari japua.” Ayaa mu hua'utyaamue'itɨ mua'aju'un eihua tyaɨte hue'itzi cɨme'e. 6Sajta seyan ti'inamuajran maj nu'u meri tinyá'use'esin a a'ahua'a na'ari maj nu'u meri tɨmua'a autyahuijsin mej tinyá'use'en. Rɨ'ɨ xu'u muan sej si cai ti'itzɨɨnya'a, a'ini ruxe'eve'e tɨ ayan tyu'urɨni. Ma ajta, caxɨɨ pu ajna tyaja'ure'enyejsin ajna xɨcajra'a tɨ jetzen nain tye'entipua'ari. 7Seica mu hui tyaɨtejra'a, majtahua'a seica tyaɨtejra'a, aɨ mu naijmi'i huataujnya'usi'ite'esin. Majta ɨ mej seica chuejra'a japua a'uchaatɨme, majtahua'a ɨ maj majta seica chuejra'a japua a'uchaatɨme, aɨ mu naijmi'i huataujnya'usi'ite'esin. Mui'icaque mu majta huatatájcu. Ajta huataujca'atzɨjxɨ'ɨsin ɨ chuej mui'icaque iiyan chaanaca japua. 8Ai pu aɨn pueen ɨ ta'anajca ɨ maj cɨn rajpueitzi mua'aju'un. 9’Aj mu mi meyan amuaavívi'iran seica jemi mej mi maɨn a'ij pua'a amuaaruuren, majta mej mi amuaacui'ini. Matɨj mana'a maj a'uchaatɨme iiyan chaanaca japua, aɨ mu amuajchaɨ́ra'a mua'aju'un maɨjna cɨme'e saj muan na'ara'astijre'e inyeetzi. 10Ajna xɨcajra'a jetze, mui'itɨ mu má nyajáuujɨsin, majta seica mu hui maujtzáarajmua'a mu mua'aju'un seij ajta seij. Majta tyú'ujcháɨra'a mua'aju'un. 11Majta mui'itɨ mu huataseijre'esin aɨme ɨ mej ti'ihue'itaca maɨjna cɨme'e maj nu'u Dioj jetze ma'acan ti'ixaxa'a. Mahuá'acuanamuan eihua ɨ tyaɨte. 12A'ini mu'uri eitze'e a'ij pua'a rɨcɨ ɨ tyaɨte, camu che'e ru'ihuaamua'a tyamua'a naa mu mua'aju'un. Mui'itɨ mu muare'erista mua'aju'un. 13’Ma ajta, Dioj pu japuan nyuuni aɨjna tɨ ayan te'eviicue'i asta na'a cai huamɨ'ɨni. 14Ajta, ayaa pu anacai ruxe'eve'e sej si a'ucɨ́jxɨ'ɨn nain japua seij chuejra'a japua sej si hua'uta'ixaate'en ɨ tyaɨte ɨ nyuucari tɨ cɨme'en raxa ɨ Dioj tɨ nainjapua tie'ijta. Aj pu xaa tye'entipua'ari nain. 15’Ayaa pu ajmi'i ra'uyu'uxaca'a aɨjna ɨ Daniel tyaacan maj nu'u ti'itɨ huatyechajtza a'u tɨ Dioj huataura'ate nain. Ai pu nu'u aɨn pueen aɨjna ɨ ti'itɨ tɨ a'ij pua'a een, tɨ xana'avi'ire'e, tɨ tzɨɨni'ire'e. Ajta aɨjna tɨ ra'ajijve'e, che'e aɨn yau'eitaa a'ara'ani aɨjna. ’Satɨ'ɨj raaseij, ayaa xu huarɨni muan. 16Maɨn ɨ maj Judea a'uchaatɨme, miche'e a'ucɨ́jxɨ'ɨn ca'anacan a'u tɨ á'ujɨrime. 17Ajta, ajna xɨcajra'a jetze, tɨ pua'a a'atɨ an a'ujcatii ɨ ruchi'i japua ta'ava'anami'i, che'e aɨn ca'anacan acajra'ani. Che'e cai ti'itɨ huiira'an ɨ ruchi'ita, silu che'e á'ura'ani ca'anacan. 18Na'ari tɨ pua'a a'atɨ tyaja'amuare'e u ruvi'ira'ata'a, che'e cai a'uré'eninyeica'an ɨ ruche tɨ ij rucɨɨxu huiiraapin, silu che'e á'ura'ani ca'anacan. 