San Mateo 23

1Aj pu i Jesús hua'uta'ixaa aɨme ɨ tyaɨte mej jemin e'etyujsaɨ, ajta aɨme ɨ maj jamuan á'ujhua'anya'a. Ayan tɨcɨn: 2―Aɨme, ɨ maj tyu'ujmua'ate ɨ yu'uxari jetze, majta aɨme ɨ fariseos, aɨ mu ti'ityetatya'upu'u teyujta'a mej mi meyan che'eta mana'a tihuá'umua'aten ɨ tyaɨte ɨ yu'uxari jetze a'ij tɨ rɨjcaa aɨjna ɨ Moisés tyaacan. 3Aɨj pu cɨn ayan ruxe'eve'e sej si hua'ara'astijre'en, sajta seyan huarɨni nain cɨme'e a'ij mej tyaja'amue'ixaate'e. ’Ma sajta muan, caxu seyan che'eta sana'a rɨjca a'ij mej ye'i rɨcɨ a'ini camu meyan huataujnyátacan cɨn ti'ijrɨ'ɨre a'ij maj tyaja'amue'ixaate'e. 4Ayaa mu va'acan cɨn tihue'ijcate'e ɨ tyaɨte aɨjna cɨme'e tɨ ayan huapɨ'ɨ muare'eri tɨ cai a'atɨ raayɨ'ɨtɨ tɨ ayan huarɨni. Majta e'eyan aɨ mu hua'utaijte'esin ɨ tyaɨte maj nu'u mi maɨjna cɨn ra'ara'astijre'en. Ma majta maɨn, camu a'atzu taura'aca tɨ ij ayan che'eta na'a tihua'ucɨ'ɨti. 5’Matɨj mana'a mej meyan rɨcɨ, ayaa mu'u rɨcɨ eijre'ecɨtze'e mej mi tyaɨte hua'useij. Antajíya'ujme'en mu rata'ahuaca maɨjna ɨ maj cɨn antaujrɨ'ɨque'ejmee ɨ rumuu jetze, majta tɨ́tɨ'ɨjmé'en tya'ajvɨ́jxɨ aɨ tɨ aucastɨmee ɨ hua'asiicu'u. 6Eecan mu raxe'eve'e tɨ tihua'ucɨ'ɨti maj a'ujra'ase ɨpuari japua jamuan aɨjna ɨ tɨ antyujmua'aree aɨjna cɨme'e ɨ maj cɨn ti'iyeste. Ajta hua'ateyujta'a, ayaa mu raxe'eve'e maj a'ujra'ase ɨ ta'anajca ɨ ɨpuari japua a'uj maj á'araraase ɨ hua'avaujsimua'a. 7Eecan pu hua'araanajchi mej maɨn tyaɨte hua'utataujte'en ajna a'u maj tí'itu'araca. Ajta, ayaa pu hua'araanajchi mej tyaɨte meyan tihua'ajeeva tɨcɨn nyavastara'a. 8’Ma sajta muan, caxu seyan rahuauca tɨ ij a'atɨ ayan tyajámuaatájeeva tɨcɨn nyavastara'a. Caxu xaa nya'u, a'ini naijmi'i xu ru'ihuaamua'a, ajta saɨj pu'u pueen ɨ a'amuavastara'a. Ai pu aɨn pueen ɨ Dioj. 9Sajta muan, caxu seyan a'atɨ huatámua'ati tɨcɨn niya'upua, a'ini saɨj pu'u pueen ɨ sej seri rájya'upuataca'a. An pu e'eseijre'e u tajapua. 10’Caxu sajta rahuauca mej meyan tyaja'amuajeeva tɨcɨn nyamaeestru'u. Caxu a'atzu, a'ini saɨj pu'u pueen ɨ tɨ i'i a'amuamaeestru, inyaa i nyaj i'i Cɨriistu'u, tɨ Dioj an na'ujyeitza ɨ ɨpuari japua. 11’Ajta, aɨjna tɨ eitze'e va'acan cɨn ti'ityejvee a'amua tzajta'a, aɨ pu hui amuaatyavaɨre'esin naijmi'ica muejmi. 