19’Cui'i xaa nya'u, eecan mu rajpueitzi mua'aju'un ajna xɨcajra'a jetze ɨ uuca maj a'utájucájme, majta aɨme ɨ maj huá'atzi'itéjme ɨ ruyaujmua'a. 20Sata'aj seyan tiraatahuavii ɨ Dioj jemi tɨ ij cai ayan ruxe'eva'a saj a'ucɨ́jxɨ'ɨn tɨ'ɨj huáseevi'in, na'ari ajna xɨcajra'a mej jetzen rusa'upi. 21’Ajna xɨcajra'a jetze, eitze'e mu rajpueitzi mua'aju'un maj cai a'anaj meyan tirajpueijtzica'a tɨj na'a tɨ Dioj raatyataahuaca'a ɨ chaanaca. Capu ajta che'e hua'acɨ'ɨti ɨ pueijtzi a'ij tɨ tihua'acɨ'ɨti ajna xɨcajra'a jetze. 22Ajta, tɨ pua'a aɨn tavastara'a ɨ Dioj cai ayan ráaruurénche'e tɨ ij cai che'e ayan íra'atéevi'i tɨ tyaumé'en a'achu pua'an xɨcaj, capu a'atɨ ruuri a'ame'enche'e. Ma ajta, hua'a cɨme'e ɨ tyaɨte tɨ Dioj ari hua'ura'asáɨra'a ɨ jajcua, aɨ pu xaa ari ayan ráaruuráa tɨ'ij cai che'e ayan ira'ateevi'in. 23’Sajta muan, caxu seyan ra'atzaahuatya'a tɨ pua'a a'atɨ ayan tyajamuaata'ixaate'en ajna xɨcajra'a jetze tɨcɨn: “Casi'i, iiya pu e'ita'a een aɨjna ɨ Cɨriistu'u.” Caxu sajta ra'atzaahuatya'a tɨ pua'a seij ayan ti'ixajta yee: “Ma'acui, amaa pu e'ita'a een.” 24Mui'itɨ mu hui huataseijre'esin aɨme ɨ maj nu'u i'i Cɨriistu'u, majta aɨme ɨ maj nu'u Dioj jetze ma'acan ti'ixaxa'a. Ma majta, camu. Meti'ihue'itaca mu'u. Ayaa mu maɨjna cɨn a'ij mej tiraayɨ'ɨtɨ mej mi seica a'ij ta'utaseij ɨ tyaɨte. Ayaa mu majta tyu'utáseijrata tɨ ute'e e'ema'acan Dioj jemi a'ij mej ye'i rɨcɨ. Ayaa pu naa seira'a a'ame mej mi hua'utyamue'itɨn hue'itzi cɨme'e aɨme ɨ tɨ Dioj hua'ura'asaɨj, tɨ pua'a ayan ti'irɨ'ɨristan mej hua'utyamue'itɨn. 25’Casi'i muan, nu'uri anacai amue'ixaa. 26Aɨj pu cɨn, caxu seyan ra'atzaahuatya'a tɨ pua'a a'atɨ ayan tyajamuaata'ixáatya'a a'ame tɨ cɨme'en yee amaa pu nu'u a'uye'i ɨtzitá a'u tɨ cai ma'a a'a a'atɨ na'ari ayen yee iiyu pu huirajca aviitzi cɨme'e yu chi'ita. 27Ma ajta, ayaa pu te'eme ajna xɨcajra'a nyej jetzen nyajtahua'a ya va'acányen i nyaj nyajta tyaata'a jetze a'iraanye. Ayaa nu eijre'ecɨtze'e seira'a na'ame tɨj maj tyámaxcɨva'aran. Anacai pu u á'ijnyéeri'icɨ a'ame a'u tɨ e'ejninyei ɨ xɨcaj, ajta e'eyan ayan che'eta na'a huanyeeri'icɨ a'ame a'u tɨ é'etyaru'ipi. 28Ajta ayaa pu che'eta na'a te'eme tɨj ti'itɨ tɨ huamɨ'ɨ. Tɨ'ɨj ti'itɨ huamɨ'ɨni, aj mu curá'acɨjxɨ'ɨsin aɨme ɨ mua'ara'ica. 29’Cɨme'en pu'u tye'entipua'ari nain ɨ maj cɨn rajpueijtzi mua'aju'un ajna xɨcajra'a jetze, aj pu xaa ayen seira'a a'ame u ute'e tɨ cɨme'en yee: Anaaruti ɨ xɨcaj, capu huanyeeri'icɨ a'ame ɨ maxcɨra'i cɨme'e. Majta maɨn ɨ xu'ura'ave, aɨ mu u a'acávatzɨjxɨ'ɨsin u ute'e. Muaatáujvivájra'asin aɨme ɨ mej tie'ijta ɨ maj majta e'eseijre'e u tajapua, matɨj mana'a pua'amua. 30’Ajna xɨcajra'a jetze, aɨj pu huataseijre'esin u ute'e ɨ maj cɨn ramua'areeran tɨcɨn nyaa nu nyajtahua'a ya va'acányejsin inyaa, i nyaj nyajta tyaata'a jetze a'iraanye. Majta maɨn ɨ tyaɨtejra'a mej iiyan seijre'e chaanaca japua, matɨj mana'a pua'amua huataujxaamɨjte'esin naijmi'i ɨ ru jetze. Ayaa mu ti'inyeseijra mua'aju'un nyatɨ'ɨj ava'acáanyen ɨ aiitɨri jetze. Ayaa pu seira'a a'ame tyamua'a naa mej mi meyan huataujtzaahuate'en. Aj mu xaa ramua'areeran ɨ nyaj nain cɨn antinmua'aree. 31Nyajta nu tya'ucácɨ'ɨsite'esin ca'anin cɨme'e, nyajta hua'utaijte'esin aɨme ɨ mej ti'inavaɨre'e u tajapua maj a'ucɨ́jxɨ'ɨn nain japua ɨ chaanaca mej mi hua'ura'asaɨre'en aɨme ɨ nyej neri hua'ava'ahuau. A'u tɨ juástɨmee ɨ chaanaca, au mu huauuvi'itɨn. 32’Sata'aj seyan yau'eitaa xa'ara'ani saɨjna cɨme'e a'ij tɨ ye'i rɨɨ a'aye'i aɨjna ɨ huarej. Tɨ'ɨj antinyajxɨ'ɨn tɨ cua'ati aɨjna ɨ cɨya'ara'an jetze, tɨ pua'a ajta ari huataxúta'an, aj xu si seyan ramua'areeran tɨ ari vejli'i ɨ viita'ari. 33A'ini ayaa xu ramua'aree a'anaj tɨ pua'a pɨti'irɨcɨ saɨjna cɨme'e ɨ sej rasise'ij, ayaa xu che'eta sana'a tiraamua'aree tɨ ari vejli'i a'anaj tɨ jetzen antipua'ari nain saɨjna cɨme'e saj raseijran nain a'ij nyej neri tyajamuaata'ixaa. 34Ayaa nu tyaja'amue'ixaate'e tzaahuati'ira'a cɨme'e, meenti mauj ruuri naijmi'i ɨ tyaɨte ɨ maj iiyan seijre'e ijii, nain pu xaa aráuraste'esin. 35Ayej xaa ti'ayajna, aɨ pu antipua'ari naijmi'i tɨj na'a ti'ipua'amua tɨ iiyan seijre'e chaanaca japua, ajta u tajapua. Ajta aɨn ɨ nyuucari a'ij nyej neri tyajamue'ixaa, capu a'anaj antipua'ari xaa nya'u. 36’Capu a'atɨ ramua'aree a'anaj tɨ te'entipua'ari na'ari a'atzaj tɨ ayan ti'irɨni. Camu ramua'aree aɨme ɨ mej ti'ivaɨre'e u tajapua. Canu nyajta ramua'aree inyaa silu, aɨ pu xaa ramua'aree aɨjna ɨ nyaj rajya'upua. 37’Ajna xɨcajra'a nyaj jetzen nyajtahua'a ya va'acányejsin inyaa, i nyaj nyajta tyaata'a jetze a'iraanye, ayaa pu te'eme. Ayaa mu che'eta mana'a ti'ijrɨ'ɨraa mua'aju'un ɨ tyaɨte matɨj ti'ijrɨ'ɨrajcaa ajna tɨ'ɨj auj ruuricaa aɨjna ɨ Noé tyaacan. 38Ayaa mu rɨjcaa, tɨ'ɨj cai xɨ antipua'araca'a ɨ chaanaca jaj cɨme'e, meti'icua'acara'a ɨ tyaɨte, majta ya'acara'a. Aɨ mu nyéjnya'ɨcha'a, majta vicha'acara'a. Mauche'e mu meyan rɨjcaa asta cai aɨn Noé atyajraa ɨ baarcu jetze tɨ ve'e. 39Majta maɨn ɨ tyaɨte, camu a'atzu ramua'areeraca'a a'ij tɨ ti'itɨ rɨniiche'en. Aj mu xaa raamua'areeri'i tɨ'ɨj huatamɨ'ɨyaca'a. Huaja'ujáujte naijmi'ica ɨ tyaɨte. Ayaa pu che'eta na'a tihua'aruuren ajna xɨcajra'a nyej jetzen ya va'acányejsin, i nyaj tyaata'a jetze a'iraanye. 