12Ayaa pu'u, a'ini a'atɨ tɨ na'a tɨ á'ujtzaahuate'e tɨ nu'u va'acan cɨn ti'ityejvee, Dioj pu raata'asin tɨ cɨle'enya'a cɨn te'entyárutya. Ma ajta, a'atɨ tɨ na'a tɨ huataujnyátacan cɨn ruseijrata tɨ cɨle'enya'a cɨn ti'ityejvee, Dioj pu ayan raata'asin tɨ te'entyarute ti'itɨj cɨme'e tɨ ve'e. 13’Sata'aj huataujxaamɨjte'en muan mɨ sej tyu'ujmua'ate ɨ yu'uxari jetze, sajta muan mɨ sej i'i fariseos. Caxu seyan ti'ijrɨ'ɨre tzaahuati'ira'a cɨme'e a'ini caxu arauraste rujɨɨmua'a. Ayaa xu tihua'atyánaamɨ ɨ tyaɨte mej mi cai a'utyarute a'u tɨ Dioj e'eseijre'e u tajapua. Caxu á'ujca'anye sej seyan huarɨni a'ij tɨ ti'ijxe'eve'e ɨ Dioj. Caxu sajta hua'ata'aca mej mi meyan huarɨni mɨ seica ɨ mej ti'ityese'e mej mi maun a'utyarute. 14’Sajta, sata'aj seyan huataujxaamɨjte'en, muan mɨ sej tyu'ujmua'ate ɨ yu'uxari jetze, sajta muan mɨ sej i'i fariseos. Caxu seyan ti'ijrɨ'ɨre tzaahuati'ira'a cɨme'e a'ini caxu arauraste rujɨɨmua'a. Ayaa xu tihua'ari'ira ɨ hua'a chi'i aɨme ɨ maj juuca, mɨ maj majta rujɨɨmua'atajmee. Sajta e'eyan, aun xu a'utyaru'ipi u teyujta'a; sajta a'ateevi'i cɨn rahuaviiraca ɨ Dioj jemi. Muan xu seyan ruseijrata saj nu'u cai ti'itɨj cɨn autyajturaa. Aɨj pu cɨn eitze'e xu rajpueitzi xa'aju'un. ’Sajta, sata'aj seyan che'eta sana'a huataujxaamɨjte'en muan mɨ saj cai rɨ'ɨ me tityaumuámua'aree. Capu ti'itɨ tasiseiri a'amuatzajta'a. 15’Sata'aj huataujxaamɨjte'en, muan, mɨ sej tyu'ujmua'ate ɨ yu'uxari jetze, sajta muan mɨ sej i'i fariseos. Caxu seyan ti'ijrɨ'ɨre tzaahuati'ira'a cɨme'e a'ini caxu aráurasten rujɨɨmua'a. Ayaa xu iiyan cɨɨnye nainjapua ɨ chaanaca, sajta yan cɨɨnye ɨ jaj japua sej si seij huatyamue'itɨn tɨ ij aɨn ayan ti'ityújchaɨca satɨj muan. Sajta, satɨ'ɨj raatyamue'itɨn, ayaa xu tihua'amua'aten tɨ ij e'eyan eitze'e amuaatyamue'itɨn eihua aɨjna cɨme'e tɨ a'ij pua'a tí'itevistan, ajta tɨ'ij aɨn eihua pu eitze'e rajpueitzi a'ame sacai muan. 16’Ayaa xu si eenya'a sauj tihua'amua'ate. Ayaa xu ti'ixaxa'a muan tɨcɨn: “Capu ti'itɨj vaɨre'e tɨ pua'a a'atɨ ayan tya'ataujratzii nyuucajtze'en ɨ teyuu, silu tɨ cɨme'en yee tɨ pua'a a'atɨ ayan tya'ataujratzii nyuucajtze'en aɨjna ɨ ooro tɨ teyuu jetze seijre'e, aj pu xaa ayan ruxe'eve'e tɨ aɨn a'atɨ ayan aráurasten aɨjna cɨme'e tɨ tya'ataujratzii.” 17Muan xu cai ti'itɨj u'umua'aree, mɨ saj cai tihuájáu'eite. ¿Ti'itaani eitze'e ruxe'eve'e ɨ Dioj jemi? ¿Ni aɨjna ɨ ooro tɨ teyuu jetze seijre'e na'ari ɨ teyuu tɨ tzajta'an Dioj huataura'ate'en aɨjna ɨ ooro? 18Ee xaa nya'u, eitze'e pu ruxe'eve'e ɨ teyuu. Ayaa xu sajta ti'ixaxa'a muan tɨcɨn: “Tɨ pua'a a'atɨ ayan tya'ataujratzii nyuucajtze'en aɨjna tɨ japuan tyu'utamuaɨ'ɨvajta, capu ti'itɨ a'ij ti'ivaɨre'e.” Ma sajta seyan ti'ixaxa'a tɨcɨn: “Tɨ pua'a a'atɨ ayan tya'ataujratzii nyuucajtze'en ɨ muaɨ'ɨvejri tɨ an yá'ujra japuan aɨjna tɨ japuan tyu'utamuaɨ'ɨvajta, aj pu xaa ayan aɨjna cɨn ruxe'eve'e tɨ aráurasten. Capu ti'itɨ a'amua tzajta'a tasiseiri.” 19Muan, mɨ saj cai rɨ'ɨ me tityaumuámua'aree, ¿ti'itaani eitze'e ruxe'eve'e ɨ Dioj jemi? ¿Ni aɨjna ɨ muaɨ'ɨvejri na'ari aɨjna tɨ japuan raatamuaɨ'ɨvajtaca'a, aɨjna tɨ japuan Dioj huataura'ate'en aɨjna ɨ muaɨ'ɨvejri? Ee xaa nya'u, eitze'e pu ruxe'eve'e aɨjna saj japuan an yá'ujra ɨ tɨ tyu'utamuaɨ'ɨvajta. 20’Ayaa pu'u ti'en, aɨjna tɨ tya'ataujratziira nyuucajtze'en aɨjna tɨ japuan tyu'utamuaɨ'ɨvajta, ayaa pu een cɨn tya'ataujratziira nyuucajtze'en aɨjna ɨ ti'itɨ, ajta nyuucajtze'en naijmi'i tɨj na'a tɨ an japuan yá'ujra. 21Ajta aɨjna ɨ a'atɨ tɨ ayan tya'ataujratziira nyuucajtze'en ɨ teyuu, aɨ pu tya'ataujratziira nyuucajtze'en aɨjna ɨ teyuu, ajta nyuucajtze'en Dioj tɨ ari huirajca aujna. 22Ajta, tɨ pua'a a'atɨ ayan tya'ataujratziira nyuucajtze'en u tajapua, ayaa pu che'eta na'a tya'ataujratziira nyuucajtze'en aɨjna ɨ ɨpuari Dioj tɨ an japuan a'a ye'ixaca. Aɨj pu cɨn, ayaa pu che'eta na'a tya'ataujratziira nyuucajtze'en aɨjna ɨ Dioj tɨ an a'a ye'ixaca japuan aɨjna ɨ ɨpuari. 23’Sata'aj huataujxaamɨjte'en, muan, mɨ sej tyu'ujmua'ate ɨ yu'uxari jetze, sajta muan mɨ sej i'i fariseos. Caxu seyan ti'ijrɨ'ɨre huataujnyátacan cɨme'e a'ini caxu seyan ra'ara'astijre'en nain cɨme'e a'ij tɨ tye'eyu'usi'i ɨ yu'uxari jetze. Muan xu xaa raata'an e'ica tɨ ruxe'eve'e aɨjna cɨme'e ɨ saj cɨn rá'ancacare'en ɨ saj racua'aca saɨjna ɨ meenta sajta saɨjna tɨ naa tyáará'i, anis ti'itɨ, sajta saɨjna ɨ cumiinu. ’Ma sajta, caxu a'atzu ra'ara'astijre'en saɨjna cɨme'e ɨ tɨ eitze'e ruxe'eve'e tɨ ayan tɨ cɨme'en yee: “Sata'aj seyan raaxa'apɨ'ɨntari'ire'en a'ij tɨ tiraavijte'e”, ajtahua'a seij tɨ ayan yee: “Sata'aj hua'ancu'uvajxɨ'ɨn ɨ ruxa'a tyaɨte”, ajtahua'a i'i tɨ cɨme'en yee: “Sata'aj cai auta'ɨtza'ara'an seij jemi.” Ayaa pu xa'apɨ'ɨn eenya'a