40’Ajna au mu huatyauu mua'aju'un vi'ira'ata'a, ma hua'apua ɨ tyetyaca. Saɨj pu á'avi'itɨchi'ihuan tɨ'ij te'entipua'are. Ajta ɨ saɨj, au pu a'utyaturaasin. 41Majta maɨn ɨ juuca, au mu a'utyáuu mua'aju'un, ma hua'apua. Matya'atɨ'ɨxɨ mu mua'aju'un. Saɨj pu ajta á'avi'itɨchi'ihuan tɨ'ij te'entipua'are, ajta ɨ saɨj, au pu a'utyaturaasin. 42’Aɨj pu cɨn, ayaa nu tyaja'amue'ixaate'e, sata'aj atanyéjnye'eri tyamua'a naa a'ini caxu ramua'aree a'anaj tɨ xɨcajra'a jetze uve'enyejsin ɨ a'amuavastara'a. 43Sata'aj seyan yau'eitaa xa'ara'ani seijna. Aɨjna cɨme'e ɨ a'atɨ tɨ huatyeechi'i, tɨ pua'a aɨn ramua'areera a'atzaj tɨ pua'a ɨ tɨca'ari tzajta'a a'utyaruti aɨjna ɨ nahua'ari, ayaa pu rɨni aɨjna tɨ huatyeechi'i. Aɨ pu atányeeri a'ame, ajta capu raata'asin tɨ aɨn nahua'ari ra'antána'aca ɨ pueerta, tɨ'i utyarute u chi'ita. 44Ayaa pu hui che'eta na'a ruxe'eve'e sej seyan atanyéjnye'eri a'ini inyaa, i nyaj nyajta tyaata'a jetze a'iraanye, ayaa nu uve'enyejsin a'atzaj saj cai pua'a nyechu'eve'e muan. 45’Aɨj nu cɨn neyan tyajá'amue'ihua'uran. ¿A'ataani tevijra'a ayan cai a'anaj a'ɨtzee, tɨ ajta rɨ'ɨ me tyauumua'aree tɨ pua'a aɨn vastara'ara'an ayan tiraijcate'en aɨjna cɨme'e tɨ tihue'ijtya'a ɨ seica ɨ mej ti'ijvaɨre'e tɨ ij aɨn tihua'umín a'atzaj tɨ pua'a ari huaxa'apɨ'ɨntari'ihuaca'a? 46Ajta aɨjna ɨ tevi, naa pu tiraatyavaɨre'esin tɨ pua'a ayan rɨjca a'ij tɨ tiraataij tɨ'ɨjtahua'a uve'enyén aɨjna tɨ ti'iraijte'e. 47Ayaa nu tyaja'amue'ixaate'e, tzaahuati'ira'a cɨme'e tɨ pua'a auj ayan rɨjca tɨ'ɨj uve'enyén ɨ vastara'ara'an, aɨ pu xaa ayan tí'iraijcate'en nain cɨme'e a'achu tɨ caj tí'ijcha'ɨ. 48Ma ajta, tɨ pua'a a'ij pua'a tí'itevistan aɨjna ɨ a'atɨ, ayaa pu rɨni. Ayaa pu ti'imua'atze ɨ rutzajta'a tɨcɨn: “Eecan pu a'ateeri ma a'ahua'a ɨ nyavastara'a.” 49Aj pu i autyéchesin tɨ e'ij pua'a tihua'utya'axɨ'ɨn ɨ ruxa'a tyaɨte ɨ mej ti'ijvaɨre'e. Ajta hua'a jamuan ti'icua'ani, ajta ye'en aɨme jamuan ɨ maj ruta'arujve'e. 50Ajta aɨn vastara'ara'an uve'enyejsin ajna xɨcajra'a tɨ jetzen cai rachu'eve'e aɨjna tɨ ti'ijvaɨre'e, ajta a'atzaj tɨj pua'a cai ramua'aree tɨ ari uve'enye. 51Aj pu i vastara'ara'an eihua pueijtzi raata'asin. Ajta raatáijte'esin tɨ aun a'utyavaaca a'u maj a'utyaturaasin aɨme ɨ maj cai tzaahuati'ira'a cɨn meyan ti'ijrɨ'ɨre. Eecan pu ruyeinixɨ'ɨn aujna, ajta rutamej pu cɨn ancurá'ujcɨ'ɨmáa a'ame aɨjna cɨme'e tɨ rajpueijtzi.

will be added

X\