a'ame'enche'e saj cai yá'uhua'anan saɨjna tɨ eitze'e ruxe'eve'e, muan xu sajta seyan huárɨniiche'e ɨ tɨ cɨle'en seijre'e. 24Capu hui ti'itɨ a'amua japua ninye'i, muejmi, mɨ saj tihua'amua'aten ɨ seica. Eecan xu ti'ityesa'aca sej si seyan ra'ara'astijre'en saɨjna cɨme'e ɨ nyuucari tɨ cai eihua ruxe'eve'e. Ma sajta muan, xu'uri ma ruurai saɨjna ɨ Dioj tɨ raaxajtaca'a aɨjna ɨ nyuucari. 25’Sata'aj huataujxaamɨjte'en muan, mɨ sej tyu'ujmua'ate ɨ yu'uxari jetze. Caxu seyan ti'ijrɨ'ɨre huataujnyátacan cɨme'e. Ayaa xu tí'ityaɨ'ɨhuaca, sajta naa eenye'en tyu'utyaujchejte'en sej si naa eenye'en xa'ara'ani me eijre'e. Ma sajta, ɨ rutzajta'a, eecan xu a'ij pua'a ti'ityetyaɨte, aɨjna cɨme'e sej seri tihua'uriiri'i ɨ tihuá'a ɨ seica, sajta saj cai a'ujcu'uvajca'a ɨ saj cɨn tyu'utyaamue'itɨ. 26Mɨ pej i'i fariseo tɨ cai ti'itɨ a a'atzájta'a tasiseiri, pauj mi'i rɨ'ɨ uhuá'aruuren ɨ tɨ ú'useijre'e ɨ a'a tzajta'a. Aj pu xaa, naa seira'a a'ame ɨ tɨ e'eseijre'e me eijre'e. 27- 28’Sata'aj huataujxaamɨjte'en muan, mɨ sej tyu'ujmua'ate ɨ yu'uxari jetze. Caxu seyan ti'ijrɨ'ɨre tzaahuati'ira'a cɨme'e. Muan xu seyan naa seijre'e me eijre'e. Sajta muan, a'ij xu pua'a ti'ityetyaɨte ɨ rutzajta'a. Ayaa xu e'en tɨj huá'achi'i ɨ maj tzajta'an huaja'anaamɨca ɨ mej meri huacuii. A'ini ayaa mu racácueinare'en me e'ijre'e, aɨj pu cɨn naa seijre'e aɨjna ɨ hua'achi'i. Ma ajta, u tzajta'an, eihua pu tya'ura'a ɨ tihua'acari, ajta ɨ tihua'ahue'ira'a tɨ ari tí'ipeti. Ayaa xu che'eta sana'a a'ij pua'a e'en ɨ rutzajta'a aɨjna cɨme'e ɨ saj cai seyan ti'ijrɨ'ɨre tzaahuati'ira'a cɨme'e, sajta a'ij pua'a rɨcɨ. 29’Sata'aj huataujxaamɨjte'en, muan mɨ sej tyu'ujmua'ate ɨ yu'uxari jetze, sajta muan mɨ sej i'i fariseos. A'ini caxu seyan ti'ijrɨ'ɨre tzaahuati'ira'a cɨme'e. Ayaa xu rá'ajta'ahuaca ɨ hua'achi'i ɨ maj tzajta'an hua'atyajtuaani ɨ mej meri huacuii, ɨ mej Dioj jetze ma'acan ti'ixaxa'ata'a. Sajta seyan tiracámeijra me e'ijre'e tyamua'a naa aɨjna hua'achi'i maj tzajta'an hua'atyajtuaani aɨme ɨ mej rɨ'ɨ ti'itetyaɨtestaca'a. 30Sajta seyan ti'ixaxa'a tɨcɨn: “Tɨ pua'a teyan ruuri ta'ara'aníche'e ajna'ɨmɨ matɨ'ɨj ye chajca'a aɨme tavaujsimua'a tyaaca, catu xaa nya'u teyan che'eta tyana'a hua'ucui'iníiche'e aɨme ɨ maj Dioj jetze ma'acan ti'ixaxa'ata'a matɨj tihua'ucuii ɨ tavaujsimua'a tyaaca.” 31Aɨj xu cɨn seyan tya'antzaahuate'en ɨ rujetze ɨ saj saɨn pueen hua'ahuaacɨxa'astyamua'a aɨme ɨ maj hua'ucuii aɨme ɨ mej Dioj jetze ma'acan ti'ixaxa'ata'a. 32Ayaa xu'u i, sata'aj raanaijmi'ire'en aɨjna ɨ maj cɨn autyajturaa ɨ Dioj jemi aɨme ɨ a'amuavaujsimua'a tyaaca. 33’Muan xu a'ij pua'a ti'ityetyaɨte, mɨ sej aɨjna jetze a'iraanye ɨ cu'ucu'u tɨ tí'ihue'itaca, ¿a'ini tyajamua'amitejte'e? ¿Ni qui ayan yee muan xu huataujvaɨre'esin tɨ ij cai Dioj amuaata'asin ɨ pueijtzi? Ayej xaa nya'u ti'ayajna. Pueijtzi pu á'amuacɨ'ɨti tɨj na'a rusen cɨme'e. 34Aɨj nu cɨn neyan tyajámuaataiti'ira aɨme ɨ mej Dioj jetze ma'acan ti'ixaxa'a, nyajta seica ɨ mej rɨ'ɨ me tityaumuámua'aree, nyajtahua'a seica ɨ mej ti'imua'ata. Ma sajta muan, seica xu cui'ini, sajta seica seyan huá'atatan ɨ curuu jetze, sajta seica, ayaa xu tihua'utyavájxɨ'ɨsin u a'amuateyujta'a. Sajta seica, ayaa xu hua'utamuarite'esin a'u tɨ e'echajta'a, sajta meyee. 35Ayaa pu'i een cɨn tyaja'amuacɨ'ɨti nain cɨn ɨ pueijtzi ɨ maj cɨn tityaacui iiyan chaanaca japua tɨj na'a maj raaje'ica aɨjna ɨ Abel tyaacan tɨ yu e'ivere'enye matɨ'ɨj raaje'ica maɨjna ɨ Zacarías ɨ tɨ yaujra'an puéenya'a aɨjna ɨ Berequías. Au mu ya'uje'ica e'ita'a tɨ a'utejvee ɨ hua'ateyuu, ajta aɨjna ɨ maj japuan tyu'utamuaɨ'ɨvajta. 36Ayaa nu hui tyaja'amue'ixaate'e tɨ ayan ti'ayajna. Naijmi'i cɨme'e ɨ mej meyan a'ij pua'a rɨjcaa, pueijtzi pu tihua'acɨ'ɨti aɨme ijii maj yeche aɨjna cɨme'e. 37’Sajta muan, mɨ saj Jerusalén huachaatɨme, naijmi'i muan mɨ saj Jerusalén jetze ajtyama'acan, eecan nu huatánxaamɨjte'e muejmi jemi, a'ini ayaa xu hua'acui'ica aɨme ɨ maj Dioj jetze ma'acan ti'ixaxa'a. Sajta muan, seyan hua'utyatu'asixɨ aɨme ɨ maj Dioj jetze ma'acan tyaja'amue'ijte'e muejmi. Mui'i nu neyan ti'ijxe'eva'acaa nyej neyan rɨ'ɨ tyajamuaachaɨn, nyej ni amue'irajtuaani. Nyejxe'eva'acaa nyej neyan amuaaruuren tɨj tyacuaara'i tɨ hua'antyasaɨre'e ɨ chɨɨpili'ise tɨ hua'ava'ana ɨ ru'ana cɨme'e. Ma sajta muan, caxu seyan ti'ijxe'eva'acaa. 38Casi'i muan, pu'uri tɨn nyaj ya ruuraini ɨ xɨcajra'a nyej jetzen raatatuaani ɨ a'amuachi'i. Mua'avi'in pu a'utyechaxɨjsin. 39Ayaa pu'u, a'ini caxu che'e a'anaj nyeseijran asta sana'a cai seyan raataxaj yee: “Che'e huaujtyamua'ave'en aɨjna tɨ ye'eve'eme nyuucajtze'en aɨjna ɨ tavastara'a.”

will be added

X\